1. Modi ki nu sabe ma Jeová krê ser nos amigu?

 JEOVÁ ta konvida-nu pa nu ser se amigu. (Tia. 4:8) El krê ser nos Deus, nos Pai i nos Amigu. El ta responde nos orason i el ta djuda-nu óras ki nu ta pasa pa prublémas. I el ta uza se organizason pa inxina-nu i pa proteje-nu. Má kuzê ki nu debe faze pa nu ser más amigu di Jeová?

2. Modi ki nu pode bira más amigu di Jeová?

² Nu pode bira más amigu di Jeová óras ki nu ta faze orason, nu ta lé se Palavra i nu ta midita na el. Óras ki nu ta faze si, nos amor pa el ta bira más txeu i nu ta bira ta da-l más valor. Nu ta xinti gana di obi ku el i da-l adorason ki el merese. (Apo. 4:11) Óras ki nu konxe Jeová más midjór, nu ta kunfia más txeu na el i na organizason ki el ta uza pa djuda-nu.

3. Kuzê ki Satanás ta faze pa tenta sipara-nu di Jeová, má kuzê ki ta djuda-nu pa nunka nu ka bandona nos Deus i se organizason? (Salmo 31:13, 14)

³ Má Satanás ta tenta sipara-nu di Jeová, prinsipalmenti óras ki nu ta pasa pa prublémas. Modi ki el ta faze kel-li? El ta tenta kaba ku nos kunfiansa na Jeová i na se organizason poku-poku. Má nu pode difende nos kabésa kóntra kes ataki li. Óras ki nos fé é fórti i nos kunfiansa na Jeová é firmi, nu ka ta bandona nos Deus i se organizason. — Lé Salmo 31:13, 14.

4. Kuzê ki nu sta ben odja na kel studu li?

⁴ Na kel studu li, nu ta ben pâpia di três kuza ki pode ben di fóra di kongregason i kada un di es pode kaba ku nos kunfiansa na Jeová i na se organizason. Modi ki  kes três kuza li pode sipara-nu di Jeová? I kuzê ki nu pode faze pa nu kontinua lial pa Jeová i pa se organizason?

5. Modi ki prublémas pode kaba ku nos kunfiansa na Jeová i na se organizason?

⁵ Alvês nu ta pasa pa prublémas sima opozison na família ô perde trabadju. Modi ki kes prubléma li pode kaba ku nos kunfiansa na organizason di Jeová i sipara-nu di Jeová? Óras ki nu ta pasa pa prublémas duránti txeu ténpu, nu pode xinti sen speransa i dizanimadu. Satanás ta pruveta kes oportunidadi li pa pô-nu ta pensa ma Jeová ka ta ama-nu. Satanás krê pa nu pensa ma é Jeová ô se organizason ki tene-nu ku kes prubléma li. É un kuza sima kel-li ki kontise ku alguns israelita na Ijitu. Na komésu es ta kriditaba ma Jeová skodje Muizés ku Aron pa traba es di Ijitu. (Êxo. 4:29-31) Má dipôs, kantu Faraó poi ses vida ta bira más duru, es fla ma Muizés ku Aron ki éra kulpadu pamodi ses prubléma. Es fla: ‘Nhos poi Faraó i se sérvus ta dispreza-nu i nhos poi un spada na ses mô pa es mata-nu.’ (Êxo. 5:19-21) Es poi kulpa na kes sérvu lial di Deus. Fórti tristi! Si dja ten txeu ténpu ki bu sta ta pasa pa prublémas, modi ki bu pode kontinua ku bu kunfiansa fórti na Jeová i na se organizason?

6. Kuzê ki nu ta prende ku proféta Abakuki sobri modi ki nu ta aguenta nos prublémas? (Habacuque 3:17-19)

⁶ Abri bu korason pa Jeová na orason i pidi se ajuda. Proféta Abakuki pasa pa txeu prubléma. Ta parse ma un bês el tinha dúvida si Jeová ta preokupaba ku el. Nton, el abri se korason i el fla Jeová kuzê ki el staba ta xinti. El fla: ‘Ó Jeová, ti ki ténpu, N ta txoma-u pa bu djuda-m, má bu ka ta obi-m? I pamodi ki bu ta dexa pesoas abuza di puder?’ (Hab. 1:2, 3) Jeová responde kel orason di korason ki se sérvu fiel faze pa el. (Hab. 2:2, 3) Dipôs, Abakuki midita na modi ki Jeová dja salvaba se povu i el fika kontenti otu bês. El fika konvensidu ma Jeová ta preokupaba ku el i ma el ta djudaba el aguenta firmi kalker prubléma. (Lé Habacuque 3:17-19.) Kuzê ki nu ta prende? Óras ki bu ta pasa pa prublémas, faze orason i fla Jeová modi ki bu sta xinti i pidi-l ajuda. Óras ki bu ta faze si, bu pode ten sertéza ma Jeová ta da-u kel forsa ki bu meste pa bu aguenta firmi. I óras ki bu xinti se ajuda, bu fé na el ta bira más fórti.

7. Di kuzê ki un família di Xirlei tenta konvense-l i kuzê ki djuda-l ka perde se fé na Jeová?

⁷ Kontinua ta faze kes kuza ki ta djuda-u mante un amizadi fórti ku Jeová. É kel-li ki djuda Xirlei, ki é un irman na Papua Nova-Giné kantu el pasa pa prublémas. b Família di Xirlei éra póbri i alvês éra difísil pa es konsigi kumida ki ta txigaba es. Un família di sel tenta kaba ku se kunfiansa na Jeová. El fla-l: “Bu ta fla ma spritu santu di Deus sta ta djuda-u, má N ka sta ta odja kel ajuda. Bu família inda sta póbri i bu sta ta perde bu ténpu ta prega.” Xirlei fla: “N pergunta nha kabésa: Deus ta preokupa ku mi i ku nha família? Nton, N faze orason lógu pa Jeová i N fla-l tudu kuza ki  N staba ta pensa na el. N kontinua ta lé Bíblia i nos publikasons i N kontinua ta prega i ta sisti runion.” Xirlei da kónta ma Jeová staba ta kuida di se família. Se família ka pasa fómi i es éra filís. Xirlei fla: “N xinti ma Jeová staba ta responde nhas orason.” (1 Tim. 6:6-8) Si bu kontinua ta faze kes kuza pa mante bu amizadi ku Jeová fórti, bu ka ta dexa prublémas ô dúvidas ta pô-u ta sipara di Jeová.

8. Kuzê ki pode kontise ku irmons ki ten responsabilidadi na organizason di Jeová?

⁸ Nos inimigus ta uza notísias i redi sosial pa spadja mintiras ô pa kria dúvida sobri kes irmon ki ten responsabilidadi na organizason di Jeová. (Sal. 31:13) Alguns irmon podu prézu i es akuzadu ma es faze algun krimi. Kes kriston na ténpu di apóstlus pasa pa un situason kuazi sima kel-li kantu apóstlu Polu akuzadu di un kuza ki el ka faze i el podu prézu. Modi ki es reaji?

9. Modi ki alguns irmon reaji kantu apóstlu Polu podu prézu?

⁹ Alguns irmon na ténpu di apóstlus para di djuda apóstlu Polu kantu el staba prézu na Roma. (2 Tim. 1:8, 15) Pamodi? Es tinha vergónha pamodi otus algen ta atxaba ma Polu éra un kriminozu? (2 Tim. 2:8, 9) Ô es tinha medu ma es tanbê es ta sérba pirsigidu? Ka ta nporta é pamodi, imajina modi ki Polu talvês xinti. El pasa pa txeu prubléma i ti el poi se vida na prigu pamodi es. (Atos 20:18-21; 2 Cor. 1:8) Nunka nu ka debe ser sima kes algen ki ka djuda apóstlu Polu kantu el staba ta meste! Di kuzê ki nu debe lenbra óras ki kes irmon ki ten responsabilidadi ta pirsigidu?

10. Di kuzê ki nu debe lenbra óras ki irmons ki ten responsabilidadi ta pirsigidu i pamodi?

¹⁰ Lenbra di pamodi ki es ta pirsigidu i kenha ki ta poi kel-li kontise. Na 2 Timóteo  3:12 ta fla: ‘Tudu kes ki krê uza ses vida pa adora Deus, unidu ku Kristu Jizus, tanbê ta ser pirsigidu.’ Nton, nu ka debe fika dimiradu ma Satanás ta ataka prinsipalmenti kes irmon ki ten responsabilidadi na organizason. El krê pa kes irmon li dexa di ser lial pa Jeová i tanbê pa nu fika ku medu. — 1 Ped. 5:8.

11. Kuzê ki nu ta prende ku izénplu di Onezífuru? (2 Timóteo 1:16-18)

¹¹ Kontinua ta djuda bus irmon i ser lial pa es. (Lé 2 Timóteo 1:16-18.) Un irmon di ténpu di apóstlus ki txomaba Onezífuru faze un kuza diferenti kantu apóstlu Polu podu prézu. Bíblia ta fla: ‘El ka xinti vergónha pamodi Polu staba prézu’. Má, Onezífuru ba djobe undi ki Polu staba i kantu el atxa-l el tenta djuda-l ranja kes kuza ki el staba ta meste. Kantu Onezífuru faze si, el poi se vida na prigu. Kuzê ki nu ta prende? Nu ka debe dexa medu di ómi inpidi-nu di djuda nos irmons ki sta pasa pa pirsigison. Envês di kel-li, nu debe difende-s i djuda-s. (Pro. 17:17) Es meste nos amor i ajuda.

12. Kuzê ki nu ta prende ku nos irmons ku irmans na Rúsia?

¹² Odja modi ki nos irmons ku irmans na Rúsia djuda ses irmon ki es krê txeu ki podu prézu. Óras ki alguns di es ta julgadu, txeu di nos irmons ku irmans ta bai tribunal pa da-s forsa. Kuzê ki nu ta prende? Óras ki ta kontadu mintira kóntra kes irmon ki ten responsabilidadi na organizason ô es ta podu prézu ô es ta pirsigidu, ka bu fika ku medu. Ora pa es, kuida di ses família i djobe otus manera di djuda-s. — Atos 12:5; 2 Cor. 1:10, 11.

13. Modi ki trósa pode kaba ku nos kunfiansa na Jeová i na se organizason?

¹³ Algun algen di nos família ki ka ta sirbi Jeová, koléga di trabadju ô koléga di skóla pode faze-nu trósa pamodi nu ta prega i nu ta sigi kes lei di Jeová sobri konportamentu. (1 Ped. 4:4) Es pode fla: “Abo é bon algen, má bu relijion ka ta dexa algen faze txeu kuza i el ka ten nada aver ku nos ténpu.” Alguns algen pode kritika-nu pa manera ki nu ta lida ku kes algen dizasosiadu. Es ta fla: “Modi ki bu pode fla ma bu ta ama algen?” Kes kuza li pode pô-u ku dúvida si leis di Jeová é justu. Bu pode kumesa ta pergunta: ‘Kel ki Jeová ta spéra di mi é ka txeu dimás? Se organizason ka ta dexa algen faze kuazi nada?’ Si bu sta ta pasa pa kel situason li, modi ki bu pode kontinua pértu di Jeová i di se organizason?

14. Modi ki nu debe reaji óras ki otus algen ta faze-nu trósa pamodi nu ta vive di akordu ku leis di Jeová? (Salmo 119:50-52)

¹⁴ Sta disididu na kontinua ta faze kel ki Jeová ta fla ma é dretu. Jó éra un ómi ki ta difendeba leis di Jeová sikrê es fazeba el trósa. Un di kes amigu falsu di Jó krê poba el ta kridita ma Deus ka ta preokupaba si el ta fazeba kel ki é dretu ô nau. (Jó 4:17, 18; 22:3) Má Jó nega kridita na kel mintira la. El sabia ma leis di Jeová sobri kel ki é dretu i mariadu é bon pa nos i el staba disididu na difende-s. El ka dexa otus algen inpidi-l di kontinua lial. (Jó 27:5, 6) Kuzê ki nu ta prende? Ka bu dexa trósa ki bu ta fazedu pô-u ku dúvida sobri leis di Jeová. Pensa na kuzê ki dja kontise ku bo  duránti bu vida. Talvês dja bu odja txeu bês ma bu vida midjora kantu ki bu faze kel ki Jeová ta fla ma é dretu. Sta sénpri disididu na faze párti di kel organizason ki ta difende kes lei li. Asi, ka ta nporta kantu algen ki faze-u trósa, nunka bu ka ta sipara di Jeová. — Lé Salmo 119:50-52.

15. Pamodi ki Brizit fazedu trósa?

¹⁵ Odja spiriénsia di Brizit, ki é un irman na Índia. Alguns algen di se família faze-l trósa pamodi se fé. Poku ténpu dipôs ki el batiza na 1997, se maridu, ki ka ta sirbi Jeová, perde se trabadju. Nton el disidi ma el, Brizit i ses fidjus-fémia debe ba moraba ku se pai ku se mai na un otu sidadi. Má Brizit ta ben pasaba pa más prublémas inda. Dja ki se maridu ka staba na trabadju, Brizit tinha ki trabadjaba dia interu pa sustentaba se família. Tanbê kongregason más pértu ta fikaba uns 350 kilómetru. Infilismenti, família di se maridu fika kóntra el pamodi se fé. Situason fika difísil di tal manera ki família di Brizit tevi ki muda otu bês. Dipôs di kel-li, un se fidju-fémia ki tinha uns 12 anu móre di kánser. Pa kuzas piora más inda, alguns família di Brizit fla-l ma el ki éra kulpadu pamodi kes kuza ki kontise. Es fla-l ma si el ka biraba Tistimunha di Jeová, ninhun di kes disgrasa li ka ta kontiseba. Má simé, Brizit kontinua ta kunfia na Jeová i el mante pértu di se organizason.

16. Modi ki Jeová abênsua Brizit pamodi el kunfia na el i na se organizason?

¹⁶ Dja ki Brizit ta moraba lonji di se kongregason, enkaregadu di grupu di kongregason insentiva-l pa el prega na se zóna i pa el faze runion na se kaza. Na komésu, el atxa ma kel-li ta sérba difísil. Má el sigi konsedju ki kel irmon da-l. El prega notísias sábi pa otus algen, el faze runion na se kaza i el tra ténpu pa el faze adorason na família ku se fidjus-fémia.  Kal ki foi rezultadu? Brizit konsigi faze txeu studu di Bíblia i txeu di es batiza. Na 2005, el bira pionera fíksu. Jeová rekonpensa-l pamodi el kunfia na el i na se organizason. Gósi, se dôs fidju-fémia ta sirbi Jeová di manera fiel i na se zóna dja ten dôs kongregason! Brizit ten sertéza ma Jeová da-l forsa pa lida ku prublémas i el aguenta firmi sikrê se família faze-l trósa.

17. Kuzê ki nu debe sta disididu na faze?

¹⁷ Satanás krê pa nu kridita ma Jeová ta bandona-nu óras ki nu ta pasa pa prublémas i ma apoia se organizason ta bira nos vida más difísil. El krê pa nu fika ku medu óras ki kes irmon ki ten responsabilidadi maltratadu, pirsigidu ô podu prézu. I pamodi nu ta fazedu trósa, el ta krê kaba ku nos kunfiansa na leis di Jeová i na se organizason. Má nu konxe dretu kes armadilha di Satanás, pur isu el ka ta ngana-nu. (2 Cor. 2:11) Sta disididu na nega kes mintira di Satanás i mante lial pa Jeová i pa se organizason. Lenbra ma Jeová nunka ka ta bandona-u. (Sal. 28:7) Pur isu, ka bu dexa nada sipara-u di Jeová! — Rom. 8:35-39.

18. Kuzê ki nu ta ben odja na kel otu studu?

¹⁸ Na kel studu li, nu pâpia di alguns prubléma ki nu pode pasa pa el fóra di kongregason. Má nos kunfiansa na Jeová i na se organizason tanbê pode podu na próva através di prublémas ki pode ben di déntu di kongregason. Modi ki nu pode lida ku kes prubléma li? Nu ta ben pâpia di kel-li na kel otu studu.