1. Kal ki é nos ‘nisisidadi spritual’ i modi ki el sta ligadu ku filisidadi?

 FILISIDADI di verdadi é ka sô un kuza sábi ki nu ta xinti na alguns momentu. Un algen pode ser filís pa tudu ténpu. Modi ki kel-li ta kontise? Na se diskursu na monti, Jizus fla: ‘Filís é kes ki ten konsénsia ma es ten nisisidadi spritual’. (Mat. 5:3) Jizus sabia ma nu kriadu ku kel dizeju fórti di konxe i adora nos Kriador, Jeová. Kel-li é nos ‘nisisidadi spritual’. Dja ki Jeová é un ‘Deus filís’, kes ki ta adora-l tanbê pode ser filís. — 1 Tim. 1:11.

2-3. (a) Sima Jizus fla, kenha más ki pode ser filís? (b) Kuzê ki nu ta ben odja na kel studu li i pamodi ki kel-li é inportanti?

² Nu pode ser filís sô si nu ka ten prublémas? Nau. Na se diskursu na monti, Jizus fla un kuza ki ta dexa-nu dimiradu. El fla ma ‘kes ki ta txora’, pamodi algun pekadu ki es faze ô pamodi prublémas na vida, pode ser filís. El fla mésmu kuza sobri ‘kes ki ta pirsigidu pamodi justisa’ ô kes ki ta sufri insultu pamodi es ta sigi Kristu. (Mat. 5:4, 10, 11) Má modi ki nu pode ser filís di verdadi na kes situason li?

³ Jizus staba ta inxina ma filisidadi ka ta ben sô óras ki tudu kuza sta dretu na nos vida, má óras ki nu ta satisfaze nos nisisidadi spritual i bira más amigu di Deus.  (Tia. 4:8) Modi ki nu pode faze kel-li? Na kel studu li, nu ta ben odja três kuza inportanti ki ta da-nu filisidadi di verdadi.

4. Kal ki é primeru kuza ki nu debe faze pa nu atxa filisidadi di verdadi? (Salmo 1:1-3)

⁴ PRIMERU: Pa nu ser filís di verdadi, nu debe lé i studa Bíblia. Jizus konpara Palavra di Deus ku kumida. Algen ku animal meste di kumida pa es pode fika bibu. Má é sô algen ki ta pode lé i studa Bíblia. I nu meste faze kel-li. É pur isu ki Jizus fla: ‘Ómi ka debe vive sô di pon, má di tudu palavra ki ta ben di bóka di Jeová.’ (Mat. 4:4) Pur isu, nu ka debe dexa pasa un dia sen lé Palavra di Deus, Bíblia ki ten txeu valor. Salmista fla: ‘Filís é ómi ki gosta txeu di lei di Jeová, i el ta lé Se lei dia ku noti.’ — Lé Salmo 1:1-3.

5-6. (a) Kuzê ki nu pode prende na Bíblia? (b) Modi ki lé Bíblia pode djuda-nu?

⁵ Pamodi Jeová ta ama-nu, el ta mostra-nu na Bíblia kuzê ki nu debe faze pa nu pode ser filís. Nu ta prende kuzê ki el krê pa nos. Nu ta prende modi ki nu pode bira se amigu i kuzê ki nu meste faze pa el púrdua nos pekadu. I nu ta prende sobri kel speransa rei di sábi ki el ta promete pa futuru. (Jer. 29:11) Kes verdadi li ki nu ta prende óras ki nu ta studa Bíblia, ta poi nos korason fika kontenti!

⁶ Nu sabe ma Bíblia tanbê ten bons konsedju ki ta djuda-nu na nos dia-dia.  Óras ki nu ta sigi kes konsedju li, nu pode atxa filisidadi. Sénpri ki bu xinti dizanimadu pamodi un prubléma na vida, tra más ténpu pa bu lé Bíblia i midita na el. Jizus fla: ‘Filís é kes ki ta obi palavra di Deus i ta faze sima el fla!’ — Luc. 11:28.

7. Modi ki bu pode pruveta di midjór manera kel ténpu ki bu ta tra pa lé Palavra di Deus?

⁷ Óras ki bu ta lé Palavra di Deus, tra ténpu pa bu xinti gostu di kuzê ki bu sta lé. Pensa na kel-li: Un algen ta faze kel kumida ki bu gosta más txeu. Má pamodi bu sta ku présa ô bu sta txeu preokupadu, bu ta kume kel kumida uma faxi. Dipôs ki bu tirmina di kume kel kumida, bu ta da kónta ma bu kume-l faxi dimás i bu rapende pamodi bu ka kume-l ku kalma i bu ka xinti gostu di kel kumida más dretu. Dja bu kustuma lé Bíblia faxi dimás ki nen bu ka xinti gostu di kuzê ki el ta fla? Tra ténpu pa bu xinti gostu na lé Palavra di Deus. Imajina kes séna, kes son, kes vós i pensa na kuzê ki bu lé. Tudu kes kuza li ta da-u más filisidadi.

8. Modi ki ‘skravu fiel i prudenti’ sta ta faze se trabadju? (Odja tanbê nóta di rodapé.)

⁸ Jizus skodje ‘skravu fiel i prudenti’ pa da kumida spritual na óra sértu, i nu sta ta resebe bon kumida spritual própi. b (Mat. 24:45) Bíblia é kel kuza prinsipal ki skravu fiel ta poi na tudu kumida ki el ta faze. (1 Tes. 2:13) Nton, kel kumida spritual li ta djuda-nu konxe manera ki Jeová ta pensa ki sta na Bíblia. É pur isu ki nu ta lé revistas Sentinéla i Nhos korda! i kes artigu ki sta na jw.org. Nu ta pripara runion di meiu di simana i di fin di simana. I tudu mês nu ta odja prugrama JW Broadcasting^® si sta na nos língua. Pruveta tudu kel kumida spritual li ta djuda-nu faze kel sugundu kuza, ki ta pô-nu ta ten filisidadi di verdadi.

9. Kal ki é kel sugundu kuza ki ta da-nu filisidadi di verdadi?

⁹ SUGUNDU: Pa nu ser filís di verdadi, nu meste vive di akordu ku leis di Jeová. Salmista skrebe: ‘Filís é tudu kes ki ten grandi ruspetu pa Jeová, i ki ta anda na Se kaminhus.’ (Sal. 128:1) Ten grandi ruspetu pa Jeová krê fla ma nu ta ruspeta-l di tal manera ki nu ta ivita faze kalker kuza ki ta pô-l fika tristi. (Pro. 16:6) Asi, nu ta sforsa pa nu kontinua ta vive di akordu ku leis di Jeová sobri kuzê ki é dretu i kuzê ki é mariadu, sima sta na Bíblia. (2 Cor. 7:1) Nu ta ser filís si nu faze kes kuza ki Jeová ta ama i nu ka faze kes kuza ki el ta ôdia. — Sal. 37:27; 97:10; Rom. 12:9.

10. Sima sta na Romanos 12:2, ki responsabilidadi ki nu ten?

¹⁰ Lé Romanos 12:2. Un algen pode sabe ma Jeová ten autoridadi pa disidi kuzê ki é dretu i kuzê ki é mariadu, má tanbê el meste seta kes lei di Deus. Pur izénplu, un algen pode sabe ma govérnu ten direitu di fla kal ki é limiti di velosidadi na strada, má talvês el pode ka sta dispostu na seta kel limiti ki es poi. Pamodi kel-li, el ta konduzi más faxi di ki kel ki el debe. Nu ta mostra na nos manera di konporta ma nu ta kridita ma  obi ku leis di Jeová é midjór manera di vive. (Pro. 12:28) Davidi tanbê xinti asi. El fla kel-li sobri Jeová: ‘Faze-m konxe kaminhu di vida. Na bu prezénsa ten txeu alegria; filisidadi sta na bu direita, pa tudu ténpu.’ — Sal. 16:11.

11-12. (a) Óras ki nu sta preokupadu ô dizanimadu, ku kuzê ki nu debe toma kuidadu? (b) Modi ki Filipenses 4:8 pode djuda-nu skodje diverson?

¹¹ Óras ki nu sta preokupadu ô dizanimadu, nu pode xinti nisisidadi di faze algun kuza pa nu divirti, asi pa nu pode skese nos prublémas. I kel-li é normal. Má nu debe toma kuidadu pa nu ka faze algun kuza ki Jeová ta ôdia. — Efé. 5:10-12, 15-17.

¹² Na karta ki apóstlu Polu skrebe pa kes irmon na Filipus, el insentiva-s pa es kontinua ta pensa na tudu kes kuza ki é ‘justu, puru, ki debe amadu i ki é bon’. (Lé Filipenses 4:8.) Nbóra Polu ka staba ta pâpia di diverson, kuzê ki el skrebe debe pô-nu pensa na kuzê ki nu ta divirti ku el. Tenta faze kel-li: Na Filipenses 4:8, na undi ki sta palavra ‘kel’ troka-l pa “múzika”, “filmi”, “livru” ô “jogu”. Faze kel-li pode djuda-u sabe kal ki Jeová pode seta i kal ki el pode ka seta. Nu krê vive di akordu ku kes lei justu di Jeová. (Sal. 119:1-3) Nton, ku un konsénsia linpu, nu pode faze kel tirseru kuza ki ta da-nu filisidadi di verdadi. — Atos 23:1.

13. Kal ki é tirseru kuza ki ta da-nu filisidadi di verdadi? (João 4:23, 24)

¹³ TIRSERU: Djobe dretu si adorason pa Jeová sta na primeru lugar na bu vida. Dja ki Jeová é nos Kriador, el merese pa nu adora-l. (Apo. 4:11; 14:6, 7) Pur isu, kuza más inportanti na nos vida debe ser adora Jeová di manera ki el ta aprova, ki é ‘ku spritu i verdadi.’ (Lé João 4:23, 24.) Nu krê pa spritu santu di Deus gia nos adorason, asi pa el pode sta di akordu ku verdadis ki sta na Palavra di Deus. Nos adorason debe sta na primeru lugar, sikrê nu ta vive na un país ki nu ten poku liberdadi ô ki nos trabadju é proibidu. Gósi más di 100 di nos irmons ku irmans sta prézu sô pamodi es é Tistimunhas di Jeová. c Má simé, es ta faze tudu ki es pode pa ora, studa i pâpia ku otus algen sobri Deus i se Reinu. Óras ki nu ta kritikadu i pirsigidu, nu pode fika kontenti pamodi nu sabe ma Jeová sta ku nos i ma el ta rekonpensa-nu. — Tia. 1:12; 1 Ped. 4:14.

14. Kuzê ki kontise ku un irmon na Tajikiston i pamodi?

¹⁴ Alguns di nos irmon ku irmans pasa pa situasons txeu difísil, má es xinti filisidadi di verdadi pamodi es faze kes três kuza ki nu odja na kel studu li. Odja kuzê ki kontise ku Jovidon Bobojonov, di 19 anu ki é di Tajikiston. Na dia 4 di otubru di 2019, el tradu di se kaza, el podu prézu pa alguns mês i es trata-l sima un kriminozu pamodi el nega ba trópa. Kel injustisa ki es faze-l dadu na notísia na txeu país. Na notísia es fla ma trópas sota-l i faze-l preson pa el bisti farda i pa el jura bandera. Dipôs di kel-li, el kondenadu i el mandadu pa un kanpu di trabadju forsadu. Ti ki  enfin prizidenti di kel país purdua-l i el da órdi pa tra-l di kadia. Duránti tudu kel provason ki el pasa pa el, Jovidon kontinua ku se lialdadi i el ka perde se alegria. Modi ki el konsigi faze kel-li? Pamodi sénpri el staba sienti di se nisisidadi spritual.

15. Modi ki Jovidon kontinua ta prende sobri Jeová timenti el staba na kadia?

¹⁵ Timenti Jovidon staba prézu, el kontinua ta prende sobri Jeová, sikrê el ka tinha Bíblia ô ninhun di nos publikasons. Modi ki el konsigi faze kel-li? Irmons ku irmans di kel lugar leba-l kumida i es skrebe testu di dia na kes bólsa ki es leba-l. Asi, el konsigi lé Bíblia i midita na el tudu dia. Dipôs ki el tradu di kadia, el da un konsedju pa tudu kes ki sta ta pasa pa provasons difísil. El fla: “Gósi é óra di uza dretu bu liberdadi pa lé Bíblia i nos publikasons pa konxe Jeová midjór.”

16. Na kuzê ki Jovidon konsentra na el?

¹⁶ Jovidon ta viveba di akordu ku leis di Jeová. El ka fika ta pensa na dizejus mariadu, nen el ka faze kuzas mariadu. Má el konsentra na Jeová i na kes kuza ki ta dexa-l kontenti. Jovidon ta dimiraba  kriason di Jeová. Tudu sédu palmanhan el ta kordaba ta obi pasus ta kanta. Di noti el ta odjaba pa lua i pa strélas. El fla: “Kes prezenti di Jeová li dexa-m txeu kontenti i da-m txeu koraji.” Óras ki nu ta da valor pa kes kuza spritual i kes kuza ki nu meste ki Jeová ta da-nu, nu ta fika más kontenti i kel alegria li pode bira nos kapasidadi di aguenta firmi más fórti.

17. Modi ki 1 Pedro 1:6, 7 pode djuda un algen ki sta na mésmu situason ki Jovidon?

¹⁷ Jovidon tanbê poi adorason pa Jeová na primeru lugar. El sabia ma éra inportanti kontinua ta mante se lialdadi pa kel Deus verdaderu. Jizus fla: ‘Adora Jeová, bu Deus, i faze sirvisu sagradu sô pa el.’ (Luc. 4:8) Kes xéfi di trópa i kes trópa krê pa Jovidon dizistiba di se relijion. Envês di kel-li, el ta oraba tudu dia i tudu noti ta pidi Jeová pa djudaba el ka dizisti i ka nega se fé. Sikrê Jovidon maltratadu, el mante se lialdadi. É verdadi ma el tradu di se kaza, el dadu pankada i el podu prézu. Má gósi el ten un fé más fórti pamodi el podu na próva. — Lé 1 Pedro 1:6, 7.

18. Modi ki nu pode kontinua filís?

¹⁸ Jeová sabe di kuzê ki nu meste pa nu pode ten filisidadi di verdadi. Si bu faze kes três kuza ki ta da-nu filisidadi di verdadi, bu pode kontinua filís sikrê bu pasa pa un situason difísil. Nton bu ta pode ben fla tanbê: ‘Filís é kel povu ki ses Deus é Jeová!’ — Sal. 144:15.