1, 2. (a) Kal ki éra trabadju más inportanti na vida di Jizus i pamodi? (b) Ki feraméntas ‘kolaboradoris di Deus’ meste prende uza dretu?

JIZUS KRISTU éra karpinteru i instrutor. (Mar. 6:3; João 13:13 ) El éra un bon karpinteru i el prende uza kes feraménta pa faze bons trabadju di madera. Tanbê el éra un bon instrutor di notísias sábi, pamodi el sabia uzaba se konhisimentu di Skrituras pa djudaba pesoas prende verdadi di Palavra di Deus. (Mat. 7:28; Luc. 24:32, 45) Kantu Jizus tinha 30 anu, el para di ser karpinteru i el bira un instrutor pamodi el sabia ma kel-la éra trabadju más inportanti ki el tinha ki fazeba. El fla ma un di kes razon prinsipal ki Deus manda-l pa Téra, éra prega notísias sábi di Reinu di Deus. (Mat. 20:28; Luc. 3:23; 4:43) El uza se vida pa prega notísias sábi, i el kreba pa otus algen fazeba mésmu kuza ki el. — Mat. 9:35-38.

² Talvês nos é ka karpinteru, má nos tudu nu ta inxina notísias sábi. Kel-li é un trabadju txeu inportanti ki própi Jeová ta partisipa na el. Aliás, Bíblia ta fla ma ‘nos é kolaboradoris di Deus.’ (1 Cor. 3:9; 2 Cor. 6:4) Nu sabe ma ‘verdadi é kel párti prinsipal di palavra di [Jeová]’. (Sal. 119:159, 160) É pur isu ki nu krê ‘uza palavra di verdadi dretu’ na nos pregason. (Lé 2 Timóteo 2:15.) Má pa kel-li, nu meste midjora nos manera di uza Bíblia i kes feraménta prinsipal  pa inxina verdadi sobri Jeová, Jizus i Reinu. Pa djuda-nu ten bon rezultadu na nos pregason, organizason di Jeová faze otus feraménta ki nu meste konxe dretu. Kes feraménta li sta djuntu ku kes feraménta prinsipal pa inxina.

3. (a) Kal ki debe ser nos obijetivu óras ki nu sta na pregason? (b) Di akordu ku Atos 13:48 , kenha ki nu debe djobe?

³ Dja bu repara ma es ta txomadu di feraméntas prinsipal pa inxina envês di feraméntas pa pregason? Pamodi? Pamodi palavra “prega” siginifika pâpia sobri un mensaji, má palavra “inxina” siginifika splika un mensaji di un manera ki algen ta ntende. Asi pa kel algen pode faze sima el prende. Na kel poku ténpu ki nu ta sta na pregason, nos obijetivu é kumesa un studu di Bíblia i inxina kes algen verdadi. Kel-li krê fla ma nu ten ki faze txeu sforsu pa nu djobe kes algen ki ten ‘inklinason pa vive pa tudu ténpu’ i djuda-s kumesa ta sirbi Jeová. — Lé Atos 13:44-48.

4. Modi ki bu pode atxa kes algen ki ten ‘inklinason pa vive pa tudu ténpu’?

⁴ Modi ki nu pode atxa kes algen ki ten ‘inklinason pa vive pa tudu ténpu’? Na ténpu di apóstlus, úniku manera di atxaba kes algen éra através di pregason. Nton nu meste faze sima Jizus fla: ‘Na kalker sidadi ô zóna ki nhos entra, nhos djobe kel algen ki merese’. (Mat. 10:11) Nu ka debe spéra ma kes algen orgulhozu i ki ka krê prende sobri Deus ta seta notísias sábi. Nu debe djobe kes algen ki é sinseru, umildi i ki krê konxe verdadi. Nu pode konpara kel trabadju li ku kel ki Jizus ta fazeba kantu el éra karpinteru. Antis di el fazeba un pésa, un mobília, un pórta, un kanga ô otus kuza, el ta ba djobeba kel madera sértu. Óras ki el atxaba kel madera, el ta uzaba se feraméntas ku se kapasidadi pa el faze kel trabadju. Nu meste faze mésmu kuza na nos trabadju di pregason. Primeru, nu meste atxa kes algen ki krê konxe verdadi i dipôs uza nos feraméntas i nos kapasidadi pa djuda-s ser un disiplu. — Mat. 28:19, 20.

5. Kuzê ki nu meste sabe sobri kes feraménta ki nu dadu? Da un izénplu. (Odja fotu na komésu di studu.)

⁵ Kada feraménta ten se obijetivu. Pur izénplu, pensa na kes feraménta ki Jizus ta uzaba kantu el éra karpinteru. * El mesteba feraménta pa tra midida, pa faze markason, pa korta, pa fra ô pa faze un pésa i tanbê pa nivela i pa djunta kes pésa. Di mésmu manera, nu meste sabe kal ki é obijetivu di kada un di kes feraménta prinsipal pa inxina ki nu ten. Nton nu ben konxe más dretu kes feraménta ki nu dadu.

6, 7. (a) Modi ki bu sta ta uza kartons di kontatu? (b) Kal ki é kes dôs obijetivu di konvitis pa runion?

⁶ Kartons di kontatu. Es é un feraménta pikinoti má es é txeu inportanti. Es ta djuda pesoas sabe anos é kenha i entra na nos site jw.org. Na nos site kes algen pode sabe más txeu sobri nos i ti pidi un studu di Bíblia. Ti gósi, dja pididu más di 400 mil studu di Bíblia na nos site jw.org, i ta fazedu más di senténas di pididu tudu dia. Bu pode tene sénpri djuntu ku bo un karton di kontatu, asi óras ki parse un xansi bu pode uza-s pa da tistimunhu.

⁷ Konvitis. Nos konviti pa runion ten  dôs obijetivu. El ta fla: “Bu sta konvidadu pa studa Bíblia ku Tistimunhas di Jeová”. Tanbê el ta fla ma kel algen pode faze un studu di Bíblia na nos “runion pa públiku” ô “djuntu ku un algen”. Kel konviti li ta djuda pesoas sabe anos é kenha, má tanbê el ta konvida kes algen ki ten ‘konsénsia di ses nisisidadi spritual’ pa studa Bíblia ku nos. (Mat. 5:3) É klaru ki nu ta resebe dretu tudu algen ki ta ba runion, ka ta nporta si es krê studa Bíblia ô nau. Si es sisti runion, es ta odja ma es pode prende txeu kuza na Bíblia.

8. Pamodi ki é inportanti pesoas sisti peloménus un runion?

⁸ É txeu inportanti nu kontinua ta konvida pesoas pa nos runion. Pamodi? Pamodi si es sisti peloménus un di nos runion, es ta odja klaru ma Tistimunhas di Jeová é diferenti di relijions falsu. Es ta inxina verdadis di Bíblia i es ta djuda pesoas konxe Deus. (Isa. 65:13) Pur izénplu, un kazal ki ta vive na Mérka ki txoma Ray ku Linda, odja kel diferénsa li alguns anu atras. Es ta kridita na Deus i es krê konxeba el más dretu. Nton es disidi vizita tudu igreja di ses sidadi i odja dôs kuza diferenti antis di es disidi faze párti di es. Primeru, es tinha ki prendeba algun kuza na kel igreja. Sugundu, kes algen di kel igreja debe bisti sima kes algen ki ta fla ma es ta sirbi Deus. Es pasa alguns anu ta faze kel-li, pamodi tinha txeu igreja na ses sidadi. Má, es ka atxa kel ki es staba ta djobe. Es ka prende nada i gentis di kes igreja ta bistiba sen ruspetu. Dipôs ki es vizita kel últimu igreja na ses lista, Linda bai pa se trabadju i Ray bai pa kaza. Na kaminhu di kaza, el pasa bera di un Salon di Reinu na se karu i el pensa: ‘Dexa-m entra pa N odja modi ki es é.’ É klaru ki kel-li foi midjór ki tudu kes otu! Tudu algen na Salon di Reinu éra idukadu, amigu di kunpanheru i es staba ben bistidu. Ray staba xintadu la na frenti i el gosta txeu di kuza ki el prende! É sima apóstlu Polu fla sobri kes algen ki ta sisti runion pa primeru bês. Es ta fika dimiradu i es ta fla: ‘Deus sta na nhos meiu mê.’ (1 Cor. 14:23-25) Désdi kel dia, Ray fika ta sisti runion tudu dumingu i dipôs el kumesa ta sisti runion na meiu di simana. Linda tanbê kumesa ta sisti runion. Nbóra es staba ku más di 70 anu, es seta studa Bíblia i es batiza.

9, 10. (a) Pamodi ki kes folhetu é faxi di uza? (b) Splika modi ki ta uzadu folhetu Kuzê ki é Reinu di Deus?.

⁹ Folhetus. Nu ten 8 folhetu pa djuda-nu kumesa un konbérsu i é faxi di uza-s. Désdi ki lansadu kes primeru folhetu na 2013, dja inprimidu más di sinku bilhon. Basta bu prende uza un di kes folhetu, bu ta prende uza tudu kes otu pamodi es é tudu igual. Modi ki bu pode uza un di kes folhetu pa kumesa un konbérsu?

¹⁰ Imajina ma bu krê uza kel folhetu Kuzê ki é Reinu di Deus?. Mostra kel pergunta ki sta na frenti di folhetu i fla: “Dja bu kustuma pergunta kuzê ki é Reinu di Deus? Bu ta atxa ma é. . . ?” Pergunta-l kal di kes três respósta el ta skodjeba. Ka ta nporta si el responde dretu ô mariadu, abri folhetu na kel párti “Kuzê ki Bíblia ta fla”. Lé Daniel 2:44 i Isaías 9:6 i si da, kontinua konbérsu. Na fin, mostra kel pergunta ki sta na últimu pájina di folhetu dibaxu di  subtéma “Pensa na kel pergunta li”: “Modi ki vida ta ben ser dibaxu di Reinu di Deus?” Asi dja bu tene un asuntu di pâpia na revizita. Óras ki bu torna bai na kel algen, mostra-l lison 7 di bruxura Notísias sábi di Deus pa bo!, ki é un di kes feraménta pa kumesa un studu di Bíblia.

11. Kal ki é obijetivu di nos revista i kuzê ki nu meste sabe sobri es?

¹¹ Revistas. Sentinéla ku Despertai! é kes revista ki más ta traduzidu i ta inprimidu na mundu! Dja ki pesoas di mundu interu ta lé kes revista, ta skodjedu asuntus ki ta interesa pesoas di tudu lugar. Nu pode uza kes revista pa djuda pesoas odja kuzê ki é más inportanti na vida. Má primeru nu debe sabe ki tipu di revista ta interesa kes algen.

12. (a) Revista Despertai! é pa kenha i kal ki é se obijetivu? (b) Ki bons rezultadu dja bu konsigi na uza es feraménta?

¹² Despertai! é pa kes algen ki sabe poku sobri Bíblia ô ki ka sabe nada. Talvês es ka sabe nada sobri kuzê ki kristons ta inxina, es ka ta kúnfia na relijion i es ta atxa ma Bíblia ka pode djuda-s. Un di kes obijetivu prinsipal di Despertai! é konvense kes algen ma Deus ta izisti. (Rom. 1:20; Heb. 11:6) Tanbê el pode djuda kes algen ten fé ma Bíblia é Palavra di Deus. (1 Tes. 2:13) Kes três asuntu di kapa di Despertai! di anu 2018 éra: “O caminho para a felicidade”, “12 segredos para uma família ser feliz” i “Como lidar com a dor da morte”.

13. (a) Kal ki é obijetivu di Sentinéla pa públiku? (b) Ki bons rezultadu dja bu konsigi na uza es feraménta?

¹³ Sentinéla pa públiku, é pa kes algen ki ten algun ruspetu pa Deus i pa Bíblia. Talvês es sabe algun kuza sobri Bíblia, má es ka ta ntende dretu kuzê ki el ta inxina. (Rom. 10:2; 1 Tim. 2:3, 4) Kes três asuntu di kapa di Sentinéla pa públiku, di anu 2018 responde kes pergunta li: “Será que a Bíblia ainda é útil?”, “É possível saber o futuro?” i “Será que Deus se importa com você?”.

14. (a) Kal ki é obijetivu di kes kuatu vídiu di nos feraméntas prinsipal pa inxina? (b) Ki bons rezultadu dja bu konsigi na uza kes vídiu?

¹⁴ Vídius. Na ténpu di Jizus, un karpinteru tinha feraméntas ki ta funsionaba sô ku mô. Má oji, karpinterus ten feraméntas ilétriku, sima séra, barbukin, lixadera, parafuzadera i otus kuza. Di mésmu manera oji, nu ten publikasons inprimidu, má tanbê nu ten kuatu vídiu bunitu na nos feraméntas pa inxina: Pamodi ki nu debe studa Bíblia?, Kuzê ki é un studu di Bíblia?, Kuzê ki ta kontise na un Salon di Reinu? i Ken ki é Tistimunhas di Jeová?. Kes vídiu ki ten ménus di dôs minutu é bon pa mostra na primeru vizita. Kes vídiu más kunpridu pode uzadu na revizita i pa kes algen ki tene más ténpu. Kes vídiu li é bons feraménta pamodi es pode motiva pesoas pa studa Bíblia i pa sisti runion.

15. Da un izénplu ki ta mostra ma odja vídiu na nos língua ta da bon rezultadu.

¹⁵ Pur izénplu, un irman pâpia ku un mudjer ki muda pa Mikronézia i ki se língua é iapês. Nos irman mostra-l vídiu Pamodi ki nu debe studa Bíblia?, na se língua. Kantu vídiu kumesa, kel mudjer fla: “Kel-li é nha língua. N ka ta kridita! N ta konsigi odja na se manera di pâpia ma el é di nha ilha. El ta pâpia nha língua!” Dipôs di kel-li, el fla ma el ta ba lé  i odja tudu kuza ki sta na se língua na jw.org. (Konpara ku Atos 2:8, 11.) Odja otu spiriénsa. Un irman na Mérka, manda se subrinhu un link di kel mésmu vídiu na se língua. El odja vídiu i el manda se tia un e-mail ta fla: “N gosta txeu di kel párti ki ta fla ma mundu sta kontroladu pa malvadu. Dja N pidi un studu di Bíblia.” Se subrinhu ta vive na un lugar ki nos irmons ten poku liberdadi pa prega!

16. Fla kal ki é obijetivu di kada un di kes bruxura li: (a) Obi ku Deus pa bu vive pa tudu ténpu. (b) Notísias sábi di Deus pa bo! (c) Ken ki sta ta faze vontadi di Jeová gósi?

¹⁶ Bruxuras. Modi ki bu pode inxina verdadis pa un algen ki ka ta lé dretu ô ki ka ten publikasons di Bíblia na se língua? Bruxura Obi ku Deus pa bu vive pa tudu ténpu  * é un feraménta pa kel-li. Un otu bon feraménta pa djuda-nu kumesa un studu di Bíblia é bruxura Notísias sábi di Deus pa bo! Bu pode mostra un algen kes 14 asuntu ki sta na últimu pájina i pidi-l pa el skodje kal ki el gosta más. Dipôs, kumesa un studu di Bíblia na kel lison. Dja bu kustuma faze kel-li na bus revizita? Kel tirseru bruxura di nos feraméntas é Ken ki sta ta faze vontadi di Jeová gósi?. El fazedu pa djuda studantis konxe nos organizason. Si bu krê sabe modi ki bu ta uza-l óras ki bu ta faze studu di Bíblia, odja Folhetu di studu Nos vida i nos trabadju di pregason, di marsu di 2017.

17. (a) Kal ki é obijetivu prinsipal di kada un di kes livru di studu? (b) Kuzê ki tudu kes algen ki batiza meste faze i pamodi?

¹⁷ Livrus. Dipôs ki bu kumesa un studu di Bíblia na un bruxura, bu pode disidi kal ki é midjór momentu pa nhos pasa pa livru Kuzê ki nu pode prende na Bíblia?. Kel feraménta li fazedu pa djuda un algen ntende kes ensinu prinsipal di Bíblia. Si kel studanti finda kel livru i el kontinua ta faze prugrésu, bu pode kontinua ta faze-l studu na livru Kontinua ta ama Deus. Kel feraménta li ta inxina studanti modi ki el pode vive sima Bíblia ta fla. Ka bu skese ma mésmu dipôs ki kel studanti batiza, el meste kontinua ta studa kes dôs livru ti finda. Kel-li ta djuda-l ten un fé fórti na Jeová i kontinua lial pa el. — Lé Colossenses 2:6, 7.

18. (a) Kuzê ki 1 Timóteo 4:16 ta insentiva-nu pa nu faze i kal ki é rezultadu? (b) Kal ki debe ser nos obijetivu óras ki nu ta uza kes feraménta prinsipal pa inxina?

¹⁸ Anos ki é Tistimunhas di Jeová, nu ten responsabilidadi di inxina ‘mensaji di verdadi, kes notísia sábi’ ki pode djuda kes algen ten vida pa tudu ténpu. (Col. 1:5; lé 1 Timóteo 4:16.) É pur isu ki nu dadu kes feraménta prinsipal pa inxina, ki é tudu kel ki nu meste. (Odja kuadru “ Feraméntas prinsipal pa inxina”.) Uza kes feraménta li sénpri ki bu pode. Kada publikador ten ki disidi ki publikason di kes feraménta el ta uza pa kumesa konbérsu ku un algen ki mostra interesi i na ki momentu ki el ta oferese-l. Má nos obijetivu é ka sô da publikason. Tanbê nu ka krê da nos publikason pa kes algen ki ka ten interesi. Nos obijetivu é faze disiplus. Nu krê djuda kes algen ki é sinseru, umildi, ki krê prende verdadi sobri Deus, tudu kes ki ten ‘inklinason pa vive pa tudu ténpu’. — Atos 13:48 ; Mat. 28:19, 20.