1. Modi ki Deus da se sérvus fiel na pasadu forsa?

 PALAVRA di Deus txeu bês ta fla ma kes ómi fiel éra fórti. Má ti kel más fórti ka xinti forsa sénpri. Pur izénplu, na alguns situason Rei Davidi ‘bira fórti sima un monti,’ má na otus situason ‘medu toma kónta di el.’ (Sal. 30:7) Enbóra spritu santu di Deus poi Sanson ta fika fórti dimás, el rekonhese ma sen kel spritu santu di Deus, el ta fikaba ‘fraku i el ta biraba sima tudu kes otu ómi.’ (Juí. 14:5, 6; 16:17) Kes ómi fiel li éra fórti pamodi Jeová ta daba es forsa.

2. Pamodi ki apóstlu Paulu fla ma el ta xintiba fraku i xeiu di puder? (2 Koríntius 12:9, 10)

² Apóstlu Paulu sabia ma el tanbê el mesteba forsa di Jeová. (Lé 2 Koríntius 12:9, 10.) Sima txeu di nos, Paulu tinha prublémas di saúdi. (Gál. 4:13, 14) Tanbê alvês, éra difísil pa el fazeba kel ki é dretu. (Rom. 7:18, 19) I alvês el ta xintiba preokupadu dimás i ku medu di kuzê ki pode kontiseba ku el. (2 Kor. 1:8, 9) Má simé, óras ki Paulu ta xintiba fraku, é la ki el ta staba xeiu di puder. Di ki manera? Jeová da Paulu kel forsa ki staba ta falta-l. El poi Paulu ta bira fórti.

3. Ki perguntas nu ta ben responde na kel studu li?

³ Jeová ta promete ma el ta da-nu forsa tanbê. (1 Ped. 5:10) Má nu ka pode spera ma nu ta resebe kel forsa li, si nu ka faze ninhun sforsu. Pur izénplu, un mutor pode poi un karu ta anda. Má kondutor ten ki  kalka na selerador pa karu bai pa algun lugar. Di mésmu manera, Jeová krê da-nu kel forsa ki nu meste, má nu debe faze algun kuza pa nu resebe-l. Modi ki Jeová ta da-nu forsa? I kuzê ki nu meste faze pa nu resebe kel forsa li? Pa responde kes pergunta li, nu ta ben odja modi ki Jeová djuda proféta Jonas, Maria mai di Jizus i apóstlu Paulu. Tanbê, nu ta ben odja modi ki Jeová ta kontinua ta da kes algen ki ta sirbi-l forsa di mésmu manera.

4. Modi ki nu pode resebe forsa di Jeová?

⁴ Un manera di nu resebe forsa di Jeová é óras ki nu ta faze orason pa el. I el ta responde-nu, óras ki el ta da-nu “puder alén di normal”. (2 Kor. 4:7) Tanbê nu pode resebe forsa óras ki nu ta lé se Palavra i nu ta midita na el. (Sal. 86:11) Mensajen di Jeová pa nos na Bíblia “ten puder”. (Ebr. 4:12) Óras ki bu ta faze orason pa Jeová i bu ta lé se Palavra, bu ta resebe forsa ki bu meste pa aguenta firmi, pa kontinua ku alegria ô pa faze un diziginason difísil. Odja modi ki Jeová da proféta Jonas forsa.

5. Pamodi ki proféta Jonas mesteba forsa?

⁵ Proféta Jonas mesteba forsa. El fuji di un diziginason difísil ki Jeová da-l. Pamodi kel-li, el staba kuazi ta móre na un tenporal fórti i el poi vida di kes otu algen na barku na prigu. Kantu es bota-l na mar, el ba para na un lugar ki nunka el ka pensaba ma el ta baba, ki éra bariga di un pexi grandi. Modi ki bu ta atxa ma Jonas xinti? El pensa ma el ta moreba? El atxa ma Jeová bandona-l? Talvês Jonas fika preokupadu dimás.

6. Sima sta na Jonas 2:1, 2, 7, kuzê ki da Jonas forsa kantu el staba na bariga di kel pexi?

⁶ Kuzê ki Jonas faze pa resebe forsa kantu el staba el sô na bariga di kel pexi? El faze orason pa Jeová. (Lé Jonas 2:1, 2, 7.) Enbóra Jonas ka obiba ku Jeová, el tinha serteza ma Jeová ta obiba se orason di rapendimentu ki el faze ku umildadi. Tanbê Jonas midita na Skrituras. Pamodi ki nu pode fla kel-li? Se orason ki nu ta atxa na Jonas kapítlu 2, ta uza txeu di kes palavra i frazis ki sta na Salmos. (Pur izénplu, konpara Jonas 2:2, 5 ku Salmo 69:1; 86:7.) Ta fika klaru ma Jonas konxeba Skrituras dretu. I kantu el midita na es duránti kel prubléma, el xinti ma Jeová ta djudaba el otu bês. Dipôs, Jonas volta pa téra séku i el staba prontu pa seta i kunpri otu diziginason. — Jonas 2:10–3:4.

7-8. Modi ki un irmon na Taiuan resebe forsa kantu el pasa pa prublémas?

⁷ Izénplu di Jonas pode djuda-nu óras ki nu ta pasa pa txeu prubléma. Pur izénplu, un irmon na Taiuan ki txoma Jin, b ten txeu prubléma di saúdi gravi. Tanbê se família ta faze-l opozison ku violénsia pamodi se fé na Jeová. El ta resebe forsa di Jeová através di orason i di studu. El fla: “Alvês óras ki N ta pasa pa prublémas, N ta fika preokupadu dimás ki N ka ta konsigi fika kalmu i faze nha studu pesoal.” Má el ka ta dizisti. El fla: “Primeru, N ta faze  orason pa Jeová, dipôs N ta poi nha skutador i N ta obi nos kántikus. Alvês N ta kanta ku vós baxu ti ki N fika kalmu i dipôs N ta kumesa ta studa.”

⁸ Studu pesoal da Jin forsa di maneras ki el ka staba ta spera. Pur izénplu, timenti el staba ta rekupera di un operason grandi, un infermera fla-l ma dja ki el tinha glóbulus brumedju baxu, el pode mesteba di un transfuzon di sangi. Na kel noti antis di operason, Jin lé spiriénsia di un irman ki faze operason sima di sel. Se glóbulus brumedju dixi más di ki di Jin, má simé kel irman ka seta un transfuzon di sangi i el konsigi rekupera. Kel spiriénsia li da Jin forsa pa el kontinua lial.

9. Kuzê ki bu pode faze si bu sta preokupadu dimás pamodi un prubléma? (Odja dizenhu i fotu.)

⁹ Duránti un prubléma, dja bu xinti preokupadu di tal manera ki nen bu ka ta konsigi faze orason dretu? Ô bu ta xinti kansadu dimás pa studa? Lenbra ma Jeová ta intende bu situason dretu. Nton óras ki bu ta faze un orason sinplis, bu pode ten serteza ma Jeová ta da-u kel ki bu meste. (Efé. 3:20) Si lé i studa é difísil pa bo pamodi bu sta duenti, kansadu ô preokupadu dimás, bu pode tenta obi gravasons di Bíblia ô di publikasons ku bazi na Bíblia. Tanbê obi un múzika ô odja un vídiu na jw.org pode djuda-u. Jeová krê da-u forsa i el ta faze kel-li óras ki bu ta faze orason pa el i dipôs bu ta djobe respósta pa bus orason na Bíblia i na tudu kes otu kuza ki el ta da-nu.

10. Modi ki nos irmons ku irmans ta da-nu forsa?

¹⁰ Jeová pode uza nos irmons ku irmans pa da-nu forsa. Es pode ser “un fonti di grandi konsolu” óras ki nu sta pasa pa un prubléma ô nu sta sforsa pa faze un diziginason difísil. (Kol. 4:10, 11) Nu ta meste amigus prinsipalmenti na ‘ténpu di frónta.’ (Pro. 17:17) Óras ki nu sta fraku, nos irmons pode  da-nu kel ki nu meste, konsola-nu i da-nu koraji pa nu kontinua ta sirbi Jeová. Odja modi ki Maria, mai di Jizus, resebe forsa di otus algen.

11. Pamodi ki Maria mesteba forsa?

¹¹ Maria staba ta meste forsa. Pensa na modi ki talvês el fika preokupadu dipôs ki el resebe un diziginason inportanti di anju Gabriel. El ka éra kazadu, má el staba grávida. El ka tinha ninhun spiriénsia na kria fidjus, má el tinha ki kuidaba di kel mininu li ki ta ben biraba Misías. Modi ki el ta splikaba se noivu, Juzé tudu kes kuza li dja ki nunka el ka fazeba séksu? — Luk. 1:26-33.

12. Sima sta na Lukas 1:39-45, modi ki Maria resebe kel forsa ki el staba ta meste?

¹² Modi ki Maria resebe kel forsa ki el staba ta meste pa faze es diziginason inportanti i ki ningen más ka dadu? El pidi ajuda di otus algen. Pur izénplu, el pidi Gabriel más informason sobri kel diziginason. (Luk. 1:34) Poku ténpu dipôs, el viaja ti un “zóna ki ta fikaba na montanha, pa un sidadi di Judá”, pa vizita Elizabeti ki éra se família. Kel vizita li djuda-l. Elizabeti ilojia Maria i Jeová uza-l pa pâpia di un profesia sobri fidju di Maria ki staba pa nase. (Lé Lukas 1:39-45.) Maria fla ma “ku se brasu” Jeová “aji ku puder.” (Luk. 1:46-51) Jeová da Maria forsa através di Gabriel i di Elizabeti.

13. Kuzê ki kontise ku un irman na Bulívia kantu el pidi irmons pa djuda-l?

¹³ Sima Maria, bu pode ten forsa tanbê através di bus irmon. Daniela, ki é un irman ki ta vive na Bulívia, staba ta meste di kel forsa li. Se pai atxadu ku un duénsa gravi i ki ka ten kura. Kantu se pai staba na ospital, Daniela toma kónta di el. (1 Tim. 5:4) Nen sénpri ka éra fásil. Daniela fla: “Txeu bês N ta xintiba ma N ka ta konsigi kontinuaba ta faze kel-li.” El pidi ajuda? Na komésu nau. El fla: “N ka krê inkomodaba irmons. N pensa: ‘É Jeová ki ta djuda-m na kel ki N meste.’ Má dipôs, N da kónta má si N fikaba mi sô, N staba ta tenta lida ku nhas prubléma mi sô.” (Pro. 18:1) Daniela disidi skrebe pa alguns di se amigus i splika-s se situason. El fla: “N ka ta konsigi splika modi ki nhas irmon ki N krê txeu da-m forsa. Es leba-m kumida na ospital i es lé testus di Bíblia ki konsola-m. Nu ta xinti txeu kontenti pamodi nu sabe ma nu ka sta nos sô. Nu ta faze párti di família di Jeová na mundu interu ki sta prontu pa djuda-u, txora ku bo i da-u koraji pa bu kontinua ta sirbi Jeová.”

14. Pamodi ki nu debe seta ajuda di ansions?

¹⁴ Un manera ki Jeová ta da-nu forsa é através di ansions. Es é prezenti ki el ta uza pa da-nu forsa i anima-nu. (Isa. 32:1, 2) Nton, óras ki bu ta fika preokupadu dimás pâpia ku ansions. Óras ki es oferese-u ajuda seta-l ku gratidon. Jeová pode da-u forsa através di es.

15. Ki speransa ki tudu algen ki ta sirbi Deus ten?

¹⁵ Nos speransa ku bazi na Bíblia pode da-nu forsa. (Rom. 4:3, 18-20) Alguns algen ki ta sirbi Deus ten speransa di vive pa tudu ténpu na séu i otus ten speransa di vive pa tudu ténpu na paraízu na téra. Nos speransa ta  da-nu forsa pa nu aguenta firmi óras ki nu ta pasa pa un prubléma, pa prega notísias sábi i pa faze txeu diziginason na kongregason. (1 Tes. 1:3) Kel speransa li da apóstlu Paulu forsa.

16. Pamodi ki apóstlu Paulu mesteba forsa?

¹⁶ Paulu mesteba forsa. Na kel karta ki el skrebe pa irmons na Korintu, el fla ma el éra sima un vazu di baru ki ta kebra faxi. El “presionadu”, “el fika konfuzu”, el “pirsigidu” i el “dadu na txon”. I ti se vida staba na prigu. (2 Kor. 4:8-10) Paulu skrebe kes palavra li na se tirseru viajen di misionáriu. Talvês na kel ténpu el ka sabia, má el ta ben pasaba pa situasons más difísil. El ta ben pasaba pa violénsia, el ta ben podu prézu i barku ta inkadjaba ku el.

17. Sima sta na 2 Koríntius 4:16-18, kuzê ki da Paulu forsa pa el aguenta prublémas?

¹⁷ Paulu tevi forsa pa el aguenta firmi pamodi el konsentra na se speransa. (Lé 2 Koríntius 4:16-18.) El fla kes irmon na Korintu ma ti si se korpu staba “ta kaba”, el ka ta dexaba kel-li dizanimaba el. Paulu konsentra na se futuru. Se speransa di vive pa tudu ténpu na séu éra “kada bês más grandi” i tinha más valor di ki kalker prubléma ki dja el pasaba pa el. Paulu midita na kel speransa li, pur isu el xinti ma el staba “ta bira novu kada dia.”

18. Modi ki speransa da Tomás ku se família forsa?

¹⁸ Tomás, ki é un irmon na Bulgária, atxa forsa na se speransa. Dja ten alguns anu ki se irmon más novu, Filipi, móre na un asidenti. Pamodi kel-li, Tomás ta xintiba txeu tristi. Pa lida ku tristéza, el ku se família fika ta imajina modi ki resureison ta ben ser. El fla: “Pur izénplu, nu ta pâpia sobri ki lugar nu ta ba inkontra ku Filipi, ki kumida nu ta faze pa el, ken ki nu ta konvida pa primeru fésta óras ki el resusita i kuzê  ki nu ta fla-l sobri kes kuza ki kontise na ténpu di fin.” Tomás ta fla ma konsentra na ses speransa ta djuda se família ten forsa pa kontinua ta aguenta firmi i ta spera kel ténpu ki Jeová ta ben resusita se irmon.

19. Modi ki bu pode bira bu speransa más fórti? (Odja fotu i dizenhu.)

¹⁹ Modi ki bu pode bira bu speransa más fórti? Pur izénplu, si bu ten speransa di vive pa tudu ténpu na téra, lé kuzê ki Bíblia ta fla sobri Paraízu i midita na el. (Isa. 25:8; 32:16-18) Pensa na modi ki vida ta ben ser na mundu novu. Imajina bu vida la. Kenha ki bu ta odja? Kuzê ki bu ta obi? Modi ki bu ta xinti? Pa djuda-u imajina, odja kes dizenhu di Paraízu na nos publikasons ô odja múzikas sima Kel mundu novu ki sta ben, Sta kuazi ta kontise, ô Pensa na kel ténpu. Si nu ta pensa sénpri na nos speransa di mundu novu, nos prublémas ta ser ‘lébi i pa poku ténpu’. (2 Kor. 4:17) Speransa ki Jeová ta da-u ta djuda-u ten forsa.

20. Sikrê óras ki nu sta xinti fraku, modi ki nu pode ganha forsa?

²⁰ Sikrê óras ki nu sta xinti fraku, ‘Deus ta da-nu forsa’. (Sal. 108:13) Jeová dja da-u kel ki bu meste pa bu resebe se forsa. Pur isu, óras ki bu meste ajuda pa faze un diziginason, pa aguenta un prubléma ô pa kontinua ku alegria faze orason pa Jeová di korason i djobe se orientason através di studu pesoal. Dexa bus irmon ku irmans da-u koraji. Tra ténpu sénpri pa pensa na bu speransa. Nton, “pa kel grandi puder di Deus da nhos forsa, asi pa nhos pode aguenta firmi na tudu kuza, ku paxénxa i alegria.” — Kol. 1:11.