STUDU 43
KÁNTIKU 90 Nu nkoraja kunpanheru
Kuzê ki pode djuda-nu kaba ku nos dúvida?
“Nhos djobe dretu tudu kuza.” — 1 Tesalonisensis 5:21.
ASUNTU PRINSIPAL
Modi ki nu ta kaba ku dúvidas ki pode afeta nos sirvisu pa Jeová.
1-2. (a) Kal ki é alguns pergunta ki sérvus di Jeová pode faze? (b) Kuzê ki nu sta ben odja na kel studu li?
NOS tudu, ka ta inporta ki idadi ki nu ten, alvês nu ta ten dúvidas. a Pur izénplu, un jóven ki é publikador pode pergunta si Jeová ta preokupa ku el di verdadi. Pamodi kel-li el ka ten serteza si el debe batiza. Ô pensa na un irmon ki kantu el éra jóven, el skodje poi sirvisu di Jeová na primeru lugar na se vida envês di skodje un trabadju ki el ta ganhaba txeu dinheru. Gósi, el sta más grandi i el ten dinheru sô pa sustenta se família. El pode pergunta si el toma un bon disizon kantu el éra más jóven. Ô pensa na un irman ki dja sta algen grandi i ki ka tene txeu forsa más. El pode xinti dizanimadu pamodi el ka ta pode faze kel ki el ta fazeba antis. Talvês dja bu kustuma faze alguns di kes pergunta li: ‘Jeová ta odja kes kuza ki N ta faze? Kes sakrifisiu ki N faze pa Jeová ten valor pa el? Inda N ta pode faze algun kuza pa Jeová?’
2 Si nu ka djobe respósta pa perguntas sima kes-li, es pode pô-nu ta perde fé na Jeová i ti mésmu ta para di adora-l. Na kel studu li nu sta ben odja modi ki nu pode konsentra na prinsípius di Bíblia ki pode djuda-nu si nu ten dúvidas (1) ma Jeová ta inporta ku nos, (2) si nu toma bons disizon na pasadu, ô (3) si inda nu ta pode faze algun kuza pa Jeová.
KUZÊ KI PODE DJUDA-NU ÓRAS KI NU TENE DÚVIDAS?
3. Kuzê ki nu pode faze óras ki nu tene dúvidas?
3 Óras ki nu tene dúvidas é inportanti nu djobe respóstas na Bíblia. Si nu faze kel-li, nos fé na Jeová i nos amizadi ku el ta bira más fórti i nu ta sta más ben priparadu pa “mante firmi na fé”. — 1 Kor. 16:13.
4. Modi ki nu pode “djobe dretu tudu kuza”? (1 Tesalonisensis 5:21)
4 Lé 1 Tesalonisensis 5:21. Repara ma Bíblia ta insentiva-nu pa nu “djobe dretu tudu kuza.” Modi ki nu pode faze kel-li? Nu pode ten serteza ma kuzê ki nu ta kridita na el é verdadi óras ki nu ta konpara-l ku kuzê ki Bíblia ta fla. Pur izénplu, pensa na situason di kel jóven ki staba ta pergunta si Jeová ta preokupa ku el di verdadi. El debe lógu kridita ma Jeová ka ta preokupa ku el? Nau, el debe “djobe dretu tudu kuza” óras ki el ta studa Bíblia pa odja kuzê ki Jeová ta pensa sobri el.
5. Modi ki nu pode atxa respósta di Jeová pa nos perguntas?
5 Óras ki nu ta lé Bíblia é sima si nu sta ta obi Jeová ta pâpia ku nos. Má, nu meste faze más di ki sô lé Bíblia si nu krê atxa respóstas ki Jeová ta da pa nos perguntas. Nu meste djobe i studa testus di Bíblia ki ta djuda-nu atxa respóstas pa kuzas ki sta ta preokupa-nu. Nu pode faze piskiza na nos publikasons. (Pro. 2:3-6) Nu pode ora pa Jeová ta pidi-l pa el djuda-nu atxa respósta pa nos perguntas. Dipôs, nu pode djobe prinsípius na Bíblia i informasons ki ta djuda-nu na nos situason. Tanbê, é bon nu lé stórias di Bíblia di sérvus fiel di Jeová ki pasa pa situason sima di nos.
6. Modi ki runion pode djuda-nu atxa respósta pa nos perguntas?
6 Tanbê, nu ta “obi” Jeová ta pâpia ku nos óras ki nu sta na runion. Si sénpri nu ta sisti runions nu pode obi un diskursu ô un komentáriu ki é respósta pa kes pergunta ki nu ten. (Pro. 27:17) Gósi nu sta ben odja kuzê ki pode djuda-nu atxa respóstas pa kes pergunta ki nu ten.
ÓRAS KI BU TEN DÚVIDAS SI JEOVÁ TA INPORTA KU BO
7. Ki pergunta alguns algen pode faze?
7 Dja bu txiga di pergunta si Jeová ta preokupa ku bo? Si bu ta xinti ma bo é ka inportanti talvês bu ta pensa ma é inposível bu ser amigu di Kel ki kria tudu kuza. Rei Davidi talvês pensa mésmu kuza. El fika dimiradu di sabe ma Jeová ta kuida ti mésmu di pesoas. El fla: ‘Ó Jeová, kuzê ki é ómi pa bu repara na el, i fidju di ómi ki ta móre pa bu presta atenson na el?’ (Sal. 144:3) Undi ki bu pode atxa respósta pa kel pergunta li?
8. Di akordu ku 1 Samuel 16:6, 7, 10-12, kuzê ki Jeová ta odja na pesoas?
8 Bíblia ta inxina-nu ma Jeová ta repara na kes algen ki ta parse ma es é ka inportanti pa otus. Pur izénplu, Jeová manda Samuel pa kaza di Jesé pa el ba skodjeba un di se fidjus pa sérba rei di Israel. Jesé tinha 8 fidju. El txoma 7 di se fidju pa ba inkontra ku Samuel, má el ka txoma Davidi ki éra kel más novu. b Má foi Davidi ki Jeová skodje. (Lé 1 Samuel 16:6, 7, 10-12.) Jeová odja ken ki Davidi éra di pa déntu di verdadi. Jeová sabia ma Davidi éra un jóven ki ta amaba el txeu.
9. Pamodi ki bu pode ten serteza ma Jeová ta preokupa ku bo? (Odja fotu.)
9 Pensa na modi ki Jeová dja mostra ma el ta inporta ku bo. El ta da-u kel midjór konsedju ki bu meste pa bu situason. (Sal. 32:8) Kel-li ta prova ma el konxe-u dretu. (Sal. 139:1) Óras ki bu ta sigi konsedju ki Jeová da-u i bu ta odja ma kel-li djuda-u, bu ta fika konvensidu ma Jeová ta inporta ku bo. (1 Cró. 28:9; Atus 17:26, 27) Jeová ta odja tudu sforsu ki bu ta faze pa bu sirbi-l i obi ku el. El ta odja kes bon kualidadi ki bu ten i el ta krê ser bu amigu. (Jer. 17:10) I el ta fika txeu kontenti si bu disidi ser se amigu tanbê. — 1 Juan 4:19.
‘Si bu djobe Jeová, el ta dexa-u atxa-l’. — 1 Cró. 28:9 (Odja parágrafu 9.) c
ÓRAS KI BU TEN DÚVIDA SI BU TOMA BONS DISIZON NA PASADU
10. Óras ki nu ta pensa na disizons ki nu toma na pasadu, ki perguntas nu pode faze?
10 Alvês, alguns algen pode pensa na disizons ki es toma na pasadu, i es ta pergunta si es toma bons disizon. Talvês es dexa un nogósiu ki es ta ganhaba dretu ô es disidi ka kumesa un nogósiu, asi pa es pode sirbi Jeová más txeu. Má talvês dja pasa txeu anu. Es pode pensa na alguns algen ki toma disizons diferenti di es i gósi ta parse ma kes algen ten txeu dinheru i un vida dretu. Pamodi kel-li es pode pergunta: ‘Kes sakrifisiu ki N faze pa Jeová ten valor pa el? Ô N devia trabadjaba más txeu pa N pode ten más dinheru gósi?’
11. Pamodi ki skritor di Salmo 73 staba ta xinti angustiadu?
11 Si bu sta faze perguntas sima kes-li, odja modi ki skritor di Salmo 73 xinti. El odja ma kes algen ki ka ta sirbiba Jeová tinha bon saúdi, es éra riku i ta parseba ma es ka tinha prubléma. (Sal. 73:3-5, 12) Kantu el odja ma ses vida sta parseba tudu dretu, kel-li pô-l ta xinti ma sforsu ki el faze pa sirbi Jeová ka foi un bon disizon. El staba ‘dia interu angustiadu’ pamodi kes pensamentu ki ta dizanimaba el. (Sal. 73:13, 14) Modi ki el lida ku kes sentimentu negativu li?
12. Sima sta na Salmo 73:16-18, kuzê ki djuda kel salmista lida ku se sentimentus negativu?
12 Lé Salmo 73:16-18. Kel salmista bai pa santuáriu di Jeová. La el konsigi pensa más dretu. El intende ma enbóra vida di kes algen ta parseba sábi, es ka tinha speransa pa futuru. Kantu el intende kel-li, el xinti pas na menti pamodi el odja ma inpenha pa kuzas spritual é kel midjór disizon. Pamodi kel-li, el fika disididu na kontinua ta sirbi Jeová. — Sal. 73:23-28.
13. Modi ki bu pode xinti pas na menti si bu ten dúvidas sobri disizons ki bu toma na pasadu? (Odja fotus.)
13 Sima salmista, bo tanbê bu pode xinti pas na menti ku ajuda di Palavra di Deus. Modi? Lenbra di kes kuza bon ki bu ten, kel-li ta inklui kes benson di Jeová. I lenbra ma kes algen ki ka ta sirbi Jeová ka ten se ajuda. Pa kes algen ki ka ta sirbi Jeová, ten un vida sábi é kuza más inportanti pa es, pamodi es ka ten speransa pa futuru. Má pa bo, Jeová promete-u bensons alén di kel ki bu ta pode imajina. (Sal. 145:16) Tanbê pensa na kel-li: bu ta pode sabe ku serteza modi ki bu vida ta sérba si bu tomaba disizons diferenti? Má bu pode ten serteza ma si bu ta toma disizons pamodi bu amor pa Deus i pa otus algen, sénpri bu ta ten kuzas na vida ki ta pô-u txeu filís.
Pensa na kes benson ki Jeová ta ben da-u na futuru (Odja parágrafu 13.) d
ÓRAS KI BU TEN DÚVIDA SI BU TA PODE FAZE ALGUN KUZA PA JEOVÁ
14. Ki situason alguns sérvu di Jeová sta pasa pa el, i ki pergunta talvês es ta faze?
14 Alguns sérvu di Jeová ka ta pode faze txeu sima es ta gostaba pamodi dja es sta algen grandi, es ten prublémas di saúdi ô es ten algun difisiénsia. Kel-li pode pô-s ta xinti ma es é ka inportanti pa Jeová. Talvês es ta pergunta: ‘Inda N ta pode faze algun kuza pa Jeová?’
15. Di kuzê ki skritor di Salmo 71 tinha serteza?
15 Kel skritor di Salmo 71 xinti di mésmu manera. El ora: ‘Ka bu bandona-m óras ki falta-m forsa.’ (Sal. 71:9, 18) Enbóra kel salmista staba ta xinti fraku, el tinha serteza ma si el sirbiba Deus di manera fiel, Jeová ta djudaba el. Kel salmista intende ma Jeová ta fika kontenti ku kes algen ki ta faze ses midjór pa sirbi-L, sikrê es ka ta pode faze txeu sima es ta gostaba. — Sal. 37:23-25.
16. Di ki manera kes algen grandi ta pode faze algun kuza pa Jeová? (Salmo 92:12-15)
16 Si bo é un algen grandi, pensa na modi ki Jeová ta odja-u. El pode djuda-u sirbi-l di manera fiel, sikrê ku bus limitason. (Lé Salmo 92:12-15.) Envês di konsentra na kuzê ki bu ka ta pode faze, konsentra na kuzê ki bu ta pode faze. Pur izénplu, bu pode djuda otus algen através di bu izénplu di fé i óras ki bu ta mostra-s ma bu ta preokupa ku es di verdadi. Bu pode pâpia ku otus algen sobri modi ki Jeová dja djuda-u duránti txeu anu i mostra-s ma bu ta kunfia ma kes promésa di Jeová ta ben kunpri. Nunka ka bu ten dúvida ma orasons di korason ki bu ta faze pa otus algen pode djuda-s. (1 Ped. 3:12) Ka ta inporta kal ki é nos situason, nos tudu nu pode faze algun kuza pa Jeová i pa otus algen.
17. Pamodi ki nu ka debe konpara kuzê ki nu ta faze ku kuzê ki otus algen ta faze?
17 Si bu sta xinti diziludidu pamodi bu ka ta pode faze más na sirvisu pa Jeová, bu pode ten serteza ma Jeová ta da txeu valor pa kel ki bu ta konsigi faze. Talvês bu ta konpara kuzê ki bu ta faze ku kuzê ki otus algen ta faze. Má ka bu faze kel-li! Pamodi? Pamodi Jeová ka ta faze kes konparason li. (Gál. 6:4) Pur izénplu, Maria da Jizus un óliu karu di prezenti. (Juan 12:3-5) Má kel viúva póbri poi dôs muéda di poku valor na kófri di ténplu. (Luk. 21:1-4) Má Jizus ka konpara kes dôs mudjer. Pa Jizus kes dôs mudjer mostra ses fé. Nton bu pode ten serteza ma Jeová ta odja tudu kel ki bu ta faze, pamodi bu fé na el i pamodi bu ta ama-l. I kel-li ten txeu valor pa el, sikrê bu ta xinti ma kuzê ki bu ta faze é poku di más.
18. Kuzê ki ta djuda-nu kaba ku nos dúvidas? (Odja kuadru “ Palavra di Jeová pode djuda-u kaba ku bus dúvida”.)
18 Alvês nos tudu ta ten dúvidas. Má sima dja nu odja, Bíblia pode djuda-nu kaba ku kes dúvida. Nton, faze bu midjór pa bu atxa respóstas pa bus pergunta, i asi bu ta ten kunfiansa envês di xinti dizanimadu. Di serteza Jeová konxe-u. El ta da valor pa bus sakrifisiu i el promete ma el ta rekonpensa-u. Jeová ta ama i el ta kuida di kada un di se sérvus lial.
KÁNTIKU 111 Nu ten txeu motivu pa sta kontenti
a MÁS SPLIKASON: Na kel studu li, nu sta ben pâpia sobri dúvidas ki ta pô-nu ta pensa si nu ten valor pa Jeová ô nau i sobri disizons ki nu toma na pasadu. Nu ka sta ben pâpia sobri dúvidas ki pesoas ta ten pamodi falta di fé na Jeová i na se promésas.
b Enbóra Bíblia ka ta fla-nu kantu anu ki Davidi tinha kantu Jeová skodje-l, talvês inda el staba jóven. — Odja Sentinéla di 1 di setenbru di 2011, pájina 29, parágrafu 2.
