1. Kuzê ki fika sienti krê fla? (2 Timóteo 4:5)

 ÓRAS ki ta kontise algun kuza ki ta xatia-nu, nos lialdadi pa Jeová i pa se organizason pode podu na próva. Modi ki nu pode vense kes kuza li? Nu meste fika sienti i firmi na fé. (Lé 2 Timóteo 4:5.) Nu ta fika sienti óras ki nu ta kontinua kalmu, nu ta pensa dretu i nu ta sforsa pa odja kuzas sima Jeová ta odja-s. Óras ki nu ta faze kel-li, nu ka ta dexa kuzas ki nu ta xinti kontrola nos manera di pensa.

2. Kuzê ki nu sta ben odja na kel studu li?

² Na studu ki pasa, nu pâpia di três kuza ki ta ben di fóra di kongregason ki pode kontise ku nos. Na kel studu li, nu sta ben pâpia di três prubléma ki pode kontise déntu di kongregason i ki pode poi nos lialdadi pa Jeová na próva: (1) óras ki nu xinti ma un irmon trata-nu mariadu, (2) óras ki nu ta dadu disiplina i (3) óras ki nu sta sforsa pa kustuma ku un mudansa na organizason. Si nu sta ta pasa pa alguns di kes prubléma li, kuzê ki nu pode faze pa nu fika sienti i kontinua lial pa Jeová i pa se organizason?

3. Modi ki nu pode reaji si nu xinti ma un irmon trata-nu mariadu?

³ Algun bês dja bu xinti ma un irmon ô irman, talvês un algen ki ten responsabilidadi, sima un ansion trata-u mariadu? Talvês kel irmon ka tinha intenson di maguaba bo. (Rom. 3:23; Tia. 3:2) Má simé, kuzê ki el faze pô-u fika xatiadu. Talvês bu ka konsigi durmi sô ta pensa na kel kuza. Talvês ti bu pergunta: ‘Si un irmon ta faze un kuza si, kel-li é organizason di Deus própi?’  É si própi ki Satanás krê pa bu pensa. (2 Cor. 2:11) Kel manera di pensa li pode pô-nu ta sipara di Jeová i di se organizason. Nton, si nu xinti ma un irmon ô un irman trata-nu mariadu, modi ki nu pode fika sienti i ivita pensa di manera ki Satanás krê pa nu pensa?

4. Modi ki Juzé fika sienti kantu el tratadu mariadu i kuzê ki nu pode prende ku se izénplu? (Génesis 50:19-21)

⁴ Ka bu guarda rankor. Kantu Juzé éra jóven, se irmons más grandi maltrata-l. Es ta odiaba el i ti alguns di es krê mataba el. (Gén. 37:4, 18-22) Dipôs es bende-l pa el bira skravu. Pur isu, Juzé pasa pa prublémas difísil ki dura uns 13 anu. Juzé pode perguntaba si Jeová ta amaba el própi. I el pode perguntaba si Jeová dja bandonaba el na kel ténpu ki el staba ta meste ajuda. Má Juzé ka guarda rankor. Envês di kel-li, el fika sienti pamodi el mante kalmu. Kantu el tevi xansi di vinga di se irmons, el ka faze kel-la i el mostra amor pa es i el purdua-s. (Gén. 45:4, 5) Juzé faze kel-li pamodi el konsigi pensa dretu. Envês di konsentra na se prubléma, el kontinua ta pensa na kuzê ki Jeová krê pa el fazeba. (Lé Génesis 50:19-21.) Kuzê ki nu ta prende? Si bu tratadu mariadu, ka bu fika maguadu ku Jeová nen ka bu pergunta si dja el bandona-u. Má, midita na modi ki el sta ta djuda-u aguenta prublémas. Tanbê, óras ki otus algen trata-u mariadu, tenta kubri ses pekadu ku amor. — 1 Ped. 4:8.

5. Modi ki Mikeias fika sienti kantu el xinti ma el tratadu mariadu?

⁵ Odja un izénplu di nos ténpu di un ansion di Mérka di Sul, ki txoma Mikeias. b El lenbra ma un bês, el xinti ma alguns irmon ki tinha responsabilidadi na organizason di Jeová trata-l mariadu. El fla: “Nunka N ka fikaba stresadu di kel manera la. N staba preokupadu. N ka ta konsigi durmiba di noti. I N txora pamodi N xinti ma N ka pode fazeba nada.” Má simé, Mikeias fika sienti i el sforsa txeu pa el kontrola kuzê ki el staba ta xinti. El ta oraba tudu óra ta pidi Jeová pa daba el spritu santu i forsa pa el aguentaba firmi. Tanbê el djobe informasons na nos publikasons ki pode djudaba el. Kuzê ki nu ta prende? Si bu xinti ma un irmon ô irman trata-u mariadu, kontinua kalmu i tenta kontrola kalker kuza negativu ki bu pode xinti. Bu pode ka sabe pamodi ki kel algen pâpia ô aji ku bo di kel manera la. Nton, pâpia ku Jeová na orason i pidi-l pa el djuda-u odja kuzas sima kel algen ta odja. Faze kel-li, pode djuda-u pensa ma kel irmon ô irman ka tinha intenson di faze-u nada mariadu i bu ta konsigi purdua-l. (Pro. 19:11) Lenbra ma Jeová sta ta odja bu situason i el ta da-u kel forsa ki bu meste pa bu aguenta firmi. — 2 Cró. 16:9; Ecl. 5:8.

6. Pamodi ki é inportanti nu ntende ma Jeová ta da-nu disiplina pamodi el ta ama-nu? (Hebreus 12:5, 6, 11)

⁶ Óras ki nu resebe disiplina nu pode fika tristi. Má si nu konsentra sô na kel tristéza, nu pode kumesa ta atxa ma kel disiplina é injustu i ma el ka ta aplika na nos ô ma el é duru dimás. Kel-li pode ka dexa-nu ntende un kuza inportanti, ki é  ma Jeová ta da-nu disiplina pamodi el ta ama-nu. (Lé Hebreus 12:5, 6, 11.) I si nu kontinua konsentradu na kel tristéza ki nu sta xinti pamodi nu dadu disiplina, nu pode da Satanás xansi di ataka-nu. El krê pa nu nega disiplina i más piór inda, pa nu sipara di Jeová i di kongregason. Si bu dadu disiplina, modi ki bu pode kontinua sienti?

7. (a) Sima sta parse na dizenhus, modi ki Jeová uza Pedru dipôs ki el seta disiplina? (b) Kuzê ki bu prende ku izénplu di Pedru?

⁷ Seta disiplina i muda kes kuza ki meste. Jizus koriji Pedru más di ki un bês na frenti di kes otu apóstlu. (Mar. 8:33; Luc. 22:31-34) Kel-li talvês poi Pedru ta xinti vergónha. Má simé, Pedru kontinua lial pa Jizus. El seta disiplina i el prende ku se érus. Pur isu, Jeová rekonpensa lialdadi di Pedru i el da-l responsabilidadis inportanti na kongregason. (João 21:15-17; Atos 10:24-33; 1 Ped. 1:1) Kuzê ki nu ta prende ku izénplu di Pedru? Óras ki nu ka ta konsentra na kel vergónha ki nu pasa pamodi nu dadu disiplina, má nu ta seta kel koreson i nu ta muda kes kuza ki meste, nu ta djuda nos kabésa i otus algen. Óras ki nu ta faze kel-li, Jeová i nos irmons ta uza-nu más txeu.

8-9. Kantu Bernardu dadu disiplina, modi ki el xinti na komésu? Má kuzê ki djuda-l muda se manera di pensa?

⁸ Odja kuzê ki kontise ku un irmon na Mosanbiki, ki txoma Bernardu. El perde priviléjiu di ser ansion. Modi ki Bernardu xinti na komésu? El fla: “N fika ofendidu pamodi N ka gosta di kel disiplina ki N dadu.” El staba preokupadu ku kuzê ki otus algen na kongregason ta pensaba sobri el. El fla: “Pasa alguns mês pa N odja kel disiplina di manera puzitivu i pa N kunfia otu bês na Jeová i na se organizason.” Kuzê ki djuda Bernardu muda se atitudi?

⁹ Bernardu muda se manera di pensa. El fla: “Kantu mi éra ansion, N ta uzaba Hebreus 12:7 pa djuda otus algen ten un ideia puzitivu sobri disiplina di Jeová. Nton, N pergunta nha kabésa: ‘Ken ki meste aplika kel testu li?’ Tudu kes ki ta  sirbi Jeová i mi tanbê.” Dipôs Bernardu faze otus kuza pa el bira ta kunfia na Jeová i na Se organizason otu bês. El bira ta lé Bíblia más txeu i ta pasa más ténpu ta midita na kel ki el lé. Nbóra el staba preokupadu ku kuzê ki irmons ku irmans ta pensaba sobri el, el sai ku es na pregason i el partisipa na runions. Ku ténpu, Bernardu bira ansion otu bês. Si bu dadu disiplina sima Bernardu, tenta ka pensa txeu na kel vergónha ki bu pasa, má seta konsedju i muda kes kuza ki meste. c (Pro. 8:33; 22:4) Si bu faze kel-li, bu pode ten sertéza ma Jeová ta rekonpensa-u pamodi bu kontinua lial pa el i pa se organizason.

10. Ki mudansa fazedu na organizason ki talvês poi lialdadi di alguns ómi israelita na próva?

¹⁰ Mudansas ki ta fazedu na organizason pode poi nos lialdadi na próva. Si nu ka toma kuidadu, nu pode ti dexa kes mudansa li pô-nu ta sipara di Jeová. Pur izénplu, pensa na modi ki kuzas muda pa kes israelita ki ta sigiba Lei di Muizés. Antis di Jeová daba es kel Lei, kes xéfi di família ta fazeba kes kuza ki saserdótis ben fika ta faze. Es ta fazeba altar i es ta ofereseba sakrifisiu pa Jeová pode djudaba ses família. (Gén. 8:20, 21; 12:7; 26:25; 35:1, 6, 7; Jó 1:5) Má kantu Jeová da kel Lei, kes xéfi di família ka dexadu faze kes kuza más. Jeová skodje saserdótis di família di Aron pa oferese sakrifisius. Ku kel mudansa li, si un xéfi di família ki ka éra di família di Aron, kumesa ta fazeba kes kuza ki saserdótis ta fazeba, es pode mataba el. d (Lev. 17:3-6, 8, 9) É pamodi kel mudansa li ki talvês Korá, Datan, i Abiron i kes 250 xéfi di tribu rabela kóntra Muizés i Aron? (Núm. 16:1-3) Nu ka ten sertéza. Nu sabe ma Korá i kes ómi ki apoia-l ka kontinua lial pa Jeová. Si fazedu mudansas na organizason ki poi bu lialdadi na próva, kuzê ki bu pode faze?

11. Kuzê ki nu ta prende di izénplu di alguns levita kuatita?

¹¹ Apoia di korason kes mudansa ki ta fazedu na organizason. Duránti ses viaji na dizértu, kes kuatita tinha un diziginason inportanti. Sénpri ki israelitas ta mudaba kanpamentu, alguns kuatita ta karegaba arka di kontratu na frenti di povu interu. (Núm. 3:29, 31; 10:33; Jos. 3:2-4) Es tinha un priviléjiu grandi! Má kantu kes israelita entra na kel téra ki Deus prometeba es, kuzas muda. Es ka meste mudaba Arka más di un lugar pa kel otu. Na ténpu ki Salumon bira rei, alguns kuatita dadu diziginason di ser kantor, otus éra porteru i otus ta kuidaba di kes armazén di kumida. (1 Cró. 6:31-33; 26:1, 24) Ka ten nada ki ta mostra ma kes kuatita reklama ô ma es pidi pa es dadu un trabadju más inportanti pamodi antis es tinha un diziginason spesial. Kuzê ki nu pode prende? Apoia di korason kes mudansa  ki ta fazedu na organizason di Jeová, i kel-li ta inklui kalker mudansa ki ta afeta bu diziginason. Kontinua ku alegria na kalker diziginason ki bu dadu. Lenbra ma é ka bu diziginason ki ta poi Jeová ta da-u valor. Pa Jeová, obi ku el ten mutu más valor di ki kalker diziginason. — 1 Sam. 15:22.

12. Modi ki Zaida xinti kantu el mudadu di diziginason?

¹² Odja izénplu di Zaida, ki é un irman ki se diziginason muda i el perde un priviléjiu ki tinha txeu valor pa el. Dipôs di más di 23 anu na Betel, el mudadu diziginason pa kanpu. El fla: “Kel mudansa li dexa-m spantadu. N xinti sen valor i N ta perguntaba nha kabésa: ‘Kuzê ki N faze mariadu?’” Pa piora situason, alguns irmon i irmans na kongregason ta flaba el: “Si bo éra bon na bu trabadju, bu ta kontinuaba na Betel.” Duránti algun ténpu, Zaida ta xintiba dizanimadu di tal manera ki el ta txoraba tudu noti. Má el fla: “Nunka N ka duvida di organizason ô di amor di Jeová.” Kuzê ki djuda Zaida fika sienti?

13. Kuzê ki Zaida faze pa vense se sentimentus negativu?

¹³ Modi ki Zaida konsigi vense kes sentimentu negativu ki el tinha? El lé artigus na nos publikasons ki ta pâpia di kes prubléma ki el sta pasaba pa el i kes artigu djuda-l lida ku es. Kel artigu “Bu pode vense dizánimu!” na Sentinéla 1 di febreru di 2001, djuda-l txeu. Kel artigu ta splika modi ki Markus, ki skrebe un livru di Bíblia, talvês lida ku sentimentus sima di sel kantu se diziginason muda. Zaida fla: “Izénplu di Markus foi sima nha ramedi pa N vense dizánimu.” Zaida tanbê kontinua pértu di se amigus. El ka fika el sô, nen el ka fika ta xinti péna di se kabésa. El da kónta ma spritu santu ta orienta kes disizon di organizason di Jeová i ma kes irmon ki ten txeu responsabilidadi ta preokupaba txeu ku el. Má tanbê el da kónta ma organizason debe faze kel ki é midjór pa trabadju di Jeová fazedu.

14. Ki mudansa ki fazedu na organizason ki Valdu sforsa pa kustuma ku el i kuzê ki djuda-l?

¹⁴ Foi difísil pa Valdu, ki é un ansion di  73 anu na Slovénia, ntende pamodi ki se kongregason djuntadu ku otu kongregason i Salon di Reinu fitxadu. El fla: “N ka ntende pamodi ki un Salon di Reinu bunitu pode fitxadu. N fika tristi pamodi ka dura ki nu konpo kel Salon. Ami é karpinteru i N faze alguns mobília novu pa Salon. Fazedu txeu mudansa pa djunta kes kongregason i kel-li é ka un kuza fásil pa nos ki sta algen grandi.” Kuzê ki djuda Valdu apoia kel orientason? El fla: “Kustuma ku kes mudansa ki organizason di Jeová ta faze, sénpri ta traze bensons. Es ta pripara-nu pa kes mudansa más grandi ki ta ben fazedu na futuru.” Bu sta ta lida ku mudansas pamodi bu kongregason djuntadu ô bu mudadu di diziginason? Ten sertéza ma Jeová ta ntende modi ki bu sta xinti. Si bu apoia kes mudansa li i bu kontinua lial pa Jeová i pa organizason ki el sta ta uza, bu pode ten sertéza ma el ta abensua-u. — Sal. 18:25.

15. Modi ki nu pode fika sienti óras ki nu ta pasa pa prublémas déntu di kongregason?

¹⁵ Sima nu ta ba ta txiga más pértu di fin, nu pode spéra ma ta ten prublémas déntu di kongregason. Kes prubléma li pode poi nos lialdadi pa Jeová na próva. Nton nu meste fika sienti. Si bu atxa ma un irmon trata-u mariadu, ka bu guarda rankor. Si bu dadu disiplina, ka bu konsentra na kel vergónha. Seta konsedju i faze kes mudansa ki meste. I óras ki organizason di Jeová ta faze un mudansa ki ta afeta-u, seta kel mudansa di korason i sigi kel orientason.

16. Modi ki bu pode kontinua ta kunfia na Jeová i na se organizason?

¹⁶ Bu pode kontinua ta kunfia na Jeová i na se organizason óras ki bu lialdadi podu na próva. Pa faze kel-li, bu meste fika sienti. Kel-li krê fla kontinua kalmu, pensa dretu i odja kuzas sima Jeová ta odja-s. Sta disididu na studa sobri kes algen ki Bíblia ta pâpia di el ki tevi bons rezultadu na lida ku prublémas sima di bo i midita na ses izénplu. Pidi Jeová pa djuda-u. I nunka ka bu afasta di kongregason. Nton, ka ta nporta kuzê ki kontise, Satanás ka ta konsigi sipara-u di Jeová ô di Se organizason. — Tia. 4:7.