1. Kal ki é midjór disizon ki un algen pode toma?

KUAZI sénpri disizons ki pai ku mai ta toma ta mexe ku vida di ses fidjus pa txeu ténpu. Si pai ku mai toma disizons mariadu, es pode kria ses fidjus prubléma. Má ses toma bons disizon, es ta djuda ses fidjus ten un vida filís. É klaru ki fidjus meste tanbê toma bons disizon. Kel midjór disizon ki un algen pode toma é sirbi Jeová, ki é nos Pai ki ta ama-nu txeu. — Sal. 73:28.

2. Ki bons disizon Jizus, Juzé i Maria toma?

² Juzé ku Maria, ki éra pai ku mai di Jizus, staba disididu na djuda ses fidjus sirbi Jeová. I kes disizon ki es toma, mostra ma kel-li éra kuza más inportanti na ses vida. (Luc. 2:40, 41, 52) Tanbê, Jizus toma bons disizon na vida ki djuda-l faze kuzê ki Jeová krê pa el fazeba. (Mat. 4:1-10) Jizus bira un algen lial, ki ta mostra bondadi i ki ten koraji. Tudu pai ta fikaba kontenti i orgulhozu di ten un fidju sima el.

3. Ki perguntas nu sta ben responde na kel studu li?

³ Na kel studu li, nu sta ben odja respósta pa kes pergunta li: Ki bons disizon Jeová toma pa Jizus? Kuzê ki pai ku mai pode prende ku kes disizon ki Juzé ku Maria toma? I kuzê ki jóvens pode prende ku kes disizon ki Jizus toma?

4. Ki disizon inportanti Jeová toma pa se Fidju?

⁴ Jeová skodje un bon pai ku un bon mai pa Jizus. (Mat. 1:18-23; Luc. 1:26-38) Maria tinha txeu amor pa  Jeová i pa Skrituras. (Luc. 1:46-55) Tanbê, manera ki Juzé reaji kantu Jeová orienta-l ta mostra ma el ta obiba ku el i ma el krê agradaba el. — Mat. 1:24.

5-6. Pa ki situason Jeová dexa Jizus pasa pa el?

⁵ Repara ma Jeová ka skodje un pai ku un mai riku pa Jizus. Sakrifisiu ki Juzé ku Maria oferese kantu Jizus nase, ta mostra ma es éra póbri. (Luc. 2:24) Talvês Juzé tinha un ofisina pikinoti di karpintaria na ladu di se kaza, na Nazaré. Nton es tinha un vida sinplis, inda más óras ki nu lenbra ma ses família ba ta kria ti txiga na peloménus 7 fidju. — Mat. 13:55, 56.

⁶ Jeová proteje Jizus di alguns prigu, má El ka proteje-l di tudu es. (Mat. 2:13-15) Pur izénplu, Jizus tevi ki lida ku famílias ki ka ta kriditaba na el. Imajina modi ki el fika tristi kantu se própi família, na komésu, ka seta ma el éra Misías. (Mar. 3:21; João 7:5 ) Talvês Jizus tevi ki lida ku mórti di Juzé kantu el éra jóven inda. I dja ki Jizus éra fidju más grandi, talvês el ki fika ta faze kel trabadju ki Juzé ta fazeba. (Mar. 6:3) Sima el ba ta bira grandi, Jizus prende kuida di se família. Pode ser ki el tevi ki trabadja pa apoia-s. Pur isu, el sabia dretu kuzê ki é sta kansadu dipôs di un dia interu di trabadju.

7. (a) Ki perguntas pode djuda un kazal na kriason di fidjus? (b) Modi ki Provérbios 2:1-6, pode djuda pai ku mai trena ses fidjus?

⁷ Si bo é kazadu i bu ta gostaba di ten fidju, pergunta bu kabésa: ‘Anos é algen umildi, ki ta ama Jeová i se Palavra? Jeová ta skodjeba nos pa nu kuidaba di un mininu ki ten txeu valor pa el?’ (Sal. 127:3, 4) Si dja bu ten fidju, pergunta bu kabésa: ‘N sta inxina nhas fidju ma é inportanti ser un bon trabadjador?’ (Ecl. 3:12, 13) ‘Ku txeu prigu ki ten na mundu di Satanás, N sta faze nha midjór pa proteje-s?’ (Pro. 22:3) Bu ka ta konsigi proteje bus fidju di tudu prubléma ki es pode pasa pa el. Kel-li é un kuza inposível. Má bu pode pripara-s pa es sabe lida ku prublémas na vida. Ku amor, inxina-s modi ki es pode kunfia na konsedjus di  Bíblia. (Lé Provérbios 2:1-6.) Pur izénplu, si un algen di bu família para di sirbi Jeová, uza Bíblia pa mostra bus fidju pamodi ki é inportanti nu kontinua sénpri lial pa Jeová. (Sal. 31:23) Ô si móre un algen ki nhos gosta txeu, mostra bus fidju modi ki Bíblia pode djuda-nu lida ku dór i atxa pas. — 2 Cor. 1:3, 4; 2 Tim. 3:16.

8. Ki orientason ki sta na Deuteronómio 6:6, 7, Juzé ku Maria sigi?

⁸ Juzé ku Maria djuda Jizus bira un algen ki ta agradaba Deus. Es sigi orientason ki Jeová ta da pa pai ku mai. (Lé Deuteronómio 6:6, 7.) Juzé ku Maria ta amaba Jeová txeu. I kuza más inportanti pa es éra djudaba ses fidjus ten kel mésmu amor.

9. Ki disizons inportanti Juzé ku Maria toma?

⁹ Juzé ku Maria skodje adora Jeová sénpri djuntu ku ses fidjus. Di sertéza, es ta sistiba kes runion ki es ta fazeba tudu simana na sinagóga, na Nazaré, i tanbê tudu anu es ta ba komemoraba Páskua na Jiruzalen. (Luc. 2:41; 4:16) Duránti kes viaji, talvês Juzé ku Maria ta inxinaba Jizus i kes otu fidju stória di povu di Jeová. I pode ser ki es ta pruvetaba kel kaminhu pa vizitaba alguns lugar ki Skrituras ta pâpia di es. Sima ses família ba ta bira más txeu, talvês ka éra fásil pa Juzé ku Maria mante konsentradu na ses adorason pa Jeová. Má kes benson ki es resebe, ta mostra ma bale péna tudu sforsu ki es faze. Ses família kontinua amigu di Jeová pamodi es poi se adorason na primeru lugar.

10. Kuzê ki pai ku mai pode prende ku Juzé i Maria?

¹⁰ Kuzê ki pai ku mai pode prende ku Juzé i Maria? Más inportanti ki kalker otu kuza, nhos dexa kel ki nhos ta fla i ki nhos ta faze mostra nhos fidjus ma nhos ta ama Jeová txeu. Nhos lenbra sénpri ma kel midjór prezenti ki nhos pode da nhos fidjus é djuda-s ama Jeová. I un di kes lison más inportanti ki nhos pode inxina nhos fidjus é modi ki es pode  studa Bíblia sénpri, faze orason, sisti runion i sai na pregason. (1 Tim. 6:6) É klaru ki nhos ten ki sustenta nhos fidjus. (1 Tim. 5:8) Má, ka nhos skese ma é ka kuzas material ki ta djuda nhos fidjus salva na fin di kel mundu bédju li, má é ses amizadi fórti ku Jeová ki ta djuda-s entra na kel mundu novu. * — Eze. 7:19; 1 Tim. 4:8.

11. (a) Modi ki konsedju ki sta na 1 Timóteo 6:17-19 ta djuda pai ku mai toma bons disizon na kriason di fidjus? (b) Kal ki é alguns obijetivu ki bu família pode ten, i ki bensons es pode resebe? (Odja kuadru “ Kal ki é bus obijetivu?”)

¹¹ É bunitu odja txeu pai ku mai ta toma bons disizon pa djuda ses fidjus ser amigu di Jeová. Sénpri es ta adora Deus djuntu. Es ta sisti runion i kongrésus, i es ta sai na pregason. Alguns família ti ta bai prega na kes tiritóriu ki ta trabadjadu poku. Otus ta faze planu pa vizita Betel ô pa trabadja na konstruson di lugaris ki organizason di Jeová ta uza. Kes família ki ta disidi partisipa na kes trabadju li, talvês ten ki gasta dinheru pa faze kes kuza li. I es pode pasa pa alguns prubléma. Má Jeová ta abensua-s txeu pamodi kel-li. (Lé 1 Timóteo 6:17-19.) Fidjus di kes família li, txeu bês ta kontinua ta faze kes kuza ki es prende duránti tudu ses vida i es ka ta rapende. * — Pro. 10:22.

12. Kuzê ki Jizus tevi ki faze sima el ba ta kria?

¹² Pai di Jizus ki sta na Séu sénpri ta toma bons disizon. Tanbê pai ku mai di Jizus li na Téra toma bons disizon. Má, sima Jizus ba ta kria, el tevi ki skodje kuzê ki el ta fazeba. (Gál. 6:5) Sima nos tudu, el tinha liberdadi di skodje. El podia poba se interesis na primeru lugar. Má envês di kel-li, Jizus skodje mante un bon amizadi ku Jeová. (João 8:29 ) Modi ki izénplu di Jizus pode djuda jóvens oji?

13. Ki disizon inportanti Jizus toma kantu el éra jóven inda?

¹³ Kantu Jizus éra jóven inda, el disidi obi ku Juzé i Maria. Nunka el ka dizobidese se pai ku se mai pamodi el ta atxaba ma el sabia más di ki es. Má, ‘el kontinua ta obi ku es.’ (Luc. 2:51) Tanbê, dja ki Jizus éra kel fidju más grandi, el tinha alguns responsabilidadi. Ta parse ma el faze se midjór pa el kuida di es. Di sertéza, el sforsa txeu pa prende un profison ku se pai di kriason. Di kel  manera li, el ta konsigi djudaba se família.

14. Modi ki nu sabe ma Jizus éra un bon studanti di Palavra di Deus?

¹⁴ Talvês Juzé ku Maria konta Jizus, ma manera ki el nase foi un milagri di Deus i kuzê ki anjus dja flaba di el. (Luc. 2:8-19, 25-38) Má, Jizus ka konforma sô ku kuzê ki el obi; tanbê el ta studaba Skrituras di el pa el. Modi ki nu sabe ma Jizus éra un bon studanti di Palavra di Deus? Pamodi kantu el éra mininu inda, kes instrutor na Jiruzalen ‘fika dimiradu ku se ntendimentu i ku se respóstas.’ (Luc. 2:46, 47) Sô ku 12 anu, Jizus dja provaba se kabésa ma Jeová éra se Pai. — Luc. 2:42, 43, 49.

15. Modi ki Jizus mostra ma el skodje faze vontadi di Jeová?

¹⁵ Kantu Jizus prende kuzê ki Jeová krê pa el fazeba, el disidi seta se diziginason. (João 6:38 ) El sabia ma txeu algen ta ben odiaba el. I sikrê el ka kria pasaba pa kel-li, Jizus disidi obi ku se Pai. Kantu el batiza na anu 29, kel kuza más inportanti na se vida éra fazeba kuzê ki Jeová kreba. (Heb. 10:5-7) I mésmu kantu el staba ta móre na un staka di tortura, Jizus ka skese di se disizon di faze vontadi di se Pai. — João 19:30.

16. Kuzê ki fidjus pode prende ku Jizus?

¹⁶ Obi ku bu pai i ku bu mai. Sima Juzé ku Maria, bu pai ku bu mai é ka perfetu. Má, é Jeová ki da-s responsabilidadi pa es proteje-u i trena-u. Si bu obi ses konsedju i bu ruspeta ses autoridadi, ‘tudu kuza ta kóre dretu ku bo’. — Efé. 6:1-4.

17. Sima sta na Josué 24:15, ki disizon kada jóven debe toma di el pa el?

¹⁷ Disidi kenha ki bu ta sirbi. Bu meste prova bu kabésa ken ki é Jeová, kal ki é se vontadi i modi ki bu pode faze-l na bu vida. (Rom. 12:2) Asi, bu ta pode toma kel disizon más inportanti di bu vida: ki é sirbi Jeová. (Lé Josué 24:15; Ecl. 12:1) Si bu ten ábitu di lé i studa Bíblia, bu amor pa Jeová ta bira más txeu i bu fé na el ta fika más fórti.

18. Kuzê ki jóvens debe skodje faze i kal ki ta ser rezultadu?

 ¹⁸ Skodje poi vontadi di Jeová na primeru lugar na bu vida. Mundu di Satanás ta fla ma pa un algen ser filís el ten ki uza se kapasidadi pa el fika riku. Na verdadi, kes ki ta pensa sô na ganha dinheru, ta ‘poi ses kabésa na txeu sufrimentu.’ (1 Tim. 6:9, 10) Má, si bu obi ku Jeová i bu skodje poi se vontadi na primeru lugar na bu vida, bu ta ten bons rezultadu i ‘bu ta aji ku sabedoria.’ — Jos. 1:8.

19. Kuzê ki pai ku mai debe lenbra?

¹⁹ Pai ku mai, nhos faze nhos midjór pa djuda nhos fidjus skodje sirbi Jeová. Nhos kunfia na el, i el ta djuda nhos toma kes midjór disizon. (Pro. 3:5, 6) Nhos lenbra ma kes kuza ki nhos ta faze, ta mexe ku nhos fidjus más txeu di ki kes kuza ki nhos ta fla. Pur isu, nhos toma disizons ki ta djuda nhos fidjus agrada Jeová.

20. Ki bensons jóvens ta ben resebe si es skodje sirbi Jeová?

²⁰ Jóvens, nhos pai ku nhos mai pode djuda nhos toma bons disizon na vida. Má, agrada Jeová é un kuza ki é sô nhos ki pode faze. Pur isu, nhos imita Jizus i nhos skodje sirbi nhos Pai na Séu ki ta ama nhos. Si nhos faze kel-li, nhos ta ten un vida okupadu, ki bale péna i filís. (1 Tim. 4:16) I na futuru nhos vida ta ser kel más sábi ki ten!