Maná éra kel kumida prinsipal ki israelitas kume na dizértu duránti kes 40 anu. (Êxo. 16:35) Pa dôs bês tanbê Jeová da-s kudurnis pa es kume. (Êxo. 16:12, 13; Núm. 11:31) Má, kes israelita tinha un bokadinhu di otus kumida pa kume.

Pur izénplu, alvês Jeová ta lebaba se povu pa ‘un lugar pa es diskansaba’ undi tinha agu i kumida pa es kume. (Núm. 10:33) Un di kes lugar éra ‘na Elin i la tinha 12 fonti di agu i 70 palmera,’ ki talvês éra pé di tanbra. (Êxo. 15:27) Un livru a ta fla ma tanbra ta da na txeu lugar diferenti i el é kel prinsipal kumida na dizértu. Tanbê, el ta da óliu i sónbra pa milhons di algen.

Talvês israelitas para na un lugar grandi ki gósi ta txomadu Feiran i ki ta faze párti di Vali di Feiran. b Un livru c ta fla ma kel vali ki ten un riu, ten 130 kilómetru i é un di kes vali más kunpridu, más bunitu i más konxedu na Sinai. Kel livru tanbê fla ma es lugar grandi ô Feiran ta fika uns 45 kilómetru di kel lugar undi ki kel Vali Feiran ta inkontra ku mar. Kel lugar grandi li ta fika uns 600 métru pa riba di nível di mar i el ten kuazi sinku kilómetru di kunprimentu. El sta xeiu di palmera i el é bunitu dimás ki dja el konparadu ku jardin di Éden. Dja ten monti anu ki pesoas ta ben li pamodi kes monti palmera.

Kantu kes israelita sai di Ijitu, es leba masa, kuzas di masa pon i talvês alguns gran i óliu. É klaru ki kes kuza li ka ta duraba txeu. Povu tanbê leba ‘animal, sima ovelhas ku baka.’ (Êxo. 12:34-39) Pamodi kel situason difísil na dizértu, talvês ku ténpu txeu di kes animal móre. Talvês es kume alguns di es i otus oferesedu pa faze sakrifisiu ti pa kes deus falsu. d (Atus 7:39-43) Má simé, israelitas tinha alguns animal. Nu pode odja kel-li  na kuzê ki Jeová fla se povu, kantu es ka obi ku el: ‘Nhos fidjus ta ben bira pastor na dizértu duránti 40 anu’. (Núm. 14:33) Nton, talvês kes animal ta daba kes israelita leti i karni. Má di serteza kel-li ka ta txigaba pa sustentaba uns 3 milhon di algen duránti 40 anu. e

Na undi ki kes animal ta atxaba kumida ku agu? f Na kel ténpu, talvês ta txobeba más txeu i tinha planta más txeu na dizértu. Estudo Perspicaz das Escrituras, volumi 1, ta fla ma dja ten uns 3 mil i 500 anu ma kes lugar ki ta guardaba agu na Arábia éra mutu más txeu di ki gósi. Dja ki ten txeu vali séku, ki antis éra rius, kel-li ta prova ma antis ta txobeba i ta formaba korentis di agu. Má simé, dizértu éra un lugar grandi i ki ta daba medu. (Deut. 8:14-16) Si ka éra kes milagri ki Jeová fazeba pa daba es agu, di serteza kes israelita i kes animal ta moreba. — Êxo. 15:22-25; 17:1-6; Núm. 20:2, 11.

Muizés fla israelitas ma kel maná ki Jeová da-s pa es kume éra pa es sabeba ‘má ómi ka ta vive sô di pon, má di tudu palavra ki ta sai di bóka di Jeová.’ — Deut. 8:3.