1. Pamodi ki Jeová merese pa nu adora sô el?

 JEOVÁ merese pa nu adora sô el pamodi el é nos Kriador i é el ki da-nu vida. (Apo. 4:11) Má, ten un prigu. Sikrê nu ta ama i nu ta ruspeta Jeová, nu pode dexa otus kuza tra-nu nos adorason ki nu debe da sô el. Nu meste ntende modi ki kel-la pode kontise. Má primeru nu sta ben odja kuzê ki siginifika adora sô Jeová.

2. Di akordu ku Êxodo 34:14, kuzê ki nu ta faze si nu ta adora sô Jeová?

² Na Bíblia, ten un amor fórti pa Jeová sta ligadu ku adora sô el. Nu ka ta dexa nada i nen ningen toma se lugar na nos korason. — Lé Êxodo 34:14.

3. Pamodi ki nos adorason pa Jeová é ka ségu?

³ Nos adorason pa Jeová é ka ségu. Pamodi? Pamodi el ten bazi na próvas, na kuzas ki nu prende sobri el. Nu konxe i nu ta dimira se kualidadis bunitu. Nu sabe kuzê ki Jeová gosta i kuzê ki el ka gosta i nu ta konkorda ku el. Nu ta ntende i nu ta apoia obijetivu ki el ten pa nos. É un ónra pa nos pamodi el ta da-nu xansi di ser se amigu. (Sal. 25:14) Tudu kuza ki nu ta prende sobri nos Kriador ta pô-nu ta bira más se amigu. — Tia. 4:8.

4. (a) Kuzê ki Diabu ta uza pa bira nos amor pa Jeová fraku? (b) Kuzê ki nu sta ben odja na kel studu li?

⁴ Diabu sta kontrola es mundu i el ta uza-l pa djobe kal ki é nos dizejus normal i nos frakézas. (Efé. 2:1-3; 1 João 5:19 ) Kuzê ki más el krê é dividi nos korason. Si nos korason sta divididu, nu ka ta konsigi adora sô Jeová.  Na kel studu li, nu sta ben odja dôs manera ki Satanás ta uza pa faze kel-li. Primeru, el ta tenta pô-nu ta ama dinheru, i sugundu, el ta krê pa nu skodje diverson mariadu.

5. Pamodi ki nu debe toma kuidadu pa nu ka kria amor pa dinheru?

⁵ Nos tudu nu ta krê ten kumida tudu dia, ropa dretu pa bisti i un lugar dretu pa mora. Má, nu meste toma kuidadu pa nu ka kumesa ta ama dinheru. Txeu algen ki ta faze párti di mundu di Satanás ‘ta ama dinheru’ i kuzas ki dinheru pode kunpra. (2 Tim. 3:2) Jizus sabia ma se sigidoris podia sérba tentadu na kria es amor. Pur isu, el fla: ‘Ningen ka pode ser skravu di dôs sinhor; pamodi ô el ta ôdia un i el ta ama kel otu, ô el ta pega un i el ta dispreza kel otu. Nhos ka pode ser skravu di Deus i di Rikézas.’ (Mat. 6:24) Un algen ki ta adora Jeová i ki tanbê ta gasta txeu ténpu i forsa ta tenta ganha rikéza na es mundu li, di algun manera, el sta ta tenta sirbi dôs sinhor. El ka sta ta adora sô Jeová.

6. Kuzê ki nu ta prende di palavras di Jizus pa kongregason na Laodisea?

⁶ Pa vólta di anu 100 D.J., tinha un kongregason na sidadi di Laodisea. Kes algen di kel kongregason fla ku orgulhu: ‘Ami é riku, N djunta rikézas i N ka meste di nada.’ Má pa Jeová i pa Jizus, es éra ‘mizeriadu, koitadu, póbri, ségu i nu’. Jizus ka konsedja-s pamodi es éra riku, má pamodi amor ki es tinha pa rikézas staba ta prujudika ses amizadi ku Jeová. (Apo. 3:14-17) Si nu da kónta ma na nos korason sta ta kria amor pa dinheru, nu ten ki aji faxi pa nu koriji  nos manera di pensa. (1 Tim. 6:7, 8) Si nu ka faze kel-li, nos korason ta fika divididu i Jeová ka ta seta nos adorason. El ta ‘iziji pa nu adora sô el.’ (Deut. 4:24) Má, modi ki dinheru pode bira inportanti dimás na nos vida?

7-9. Kuzê ki bu prende di izénplu di un ansion ki txoma David ?

⁷ Odja izénplu di David, un ansion ki ta mora na Mérka. El ta fla ma el éra un bon trabadjador. Kel enpréza ki el ta trabadjaba na el, subi-l di postu i ti el fika konxedu kómu un di kes midjór algen di kel país ki ta fazeba kel trabadju. David fla: “Na kel ténpu, N ta pensaba ma kes rekonpénsa éra un próva ma Jeová staba ta abensua-m.” Má kel-li éra verdadi?

⁸ David kumesa ta da kónta ma se trabadju staba ta prujudika se amizadi ku Jeová. El fla: “Óras ki N ta staba na runion i ti na pregason, N ta fikaba tudu óra ta pensa na prublémas di trabadju. N staba ta ganha txeu dinheru, má N staba ta fika preokupadu dimás i ku prublémas na kazamentu.”

⁹ David odja ma el meste disidiba kuzê ki éra más inportanti pa el. El fla: “N disidi ma éra óra di koriji nha situason.” David kria fazeba alguns mudansa na se oráriu di trabadju, i el pâpia ku se xéfi sobri kel-li. Kal ki foi rezultadu? David perde trabadju! Kuzê ki el faze? El fla: “Na kel otu dia, N prenxe pitison pa ser pioneru ajudanti na kel mês i na kes otu mês más pa frenti.” Dipôs di un ténpu, el bira pioneru fíksu i más tardi se mudjer tanbê. Pa es sustenta, es kumesa ta faze trabadju di linpéza na alguns prédiu. Kel-li é un trabadju ki txeu  algen ka ta da valor. Má, pa David ku se mudjer, más inportanti ka é tipu di trabadju ki es ta faze, má é poi sirvisu di Jeová na primeru lugar. Sikrê es ta ganha más poku di kel ki es ta ganhaba antis, tudu mês es ten kel ki es meste pa paga ses dispéza. Es krê poi Jeová na primeru lugar i es sta ta xinti modi ki el ta kuida di kes ki ta buska Reinu primeru. — Mat. 6:31-33.

10. Modi ki nu pode proteje nos korason?

¹⁰ Ka ta nporta si nos é riku ô póbri, nos tudu nu ten ki proteje nos korason. Modi? Ka bu dexa amor pa dinheru kria na bu korason. I ka bu dexa bu trabadju bira más inportanti na bu vida di ki bu sirvisu pa Jeová. Modi ki bu pode sabe si kel-li sta ta kontise ku bo? Faze alguns pergunta: ‘Óras ki N sta na runion ô na pregason, N ta fika sô ta pensa na trabadju? N ta sta sénpri preokupadu na djunta dinheru pa futuru? N sta ta dexa dinheru ô kuzas material pô-m ta ten prublémas na nha kazamentu? N ta setaba otu trabadju ki otus ka ta da valor, pa N pode ten más ténpu pa N sirbi Jeová?’ (1 Tim. 6:9-12) Óras ki bu ta faze kes pergunta li, lenbra ma Jeová ta ama-u, i el ta faze kel promésa li pa kes ki ta adora sô el: ‘Nunka N ka ta dexa-u i nunka N ka ta bandona-u.’ É pur isu ki apóstlu Polu skrebe: ‘Nhos manera di vive debe sta livri di amor pa dinheru’. — Heb. 13:5, 6.

11. Kuzê ki diverson pode faze ku algen?

¹¹ Jeová krê pa nu pruveta vida. I un kuza ki pode djuda-nu faze kel-li é diverson. Bíblia ta fla ma ‘ka ten nada midjór pa un ómi di ki kume, bebe i goza di se trabadju duru.’ (Ecl. 2:24) Má txeu di kes diverson ki mundu ta oferese pode prujudika-nu. Es ta rabaxa kes lei di konportamentu di pesoas, i es ta insentiva-s seta ô ti ama kes kuza ki Palavra di Deus ta kondena.

12. Di akordu ku 1 Coríntios 10:21, 22, pamodi ki nu debe toma kuidadu óras ki nu ta skodje diverson?

¹² Nu krê adora sô Jeová, pur isu, nu ka pode kume ‘na méza di Jeová’ i ‘na méza di dimónis.’ (Lé 1 Coríntios 10:21, 22.) Kume djuntu ku un algen txeu bês é sinal di amizadi. Si nu skodje diverson ki ta insentiva violénsia,  fitisaria ô bruxaria, konportamentu seksual mariadu ô otus dizeju i konportamentu di karni, na verdadi nu sta ta partisipa di un kumida priparadu pa inimigus di Deus. Kel-la ta prujudika-nu i tanbê ta straga nos amizadi ku Jeová.

13-14. Di akordu ku Tiago 1:14, 15 pamodi ki nu debe toma kuidadu ku diverson ki nu ta skodje? Da un izénplu.

¹³ Di algun manera, nu pode konpara diverson ku un kumida. Óras ki nu ta kume, nu pode skodje kuzê ki nu ta poi na bóka. Má dipôs ki nu inguli kel kumida, nu ka ta pode skodje modi ki el ta ba afeta nos korpu. Na fin, kes kuza ki ta da forsa ta pasa ta faze párti di nos korpu. Un bon kumida pode da-nu bon saúdi. Má un kumida mariadu pode prujudika nos saúdi. Talvês nu ka ta odja lógu kes rezultadu, má di sertéza el ta ben parse ku ténpu.

¹⁴ Ta kontise mésmu kuza óras ki nu ta skodje diverson. Nu pode kontrola kuzê ki nu ta poi déntu di nos menti. Má kuzê ki ta ben kontise dipôs na nos menti i na nos korason nu ka ta pode kontrola. Diverson ki é dretu pode anima-nu, má diverson mariadu ta prujudika-nu. (Lé Tiago 1:14, 15.) Talvês rezultadus di un diverson mariadu ka ta parse lógu, má un dia el ta parse. É pur isu ki Bíblia ta aviza-nu: ‘Ka nhos ngana nhos kabésa: ku Deus ka ta brinkadu. Pamodi é kel ki algen símia, ki el ta kodje tanbê; pamodi kel ki ta símia ta pensa sô na karni, ta ben kodje di karni distruison’. (Gál. 6:7, 8) Di sertéza é inportanti pa nu fika lonji di tudu diverson ki ta insentiva kes kuza ki Jeová ta ôdia! — Sal. 97:10.

15. Ki prezenti Jeová da-nu?

¹⁵ Txeu irmon gosta di odja JW Broadcasting^®, ki é nos prugrama di tilivizon na internet. Un irman ki txoma Marilyn fla: “JW Broadcasting djuda-m ser más puzitivu. I N ka meste toma kuidadu ku kuza ki N ta odja. Óras ki N ta xinti mi sô ô dizanimadu, N ta odja algun diskursu ô Adorason di palmanhan i N ta xinti más nkorajadu. N ta xinti más pértu di Jeová i di se organizason. Prugrama di JW Broadcasting muda-m nha vida!” I bo, bu sta ta uza kel prezenti li ki Jeová da-nu? Alén di kel prugrama ki ta sai tudu mês, JW Broadcasting ten txeu múzika i otus prugrama pa obi, ki ta nkoraja i vídius ki nu pode odja óras ki nu krê.

16-17. Pamodi ki nu debe kontrola kantu ténpu ki nu ta gasta ku diverson i modi ki nu pode faze kel-li?

¹⁶ Nu meste toma kuidadu ka sô ku tipu di diverson má tanbê ku kantu ténpu ki nu sta ta gasta ku el. Si nu ka faze si, nu pode kaba pa gasta más ténpu ta divirti di ki ta sirbi Jeová. Txeu algen ta atxa difísil kontrola kantu ténpu ki es ta gasta ku diverson. Un irman di 18 anu ki txoma Abigail, fla: “Odja tilivizon ta djuda-m relaxa dipôs di un dia kansadu. Má si N ka toma kuidadu, N pode fika txeu óra na frenti di tilivizon.” Un jóven ki txoma Samuel fla: “N da kónta ma N ta odja txeu vídiu pikinoti na internet. N ta kumesa ta odja sô un, má óras ki N da kónta dja pasa uns três ô kuatu óra.”

¹⁷ Modi ki bu pode kontrola kantu ténpu ki bu ta gasta ku diverson? Primeru kuza é sabe kantu ténpu ki bu sta ta gasta ku el. Pamodi ki bu ka ta tenta skrebe duránti un simana kantu ténpu ki bu sta  ta gasta ku diverson? Skrebe na un kalendáriu kantu óra ki bu sta ta gasta na internet, ta odja tilivizon, ta djuga na tablet ô telemóvel. Si bu da kónta ma bu sta ta gasta ténpu dimás, tenta faze un prugrama. Tra ténpu pa faze kes kuza más inportanti primeru i dipôs tra un ténpu pa diverson. Nton pidi Jeová pa djuda-u kunpri bu prugrama. Asi bu ta ten ténpu i forsa pa studa Bíblia, pa faze adorason na família, pa bai runion i pa sai na pregason. Tanbê el ta djuda-u ten un konsénsia trankilu.

18-19. Modi ki nu pode prova ma nu ta adora sô Jeová?

¹⁸ Dipôs ki apóstlu Pedru skrebe sobri fin di mundu di Satanás i sobri kel mundu novu ki sta pa ben, el fla: ‘Nhos ki N ta ama, dja ki nhos sta spéra kes kuza li, nhos faze tudu sforsu pa ti ki enfin el atxa nhos sen mantxa i sen defetu i na pas.’ (2 Ped. 3:14) Óras ki nu ta sigi kel konsedju li i nu ta faze nos midjór pa nu kontinua linpu na nos konportamentu i adora Deus sima el ta krê, nu sta ta mostra ma nu ta adora sô el.

¹⁹ Satanás ku se mundu ta kontinua ta tenta-nu pa nu poi otus kuza na primeru lugar na nos vida envês di Jeová. (Luc. 4:13) Má simé nu ka krê dexa nada tra lugar di Jeová na nos korason. Nu sta disididu na adora sô Jeová pamodi é sô el ki merese!