1. Na kuzê ki nu ta imajina óras ki nu ta pensa na un algen ki ten mizerikórdia?

ÓRAS ki nu ta pensa na un algen ki ten mizerikórdia, nu ta imajina un algen ki ta mostra bondadi, amor, ki ten péna di otus i ki gosta di da. Kel tipu di algen li ta pô-nu lenbra di kel stória ki Jizus konta sobri kel bon samaritanu. Kel ómi é ka éra judeu, má el mostra ‘mizerikórdia’ pa un judeu ki ladrons furta ses kuza i da-l pankada. Kel samaritanu ‘xinti péna’ di kel judeu ki dadu pankada i ku amor, el kuida di el. (Luc. 10:29-37) Kel stória li ta inxina-nu sobri mizerikórdia, ki é un kualidadi bunitu di nos Deus. Jeová ta mostra-nu mizerikórdia tudu dia i el ta faze kel-li pamodi el ta ama-nu.

2. Kal ki é otu manera di mostra mizerikórdia?

² Ten otu kuza ki nu ta pensa na el óras ki nu ta obi palavra mizerikórdia. Un algen ki ten mizerikórdia ta disidi ka kastiga un algen ki debe kastigadu. Kel-li ta pô-nu lenbra ma Jeová ten txeu mizerikórdia. Salmo 103:10 ta fla ma ‘el ka ta trata-nu di akordu ku nos pekadu’. Má na alguns situason, Jeová ta disiplina un algen ki faze un kuza mariadu di manera firmi.

3. Ki perguntas nu sta ben responde na kel studu li?

³ Na kel studu li, nu sta ben responde alguns pergunta: (1) Pamodi ki Jeová ta mostra mizerikórdia? (2) Ta da pa disiplina un algen di manera firmi i simé mostra-l mizerikórdia? (3) Kuzê ki pode djuda-nu mostra mizerikórdia? Nu ben odja modi ki Bíblia ta responde kes pergunta li.

4. Pamodi ki Jeová ta mostra mizerikórdia?

⁴ Jeová gosta di mostra mizerikórdia. Apóstlu Polu skrebe  ma Deus é ‘riku na mizerikórdia’. Kes versíklu antis i dipôs ta mostra ma Polu fla kel-li pamodi Jeová da kes algen inperfetu speransa di bai vive na Séu. (Efé. 2:4-7) Má Jeová ka ta mostra mizerikórdia sô pa kes kriston skodjedu ku spritu santu. Salmista Davidi skrebe: ‘Jeová é bon ku tudu algen, i se mizerikórdia ta odjadu na tudu se óbras.’ (Sal. 145:9) Jeová ta ama pesoas, pur isu sénpri ki el atxa un bon motivu pa mostra un algen mizerikórdia, el ta faze kel-li.

5. Modi ki Jizus prende sobri mizerikórdia di Jeová?

⁵ Jizus sabe más di ki kalker algen modi ki Jeová gosta di mostra mizerikórdia. Antis di el ben pa Téra, el vive duránti un monti ténpu djuntu ku se Pai la na Séu. (Pro. 8:30, 31) Txeu bês el odja Jeová ta mostra mizerikórdia pa kes algen ki peka. (Sal. 78:37-42) Óras ki el ta inxinaba, Jizus sénpri ta papiaba di es kualidadi bunitu di se Pai.

6. Modi ki Jizus djuda-nu ntende ma Jeová gosta di mostra mizerikórdia?

⁶ Sima nu odja na kel studu ki pasa, Jizus konta stória di kel fidju ki perde, pa inxina-nu modi ki Jeová gosta di mostra mizerikórdia. Kel fidju sai di kaza i ‘el gasta tudu se kuzas di valor atoa, ta leba un vida mariadu.’ (Luc. 15:13) Dipôs el rapende di se pekadus, el rabaxa se kabésa i el volta pa kaza. Má modi ki se pai reaji? Kel fidju ka tevi ki spéra txeu pa diskubri. Jizus fla: ‘Timenti inda el staba lonji, se pai odja-l i el xinti péna [di el]; nton, el kóre, el brasa-l i el da-l beju ku amor.’ Kel pai ka rabaxa se fidju. Envês di kel-li, el mostra-l mizerikórdia, el purdua-l i el resebe-l di brasu abértu. Kuzê ki kel fidju faze éra gravi dimás, má dja ki el rapende, se pai purdua-l. Kel pai na kel stória di Jizus ki mostra mizerikórdia, ta reprizenta Jeová. Ku kel stória li ki ta toka nos korason, Jizus mostra ma Jeová tene gana di púrdua kes ki ta rapende di verdadi. — Luc. 15:17-24.

7. Modi ki manera ki Jeová ta mostra mizerikórdia ta prova ma el ten txeu sabedoria?

⁷ Jeová ta mostra mizerikórdia pamodi el ten txeu sabedoria. Jeová sénpri ta toma kes disizon ki é bon pa nos tudu. Bíblia ta fla ma ‘kel sabedoria ki ta ben di riba’ é ‘xeiu di mizerikórdia i di bons  frutu’. (Tia. 3:17) Sima un pai ki ten txeu amor, Jeová sabe ma é bon pa se sérvus óras ki el ta mostra-s mizerikórdia. (Sal. 103:13; Isa. 49:15) I dja ki Jeová ta faze kel-li, se sérvus ten un speransa pa futuru, sikrê es é inperfetu. Pamodi Jeová ten txeu sabedoria, sénpri el ta mostra mizerikórdia óras ki el odja ma ten un bon razon di faze kel-la. Má tanbê Jeová sabe ki óras ki el ka debe mostra mizerikórdia. Nunka el ka ta mostra mizerikórdia óras ki el sabe ma si el faze kel-la, el sta dexa kel algen kontinua ta faze kuzas mariadu.

8. Alvês ki medida ten ki tomadu i pamodi?

⁸ Imajina ma un sérvu di Jeová disidi leba un vida mariadu. Kuzê ki nu debe faze? ‘Nhos para di konvive ku’ el. É kel orientason li ki Jeová da apóstlu Polu pa da kongregason. (1 Cor. 5:11) Kes algen ki peka i es ka rapende, debe dizasosiadu di kongregason. Ta tomadu kel medida li pa proteje kes irmon ku irmans fiel i pa nu ser santu sima Jeová. Má alguns algen ta atxa ma óras ki un algen dizasosiadu, Deus ka mostra-l mizerikórdia. Má kel-li é verdadi mê? Nu ben odja.

9-10. Sima sta na Hebreus 12:5, 6, pamodi ki nu pode fla ma dizasôsia un algen é un manera di mostra mizerikórdia? Da un izénplu.

⁹ Óras ki nu obi ta avizadu na runion ma un algen ki nu konxe i ki nu ta ama ‘é ka Tistimunha di Jeová más’, nu ta fika txeu tristi. Talvês ti nu ta pergunta si kel algen meste sérba dizasosiadu mê. Má dizasôsia algen é un manera di mostra mizerikórdia? Klaru ki sin. Disiplina un algen ki merese, é un manera di mostra sabedoria, mizerikórdia i amor. (Pro. 13:24) Má dizasôsia un algen ki faze un pekadu, pode djuda-l rapende i muda di atitudi? Pode sin. Txeu irmon ku irmans ki faze un pekadu gravi fla ma dizasosiason djuda-s rapende, muda ses vida i volta pa Jeová. — Lé Hebreus 12:5, 6.

¹⁰ Pensa na kel izénplu li. Un pastor ta da kónta ma un di se ovelhas sta duenti. El sabe ma pa el kuida di kel ovelha ki sta duenti, el ten ki sipara-l di kes otu ovelha. Má ovelhas gosta di sta djuntu i es ta fika dizorientadu óras ki es podu es sô. Nton kel-li krê fla ma kel pastor ki disidi sipara kel ovelha ki sta duenti é duru ô mau? É klaru ki nau. El sabe ma si el dexa un ovelha ki sta duenti fika djuntu ku kes otu, kel duénsa ta spadja. Pur isu, óras ki el sipara kel ovelha ki sta duenti, el ta proteje tudu kes otu. — Tanbê odja Levítico 13:3, 4.

11. (a) Di ki manera un dizasosiadu é sima un ovelha ki sta duenti? (b) Kuzê ki kes dizasosiadu pode faze i ki ajuda es pode resebe?

¹¹ Óras ki un algen ta dizasosiadu, nu ten ki odja-l sima un ovelha ki sta duenti. Dja ki se amizadi ku Jeová sta prujudikadu, el é sima un algen ki sta duenti. (Tia. 5:14) Sima kes algen ki sta duenti pode pasa duénsa pa otus algen, un algen ki se amizadi ku Jeová sta prujudikadu, pode poi otus ta faze kuzas mariadu. Pur isu, na alguns kazu, kel algen ki sta duenti meste siparadu di kongregason. Kel disiplina li é un manera di Jeová mostra amor pa kes ovelha fiel di se ribanhu. Tanbê, kel-li pode toka korason di kel algen ki peka i pô-l ta rapende. Má kel algen ki sta dizasosiadu inda pode faze alguns kuza. El pode sisti tudu runion i la el ta resebe orientasons di Bíblia ki ta djuda-l ten un fé fórti otu bês. Tanbê el pode resebe  publikasons pa el faze se studu pesoal i odja JW Broadcasting^®. Óras ki ansions ta odja mudansa ki un dizasosiadu sta ta faze, di vês en kuandu, es pode da-l konsedju i orientasons ki ta djuda-l rekupera se amizadi ku Jeová. I kel-li ta djuda-l bira un Tistimunha di Jeová otu bês. *

12. Kal ki é midjór manera di ansions mostra amor i mizerikórdia pa un algen ki peka i ki ka rapende?

¹² É inportanti nu lenbra ma é sô kes algen ki ta peka i ki ka ta rapende ki ta dizasosiadu. Ansions sabe ma es debe pensa ku txeu kuidadu antis di es disidi dizasôsia un algen. Es sabe ma disiplina di Jeová debe dadu ‘na medida sértu’. (Jer. 30:11) Ansions ta ama ses irmon ku irmans i es ka krê faze nada ki ta prujudika ses amizadi ku Jeová. Má alvês, midjór manera di mostra amor i mizerikórdia, é tra kel algen ki peka di kongregason duránti algun ténpu.

13. Pamodi ki un kriston na Korintu tevi ki dizasosiadu?

¹³ Odja modi ki apóstlu Polu lida ku un algen ki peka i ki ka rapende. Un kriston na Korintu staba ta faze konportamentu seksual mariadu ku mudjer di se pai. Fórti kuza feiu! Jeová dja papiaba ku israelitas sobri kel asuntu li: ‘Kel ómi ki faze relason seksual ku mudjer di se pai, ta poi se pai na vergónha. Es tudu dôs debe móre sen falta.’ (Lev. 20:11) É klaru ki Polu ka podia mandaba pa es mataba kel ómi. Má el orienta kes irmon na Korintu pa dizasosia-l. Kel konportamentu mariadu di kel ómi staba ta prujudika otus algen na kongregason. Alguns di es nen ka ta atxaba ma kel-la éra un pekadu gravi! — 1 Cor. 5:1, 2, 13.

14. Modi ki Polu mostra mizerikórdia pa un dizasosiadu na Korintu i pamodi? (2 Coríntios 2:5-8, 11)

¹⁴ Dipôs di algun ténpu, Polu fika ta sabe ma kel ómi dja fazeba txeu mudansa. El rapende di verdadi! Kel ómi poi kongregason na vergónha, má Polu fla kes ansion ma el ka krê sérba ‘duru dimás’. El da-s kel orientason li: ‘Nhos debe purdua-l ku bondadi i konsola-l’. Polu tanbê splika pamodi ki es devia fazeba kel-la. El fla: ‘Pa tristéza dimás ka kaba ku el.’ Apóstlu Polu xinti péna di kel ómi ki rapende. El ka krê pa kel ómi fikaba  dizanimadu dimás pamodi kuzê ki el faze, asi pa el ka dizisti di buskaba perdon di Deus. — Lé 2 Coríntios 2:5-8, 11.

15. Modi ki ansions pode ser firmi i mostra mizerikórdia omésmu ténpu?

¹⁵ Sima Jeová, ansions gosta di mostra mizerikórdia. Es ta ser firmi óras ki meste, má es ta mostra mizerikórdia sénpri ki ta da, ô sénpri ki ten un bon motivu di faze kel-la. Si ansions ka disiplina un algen ki merese kastigu, es ka sta ta mostra mizerikórdia. Envês di kel-li, es sta ta seta pa kel algen kontinua ta faze kuza mariadu. Má é sô ansions ki debe mostra mizerikórdia?

16. Sima sta na Provérbios 21:13, kuzê ki Jeová ta faze óras ki un algen ka ta mostra mizerikórdia?

¹⁶ Nos tudu, nu krê mostra mizerikórdia sima Jeová. Pamodi? Un di kes razon é pamodi Jeová ka ta obi orason di kes algen ki ka ta mostra mizerikórdia. (Lé Provérbios 21:13.) Ninhun di nos, nu ka krê pa kel-li kontise. Pur isu, nu debe toma kuidadu pa nos korason ka bira duru. Nunka nu ka debe nega obi un irmon ki sta ta sufri, má sénpri nu debe obi óras ki un ‘póbri ta grita’. Tanbê nu debe leba asériu kel konsedju di Tiago 2:13: ‘Kenha ki ka ta mostra mizerikórdia ta ser julgadu sen mizerikórdia.’ Si nos é umildi, nu ta lenbra ma nu meste pa otus algen mostra-nu txeu mizerikórdia, asi nu ta sta más dispostu na trata otus ku mizerikórdia. Un situason ki nu debe mostra txeu mizerikórdia é óras ki un algen ki peka ta volta pa kongregason.

17. Modi ki rei Davidi mostra mizerikórdia?

¹⁷ Bíblia ten txeu izénplu ki ta djuda-nu mostra mizerikórdia, envês di ten un korason duru. Odja izénplu di Rei Davidi. El mostra mizerikórdia txeu bês. Rei Saul krê mataba el, má Davidi mostra mizerikórdia pa kel rei ki Deus skodje. Nunka el ka tenta vinga di Saul, nen prujudika-l. — 1 Sam. 24:9-12, 18, 19.

18-19. Kal ki é dôs situason ki Davidi ka mostra mizerikórdia?

¹⁸ Má na alguns situason, Davidi ka mostra mizerikórdia. Pur izénplu, un bês, Nabal ki éra un ómi duru, ka mostra ruspetu pa Davidi i el nega da-l kumida el ku se trópas. Davidi fika uma xatiadu i el disidi mata Nabal ku tudu kes ómi di se kaza. Davidi ka fika ku kulpa di sangi pamodi Abigail, ki éra mudjer di Nabal, aji rápidu i el mostra bondadi i paxénxa. — 1 Sam. 25:9-22, 32-35.

¹⁹ Na un otu situason, proféta Natan fla Davidi ma un ómi riku furta ovelha di se vizinhu póbri ki el gostaba txeu di el. Davidi fika uma xatiadu i el responde: ‘Sima é sértu ma Jeová sta bibu, kel ómi ki faze kel-li merese móre!’ (2 Sam. 12:1-6) Davidi konxeba lei di Muizés dretu. Sima kel lei ta flaba, si un ómi furtaba un ovelha, el tinha ki daba se dónu kuatu ovelha.  (Êxo. 22:1) Má modi ki Davidi podia flaba ma kel ómi merese moreba? Kel-li ta sérba un julgamentu duru dimás. Natan konta kel stória li, pa djuda Davidi ntende ma el faze un krimi mutu más gravi i Jeová mostra-l txeu mizerikórdia, má Davidi ka mostra mizerikórdia pa kel ómi na stória di Natan! — 2 Sam. 12:7-13.

20. Kuzê ki nu ta prende ku izénplu di Davidi?

²⁰ Repara ma kantu Davidi staba uma xatiadu, el disidi ma Nabal i kes ómi di se kaza devia moreba. I dipôs, el fla ma kel ómi di stória di Natan merese moreba. Óras ki nu ta lé kel sugundu stória di Bíblia li, talvês nu ta fika ta pensa, pamodi ki un ómi ki sénpri ta mostraba bondadi, julga un algen di manera duru si. Pensa na kuzê ki dja kontiseba na vida di Davidi. Na kel ténpu la, Davidi staba ku konsénsia pizadu. Un algen ki ten un bon amizadi ku Jeová, ka ta julga otu di manera duru. Má envês di kel-li, repara kuzê ki Jizus aviza se sigidoris: ‘Nhos para di julga, pa nhos ka ser julgadu; pamodi, ku kel julgamentu ki nhos ta julga, nhos ta julgadu tanbê’. (Mat. 7:1, 2) Pur isu, nu ten ki toma kuidadu pa nu ka ser duru, má nu debe ser ‘riku na mizerikórdia’, sima nos Deus.

21-22. Di ki maneras nu pode mostra mizerikórdia pa otus algen?

²¹ Mizerikórdia é más di ki sô xinti péna di otus. Un algen ki ten mizerikórdia ta “faze kuza pa djuda otus”. Nton nos tudu, nu debe presta txeu atenson pa nu odja si algen na nos família, na nos kongregason ô na lugar ki nu ta mora meste di ajuda. Asi, nu ta atxa txeu oportunidadi di mostra mizerikórdia! Pur izénplu, sta algun algen ki meste konsolu? Bu ta pode da-l un ajuda ki el meste, talvês faze-l kumida ô algun otu kuza? Sta algun irmon ki readimitidu i ki sta meste konsolu ô nkorajamentu di un amigu? Nu ta pode konsola otus algen na nos tiritóriu ku kes notísia sábi? Kel-li é un di kes midjór manera ki nu pode mostra mizerikórdia pa otus algen. — Jó 29:12, 13; Rom. 10:14, 15; Tia. 1:27.

²² Si nu fika sienti na nisisidadis di otus algen, nu ta odja ma ten txeu oportunidadi di nu mostra mizerikórdia. Óras ki nu ta mostra kel kualidadi li, nos Pai na Séu, kel Deus ki é ‘riku na mizerikórdia’ ta fika txeu kontenti!