1-2. Ki bons motivu nu ten pa nu mostra amor lial pa kunpanheru?

NU TEN bons motivu pa nu mostra amor lial pa kunpanheru. Kal ki é alguns di es? Odja modi ki alguns provérbiu di Bíblia ta responde kel pergunta li: ‘Ka bu dexa pa amor lial ku fidelidadi bandona-u. Nton, Deus ku ómis ta fika kontenti ku bo i es ta atxa ma bo é un algen ki ten ntendimentu.’ ‘Un ómi ki ta faze bondadi sta faze ben pa se kabésa’. ‘Kenha ki ta npenha pa justisa i pa amor lial ta atxa vida’. — Pro. 3:3, 4; 11:17, nóta di rodapé; 21:21.

² Kes provérbiu li ta da-nu três motivu pa nu mostra amor lial. Primeru, óras ki nu mostra amor lial, Jeová ta da-nu txeu valor. Sugundu, óras ki nu ta mostra amor lial, nu ta resebe txeu kuza gósi. Pur izénplu, nu ta faze amizadis ki ta dura pa tudu ténpu. Tirseru, si nu mostra amor lial, nu ta ben resebe txeu benson i vida pa tudu ténpu. Nton, nu ten bons motivu pa nu obi ku kel órdi ki Jeová da-nu di ‘trata kunpanheru ku amor lial i mizerikórdia.’ — Zac. 7:9.

3. Ki perguntas nu sta ben responde na kel studu li?

³ Na kel studu li, nu sta ben responde kuatu pergunta. Pa kenha ki nu debe mostra amor lial? Kuzê ki livru di Rute ta inxina-nu sobri mostra amor lial? Modi ki nu pode mostra amor lial oji? Modi ki mostra amor lial ta djuda-nu?

4. Modi ki nu pode mostra amor lial sima Jeová? (Marcos 10:29, 30)

⁴ Kel studu ki pasa, djuda-nu ntende ma Jeová ta mostra amor lial sô pa kes ki ta ama-l i ki ta sirbi-l. (Dan. 9:4) Nu krê bira ‘ta imita Deus, sima fidjus ki el ta ama’. (Efé. 5:1) Pur isu, nu krê mostra amor lial pa nos irmons ku irmans, ki é un amor fórti, ki ka ta kaba. — Lé Marcos 10:29, 30.

5-6. Kuzê ki pesoas ta atxa ma é “lialdadi”?

⁵ Di sertéza bu ta konkorda ma sima nu ta ba ta ntende kuzê ki é amor lial, nu ta konsigi mostra kel kualidadi li mutu más txeu pa nos irmons ku irmans. Pa nu ntende midjór kuzê ki é amor lial, nu ben odja diferénsa entri kel kualidadi li i kuzê ki pesoas ta pensa sobri lialdadi. Odja un izénplu.

 ⁶ Alguns ta atxa ma un algen ki dja ten txeu ténpu ta trabadja na un inpréza é un trabadjador lial. Má talvês na tudu kes anu ki el ten ta trabadja na kel inpréza, nunka el ka txiga di konxe kes diretor. I pode ser ki alvês el ka ta konkorda ku régras di kel inpréza. Kel trabadjador ka ta ama kel inpréza, má el sta kontenti pamodi el ten un trabadju i el ta ganha se dinheru. El ta kontinua na kel trabadju ti ki el reforma ô ti ki el atxa un trabadju midjór.

7-8. (a) Kuzê ki ta poi un algen ta mostra amor lial? (b) Pamodi ki nu sta ben studa alguns versíklu di livru di Rute?

⁷ Sima nu odja na  parágrafu 6, diferénsa entri lialdadi i amor lial sta na kel razon ki ta poi un algen ta ser lial. Na ténpu ki Bíblia skrebedu, kuzê ki sénpri poi sérvus di Deus ta mostra amor lial pa kunpanheru? Kes ki mostra amor lial ka faze kel-li pamodi es tinha ki faze-l, má pamodi es kreba. Odja izénplu di Davidi. El sabia ma Saul, ki éra pai di Jonatan, krê mataba el. Má simé korason di Davidi pô-l ta mostra amor lial pa Jonatan, ki éra se amigu ki el kreba txeu. Alguns anu dipôs ki Jonatan móre, Davidi kontinua ta mostra amor lial pa Mefibozéti, ki éra fidju di Jonatan. — 1 Sam. 20:9, 14, 15; 2 Sam. 4:4; 8:15; 9:1, 6, 7.

⁸ Nu pode prende txeu sobri amor lial óras ki nu ta studa alguns versíklu di livru di Rute. Kuzê ki nu pode prende di amor lial di kes algen ki es livru ta pâpia di es? Modi ki nu pode aplika na nos kongregason kes kuza ki nu sta ben prende? *

9. Pamodi ki Nuemi atxa ma Jeová staba kóntra el?

⁹ Na livru di Rute, nu ta lé stória di Nuemi, se nóra Ruti i di un ómi ki txomaba Boás, ki ta amaba Deus. Boás éra família di maridu di Nuemi. Pamodi fómi na Israel, Nuemi, se maridu i ses dôs fidju muda pa Muabi. Timenti es staba ta mora la, maridu di Nuemi móre. Ses dôs fidju kaza, má dipôs es móre tanbê. (Rute 1:3-5; 2:1) Tudu kes disgrasa li poi Nuemi ta fika kada bês más dizanimadu. El fika tantu dizanimadu ki el pensa ma Jeová staba kóntra el. Repara modi ki el staba ta xinti.  El fla: ‘Mô di Jeová dja fika kóntra mi.’ Kel ‘Tudu-Poderozu bira nha vida txeu margós.’ Tanbê el fla: ‘Jeová sta kóntra mi i kel Tudu-Poderozu dja traze-m txeu sufrimentu’. — Rute 1:13, 20, 21.

10. Modi ki Jeová reaji kantu el obi kes kuza ki Nuemi fla?

¹⁰ Modi ki Jeová reaji kantu el obi kes kuza ki Nuemi fla? El ka bandona Nuemi. Má envês di kel-li, el poi na se lugar. Jeová ntende ma ‘frónta pode poi un algen ki ten sabedoria ta aji sima dodu’. (Ecl. 7:7) Má Nuemi meste ntendeba ma Jeová ka bandona-l. Modi ki Jeová djuda-l? (1 Sam. 2:8) Jeová uza Ruti pa mostra Nuemi amor lial. Ku bondadi, Ruti djuda Nuemi ka xinti dizanimadu dimás i odja ma Jeová inda ta amaba el. Kuzê ki nu ta prende ku izénplu di Ruti?

11. Pamodi ki txeu irmon ku irmans ta sforsa pa djuda kes ki sta tristi ô dizanimadu?

¹¹ Amor lial ta pô-nu ta djuda kes ki sta dizanimadu. Sima Ruti ka bandona Nuemi, oji tanbê irmons ku irmans ta sforsa txeu pa djuda kes algen na kongregason ki sta xinti tristi ô dizanimadu. Es ta faze kel-li pamodi amor i es ta faze tudu kel ki es pode pa djuda kes irmon. (Pro. 12:25, nóta di rodapé; 24:10) Kel-li sta di akordu ku konsedju ki apóstlu Polu da. El fla: ‘Nhos konsola kes ki sta diprimidu, nhos djuda kes fraku, nhos ten paxénxa ku tudu algen.’ — 1 Tes. 5:14.

12. Txeu bês kal ki é midjór manera di djuda un algen na kongregason ki sta dizanimadu?

¹² Txeu bês midjór manera di djuda un algen ki sta dizanimadu é obi-l ku atenson i dexa-l sabe ma nu ta ama-l. Jeová ta da txeu valor pa kuzê ki nu ta faze pa djuda se sérvus fiel. (Sal. 41:1) Provérbios 19:17 ta fla: ‘Ken ki ta djuda póbri sta ta pista Jeová, i El ta rekonpensa-l pa kel-li.’

13. Ki disizon Ruti ku Orpa toma i pamodi ki nu pode fla ma Ruti mostra amor lial? (Odja dizenhu na kapa.)

¹³ Pa nu ntende midjór kuzê ki é amor lial, nu ben odja kuzê ki kontise ku Nuemi dipôs ki se maridu i se dôs fidju móre. Kantu Nuemi fika ta sabe ma ‘Jeová dja lenbraba di se povu pamodi el sta ta daba es kumida’, el disidi sai di Muabi i volta pa se téra. (Rute 1:6) Se dôs nóra disidi bai ku el, má na kaminhu, Nuemi fla-s três bês pa es volta pa Muabi. Kuzê ki kontise? Bíblia ta fla: ‘Orpa da se sógra beju i el bai. Má Ruti, insisti na fika ku el.’ (Rute 1:7-14) Kantu Orpa disidi volta pa Muabi, el faze kel ki Nuemi pidi-l pa el faze, má Ruti faze más di ki kel ki Nuemi pidi-l. El podia  baba pa kaza tanbê, má el disidi fika ku Nuemi pa djuda-l. Ruti disidi fika ku Nuemi ka pamodi el tinha ki fazeba kel-la, má pamodi el kreba. (Rute 1:16, 17) Kantu Ruti toma kel disizon la, el mostra amor lial. Kuzê ki nu ta prende di kel stória li?

14. (a) Oji modi ki txeu irmon ku irmans ta imita izénplu di Ruti? (b) Sima sta na Hebreus 13:16, ki sakrifisius ta poi Jeová kontenti?

¹⁴ Amor lial ta pô-nu ta faze más di ki kel ki ta speradu di nos. Sima na ténpu antigu, oji txeu irmon ku irmans ta disidi mostra amor lial pa ses kunpanheru di adorason, sikrê es ka konxe-s. Pur izénplu, óras ki es fika ta sabe ma kontise un dizastri na naturéza, lógu es ta tenta sabe kuzê ki es pode faze pa djuda. Óras ki algen na kongregason sta pasa pa un prubléma difísil, kes irmon li ta aji faxi pa da kel algen ajuda ki el sta meste. Sima kes irmon di Masedónia, na ténpu di apóstlus, oji tanbê irmons ta faze más di ki kel ki ta speradu di es. Es ta faze sakrifisius i es ta da ‘más di kel ki es ten’ pa djuda ses irmons ki meste. (2 Cor. 8:3) Jeová ta fika txeu kontenti óras ki el ta odja irmons ta mostra amor lial pa kunpanheru! — Lé Hebreus 13:16.

15-16. Modi ki Ruti mostra ma el krê kontinuaba ta djuda Nuemi?

¹⁵ Nu pode prende txeu kuza na stória di Ruti ku Nuemi. Nu ben odja alguns.

¹⁶ Ka bu dizisti di djuda. Kantu Ruti oferese pa bai ku se sógra, na komésu Nuemi ka seta. Má Ruti ka dizisti. Kal ki foi rezultadu? Bíblia ta fla: ‘Kantu Nuemi odja ma Ruti staba ta insisti na bai ku el, el para di tenta konvense-l.’ — Rute 1:15-18.

17. Kuzê ki ta djuda-nu ka dizisti faxi di djuda un algen?

¹⁷ Kuzê ki nu ta prende? Nu meste ten paxénxa pa djuda nos irmons ki sta dizanimadu. Má kel-li ka debe pô-nu ta dizisti di es. Talvês un irman sta ta meste di ajuda. * Sikrê na komésu el ka seta nos ajuda, amor lial ta pô-nu ka ta dizisti di el. (Gál. 6:2) Nu ta spéra ma el ta seta nos ajuda i ma el ta dexa-nu labanta-l i konsola-l.

18. Kuzê ki talvês poi Ruti ta xinti tristi?

¹⁸ Ka bu mágua faxi. Kantu Nuemi ku Ruti txiga na Belen, Nuemi nkontra ku alguns algen ki éra se vizinhu. El fla-s: ‘N tinha tudu kantu ki N bai, má Jeová pô-m ta volta ku mô baziu.’ (Rute 1:21) Imajina modi ki Ruti talvês xinti kantu el obi kuzê ki Nuemi fla! Ruti faze di tudu pa djuda Nuemi. El txora ku el, el konsola-l i el anda txeu dia djuntu ku el. Má sikrê ku tudu sforsu ki el faze, Nuemi fla: ‘Jeová pô-m ta volta ku mô baziu.’ Kes kuza ki Nuemi fla ta parse sima ki el ka ta daba valor pa ajuda ki Ruti da-l. Ruti staba na ladu di Nuemi kantu ki el fla kes palavra li. Talvês Ruti fika txeu tristi! Má simé Ruti ka bandona Nuemi.

19. Kuzê ki ta djuda-nu ka bandona un algen ki sta dizanimadu?

¹⁹ Kuzê ki nu ta prende? Alvês ku tudu sforsu ki nu ta faze pa djuda  un irman ki sta dizanimadu, el pode fla-nu un kuza ki magua-nu. Má nu ka debe fika xatiadu. Nu ka debe bandona nos irman i nu debe pidi Jeová pa djuda-nu atxa un manera di konsola-l. — Pro. 17:17.

20. Kuzê ki da Ruti forsa pa el kontinua ta djuda Nuemi?

²⁰ Nkoraja kes ki meste. Ruti mostra amor lial pa Nuemi, má el tanbê el staba ta meste di nkorajamentu. Pur isu, Jeová insentiva Boás pa da-l kel nkorajamentu ki el staba ta meste. Boás fla Ruti: ‘Jeová ta rekonpensa-u pa kuza ki bu faze, i ki bu ta resebe un pagamentu perfetu di Jeová, ki é Deus di Israel, pamodi bu ben djobe proteson dibaxu di se azas.’ Kuzê ki Boás fla Ruti toka se korason. Ruti fla Boás: ‘Bu pâpia di un manera ki poi bu sérva ta fika trankilu’. (Rute 2:12, 13) Boás nkoraja Ruti kantu el staba ta meste i kel-li da-l forsa pa el ka dizisti di djuda Nuemi.

21. Sima sta na Isaías 32:1, 2, kuzê ki ansions ta faze?

²¹ Kuzê ki nu ta prende? Kes ki ta mostra amor lial pa otus algen alvês tanbê es ta meste di nkorajamentu. Boás, ilôjia Ruti kantu el odja-l ta trata Nuemi ku bondadi. Oji tanbê ansions ta ilôjia irmons ku irmans na kongregason óras ki es ta odja-s ta djuda otus. Kes ilojiu ta da-s forsa ki es meste pa es kontinua ta djuda otus. — Lé Isaías 32:1, 2.

22-23. Modi ki Nuemi muda di atitudi i pamodi? (Salmo 136:23, 26)

²² Dipôs di algun ténpu, Boás da Ruti ku Nuemi txeu kumida. (Rute 2:14-18)  Modi ki Nuemi reaji? El fla: ‘Pa Jeová, kel ki ka fadja na mostra amor lial pa kes bibu i pa kes mortu, abensua-l.’ (Rute 2:20a) Atitudi di Nuemi muda txeu! Antis, el flaba dizusperadu: ‘Jeová sta kóntra mi’. Má gósi el fla uma kontenti: ‘Jeová ka fadja na mostra amor lial’. Kuzê ki poi Nuemi ta muda di atitudi?

²³ Ti ki enfin Nuemi konsigi odja mô di Jeová na se vida. Jeová uza Ruti pa djuda Nuemi kantu el staba ta volta pa Judá. (Rute 1:16) Nuemi tanbê ntende ma Jeová uza Boás pa djuda el ku Ruti. (Rute 2:19, 20b) Talvês Nuemi pensa: ‘Gósi dja N odja ma Jeová nunka ka bandona-m. El staba ku mi tudu kel ténpu li!’ (Lé Salmo 136:23, 26.) Talvês Nuemi fika txeu kontenti di odja ma Ruti ku Boás ka dizisti di el! Di sertéza es tudu três fika kontenti pamodi Nuemi rekupera se alegria i forsa pa sirbi Jeová.

24. Pamodi ki nu krê kontinua ta mostra amor lial pa nos irmons?

²⁴ Kuzê ki livru di Rute ta inxina-nu sobri amor lial? Amor lial ta djuda-nu ka dizisti faxi di nos irmons ku irmans ki sta pasa pa prublémas. Tanbê el ta pô-nu ta faze sakrifisius pa djuda-s. Ansions meste nkoraja kes ki ta mostra amor lial pa otus. Nu ta fika txeu kontenti óras ki nu ta odja nos irmons ku irmans ta rekupera ses alegria i forsa pa sirbi Jeová. (Atos 20:35) Má kal ki é kel razon más inportanti ki debe pô-nu kontinua ta mostra amor lial? É pamodi nu krê imita i agrada Jeová, ki é ‘xeiu di amor lial’. — Êxo. 34:6; Sal. 33:22.