1. Modi ki nu sabe ma trabadju di faze disiplus é un trabadju ki ta salva vida?

TRABADJU di faze disiplus é un trabadju ki ta salva vida! Modi ki nu sabe kel-li? Kantu Jizus da kel órdi ki sta na Mateus 28:19, 20, el fla: ‘Nhos bai i nhos faze disiplus, nhos batiza-s’. Pamodi ki é inportanti nu batiza? Si nu krê salva nu meste batiza. Un algen ki krê batiza ten ki kridita ma sô el ta salva pamodi Jizus móre pa nos i el resusitadu. É pur isu ki apóstlu Pedru fla kristons: ‘Batismu, ta salva nhos gósi, através di resureison di Jizus Kristu.’ (1 Ped. 3:21) Nton, óras ki un novu disiplu ta batiza, el ta ganha xansi di ten salvason.

2. Sima sta na 2 Timóteo 4:1, 2, ki tipu di instrutor nu debe ser?

² Pa faze disiplus, nu meste ‘ten arti di inxina.’ (Lé 2 Timóteo 4:1, 2.) Pamodi? Pamodi Jizus da-nu kel órdi li: ‘Nhos bai i nhos faze disiplus, nhos inxina-s’. Apóstlu Polu fla ma nu meste ‘kontinua’ na es trabadju, ‘pamodi óras ki nu faze si nu ta salva nos kabésa i kes ki ta obi-nu.’ É pur isu ki Polu tinha bon motivu pa flaba: ‘Presta txeu atenson na bu manera di inxina.’ (1 Tim. 4:16) Dja ki pa faze disiplus nu meste inxina, nu krê pa nos manera di inxina ser kel midjór.

3. Na kel studu li, kuzê ki nu sta ben odja sobri faze studus di Bíblia?

³ Nu sta studa Bíblia ku milhons di algen na mundu interu. Má, sima nu odja na kel studu ki pasa, nu krê sabe modi ki nu pode djuda más di kes algen li bira disiplus batizadu di Jizus Kristu. Na kel studu li, nu sta ben odja más sinku kuza ki tudu instrutor meste faze pa  djuda un studanti faze prugrésu i batiza.

4. Pamodi ki un instrutor ka debe pâpia txeu óras ki el ta faze un studu di Bíblia? (Tanbê odja nóta di rodapé.)

⁴ Nu gosta txeu di inxina kuzê ki sta na Bíblia. Pur isu, nu pode krê pâpia txeu di kel kuza ki nu gosta. Má ken ki ta faze Studu di Sentinéla, Studu di Bíblia na kongregason ô faze un algen studu, ka debe pâpia txeu dimás. Pa dexa Bíblia inxina, un instrutor debe kontrola pa el ka splika tudu kuza ki el sabe sobri un testu di Bíblia ô un asuntu. * (João 16:12 ) Konpara kel konhisimentu di Bíblia ki bu tinha kantu bu batiza, ku kel ki bu sabe gósi. Na kel ténpu, bu sabeba sô kes verdadi prinsipal di Bíblia. (Heb. 6:1) Leba alguns anu pa bu prende kuzê ki bu sabe oji. Pur isu, ka bu tenta inxina un studanti tudu kuza ki bu sabe di un bês.

5. (a) Sima sta na 1 Tessalonicenses 2:13, kuzê ki nu krê pa nos studanti ntende? (b) Modi ki nu pode insentiva un studanti pa pâpia sobri kuzê ki el sta prende?

⁵ Nu krê pa nos studanti ntende ma tudu kuza ki el sta prende sta na Bíblia. (Lé 1 Tessalonicenses 2:13.) Modi ki nu pode faze kel-li? Insentiva bu studanti pa pâpia di kuzê ki el sta prende. Envês di sta sénpri ta splika-l testus di Bíblia, pidi-l pa el splika-u alguns di kes testu. Djuda bu studanti odja modi ki el pode uza Palavra di Deus na se vida. Faze-l perguntas pa sabe kuzê ki el ta pensa i xinti sobri alguns testu di Bíblia ki el lé. (Luc. 10:25-28) Pur izénplu, pergunta-l: “Modi ki kel testu li ta djuda-u odja un di kes kualidadi di Jeová?” “Modi ki kel verdadi di Bíblia li pode djuda-u?” “Kuzê ki bu ta atxa di kuza ki bu prende gósi?” (Pro. 20:5) Ka ta nporta kantu kuza ki un studanti sabe, más inportanti inda é si el ta ama txeu kes kuza ki el sabe i si el ta faze sima el prende.

6. Pamodi ki é bon pidi un instrutor ku más spiriénsa pa bai ku nos faze un studu di Bíblia?

⁶ Bu ta kustuma pidi kes instrutor ku más spiriénsa pa bai ku bo faze un studu di Bíblia? Si bu ta faze si, pergunta-s kuzê ki es atxa di manera ki bu faze studu i si bu dexa Bíblia inxina. Si bu krê midjora bu manera di inxina, bu meste ser umildi. (Konpara ku Atos 18:24-26.) Dipôs, pergunta kel publikador ku más  spiriénsa si el ta atxa ma bu studanti sta ntende kuzê ki el sta prende. Tanbê, si bu ka ta pode faze kel studu pa un simana ô más, pidi kel publikador ku más spiriénsa pa faze-u el. Asi, kel studu ka ta para i bu studanti ta ntende ma se studu é inportanti. Nunka ka bu pensa ma un studanti é di “bo” i ma ningen más ka pode faze-l studu. Di sertéza, bu krê kel ki é midjór pa studanti i pa el kontinua ta prende más sobri verdadi.

7. Kuzê ki ta djuda un studanti ama kes kuza ki el sta prende?

⁷ Un studanti meste odja ma bu ta ama i ma bu ta kridita na kes verdadi ki sta na Bíblia. (1 Tes. 1:5) Asi é más faxi el ama kes kuza ki el sta prende. Tanbê óras ki ta da, fla-l modi ki algun prinsípiu di Bíblia dja djuda-u. Kel-li ta pô-l ta odja ma konsedjus di Bíblia pode djuda-l tanbê.

8. Kuzê más ki bu pode faze pa djuda bu studanti di Bíblia, i pamodi ki é bon bu faze kel-li?

⁸ Si bu studanti sta pasa pa prublémas, konta-l spiriénsa di irmons ki pasa pa mésmu prublémas i modi ki es konsigi lida ku es. Konvida un irmon di kongregason, ki pode ser un bon izénplu pa kel studanti, pa bai ku bo faze kel studu. Bu pode uza kes stória di vida ki ta nkoraja, ki sta na párti “Bíblia ta muda vida di algen”. * Kes tipu di artigu i vídius li ta djuda bu studanti odja pamodi ki é bon sigi prinsípius di Bíblia na se vida.

9. Modi ki bu pode insentiva un studanti pa pâpia ku se família i amigus sobri kuzê ki el sta prende?

⁹ Si bu studanti é kazadu, se maridu ô se mudjer sta studa Bíblia tanbê? Si el ka sta studa, konvida-l pa studu. Insentiva bu studanti pa pâpia ku se família i amigus sobri kuzê ki el sta prende. (João 1:40-45 ) Modi? Bu pode pergunta: “Modi ki bu ta splikaba kel verdadi li pa bu família?” ô “Ki testu di Bíblia bu ta uzaba pa prova kel-li pa un amigu?” Di kel manera li, bu sta trena bu studanti pa ser un instrutor. I óras ki el sta priparadu, el pode kumesa ta prega djuntu ku kongregason sima un publikador ki é ka batizadu. Pergunta bu studanti si el konxe algun algen ki ta gostaba di studa Bíblia. Si el konxe, tenta pâpia ku kel algen  más faxi ki bu pode i oferese-l un studu di Bíblia. Mostra-l vídiu Kuzê ki é un studu di Bíblia?. *

10. Sima sta na 1 Tessalonicenses 2:7, 8, modi ki un instrutor pode imita izénplu di apóstlu Polu?

¹⁰ Un instrutor meste mostra ma el ta preokupa di verdadi ku se studantis. Odja bu studanti sima un algen ki pode ben bira bu irmon ô bu irman na kongregason. (Lé 1 Tessalonicenses 2:7, 8.) É ka faxi pa es dexa kes amigu di mundu i faze tudu kes mudansa ki es meste pa sirbi Jeová. Nu meste djuda-s atxa amigus di verdadi na kongregason. Ser amigu di bu studanti. Pasa ténpu ku el ka sô duránti studu, má tanbê na otus momentu. Txoma-l, manda-l mensaji ô faze-l un vizita brévi na un dia ki nhos ka ta studa. Asi, el ta odja ma bu ta preokupa ku el di verdadi.

11. Kuzê ki nu krê pa nos studantis atxa na kongregason, i pamodi?

¹¹ Ten un ditadu ki ta fla: “Pa kria un mininu ta mestedu tudu algen na se zóna.” Tanbê nu pode fla: “Pa faze un disiplu ta mestedu tudu algen na kongregason.” É pur isu ki un bon instrutor ta mostra se studanti otus irmon na kongregason, ki pode djuda-l bira más amigu di Jeová. Asi, kel studanti ta ten xansi di sta djuntu ku povu di Deus, ki ta nkoraja-l óras ki el sta pasa pa algun tipu di prubléma. Nu krê pa kada studanti xinti ma el ta faze párti di kongregason i párti di nos família di irmons i irmans. Nu krê pa el xinti kel amor ki kristons verdaderu ta mostra pa kunpanheru. Asi, é más faxi el para di sta djuntu ku kes algen ki ka ta djuda-l ama Jeová. (Pro. 13:20) Si kes algen ki antis éra se amigus ka krê nada ku el, el ta sabe ma el pode atxa amigus di verdadi na organizason di Jeová. — Mar. 10:29, 30; 1 Ped. 4:4.

12. Pamodi ki nu debe pâpia ku un studanti sobri da vida pa Jeová i batiza?

¹² Sénpri fla studanti pamodi ki un algen debe da se vida pa Jeová i batiza. Na verdadi, nu ta studa Bíblia ku un algen pamodi nu krê djuda-l sirbi Jeová i batiza. Dipôs di alguns mês ta studa Bíblia, inda más dipôs di kumesa ta sisti runions, kel studanti debe ntende ma  obijetivu di se studu di Bíblia é djuda-l bira un Tistimunha di Jeová.

13. Kuzê ki un studanti meste faze pa el pode batiza?

¹³ Ten alguns kuza ki un studanti di Bíblia meste faze pa el pode batiza. Primeru, el ta konxe Jeová, el ta prende ama-l i ten fé na El. (João 3:16; 17:3 ) Dipôs, el ta bira amigu di Jeová i tanbê di irmons na kongregason. (Heb. 10:24, 25; Tia. 4:8) Ku ténpu, el ta dexa di faze kes kuza mariadu i el ta rapende di se pekadus. (Atos 3:19 ) Tanbê, se fé ta pô-l ta pâpia ku otus algen sobri kes kuza ki el prende. (2 Cor. 4:13) Nton, el ta da se vida pa Jeová i el ta batiza. (1 Ped. 3:21; 4:2) Kel-li é un dia ki tudu algen na kongregason ta sta kontenti! Timenti un studanti sta faze kes kuza ki ta pô-l ta batiza, nu meste ilojia-l sénpri i insentiva-l pa el kontinua ta faze prugrésu.

14. Ki perguntas un instrutor debe faze pa sabe si un studanti sta ta faze prugrésu?

¹⁴ Nu meste ten paxénxa óras ki nu ta djuda un studanti faze prugrésu pa el da se vida pa Deus i batiza. Má tanbê, nu meste sabe si el krê sirbi Jeová. Pergunta bu kabésa: ‘Nha studanti dja da algun sinal ma el sta tenta obi ku mandamentus di Jizus? Ô el krê sô prende kes kuza interesanti na Bíblia?’

15. Kuzê ki ta mostra ma un studanti sta faze prugrésu?

¹⁵ Djobe sénpri prugrésu di bu studanti. Pur izénplu, el ta fla kuzê ki el ta xinti pa Jeová? El ta faze orason pa Jeová? (Sal. 116:1, 2) El gosta di lé Bíblia? (Sal. 119:97) El sta sisti tudu runion? (Sal. 22:22) El sta faze kes mudansa ki el meste na vida? (Sal. 119:112) El ta kustuma fla se família i amigus kuzê ki el sta prende? (Sal. 9:1) I más inportanti inda, el krê ser un Tistimunha di Jeová? (Sal. 40:8) Si bu studanti ka sta faze ninhun di kes kuza li, tenta sabe pamodi. Dipôs, pâpia ku el klaru sobri kel asuntu, má ku bondadi. *

16. Kuzê ki pode mostra ma ka bale péna kontinua ta faze un studu di Bíblia?

¹⁶ Sénpri nu debe djobe si bale péna  kontinua ta faze un studu di Bíblia. Pergunta bu kabésa: ‘Kel studanti ka ta kustuma pripara studu? El ta mostra ma el ka ten ninhun interesi na sisti runion? Inda el ten kes ábitu mariadu? Inda el sta na algun relijion falsu?’ Si bu respósta é sin, kontinua ta studa Bíblia ku el, pode ser sima tenta djuda un algen prende nada, má el ka krê modja na agu. Si kel studanti ka ta da ninhun valor pa kuzê ki el sta prende i el ka krê faze mudansas, ka bale péna kontinua ta faze-l studu.

17. Sima sta na 1 Timóteo 4:16, kuzê ki tudu instrutor di Bíblia debe faze?

¹⁷ Nu ta leba asériu nos responsabilidadi di faze disiplus, i nu krê djuda nos studantis faze prugrésu i batiza. Pur isu, nu dexa Bíblia inxina, i nu inxina di manera ki ta mostra ma nu ta ama i ma nu ta kridita na kel ki nu sta inxina. Nu insentiva nos studanti pa faze amigus na kongregason. I sénpri nu mostra ma é inportanti da vida pa Deus i batiza. Tanbê é bon nu djobe prugrésu ki un studanti sta faze. (Odja kuadru “ Kuzê ki un instrutor meste faze pa djuda un studanti batiza”.) Nu sta kontenti di partisipa na es trabadju ki ta salva vida! Pur isu, nu sta disididu na faze nos midjór pa djuda nos studantis faze prugrésu i batiza.