1-2. (a) Pamodi ki Armajedon é un notísia sábi pa pesoas? (b) Ki perguntas nu sta ben responde na kel studu li?

DJA bu kustuma obi pesoas ta uza kel palavra li “Armajedon”, pa pâpia di un géra nukliar ô un dizastri na naturéza? Má, kuzê ki Bíblia ta fla sobri Armajedon é un notísia sábi; el é un kuza ki debe da-nu alegria! (Apo. 1:3) Géra di Armajedon ka ta ben distrui umanus, má el ta ben salva pesoas! Di ki manera?

² Bíblia ta fla ma géra di Armajedon ta ben salva pesoas óras ki el ben kaba ku govérnus di ómi. Kel géra li ta ben salva pesoas óras ki el ben kaba ku algen mau i dexa sô kes algen justu. I el ta ben salva pesoas pamodi el ka ta dexa pa nos planéta distruídu. (Apo. 11:18) Pa nu ntende midjór kes asuntu li, nu sta ben responde kuatu pergunta: Kuzê ki é Armajedon? Kuzê ki ta ben kontise antis di Armajedon? Modi ki nu pode salva duránti Armajedon? Modi ki nu pode kontinua fiel gósi ki Armajedon sta kuazi ta txiga?

3. (a) Kuzê ki siginifika palavra ‘Armajedon’? (b) Di akordu ku Apocalipse 16:14, 16, pamodi ki nu pode fla ma Armajedon é ka un lugar na Téra?

³ Lé Apocalipse 16:14, 16. Palavra Armajedon ta parse sô un bês na Bíblia. El ta ben di un palavra ebraiku ki siginifika ‘Monti Mejidu’. (Apo. 16:16; nóta di rodapé) Mejidu éra un sidadi na Israel antigu. (Jos. 17:11) Má Armajedon ka siginifika nómi di un lugar na Téra. Na pokus palavra, el ta  siginifika un situason undi ki ‘reis di tudu téra’ ta sta djuntadu kóntra Jeová. (Apo. 16:14) Má, na kel studu li, tanbê nu ta ben uza palavra Armajedon pa pâpia di kel géra ki ta ben kontise lógu dipôs ki kes rei di téra djuntadu. Modi ki nu sabe ma Armajedon é ka un lugar na Téra? Primeru, ka ta izisti un monti na Mejidu. Sugundu, kel zóna di Mejidu é pikinoti dimás pa poi tudu kes ‘rei di téra interu’, ses trópas i armas di géra. Tirseru, sima nu sta ben odja más pa frenti na kel studu li, géra di Armajedon ta kumesa óras ki ‘reis’ di mundu ataka povu di Deus, ki sta spadjadu na mundu interu.

4. Pamodi ki Deus txoma se géra final di lugar di Mejidu?

⁴ Pamodi ki Jeová txoma se grandi géra final di lugar di Mejidu? Na ténpu ki Bíblia skrebedu, es ta fazeba txeu géra na Mejidu i pértu di vali di Jizreel. Alvês, Jeová ta djudaba se povu óras ki el ta lutaba pa es. Pur izénplu, ‘djuntu di kes agu di Mejidu’, Deus djuda un juís israelita, ki txomaba Baraki, ganha géra kóntra trópas di Kanan komandadu pa un xéfi ki txomaba Sízera. Baraki i profetiza Débura agradise Jeová pa vitória ki foi un milagri. Es kanta: ‘Strélas luta la di séu kóntra Sízera. Riu di Kizon rasta-s’. — Juí. 5:19-21.

5. Di ki manera inportanti géra di Armajedon é diferenti di géra ki Baraki partisipa?

⁵ Baraki ku Débura tirmina ses múzika ku kes palavra li: ‘Ó Jeová, pa tudu bus inimigus móre, má pa kes ki ta ama-u pa ser sima sól ki ta nase na se glória.’ (Juí. 5:31) Na Armajedon, inimigus di Deus tanbê ta móre i kes ki ta ama-l ta ben salva. Má, ten un diferénsa inportanti entri kes dôs géra. Duránti géra di Armajedon, povu di Deus ka ta luta. Nen es ka ta ten arma! Ses ‘forsa ta ben sta na es kontinua kalmu i ten kunfiansa’ na Jeová i na se izérsitu ki sta na Séu. — Isa. 30:15; Apo. 19:11-15.

6. Kuzê ki Jeová pode uza pa kaba ku se inimigus na Armajedon?

⁶ Modi ki Deus ta ben ganha se inimigus na géra di Armajedon? El pode uza txeu manera diferenti. Pur izénplu, el pode uza tremor di téra, pédras di granizu i raius di Séu. (Jó 38:22, 23; Eze. 38:19-22) El pode poi inimigus ta luta kóntra kunpanheru. (2 Cró. 20:17, 22, 23) I el pode uza se anjus pa distrui kes algen mau. (Isa. 37:36) Ka ta nporta kuzê ki Deus ta ben uza, é el ki ta ganha. Tudu kes inimigu ta ser distruídu. I tudu kes algen justu ta ben salva. — Pro. 3:25, 26.

7-8. (a) Di akordu ku 1 Tessalonicenses 5:1-6, ki avizu stranhu govérnus di mundu ta ben faze? (b) Pamodi ki kel avizu ta ser un mintira prigozu?

⁷ Es ta ben fla ‘pas i suguransa’ antis di ‘dia di Jeová.’ (Lé 1 Tessalonicenses 5:1-6.) Na 1 Tessalonicenses 5:2, palavras ‘dia di Jeová’ krê fla ‘grandi tribulason’. (Apo. 7:14) Modi ki nu ta sabe ki óra ki grandi tribulason ta kumesa? Bíblia ta fla ma ta ben dadu un avizu stranhu. Kel avizu ta sirbi di sinal ma grandi tribulason sta kuazi ta kumesa.

⁸ Kel avizu é di ‘pas i suguransa’. Pamodi ki govérnus di mundu ta ben fla kel-li? Xéfis di relijion ta ben fla kel-la tanbê? Talvês. Má kel avizu di pas i suguransa é un otu mintira prigozu ki ta ben di dimónis. Txeu algen ta ben atxa ma es sta suguru, má na verdadi ta sta kuazi ta kumesa kel tribulason más grandi na stória di mundu. I sima Bíblia ta fla  ‘distruison ta ben riba di es dirapenti, sima óras ki mudjer grávida ta xinti dór di ten fidju’. I kuzê ki ta ben kontise ku sérvus di Jeová? Talvês es pode fika dimiradu pamodi grandi tribulason ta kumesa dirapenti, má dja es ta sta priparadu pa el.

9. Jeová ta distrui mundu di Satanás di un bês sô? Splika.

⁹ Na ténpu di Nué, Jeová kaba ku tudu kel mundu mau, di un bês sô. Má, ku sistéma di Satanás ta ser diferenti. Primeru, el ta distrui Babilónia kel Grandi, ki ta reprizenta tudu kes relijion falsu di mundu. Dipôs, na Armajedon, el ta ben distrui tudu kes otu párti di mundu di Satanás, ki ta inklui pulítika, trópas i komérsiu. Gósi nu sta ben odja kada un di kes kuza li.

10. Di akordu ku Apocalipse 17:1, 6 i 18:24, pamodi ki Jeová ta ben kaba ku Babilónia kel Grandi?

¹⁰ ‘Julgamentu di kel grandi prostituta.’ (Lé Apocalipse 17:1, 6; 18:24.) Babilónia kel Grandi poi txeu algen ka ta mostra ruspetu pa nómi di Deus. El ta inxina mintiras sobri Deus. Sima un prostituta, relijion falsu é infiel pa Deus i el ta apoia govérnus di mundu. El ta uza se puder i influénsia ki el ten, pa el toma dinheru di ses ménbru i dja el mata monti algen, ki ta inklui alguns sérvu di Deus. (Apo. 19:2) Modi ki Jeová ta ben kaba ku Babilónia kel Grandi?

11. Kuzê ki é kel ‘féra kor burmedju’, i modi ki Deus ta ben uza-l kóntra Babilónia kel Grandi?

¹¹ Jeová ta ben uza ‘10 txifri’ di ‘un féra kor burmedju’ pa kaba ku kel ‘grandi prostituta’. Kel féra li ta reprizenta Organizason di Nasons Unidu. Kes 10 txifri ta reprizenta govérnus ki ta apoia Organizason di Nasons Unidu. Na ténpu sértu di Deus, kes govérnu ta ben fika kóntra Babilónia kel Grandi. Es ‘ta dexa-l distruídu i nu’, es ta toma se rikézas i es ta mostra tudu algen kuzas mariadu ki el faze. (Apo. 17:3, 16) Se distruison ta ser uma faxi, ki ta parse ma kontise ‘sô na un dia’. Tudu  kes ki ta apoiaba relijion falsu ta ben fika spantadu, pamodi sénpri el ta ngababa se kabésa: ‘N sta xintadu sima rainha, ami é ka viúva i nunka N ka ta ben odja tristéza.’ — Apo. 18:7, 8.

12. Kuzê ki Jeová ka ta ben dexa nasons faze, i pamodi?

¹² Deus ka ta ben dexa nasons kaba ku se povu. Sérvus di Deus onra se nómi i es obi se órdi di fuji di Babilónia kel Grandi. (Atos 15:16, 17; Apo. 18:4) Tanbê, es trabadja txeu pa djuda otus fuji di el. Pur isu, sérvus di Jeová ka ta ben ‘resebe párti di se pragas’, óras ki Babilónia kel Grandi distruídu. Má simé, ses fé ta ben podu na próva.

13. (a) Ken ki é Gogi? (b) Di akordu ku Ezequiel 38:2, 8, 9, kuzê ki ta poi Gogi ta ataka povu di Deus?

¹³ Ataki di Gogi. (Lé Ezequiel 38:2, 8, 9.) Dipôs ki tudu relijion falsu distruídu, povu di Deus ta ben odjadu sima un arvi ki skapa el sô di un tenporal fórti. Di sertéza Satanás ta ben fika ku txeu raiba. El ta ben mostra se raiba óras ki el ben uza informasons falsu di dimónis, ki na Apocalipse ta txomadu di ‘palavras ki ta ben di dimónis’, pa el pode poi un grupu di nasons ta ataka povu di Jeová. (Apo. 16:13, 14) Kel grupu di nasons ta txomadu di ‘Gogi di téra di Magogi’. Óras ki nasons ataka povu di Jeová, ta kumesa géra di Armajedon. — Apo. 16:16.

14. Kuzê ki Gogi ta ben da kónta?

¹⁴ Gogi ta ben kúnfia na se ‘brasu di karni’ ki é se trópas poderozu. (2 Cró. 32:8) Anos nu ta kúnfia na Jeová, nos Deus, ki pa nasons pode parse un kuza ki ka ta faze sentidu. Pamodi? Pamodi Babilónia kel Grandi éra poderozu, má se deuzis ka salva-l di ‘féra’ i se ‘10 txifri’! (Apo. 17:16) Nton, Gogi ta ben atxa ma é fásil el ganha. Sima ‘núvens ta kubri téra’, el ta ben ataka povu di Jeová. (Eze. 38:16) Má, Gogi lógu ta da kónta ma el ka ta  pode skapa. Sima Faraó na Mar Burmedju, Gogi ta ben ntende ma el sta ta luta kóntra Jeová. — Êxo. 14:1-4; Eze. 38:3, 4, 18, 21-23.

15. Kuzê ki Jizus ta ben faze na géra di Armajedon?

¹⁵ Kristu ku se trópas na Séu ta ben difende povu di Deus i es ta ben distrui Gogi ku se trópas. (Apo. 19:11, 14, 15) Má, kuzê ki ta ben kontise ku Satanás, ki é kel inimigu prinsipal di Jeová, ki spadja mintiras pa nasons i pô-s ta ataka povu di Jeová na géra di Armajedon? Jizus ta ben bota-l na un abismu djuntu ku dimónis, i es ta fika prézu la pa mil anu. — Apo. 20:1-3.

16. (a) Modi ki nu ta mostra ma nu ‘konxe Deus’? (b) Kuzê ki ta ben kontise ku kes algen ki konxe Deus na Armajedon?

¹⁶ Ka ta nporta si dja nu ten txeu anu na verdadi ô nau, nu pode salva na Armajedon. Pa kel-li, nu debe mostra ma nu ‘konxe Deus’ i ma nu ‘ta obi ku notísias sábi sobri nos Sinhor Jizus.’ (2 Tes. 1:7-9) Nu ta ‘konxe Deus’ óras ki nu sabe kuzê ki el gosta, kuzê ki el ka gosta i se leis. Tanbê, nu ta mostra ma nu konxe-l óras ki nu ta ama i nu ta obi ku el, i óras ki nu ta adora sô el. (1 João 2:3-5; 5:3 ) Si nu faze si, Deus ta ‘konxe-nu’ i el ta fika kontenti ku nos! (1 Cor. 8:3) I si Deus sta kontenti ku nos, el ta ben salva-nu na Armajedon.

17. Kuzê ki siginifika ‘obi ku notísias sábi sobri nos Sinhor Jizus’?

¹⁷ ‘Notísias sábi sobri nos Sinhor Jizus’ ta inklui tudu kes verdadi ki Jizus inxina i ki sta na Palavra di Deus. Nu ta obi ku kes notísia sábi óras ki nu ta faze sima nu prende na nos vida. Pur izénplu, nu ta poi Reinu na primeru lugar, nu ta vive di akordu ku leis justu di Deus i nu ta pâpia ku otus sobri Reinu di Deus. (Mat. 6:33; 24:14) Tanbê, nu ta apoia kes irmon  di Kristu skodjedu ku spritu santu, ki ta kuida di txeu responsabilidadi. — Mat. 25:31-40.

18. Di ki manera kes irmon di Kristu skodjedu ku spritu santu ta ben rekonpensa kel bondadi ki es mostradu?

¹⁸ Ka ta dura, kes kriston skodjedu ku spritu santu ta ben rekonpensa kes ki é di ‘otus ovelha’, pa bondadi ki es mostra-s. (João 10:16 ) Di ki manera? Antis di géra di Armajedon kumesa, tudu kes 144 mil dja ta sta resusitadu i es ta sta na Séu ku un vida spritual ki ka ta móre. Es ta ben faze párti di kes trópa na Séu ki ta ben kaba ku Gogi, i es ta ben proteje ‘un monti di algen’ ki ta sirbi Jeová. (Apo. 2:26, 27; 7:9, 10) Di sertéza, kes monti di algen ta ben fika kontenti pamodi es apoia kes kriston skodjedu ku spritu santu kantu inda es staba na Téra!

19-20. Ka ta nporta ki provason nu sta pasa pa el, modi ki nu pode kontinua fiel timenti Armajedon ka txiga?

¹⁹ Duránti ténpu di fin, txeu di nos sta pasa pa provasons. Má simé, nu pode aguenta ku alegria. (Tia. 1:2-4) Un kuza ki ta djuda-nu txeu é faze orason sénpri. (Luc. 21:36) Tanbê, nu debe studa Palavra di Deus tudu dia, sima kes profesia sobri kes kuza ki ta ben kontise na futuru, i pensa txeu na kuzê ki nu studa. (Sal. 77:12) Si nu faze kes kuza li i nu da nos midjór na pregason, nos fé i nos speransa ta fika más fórti.

²⁰ Pensa modi ki bu ta ben xinti óras ki Babilónia kel Grandi distruídu i óras ki Armajedon kaba! Más inportanti inda, imajina modi ki bu ta ben fika kontenti óras ki tudu algen ruspeta nómi di Jeová i se direitu di governa! (Eze. 38:23) Di sertéza, Armajedon é un notísia sábi pa kes ki konxe Deus, ki ta obi ku se Fidju i ki aguenta firmi ti fin. — Mat. 24:13.