STUDU 46
KÁNTIKU 49 Nu poi Jeová ta fika kontenti
Irmons, nhos sta sforsa pa ser ajudanti di kongregason?
“Nu ta ser más filís óras ki nu ta da di ki óras ki nu ta resebe.” — ATUS 20:35.
ASUNTU PRINSIPAL
Insentiva kes irmon batizadu pa es ten dizeju i pa es kualifika pa ser un ajudanti di kongregason.
1. Kuzê ki apóstlu Paulu ta xintiba pa kes ajudanti di kongregason?
AJUDANTI di kongregason ta faze un trabadju txeu inportanti na kongregason. Apóstlu Paulu ta daba valor pa kes ómi fiel li. Pur izénplu, kantu el skrebe pa kristons na Filipus, el manda mantenha prinsipalmenti pa kes ajudanti di kongregason i pa kes ansion. — Flp. 1:1.
2. Modi ki un irmon ki txoma Luís ta xinti di ser un ajudanti di kongregason?
2 Ka ta inporta si un irmon é jóven ô el é algen grandi, el ta xinti kontenti di ser ajudanti di kongregason. Pur izénplu, Devan diziginadu pa ser ajudanti di kongregason kantu el tinha 18 anu. Má, un irmon ki txoma Luís diziginadu pa ser ajudanti di kongregason kantu el tinha más di ki 50 anu. Modi ki el xinti? El fla: “N sta txeu kontenti di djuda nhas irmon ku irmans na kongregason di kel manera li. Irmons ta mostra-m txeu amor i gósi N ta pode mostra-s amor tanbê!” Txeu ajudanti di kongregason ta xinti di mésmu manera.
3. Ki perguntas nu sta ben responde?
3 Si bo é un irmon batizadu i inda bu ka é un ajudanti di kongregason, bu pode poi kel méta li? Kuzê ki pode motiva-u pa bu faze kel-li? Kal ki é kes kualidadi ki Bíblia ta fla ma bu debe dizenvolve pa bu ser un ajudanti di kongregason? Na kel studu li, nu sta ben odja respósta pa kes pergunta li. Má, primeru nu sta ben odja ki tipu di trabadju un ajudanti di kongregason ta faze.
KI TIPU DI TRABADJU UN AJUDANTI DI KONGREGASON TA FAZE?
4. Ki trabadjus un ajudanti di kongregason ta faze? (Odja fotus.)
4 Un ajudanti di kongregason é un irmon batizadu, diziginadu pa spritu santu, ki ta djuda ansions faze txeu trabadju inportanti na kongregason. Alguns ajudanti di kongregason ta djobe si ten tiritóriu i publikasons ki ta txiga pa pregason. Otus ta djuda na linpa i konpo Salon di Reinu. Ajudantis di kongregason pode diziginadu pa ser indikador i pa djuda na son i vídiu duránti runion. Kes trabadju ki ajudanti di kongregason ta faze ta djuda pa runion kóre dretu. Más inportanti inda, ajudanti di kongregason é ómis ki ta ama Jeová i ki ta vive di akordu ku leis di Deus. Tanbê es ta ama ses irmon ku irmans txeu. (Mat. 22:37-39) Modi ki un irmon batizadu pode bira un ajudanti di kongregason?
Ajudantis di kongregason ta imita Jizus i es ta kuida di kes kuza ki otus algen ta meste (Odja parágrafu 4.)
5. Modi ki un irmon pode sforsa pa alkansa méta di ser un ajudanti di kongregason?
5 Bíblia ta fla-nu ki kualidadis un irmon meste dizenvolve pa el pode bira un ajudanti di kongregason. (1 Tim. 3:8-10, 12, 13) Bu pode alkansa kel priviléjiu li óras ki bu ta studa kes kualidadi ki sta na Bíblia i bu ta sforsa txeu pa dizenvolve-s. Má primeru, bu meste pensa pamodi ki bu krê ser un ajudanti di kongregason.
PAMODI KI BU KRÊ SER UN AJUDANTI DI KONGREGASON?
6. Kuzê ki debe motiva-u pa bu faze kalker trabadju pa bus irmon? (Mateus 20:28; odja dizenhu)
6 Pensa na Jizus, ki é kel grandi izénplu ki nu ten. Tudu kel ki el ta fazeba éra pamodi amor pa se Pai i amor pa pesoas. Kel amor ki el tinha pa otus algen pô-l ta sforsa txeu pa djuda otus i ti mésmu pô-l ta faze trabadjus umildi. (Lé Mateus 20:28; Juan 13:5, 14, 15) Si bu dexa amor motiva-u, Jeová ta abensua-u i el ta djuda-u alkansa bu méta di kualifika pa bu ser un ajudanti di kongregason. — 1 Kor. 16:14; 1 Ped. 5:5.
Através di se izénplu, Jizus inxina se apóstlus ma es debe sirbiba otus ku umildadi envês di djobe un puzison inportanti. (Odja parágrafu 6.)
7. Pamodi ki un irmon ka debe atxa ma el é más inportanti di ki otus algen?
7 Na mundu, txeu bês pesoas ta dimira kes algen ki ta sforsa pa ser más inportanti di ki otus algen. Má, kel-li ka ta kontise na organizason di Jeová. Un irmon ki ta ama otus algen sima Jizus ta ama, el ka ta krê manda na otus algen i nen el ka ta atxa ma el é más inportanti di ki es. Si un algen ki ta atxa ma el é más inportanti di ki otus algen diziginadu na kongregason, di serteza el ka ta ba faze un trabadju umildi ki ta mestedu pa kuida di kes ovelha di Jeová. El pode atxa ma el é inportanti dimás pa faze alguns trabadju. (Juan 10:12) Jeová ka ta abênsua sforsu di ningen ki krê faze kuzas pamodi el ta atxa ma el é más inportanti di ki otus algen. — 1 Kor. 10:24, 33; 13:4, 5.
8. Ki konsedju Jizus da se apóstlus?
8 Alvês ti mésmu kes bons amigu di Jizus krê tinha alguns priviléjiu, má ses motivason ka éra dretu. Pensa na kuzê ki apóstlu Tiagu i Juan faze. Es pidi Jizus pa da-s un lugar spesial na se Reinu. Jizus ka ilojia-s kantu es pidi kel-la. Envês di kel-li, el fla tudu kes 12 apóstlu: “Ken ki krê ser grandi entri nhos, el ten ki ser nhos sérvu, i ken ki krê ser primeru entri nhos, el ten ki ser skravu di nhos tudu.” (Mar. 10:35-37, 43, 44) Kes irmon ki ten bon motivason, ki é dizeju di sirbi otus algen, ta ser un benson pa kongregason. — 1 Tes. 2:8.
KUZÊ KI PODE DJUDA-U KRÊ SIRBI BUS IRMON
9. Kuzê ki pode djuda-u krê faze kel trabadju di sirbi otus algen?
9 Di serteza bu ta ama Jeová i bu krê sirbi otus algen. Má bu pode ka ten kel dizeju di faze kel tipu di trabadju ki ajudantis di kongregason ten ki faze. Kuzê ki pode djuda-u krê faze kel trabadju di sirbi otus algen? Pamodi ki bu ka ta pensa na kes alegria ki bu ta ten óras ki bu ta sirbi bus irmon ku irmans? Jizus fla: “Nu ta ser más filís óras ki nu ta da di ki óras ki nu ta resebe.” (Atus 20:35) Jizus ka sô fla kel-li, má tanbê el faze kel-li. El tinha txeu alegria pamodi el ta sirbiba otus algen, i bo tanbê bu pode ten.
10. Modi ki Jizus mostra ma el staba kontenti di sirbi otus algen? (Markus 6:31-34)
10 Odja un izénplu ki ta mostra ma Jizus staba kontenti di sirbi otus. (Lé Markus 6:31-34.) Tevi un momentu ki Jizus ku se apóstlus staba kansadu. Es staba ta bai pa un lugar izoladu pa es ba diskansaba un bokadinhu. Má un monti di algen txiga la primeru ki es, i es kreba pa Jizus inxinaba es. El podia flaba nau pamodi el ku se apóstlus ‘ka tinha nen ténpu pa kumeba.’ Ô Jizus podia mandaba es bai ses kaminhu dipôs di inxinaba es sô un ô dôs verdadi. Má pamodi Jizus ta amaba es “el kumesa ta inxina-s txeu kuza.” I Jizus kontinua ta inxina-s ti ki fika “tardi”. (Mar. 6:35) Jizus ka éra obrigadu faze kel-li, má el faze-l pamodi “el xinti pena di es”. El krê inxinaba es pamodi el ta amaba es. Sirbi otus algen da Jizus txeu alegria.
11. Modi ki Jizus djuda pesoas ku kes kuza ki es mesteba? (Odja fotu ku dizenhu.)
11 Jizus djuda pesoas kantu el inxina-s sobri Deus. Má tanbê, el djuda-s ku kes kuza ki es mesteba. El faze un milagri pa da kes algen kumida i dipôs el pidi se disiplus pa distribui kel kumida pa kes algen. (Mar. 6:41) Kantu el faze kel-li, el inxina se disiplus modi ki es ta sirbi otus algen. Tanbê, el mostra-s ma trabadju ki ta djuda otus algen, sima kes ki un ajudanti di kongregason txeu bês ta faze, é inportanti. Pensa na modi ki kes apóstlu fika kontenti di trabadja djuntu ku Jizus na da kes algen kumida através di un milagri ti ki “tudu kes algen kume i es fika fartu”! (Mar 6:42) É klaru ki kel-li ka é úniku bês ki Jizus poi interesi di otus algen na frenti di se interesi. Kantu el staba na téra el uza tudu se vida pa sirbi pesoas. (Mat. 4:23; 8:16) Jizus xinti txeu filís di inxina otus algen i di kuida di ses nisisidadi. Bo tanbê, bu ta ben xinti txeu alegria si bu sta dispostu na ser un ajudanti di kongregason pa bu djuda otus algen.
Óras ki bu ta ama Jeová i bu ten dizeju di sirbi otus algen, bu ta faze tudu kel ki bu ta pode pa bu djuda bus irmon ku irmans. (Odja parágrafu 11.) a
12. Pamodi ki ninhun di nos ka debe atxa ma nu ka ten ninhun kapasidadi ki nu pode uza pa djuda kongregason?
12 Si bu ta xinti ma bu ka ten ninhun kapasidadi spesial, ka bu dizanima. Di serteza bu ten kualidadis ki bu pode uza pa djuda kongregason. Pensa na kuzê ki Paulu fla na 1 Koríntius 12:12-30 i dipôs pidi Jeová pa djuda-u odja modi ki kel-li ta aplika na bo. Kes palavra di Paulu ta mostra klaru ma sima kes otu sérvu di Jeová, bu mestedu i bu ten txeu valor pa kongregason. Si inda bu meste midjora kes kualidadi pa bu ser un ajudanti di kongregason, ka bu dizisti. Envês di kel-li, faze kel ki bu ta pode pa bu sirbi Jeová i pa bu djuda bus irmon. Bu pode ten serteza ma ansions ta ba pensa na bus kapasidadi i es ta da-u kes diziginason ki bu ta pode faze. — Rom. 12:4-8.
13. Pamodi ki é ka difísil dimás un algen kualifika pa ser un ajudanti di kongregason?
13 Un otu motivu ki debe pô-u ta sforsa pa kualifika pa ser un ajudanti di kongregason, é pamodi tudu sérvus di Jeová, meste ten kes kualidadi li. Pur izénplu, tudu sérvus di Jeová debe sforsa pa bira más se amigu, sta prontu pa sirbi otus ku alegria i vive di un manera ki ta agrada Deus. Nton, talvês dja bu dizenvolve txeu di kes kualidadi ki un algen meste ten pa ser un ajudanti di kongregason. Nton, kuzê más ki un irmon meste faze pa el diziginadu pa ser ajudanti di kongregason?
KUZÊ KI BU PODE FAZE PA BU SER UN AJUDANTI DI KONGREGASON
14. Kuzê ki “ser sériu” krê fla? (1 Timótiu 3:8-10, 12)
14 Nu ben odja alguns kualidadi ki Bíblia ta pâpia di el ki sta na 1 Timótiu 3:8-10, 12. (Lé.) Un ajudanti di kongregason debe “ser sériu”. Kel palavra li tanbê pode ser traduzidu pa “merese pa otus algen ruspeta-u,” ô “aji di un manera ki otus algen ta ruspeta-u”. Kel-li ka krê fla ma nunka bu ka debe ri ô divirti. (Ecl. 3:1, 4) Má, bu debe sforsa pa bu kunpri tudu bus responsabilidadi. Si sénpri bu tirmina trabadju ki bu diziginadu pa faze i bu faze-l dretu, tudu algen na kongregason ta kunfia na bo i es ta ruspeta-u.
15. Kuzê ki krê fla ‘ser ómi ki ten sô un palavra’ i ‘ka ten ganánsia pa ganha algun kuza ku dizonestidadi’?
15 ‘Ser ómi ki ten sô un palavra’ krê fla ma bo é sinseru, onéstu i di kunfiansa. Bu ta faze kel ki bu fla ma bu ta faze i bu ka ta konta mintira pa otus algen. (Pro. 3:32) ‘Ka ten ganánsia pa ganha algun kuza ku dizonestidadi’ krê fla ma bo é onéstu óras ki bu ta faze nogósiu ku otus algen i na manera ki bu ta uza bu dinheru. Bu ka ta tra pruvetu di bus amigu na kongregason pa bu pode ganha dinheru.
16. (a) Kuzê ki ‘ka bebe txeu vinhu’ krê fla? (b) Kuzê ki krê fla ten “un konsénsia linpu”?
16 ‘Ka bebe txeu vinhu’ krê fla ma bu ka pode bebe txeu bebida alkólika i nen bu ka debe ten fama di un algen ki ta bebe txeu. Ten “un konsénsia linpu” krê fla ma bu ta vive di akordu ku leis di Jeová. Enbóra bo é ka perfeitu bu ten un bon amizadi ku Jeová i kel-li ta pô-u ta xinti pas déntu bo.
17. Modi ki un irmon pode mostra ma el “ten kapasidadi”? (1 Timótiu 3:10; Odja fotu.)
17 Ansions ‘debe djobe si bu ten kapasidadi’ di kuida dretu di bus responsabilidadi i si es pode kunfia na bo. Pur isu, óras ki ansions da-u un diziginason, sigi ku kuidadu kes instruson i orientasons ki organizason ta da. Tenta intende kuzê ki sta involvidu na faze kel trabadju i kantu ténpu ki ta leba pa bu tirmina-l. Óras ki bu ta sforsa pa bu kunpri kada diziginason ki bu dadu otus irmon na kongregason ta repara kel-li i es ta fika kontenti ku prugrésu ki bu sta faze. Ansions, nhos meste sta sienti pa trena kes irmon batizadu. (Lé 1 Timótiu 3:10.) Na bu kongregason ten jóvens batizadu ki ten uns 13 anu ô ménus? Es ta kustuma faze studu pesoal i pripara pa runions? Sénpri es ta da komentáriu na runion i es ta partisipa na pregason? Si respósta pa kes pergunta li é sin, da-s diziginasons ki es ta konsigi faze di akordu ku ses idadi. Di kel manera li, es ta mostra ma “es ten kapasidadi.” Dipôs, óras ki es ten entri 17 i 19 anu es pode diziginadu pa ser ajudanti di kongregason.
Óras ki ansions ta da kes irmon batizadu diziginasons, es ta pode odja si es “ten kapasidadi.” (Odja parágrafu 17.)
18. Kuzê ki krê fla “ka sta akuzadu di nada”?
18 “Ka sta akuzadu di nada” krê fla ma ningen ka ten motivu pa akuza-u ma bu faze kuzas mariadu. É klaru ki pesoas pode konta mintira sobri sérvus di Jeová. Kel-li kontise ti mésmu ku Jizus i el fla ma se sigidoris ta ben pasaba pa mésmu kuza. (Juan 15:20) Má, si bu ten un konportamentu linpu sima Jizus tevi, bu ta ganha un bon nómi na kongregason. — Mat. 11:19.
19. Óras ki Bíblia ta fla ma ómi debe “ser maridu sô di un mudjer” kuzê ki el krê fla?
19 “Maridu sô di un mudjer”. Kantu Jeová faze kel primeru kazamentu, el fla ma kazamentu debe ser entri un ómi ku un mudjer. É kel-li ki tudu sérvus di Jeová debe sigi. (Mat. 19:3-9) Un ómi ki ta sirbi Jeová, nunka ka debe faze konportamentu seksual mariadu. (Ebr. 13:4) Kel-li krê fla ma sénpri el debe ser lial pa se mudjer. Nton, nunka el ka debe mostra interesi romántiku pa otus mudjer. — Jó 31:1.
20. Modi ki un irmon pode “toma kónta dretu” di se família?
20 “Toma kónta dretu di ses fidjus i di ses própi família.” Si bu é un xéfi di família bu debe kunpri dretu ku bus responsabilidadi na família. Faze adorason na família sénpri. Sénpri ki bu ta pode, sai na pregason ku kada algen di bu família. Djuda bus fidju dizenvolve un amizadi fórti ku Jeová. (Efé. 6:4) Un ómi ki ta kuida di se família ta mostra ma el pode kuida di kongregason. — Konpara ku 1 Timótiu 3:5.
21. Kuzê ki bu pode faze si inda bo é ka ajudanti di kongregason?
21 Irmons, si inda nhos é ka ajudantis di kongregason, favor nhos faze orason i nhos analiza kes informason ki sta na kel studu li. Studa kes kualidadi ki un ajudanti di kongregason meste ten i dipôs sforsa pa bu dizenvolve-s. Pensa na modi ki bu ta ama Jeová i bus irmon ku irmans. Bira bu amor pa bus irmon ku irmans más fórti i pensa na pamodi ki bu krê sirbi-s. (1 Ped. 4:8, 10) Sforsa pa bu ser ajudanti di kongregason i bu ta ten txeu alegria na sirbi bus irmon na kongregason. Bu pode ten serteza ma Jeová ta abênsua sforsu ki bu sta ta faze pa bira ajudanti di kongregason! — Flp. 2:13.
KÁNTIKU 17 ‘N krê sin’
a SPLIKASON DI FOTU KU DIZENHU: Na skerda, Jizus sta ta sirbi se disiplus ku umildadi, na ladu direita un ajudanti di kongregason sta ta djuda un irmon ki dja sta algen grandi.
