1. Kuzê ki nu pode spéra i di kuzê ki nu pode ten sertéza?

 NU PODE spéra ma nu ta pasa pa opozison na nos trabadju di pregason. I kel opozison li pode bira más txeu na futuru. (Dan. 11:44; 2 Tim. 3:12; Apo. 16:21) Má simé, nu pode ten más sertéza ma Jeová ta da-nu kel ajuda ki nu meste. Pamodi? Pamodi Jeová sénpri djuda se sérvus faze kel ki el pidi-s, sikrê éra difísil pa es. Pur izénplu, nu ben pâpia di alguns kuza ki kontise na vida di proféta Ezekiel, ki prega pa kes judeu ki staba prézu na Babilónia.

2. Pa ki tipu di algen ki Ezekiel prega i kuzê ki nu sta ben odja na kel studu li? (Ezequiel 2:3-6)

² Pa ki tipu di algen ki Ezekiel prega? Jeová fla ma es éra ‘rebéldi’ i ‘di korason duru’. Es éra sima spinhu ki ta fazeba algen mal i prigozu sima lakrau. É pamodi kel-li ki Jeová fla Ezekiel txeu bês: ‘Ka bu xinti medu’! (Lé Ezequiel 2:3-6.) Ezekiel konsigi faze se trabadju di pregason pamodi (1) é Jeová ki manda-l, (2) spritu santu da-l forsa i (3) kuzas ki Deus fla-l bira se fé más fórti. Modi ki kes três kuza li djuda Ezekiel? I modi ki es ta djuda-nu gósi?

3. Ki palavras ki talvês da Ezekiel forsa i modi ki Jeová garanti-l ma el ta djudaba el?

³ Jeová fla Ezekiel: ‘N sta ta manda-u’. (Eze. 2:3, 4) Kes palavra li talvês da Ezekiel forsa. Pamodi? Pamodi Ezekiel talvês lenbra ma Jeová fla Muizés ku Izaías un  kuza kuazi sima kel-li kantu el skodje-s pa ser se profétas. (Êxo. 3:10; Isa. 6:8) Ezekiel tanbê sabia ma Jeová djuda kes dôs proféta li faze ses trabadju. Pur isu, kantu Jeová fla Ezekiel dôs bês: ‘N sta ta manda-u’, el tinha bons motivu pa kunfia ma Jeová ta djudaba el. Tanbê, Ezekiel skrebe txeu bês: ‘Jeová fla-m kes palavra li’. (Eze. 3:16) I txeu bês el skrebe: ‘Jeová torna pâpia ku mi’. (Eze. 6:1) Ezekiel ka tinha dúvida ma é Jeová ki mandaba el. Pai di Ezekiel éra saserdóti. Talvês el inxina Ezekiel ma Jeová sénpri fla se profétas ma el ta djudaba es. Jeová fla Izaki, Jakó i Jeremias: ‘N sta ku bo’. — Gén. 26:24; 28:15; Jer. 1:8.

4. Ki palavras ki ta konsola algen ki da Ezekiel forsa?

⁴ Modi ki maioria di israelitas ta reajiba óras ki Ezekiel ta fazeba se trabadju di pregason? Jeová fla: ‘Kaza di Israel ka ta ba krê obi-u, pamodi es ka krê obi-m.’ (Eze. 3:7) Kantu povu nega obi ku Ezekiel, es nega obi ku Jeová. Kes palavra li garanti Ezekiel ma el ka fadja na faze se trabadju di proféta sikrê povu nega obi ku el. Tanbê Jeová da Ezekiel sertéza ma óras ki kes kuza ki el flaba ben kontiseba povu ta fikaba ta sabe ‘ma tevi un proféta na ses meiu.’ (Eze. 2:5; 33:33) Nu ka ten dúvida ma kes palavra li ki ta konsola algen, da Ezekiel kel forsa ki el staba ta meste pa faze se trabadju di pregason.

5. Sima sta na Isaías 44:8, kuzê ki ta da-nu koraji?

⁵ Nos tanbê nu ten koraji pamodi  nu sabe ma é Jeová ki ta manda-nu prega. El txoma-nu di se tistimunhas. (Isa. 43:10) Kel-li é un priviléjiu grandi! Sima Jeová fla Ezekiel: ‘Ka bu xinti medu’, Jeová ta fla-nu tanbê: ‘Ka nhos dexa medu toma kónta di nhos’. Pamodi ki nu ka debe xinti medu di kes algen ki é kóntra nos? Pamodi sima kontise ku Ezekiel, é Jeová ki manda-nu i el ta djuda-nu. — Lé Isaías 44:8.

6. (a) Kuzê ki Jeová fla ki ta garanti-nu ma el ta djuda-nu? (b) Kuzê ki ta konsola-nu i ta da-nu forsa?

⁶ Jeová ta promete ma el ta djuda-nu. Pur izénplu, antis di el fla: ‘Anhos é nhas tistimunha,’ el fla: ‘Óras ki bu pasa na meiu di agu, N ta sta ku bo, i óras ki bu pasa na rius, es ka ta kubri-u. Óras ki bu anda na meiu di lumi, bu ka ta fika txumuskadu, nen lumi ka ta kema-u.’ (Isa. 43:2) Alvês óras ki nu ta prega, nu ta pasa pa prublémas ki é sima agu ki ta kubri-nu i provasons ki é difísil di tal manera ki é sima lumi ki pode kema-nu. Má simé, ku ajuda di Jeová, nu ta kontinua ta prega. (Isa. 41:13) Sima na ténpu di Ezekiel, gósi maioria di algen ka ta krê obi nos mensaji. Má kel-li é ka pamodi nu ka sta prega dretu. Sabe ma Jeová ta fika kontenti óras ki nu ta kontinua ta pâpia di se mensaji di manera fiel ta konsola-nu i ta da-nu forsa. Apóstlu Polu fla: ‘Kada un ta resebe se própi rekonpénsa, di akordu ku se própi trabadju.’ (1 Cor. 3:8; 4:1, 2) Un irman ki dja dura ki é pionera fla: “Sabe ma Jeová ta rekonpensa sforsu ki nu ta faze ta da-m alegria.”

7. Modi ki Ezekiel ta xintiba óras ki el ta pensaba na kel vizon ki el tevi? (Odja dizenhu na kapa.)

⁷ Ezekiel odja ma spritu santu ten txeu puder. Na un vizon ki Ezekiel tevi, el odja ma spritu santu staba ta djuda anjus poderozu i ta poi ródas grandi di un karu na séu ta anda. (Eze. 1:20, 21) Modi ki Ezekiel reaji? El skrebe kuzê ki kontise: ‘Kantu N odja kel-li N nbaxa ku róstu pa txon’. Ezekiel fika dimiradu ku kuzê ki el odja ki el kai na txon. (Eze. 1:28) Dipôs, sénpri ki Ezekiel ta pensaba na kel vizon, talvês el ta xintiba forsa i ku sertéza ma ku ajuda di spritu santu di Deus el ta konsigi fazeba se trabadju di pregason.

8-9. (a) Ki órdi ki Jeová da Ezekiel? (b) Modi ki Jeová da Ezekiel más forsa pa prega na se tiritóriu ki éra difísil?

⁸ Jeová fla Ezekiel: ‘Fidju di ómi, fika di pé pa N pâpia ku bo.’ Kel órdi li i spritu santu da Ezekiel kel forsa ki el staba ta meste pa el labanta. Ezekiel skrebe: ‘Spritu entra na mi i el pô-m ta fika di pé’. (Eze. 2:1, 2) Dipôs i duránti tudu se trabadju di pregason ‘mô’ di Deus ô spritu santu, gia Ezekiel. (Eze. 3:22; 8:1; 33:22; 37:1; 40:1) Spritu santu da Ezekiel koraji pa faze se trabadju di prega pa kes algen na se tiritóriu ki tinha ‘kabésa duru i korason duru tanbê’. (Eze. 3:7) Jeová fla Ezekiel: ‘N poi bu róstu ta fika riju sima ses róstu i bu tésta ta fika riju sima ses tésta. N faze bu tésta sima un diamanti, más riju di ki pédra. Ka bu xinti medu di es, nen ka bu dexa medu toma kónta di bo pamodi ses róstu’. (Eze. 3:8, 9) É sima si Jeová staba ta fla Ezekiel: ‘Ka bu dexa kel  povu li ki é temozu dizanima-u. N ta da-u forsa.’

⁹ Dipôs di kel-li, spritu santu leba Ezekiel pa ba prega na se tiritóriu. El skrebe: ‘Mô di Jeová éra fórti riba mi.’ Pasa un simana pa Ezekiel ntende dretu kel mensaji ki el tinha ki pregaba ku sertéza pa kes algen. (Eze. 3:14, 15) Dipôs Jeová fla-l pa el bai pa un vali na undi ki ‘spritu entra na el’. (Eze. 3:23, 24) Asi, Ezekiel staba prontu pa kumesa se trabadju di pregason.

10. Ki ajuda ki nu meste pa faze nos trabadju di pregason i pamodi?

¹⁰ Ki ajuda ki nu meste pa faze nos trabadju di pregason? Pa responde, pensa na kuzê ki kontise ku Ezekiel. Antis di el kumesa se trabadju di pregason, spritu santu da-l kel forsa ki el staba ta meste. Gósi, sima kontise ku Ezekiel, sô nu ta konsigi faze nos trabadju di pregason ku ajuda di spritu santu. Pamodi? Pamodi Satanás sta ta briga kóntra nos pa el pode para trabadju di pregason. (Apo. 12:17) Txeu algen ta atxa ma Satanás ten forsa di tal manera ki nu ka ta konsigi briga kóntra el. Má, através di nos trabadju di pregason nu sta vense Satanás. (Apo. 12:9-11) Di ki manera? Óras ki nu ta partisipa na pregason, nu ta mostra ma nu ka ten medu di kes amiasa di Satanás. Kada bês ki nu ta prega, Satanás sta perde. Nu ta konsigi kontinua ta prega sikrê ku opozison. Kuzê ki kel-li ta mostra? Ta fika klaru ma spritu santu sta da-nu forsa i ma Jeová sta kontenti ku nos. — Mat. 5:10-12; 1 Ped. 4:14.

11. Kuzê ki spritu santu ta faze pa nos i modi ki nu pode kontinua ta resebe-l?

¹¹ Kuzê más ki nu ta prende óras ki nu pensa na modi ki Jeová da Ezekiel kel  forsa ki el staba ta meste pa prega? Spritu santu pode da-nu kel forsa ki nu meste pa vense kalker prubléma ki nu ta pasa pa el na nos trabadju di pregason. (2 Cor. 4:7-9) Nton kuzê ki nu pode faze pa kontinua ta resebe spritu santu? Nu meste pidi spritu santu na orason sénpri, ku kunfiansa ma Jeová ta obi nos orason. Jizus inxina se disiplus: ‘Nhos kontinua ta pidi, nhos kontinua ta djobe, nhos kontinua ta konku’. I Jeová ‘ta da spritu santu pa kes ki pidi-l’. — Luc. 11:9, 13; Atos 1:14; 2:4.

12. Sima sta na Ezequiel 2:9–3:3, di undi ki kel rolu ben i kuzê ki el tinha?

¹² É ka sô spritu santu ki da Ezekiel forsa, má kuzê ki Deus fla-l da-l forsa tanbê. Na kel vizon ki Ezekiel tevi, el odja un rolu na mô di un algen. (Lé Ezequiel 2:9–3:3.) Di undi ki kel rolu ben? Kuzê ki el tinha? Modi ki el bira fé di Ezekiel más fórti? Nu ben odja. Kel rolu ben di tronu di Deus. Talvês, Jeová uza un di kes kuatu anju ki Ezekiel dja odjaba antis pa da-l kel rolu. (Eze. 1:8; 10:7, 20) Kel rolu tinha palavras di Deus ki éra un mensaji di julgamentu kunpridu ki Ezekiel tinha ki flaba kes judeu rebéldi ki staba prézu. (Eze. 2:7) Kel mensaji staba skrebedu na tudu dôs ladu di kel rolu.

13. Kuzê ki Jeová fla Ezekiel pa faze ku kel rolu i pamodi ki el éra dósi?

¹³ Jeová fla se proféta pa kume kel rolu i pa el ‘intxi bariga ku el.’ Ezekiel obidese i el kume kel rolu interu. Kuzê ki kel párti di vizon li krê fla? Ezekiel meste ntendeba dretu kel mensaji ki el tinha ki ba flaba. El tinha ki kriditaba na kel mensaji, asi pa el xintiba motivadu na prega. Nton kontise un kuza ki el ka staba ta spéra. Ezekiel da kónta ma kel rolu ‘éra dósi sima mel.’ (Eze. 3:3) Pamodi? Pa Ezekiel, priviléjiu di reprizenta Jeová éra un kuza dósi ô sábi. (Sal. 19:8-11) El fika kontenti pamodi Jeová skodje-l pa el ser proféta.

14. Kuzê ki djuda Ezekiel staba prontu pa seta se diziginason?

¹⁴ Dipôs, Jeová fla Ezekiel: ‘Seta na bu korason i obi tudu kuza ki N sta fla-u’. (Eze. 3:10) Ku kes palavra li, Jeová fla Ezekiel pa el tenta lenbraba di kuzê ki staba skrebedu na kel rolu i pa el miditaba na el. Kantu Ezekiel faze kel-li se fé bira más fórti. Tanbê, el tinha ki flaba povu kel mensaji ki staba na kel rolu. (Eze. 3:11) Kantu Ezekiel ntende dretu i el kridita na kel mensaji di Deus, el staba prontu pa kumesa ta prega i pa kontinua ta faze-l ti fin. — Konpara ku Salmo 19:14.

15. Pa aguenta firmi na pregason, kuzê ki nu meste ‘seta na korason’?

¹⁵ Pa nu kontinua nos trabadju di pregason nu meste dexa kes kuza ki Deus ta fla kontinua ta bira nos fé más fórti. Nu meste ‘seta na korason’ tudu kuza ki Jeová ta fla-nu. Gósi Jeová ta pâpia ku nos através di se Palavra, Bíblia. Modi ki nu pode ten sertéza ma Palavra di Deus ta kontinua ta afeta kuzê ki nu ta pensa, kuzê ki nu ta xinti i nos motivasons?

16. Kuzê ki nu meste faze ku Palavra di Deus i modi ki nu pode ntende-l más midjór?

 ¹⁶ Óras ku nu ta kume i nu ta faze dijeston, nos korpu ta fika más fórti. I óras ki nu ta studa Palavra di Deus i nu ta midita na el nos fé ta fika más fórti. Nu ta lenbra di kel lison ki nu prende di kel rolu. Jeová krê pa nu ‘intxi bariga’ ku se Palavra, kel-li krê fla pa nu ntende-l dretu. Nu pode faze-l óras ki nu ta ora, lé i midita. Primeru, nu ta faze orason pa pripara nos korason pa resebe kes pensamentu di Deus. Dipôs, nu ta lé un párti na Bíblia. I dipôs di kel-li, nu ta para pa midita i pa pensa txeu na kuzê ki nu lé. Kal ki ta ser rezultadu? Óras ki nu midita más txeu, nu ta ntende Palavra di Deus más midjór i nos fé ta fika más fórti.

17. Pamodi ki é inportanti midita na kuzê ki nu ta lé na Bíblia?

¹⁷ Pamodi ki é inportanti nu lé Bíblia i midita na el? Faze kel-li ta da-nu kel forsa ki nu meste pa prega notísias sábi di Reinu gósi i kel mensaji di julgamentu ki nu ta ben prega na futuru ki sta kuazi pa ben. Tanbê, óras ki nu ta midita na kes kualidadi bunitu di Jeová nos amizadi ku el ta fika kada bês más fórti. I rezultadu di kel-li é ki nu ta xinti un kuza dósi ô sábi, ki é pas déntu nos i alegria. — Sal. 119:103.

18. Kuzê ki kes algen na nos tiritóriu ta ben rekonhese i pamodi?

¹⁸ Nos é ka proféta sima Ezekiel. Má, nu sta disididu na kontinua ta pâpia di mensaji di Jeová ki sta na se Palavra ti ki el fla ma trabadju di pregason dja kaba. Óras ki kel ténpu di julgamentu txiga kes algen na nos tiritóriu ka ta ten ninhun motivu pa fla ma es ka avizadu i ma Deus skese di es. (Eze. 3:19; 18:23) Envês di kel-li, es sta ben rekonhese ma kel mensaji ki nu prega ben di Deus.

19. Kuzê ki ta da-nu forsa pa nu faze nos trabadju di pregason?

¹⁹ Kuzê ki ta da-nu forsa pa nu faze nos trabadju di pregason? É kes três kuza ki da Ezekiel forsa. Nu ta kontinua ta prega pamodi nu sabe ma é Jeová ki manda-nu, spritu santu ta da-nu forsa i Palavra di Deus ta bira nos fé más fórti. Ku ajuda di Jeová nu sta disididu na faze nos trabadju di pregason i aguenta firmi ‘ti fin’. — Mat. 24:13.