NA MUNDU interu, ansions ta da txeu valor pa ses priviléjiu di sirbi ses irmons. Es é un benson pa tudu nos! Má, ka dura fazedu un mudansa. Kes ansion di más idadi, abri mô di alguns responsabilidadi inportanti ki es tinha i ansions más novu pasa ta kuida di kes responsabilidadi. Di ki manera?

Pamodi kel mudansa li, enkaregadus di grupu di kongregason i kes instrutor di skólas di organizason, ku más di 70 anu, tevi ki dexa ses responsabilidadi. Tanbê, ansions ku más di 80 anu, ki éra kordenadoris di Kumison di Filial ô di grupu di ansions na kongregason, tevi ki pasa ses responsabilidadi pa ansions más novu. Modi ki kes irmon más bédju reaji ku kel mudansa li? Es kontinua lial pa Jeová i pa se organizason!

Un irmon ki txoma Ken, ki éra kordenador di Kumison di Filial pa más di 49 anu fla: “N konkorda 100% ku kel disizon li. Pa fla verdadi, na kel dia di sédu ki N sabe di kel mudansa, dja N pidiba Jeová na orason pa skodje un irmon más novu pa ser  kordenador.” Ansions fiel di mundu interu, reaji di mésmu manera ki Ken. É klaru ki es gosta di sirbi ses irmon, pur isu, es fika un bokadinhu tristi na komésu.

Un irmon ki txoma Esperandio ki éra kordenador di grupu di ansions, fla: “Na komésu N fika un bokadinhu tristi.” Má, dipôs el fla: “N staba ta meste di más ténpu pa N kuidaba di nha saúdi.” Esperandio kontinua ta sirbi Jeová fiel i el é un benson pa se kongregason.

I kes irmon ki dja tinha txeu ténpu na sirvisu di enkaregadu di grupu di kongregason i ki tevi ki muda di diziginason? Un irmon ki txoma Allan, ki pasa 38 anu ta vizita kongregason, fla: “Kel-li éra un kuza ki N ka sta speraba.” Má simé, el odja ma é bon trena irmons más novu i kontinua fiel ta sirbi Jeová.

Russell pasa 40 anu ta vizita kongregason i tanbê el éra instrutor di skólas di organizason. El fla ma na komésu kantu es resebe novu diziginason el ku se mudjer, es fika dizanimadu. Tanbê el fla: “Nu ta daba txeu valor pa nos trabadju i nu ta xintiba ma inda nu tinha forsa pa nu kontinuaba.” Russell ku se mudjer sta ta uza tudu kel trenamentu ki es resebe i spiriénsa ki es ten, pa djuda na ses kongregason i pa djuda irmons sirbi Jeová ku alegria.

Sikrê bu ka pasa pa kel situason li, kuzê ki sta na 2 Samuel pode djuda-u ntende kuzê ki kes irmon xinti.

Bu ta lenbra kantu Absalon fidju di Rei Davidi rabela? Davidi fuji di Jiruzalen pa Maanain, ki ta fikaba na lésti di Riu Jurdon. Kantu Davidi ku ses ómi staba la, es pasa alguns nisisidadi. Bu ta lenbra kuzê ki kontise dipôs?

Três ómi ki ta moraba na kel zóna, resebe-s dretu. Es leba-s kama i alguns kuza ki es staba ta meste. Un di kes ómi éra Barzilai. (2 Sam. 17:27-29) Kantu rebelion di Absalon kaba, Davidi volta pa Jiruzalen i Barzilai kunpanha-l ti Jurdon. Davidi tenta konvense Barzilai pa muda pa Jiruzalen. El fla ma el ta daba el kumida pa tudu ténpu di se vida. Má, Davidi sabeba ma Barzilai éra ‘un ómi txeu riku’ i el ka mesteba di nada. (2 Sam. 19:31-33) Talvês, Davidi kreba pa el fikaba djuntu ku el na Jiruzalen, pamodi el odja ma Barzilai éra algen ki tinha txeu anu di spiriénsa i ki podia daba el bons konsedju. Kel-li éra un priviléjiu grandi pa Barlizai moraba na palásiu i trabadjaba la.

Má, Barzilai sabia ma dja el staba algen grandi. El lenbra ma dja el tinha 80 anu i  el fla: ‘N ta konsigi sabe si un kuza é dretu ô mariadu?’ Kuzê ki Barzilai krê flaba ku kel-li? Duránti tudu se vida el ganha txeu sabedoria. Inda el ta podia daba bons konsedju, sima kes ‘ómi más bédju’ ta fazeba ku Rei Rubuon. (1 Reis 12:6, 7 ; Sal. 92:12-14; Prov. 16:31) Nton, talvês Barzilai staba ta pâpia di se idadi. El rekonhise ma se idadi ka ta dexaba el xinti gostu di kumida i nen obiba dretu. (Ecl. 12:4, 5) Pur isu, Barzilai pidi Davidi pa leba Kiman ki éra más novu. Talvês Kiman éra fidju di Barzilai. — 2 Sam. 19:35-40.

Kes mudansa ki fladu na komésu di es artigu, ta mostra kel mésmu manera di pensa ki Barzilai tinha. É klaru ki oji ka ta djobedu sô pa situason i kapasidadi di un algen, sima kontise ku Barzilai. Tinha nisisidadi di djobe situason di tudu algen i odja kuzê ki é midjór pa kes ansion fiel di más idadi.

Kes ómi umildi i fiel ntende ma organizason di Jeová ta fika kada bês más fórti i ta kria, si kes irmon más novu konsigi kuida di responsabilidadi ki éra di kes irmon más bédju. Kuazi sénpri, é kes irmon más bédju ki ta trena kes más novu. É kel-li ki apóstlu Polu faze ku Timótiu i ki talvês Barzilai faze ku se fidju. (1 Cor. 4:17; Fil. 2:20-22) Kes irmon más novu, mostra ma es é ómis ki dadu ‘sima prezentis’, kapás di djuda ‘forma korpu di Kristu’. — Efé. 4:8-12; djobe tanbê Números 11:16, 17, 29.

Txeu di kes ki abri mô di alguns responsabilidadi, gósi es tene xansi di faze más na ses sirvisu pa Jeová.

Un irmon ki txoma Marco, ki foi enkaregadu di grupu di kongregason duránti 19 anu, fla: “Gósi nha situason ta djuda-m da más atenson pa kes maridu di nos irmans ki ka é Tistimunhas di Jeová.”

Geraldo ki pasa 28 anu na sirvisu di enkaregadu di grupu di kongregason, fla: “Nos obijetivu gósi é djuda kes inativu i ten más studus di Bíblia.” El ku se mudjer ta faze 15 studu di Bíblia. I txeu di kes inativu gósi sta ta sisti runion.

Allan ki dja nu papiaba di el na komésu, fla: “Gósi nu ten más ténpu i más xansi di trabadja na pregason. Nu sta gosta txeu di trabadja na tistimunhu pa públiku, tistimunhu na lójas i prega pa nos vizinhus. Dôs di es sta ta bai runion.”

Si bo é un di kes irmon lial i bu resebe un novu diziginason, ten otu manera ki bu pode apoia sirvisu di Jeová. Bu pode uza bu spiriénsa pa djuda kes irmon más novu na kongregason. Russell ki dja nu papiaba di el antis, fla: “Jeová sta ta trena i el sta ta uza ómis más novu ki ten kapasidadi. Irmons di mundu interu sta ta resebe ses ajuda, através di ses ensinu i ses vizita di nkorajamentu.” — Odja kuadru “ Djuda kes irmon más jóven faze ses midjór”.

Si dja ten poku ténpu ki bu resebe novu diziginason, ka bu perde alegria. Dja bu marka vida di txeu algen na bu sirvisu di tudu korason.I inda bu pode kontinua ta faze kel-li. Txeu algen gosta di bo i bu pode ten sertéza ma es ta kontinua ta gosta.

Más inportanti inda, bu ten un lugar guardadu na korason di Jeová. El ka ta ‘skese di bus óbra i di amor ki bu mostra pa se nómi, di manera ki bu sirbi kes algen santu i bu kontinua ta sirbi-s.’ (Heb. 6:10) Kel testu li ta mostra klaru ma bu  ten txeu valor pa Jeová. El ka ta lenbra sô di kes sforsu ki bu faze na pasadu. Má tanbê pa kel ki bu ta kontinua ta faze pa agrada-l!

Má, i si bu ka muda di un diziginason sima kes irmon li? Bu pode ten sertéza ma kel asuntu li pode djuda-u. Di ki manera?

Si bu konxe algun irmon di más idadi ki resebe novu diziginason, tenta prende ku tudu se spiriénsa! Pidi se konsedju, se opinion i tenta odja modi ki el ta kuida di se novu diziginason.

Pode ser ki bo é un irmon di más idadi ki sta ta sirbi na un novu diziginason ô un irmon ki sta ta prende ku kes ki ten más spiriénsa. Ka ta nporta kal ki é bu situason, lenbra ma Jeová ta da txeu valor pa se sérvus lial ki sforsa na pasadu i ki sta ta kontinua ta sforsa.