Dja ki más algen sta partisipaba na pregason, irmons ku irmans mesteba más publikason. Kes irmon di Betel di Brooklyn staba ta faze revistas, má inda es ta uzaba kes inpréza pa inprimi kes kapa duru di livrus. Duránti txeu mês kes inpréza ka sta konsigi inprimiba tudu kes livru ki irmons ta mesteba na pregason. Nton irmon Rutherford pergunta Robert Martin, ki éra responsável pa kel lugar di inprimi, si dja el pensaba na inprimi nos livrus.

Irmon Robert responde: “Kel-li é un ideia interesanti, pamodi kel-li krê fla ma nu ta abriba un lugar ki nu ta fazeba nos livrus.” Kes irmon renda un lugar na rua Concord, nunbru 18 na Brooklyn i es ranja kes kuza ki es ta mesteba.

Má é ka tudu algen ki staba kontenti ku kel-li. Prizidenti di un inpréza ki ta inprimiba nos livrus bai vizita-nu. El fla: “Nhos tene bons mákina di inprimi livrus. Má ninhun di nhos ka sabe modi ki es ta uzadu. Na 6 mês nhos ta straga tudu kes mákina li.”

Irmon Robert fla: “Ta parse ma el tinha razon. Má nu sabe ma Jeová pode djudaba nos i ma el staba ku nos.” Irmon Robert staba sértu. Poku ténpu dipôs nu staba ta inprimi 2 mil livru tudu dia.

Alén di inprimi nos livrus, povu di Jeová kumesa ta uza un manera novu di spadja notísias sábi, ki éra através di rádiu. Na dia 26 di febreru di 1922, na un dumingu di tardi, irmon Rutherford pâpia na rádiu pa primeru bês. El faze un diskursu ku téma: “Milhons ki sta vive gósi ka ta  móre nunka más”, na un rádiu na sidadi di Los Angeles, Kalifórnia, na Mérka.

Uns 25 mil algen obi kel prugrama. I alguns di es manda kartas pa irmon Rutherford pa agradese. Un di kes karta éra di Willard Ashford, ki ta moraba na sidadi di Santa Ana, na Kalifórnia. El ilojia diskursu di irmon Rutherford i el fla ma el éra “sábi i interesanti”. Dipôs el fla: “Na nha família ten três algen duenti ki ka ta pode sai di kaza. Es ka ta pode obiba kel diskursu si ka éra através di rádiu, sikrê el fazedu pértu di nos kaza.”

Fazedu otus diskursu na rádiu na kes otu simana. Revista Tori di Vijia (na inglês) fla ma ti fin di 1922, “peloménus uns 300 mil algen obi kel mensaji na [rádiu].”

Kes karta da kes Studanti di Bíblia koraji i es staba disididu na ten ses rádiu na Staten Island, pértu di Betel di Brooklyn. Dipôs di kel anu li, Studantis di Bíblia uza es rádiu ki éra WBBR, pa spadja notísias di Reinu na monti lugar.

Sentinéla 15 di junhu di 1922, fla ma staba ta ben fazedu un kongrésu na Cedar Point, Ohio, di 5 ti 13 di setenbru di 1922. Studantis di Bíblia staba kontenti kantu ki es txiga na Cedar Point.

Na kel primeru diskursu, irmon Rutherford fla pa kes algen ki staba ta sisti: “N ten sertéza, ma Sinhor ta abênsua kel kongrésu li i el ta ben da un tistimunhu ki nunka ka dadu na téra interu.” Kes irmon ki faze diskursu na kel kongrésu insentiva irmons ku irmans pa prega notísias sábi.

Dipôs, na sésta-fera, dia 8 di setenbru, uns 8 mil algen intxi kel lugar, ku gana di obi un diskursu di irmon Rutherford. Es staba ta spéra pa el splika kuzê ki kes létra “ADV”, ki staba na kes konviti krê flaba. Kantu es xinta, txeu di es repara un panu grandi roladu pa riba di palku. Artur Klaus, ki sai di Tulsa, Oklaoma, na Mérka, pa bai pa kel kongrésu, xinta na un lugar ki el ta obiba kes diskursu dretu. Kel-li éra  difísil pamodi na kel ténpu ka tinha mikrofóni ô kuluna pa poi volumi más altu.

Pa ningen ka paraba kel diskursu, prizidenti aviza ma es ka ta dexaba ningen ki txigaba atrazadu entra duránti diskursu di irmon Rutherford. Kantu staba 9 i meia di palmanhan, irmon Rutherford kumesa se diskursu ku kes palavra di Jizus ki sta na Mateus 4:17: ‘Reinu di Séu sta kuazi ta txiga’. Kantu el pâpia di modi ki algen ta ben obiba verdadi sobri Reinu, el fla: “Jizus fla ma na ténpu di se prezénsa el ta ben fazeba un kodjéta di algen i el ta ben djuntaba kes ki é verdaderu i lial.”

Irmon Artur, ki staba xintadu na kel sala prinsipal, lenbra: “Nu ta prestaba atenson na kada palavra.” Má dirapenti, Artur xinti mal i el tevi ki sai di kel sala. El ka krê saíba, pamodi el sabia ma si el saíba es ka ta dexaba el entra más.

Poku minutu dipôs, Artur dja staba ta xinti midjór. El fla ma timenti el staba ta volta pa kel sala prinsipal, el obi algen ta da palmu riju. Kel-li dexa-l kontenti! Artur disidi ma el ta pode obiba réstu di kel diskursu dretu sikrê el subiba na undi ki kes panu roladu staba. Na kel ténpu, irmon Artur tinha 23 anu i el ranja un manera di subi ti ki txiga la. Kes janéla staba abértu i el fla ma kantu el txiga pértu di es, el konsigi obi kel diskursu dretu.

Má el ka staba el sô. Alguns di ses amigu staba la tanbê. Un di kes éra, Frank Johnson ki bai ti el i pergunta-l: “Bu tene un faka?”

Artur fla-l: “N tene sin.”

Frank fla-l: “Abo é respósta pa nos orason. Bu sta ta odja kel rolu grandi li ki sta maradu na kes prégu? É un panu. Fika  sienti na Juís. a Óras ki el fla: ‘Nhos da avizu, nhos da avizu’, bu ta korta kes kuatu kórda li.”

Nton, Artur tinha faka na mô djuntu ku kes otu irmon ta spéra kel sinal. Lógu dipôs, irmon Rutherford txiga na kel párti más inportanti di se diskursu. Irmon Rutherford staba animadu i talvês ti el grita kantu el fla: “Nhos ser fiel i tistimunhas verdaderu di Sinhor. Nhos kontinua ta luta ti ki relijion falsu distruídu konpletamenti. Nhos prega mensaji na tudu lugar. Mundu ten ki sabe ma Jeová é Deus i ma Jizus Kristu é Rei di reis i Sinhor di sinhoris. Kel-li é ténpu más inportanti di stória. Nhos odja, Rei dja sta ta governa! Nhos skodjedu pa fla tudu algen kel-li. Nton, nhos da avizu, nhos da avizu, nhos da avizu sobri Rei i se Reinu.”

Artur fla ma el ku kes otu irmon korta kes kórda i kel panu abri. “ADV” é kes primeru létra di palavra “aviza” na inglês, ki krê fla prega ô da tistimunhu. Staba skrebedu na kel panu: “Nhos da avizu sobri Rei i Reinu.”

Kel kongrésu na Cedar Point djuda irmons konsentra na kel trabadju inportanti di prega sobri Reinu i kes ki staba prontu pa prega bai pregason kontenti. Un kolpurtor (ki gósi ta txomadu pioneru) di Oklaoma, na Mérka, skrebe: “Nu prega na kes lugar ki txeu algen ta trabadja na mina di karvon i es éra póbri.” El fla ma txeu bês óras ki kes algen ta obiba kel mensaji ki sta na revista Idadi di Oru, “lágua ta saíba es di odju.” El fla tanbê: “Nu sta kontenti pamodi nu pode konsola-s.”

Kes Studanti di Bíblia odja ma kes palavra di Jizus ki sta na Lucas 10:2 éra urjenti. El ta fla: ‘Kodjéta é grandi, má trabadjadoris é poku.’ Na fin di 1922, es staba más disididu na da avizu sobri mensaji di Reinu na téra interu.