1-2. Kuzê ki Eclesiastes 11:6 ten aver ku pregason di notísias sábi di Reinu?

NA ALGUNS país, pesoas gosta di obi notísias sábi. Kel mensaji ki nu ta leba é kel ki es meste! Má na otus país, pesoas ka ta mostra kuazi ninhun interesi na Deus ô na Bíblia. Modi ki pesoas ta reaji na bu tiritóriu? Ka ta nporta modi ki es ta reaji, Jeová ta spéra pa nu kontinua ta prega ti ki el fla dja sta bon.

² Jeová dja disidi ki ténpu ki trabadju di pregason ta kaba i ki ténpu ki ‘fin ta ben’. (Mat. 24:14, 36) Timenti kel-li ka kontise, modi ki nu pode obi ku kes palavra li: ‘Ka bu diskansa bu mô’? * — Lé Eclesiastes 11:6.

3. Kuzê ki nu sta ben odja na kel studu li?

³ Kel studu ki pasa pâpia di kuatu kuza ki nu meste faze pa nu bira bons ‘piskador di ómi’. (Mat. 4:19) Na kel studu li, nu sta ben odja três kuza ki sta ben da-nu más forsa pa nu sta disididu na prega, ka ta nporta kal ki é nos situason. Nu sta ben prende pamodi ki é inportanti nu (1) mante konsentradu, (2) ten paxénxa i (3) ten un fé fórti.

4. Pamodi ki nu meste kontinua konsentradu ta faze trabadju ki Jeová da-nu?

⁴ Jizus dja flaba modi ki mundu ta staba duránti ténpu di fin. El sabia ma kuzas ki ta kontiseba pode distraíba se  sigidoris di faze trabadju di pregason. Pur isu, el aviza se disiplus: ‘Nhos mante sienti’. (Mat. 24:42) Na ténpu di Nué, pesoas staba distraídu ku kes kuza di dia-dia i es ka leba asériu kes avizu di Nué. (Mat. 24:37-39; 2 Ped. 2:5) Di mésmu manera, oji ten alguns kuza ki pode distrai-nu. Pur isu, nu krê kontinua konsentradu ta faze kel trabadju ki Jeová da-nu.

5. Sima sta na Atus 1:6-8, ti undi ki trabadju di pregason ta txigaba?

⁵ Pregason di Reinu é trabadju ki merese tudu nos atenson. Jizus dja flaba ma dipôs di se mórti, pregason ta kontinuaba pa txeu ténpu i se sigidoris ta fazeba trabadju mutu más txeu. (João 14:12 ) Kantu Jizus móre, alguns di se disiplus ba piska otu bês. Pur isu, dipôs ki el resusitadu, Jizus faze un milagri ki poi alguns di se disiplus ta pega un monti pexi. Dipôs di kel milagri, Jizus mostra ma ser piskadoris di ómi éra mutu más inportanti di ki kalker otu trabadju. (João 21:15-17 ) Un poku antis di Jizus bai pa Séu, el fla se disiplus ma trabadju di pregason ki el kumesa ta faze na Israel ta ben spadjaba pa tudu lugar. (Lé Atus 1:6-8, BPK.) Alguns anu dipôs, Jizus poi apóstlu Juan ta ten un vizon di kuzê ki ta ben kontiseba duránti ‘dia di Sinhor.’ * Un di kes kuza ki Juan odja ta dexa algen dimiradu: Ku orientason di anju, ‘kes notísia sábi ki ta dura pa tudu ténpu’ staba ta ser pregadu ‘pa tudu nasons, tribus, línguas i povus.’ (Apo. 1:10; 14:6) Kel-li ta mostra klaru ma Jeová krê pa nu partisipa na es grandi trabadju di pregason ti ki txiga se fin.

6. Kuzê ki ta djuda-nu mante konsentradu na trabadju di pregason?

⁶ Un kuza ki pode djuda-nu mante  konsentradu na nos trabadju di pregason é óras ki nu ta pensa na tudu kuza ki Jeová sta faze pa apoia-nu. Pur izénplu, el ta da-nu txeu kumida spritual. Nu ten txeu publikason inprimidu, na formatu dijital, vídius, publikasons gravadu pa obi i prugramas na internet. Tanbê pensa na nos site ofisial, ki ten informasons na más di mil língua! (Mat. 24:45-47) Timenti pesoas na mundu sta divididu pamodi pulítika, relijion i pamodi alguns é riku ô póbri, más di 8 milhon di sérvus di Deus sta unidu sima un família. Pur izénplu, na sésta-fera 19 di abril di 2019, Tistimunhas di Jeová na mundu interu staba unidu ta izamina testu di dia. I na kel noti, 20.919.041 algen djunta pa komemora mórti di Jizus. Óras ki nu ta pensa na kel priviléjiu grandi ki nu ten di odja es milagri i faze párti di el, kel-li ta pô-nu ta krê mante okupadu na trabadju di Reinu.

7. Modi ki izénplu di Jizus ta djuda-nu mante konsentradu?

⁷ Otu manera di nu mante konsentradu na trabadju di pregason é óras ki nu ta sigi izénplu di Jizus. El ka dexa nada distrai-l di da tistimunhu di verdadi. (João 18:37 ) Kantu Satanás oferese-l ‘tudu kes reinu di mundu i ses glória’, Jizus ka kai na kel armadilha. I tanbê el ka seta kantu otus algen krê fazeba el rei. (Mat. 4:8, 9; João 6:15 ) Jizus ka fika ta pensa na kel dizeju di ten kuzas material, nen el ka dexa pirsigison duru pô-l ta para. (Luc. 9:58; João 8:59 ) Anos tanbê, nu pode mante konsentradu óras ki nos fé ta pasa pa próva si nu lenbra di konsedju ki apóstlu Polu da. El insentiva kristons pa imita izénplu di Jizus pa es pode ka ‘kansa nen pa es ka dizisti’! — Heb. 12:3.

8. Kuzê ki é paxénxa i pamodi ki nu meste-l inda más oji?

⁸ Paxénxa é kapasidadi di spéra ku kalma ti ki un situason muda. Alvês, nu ta pasa pa situasons kasábi i nu ta krê pa es kaba faxi. Ô pode ser ki nu tene gana pa kontise un kuza ki dja nu ten txeu ténpu ta spéra. Na kes dôs situason li, nu meste ten paxénxa. Proféta Abakuki tinha gana di odjaba fin di violénsia na Judá. (Hab. 1:2) Kes disiplu di Jizus ta speraba ma Reinu ta “kumesaba lógu” i ta salvaba es di govérnu di Roma. (Lúkas 19:11, BPK ) Anos tanbê nu tene gana pa Reinu di Deus ben kaba ku maldadi i traze un mundu novu di pesoas ki ta obi ku Deus. (2 Ped. 3:13) Má, nu meste ten paxénxa i spéra pa óra sértu di Jeová. Nu ben odja modi ki Jeová ta inxina-nu ten paxénxa.

9. Ki izénplus ta mostra ma Jeová ten paxénxa?

⁹ Jeová é izénplu perfetu di algen ki ta mostra paxénxa. Antis di Dilúviu, el da Nué ténpu ki el mesteba pa el fazeba arka i pa el sérba ‘pregador di justisa’. (2 Ped. 2:5; 1 Ped. 3:20) Kantu Abraon faze txeu pergunta sobri distruison di Sudoma ku Gumora, Jeová obi-l ku paxénxa. (Gén. 18:20-33) Duránti txeu ténpu, nason di Israel bira infiel pa Jeová, má simé el mostra txeu paxénxa. (Nee. 9:30, 31) Oji tanbê, nu ta odja ma Jeová ten paxénxa pamodi el sta da ténpu pa tudu kes algen ki krê bira se amigu ‘rapende.’ (2 Ped. 3:9; João 6:44; 1 Tim. 2:3, 4) Óras ki nu ta pensa na izénplu di Jeová, el ta da-nu bon motivu pa nu kontinua ta prega i ta inxina ku  paxénxa. Má gósi nu ben odja modi ki Jeová ta uza un ilustrason ki sta na Bíblia pa inxina-nu ten paxénxa.

10. Kuzê ki nu ta prende ku ilustrason di agrikultor ki sta na Tiago 5:7, 8 ?

¹⁰ Lé Tiago 5:7, 8. Izénplu di agrikultor ta inxina-nu ten paxénxa. É verdadi ki ten alguns planta ki ta kria faxi. Má, kuazi tudu planta, inda más kes ki ta da fruta, ta dura más ténpu pa faze kodjéta. Na Israel, ta duraba uns 6 mês pa planta kriaba. Un agrikultor ta kustuma plantaba simentis dipôs di kes primeru txuba, ki ta kaíba na metadi di mês di otubru, i el ta fazeba kodjéta dipôs di kes últimu txuba, ki ta kaíba na metadi di mês di abril. (Mar. 4:28) Paxénxa di un agrikultor é un grandi izénplu pa nos. Má, kel-li alvês é ka fásil.

11. Modi ki paxénxa ta djuda-nu na trabadju di pregason?

¹¹ Dja ki nos é inperfetu nu ta krê odja faxi kes rezultadu di nos sforsu. Má, pa un plantason da kumida, kel agrikultor ten ki kuida di el dretu. El meste pripara txon, símia, rinka kes padja brabu i rega kes planta. Di mésmu manera, trabadju di faze disiplus ta iziji txeu sforsu. Ta leba ténpu pa rinka di korason di un studanti kes padja brabu ki ka ta dexa-s trata tudu algen igual i mostra amor. Si nu ten paxénxa, nu ka ta dizanima óras ki pesoas ka ta obi-nu. I mésmu óras ki alguns algen ta obi nos mensaji, nu meste ten paxénxa pamodi nu ka pode obriga un studanti ten fé. Alvês, ti disiplus di Jizus ka ta ntendeba faxi kuzê ki el ta inxinaba. (João 14:9 ) Nu debe lenbra ma nu pode planta i rega, má é Deus ki ta faze-l kria. — 1 Cor. 3:6.

12. Modi ki nu pode ten paxénxa óras ki nu ta da tistimunhu pa nos família ki é ka Tistimunha di Jeová?

¹² Otu kuza ki pode ser difísil nu ten  paxénxa é óras ki nu ta da tistimunhu pa nos família ki é ka Tistimunha di Jeová. Un kuza ki pode djuda-nu é kel konsedju ki sta na Eclesiastes 3:1, 7 : ‘Ten un ténpu pa fika kaladu i ténpu pa pâpia’. Na alguns situason, nu pode fika kaladu i dexa nos bon konportamentu pâpia pa nos. Má tanbê, nu pode fika sénpri sienti óras ki parse oportunidadi di pâpia sobri Jeová. (1 Ped. 3:1, 2) É inportanti nu mostra zelu óras ki nu ta prega i inxina, má nu debe ten paxénxa ku tudu algen, ti mésmu ku nos família.

13-14. Ki izénplus di paxénxa nu pode imita?

¹³ Nu pode prende ten paxénxa ku izénplus di sérvus fiel di Jeová di ténpu antigu i tanbê ku kes di nos ténpu. Abakuki staba ku gana di odja maldadi ta kaba. Má, el mostra paxénxa kantu el fla: ‘N ta fika sakédu na nha lugar di guarda’. (Hab. 2:1) Apóstlu Polu fla ma el tinha gana di ‘tirminaba’ se trabadju pa Deus. Má, ku paxénxa el kontinua ta ‘da un tistimunhu konplétu di notísias sábi’. — Atos 20:24.

¹⁴ Odja izénplu di un kazal ki kursa Skóla di Jiliádi. Es diziginadu pa un país ki tinha poku Tistimunha di Jeová. Dja ki relijion prinsipal di kel país é ka kriston, kel kazal ka atxa txeu algen ki tinha interesi na studa Bíblia. Má, ses koléga di turma di Jiliádi ki staba ta sirbi na otus país, sénpri ta mandaba es bons notísia di txeu studu di Bíblia ki staba ta faze prugrésu. Má, kel kazal kontinua ta prega ku paxénxa sikrê kes algen di ses tiritóriu ka ta obiba ses mensaji. Dipôs di 8 anu ta prega, na un tiritóriu ki ta parseba ma kuazi ningen ka ta krê obiba, ti ki enfin es xinti alegria di odja un di ses studanti ta batiza. Kuzê ki kes izénplu di ténpu antigu i di nos ténpu ta inxina-nu? Es ka bira prigisozu i nen es ka diskansa ses mô, i Jeová abensua-s pamodi ses paxénxa. Di sertéza, kel-li ta pô-nu ta krê ‘imita kes ki ta resebe promésas pamodi ses fé i ses paxénxa.’ — Heb. 6:10-12.

15. Modi ki fé ta djuda-nu sta más disididu na prega?

¹⁵ Nu ten fé na kel mensaji ki nu ta prega. Pur isu, nu sta disididu na pâpia di el ku tudu algen ki nu ta pode. Nu ta kunfia na promésas di Palavra di Deus. (Sal. 119:42; Isa. 40:8) Nu sta ta odja profesias di Bíblia ta kunpri na nos ténpu. Nu sta ta odja pesoas ta muda ses vida pa midjór pamodi es sta ta sigi konsedjus di Bíblia. Tudu kel-li ta da-nu más kunfiansa inda, ma tudu algen meste obi kes notísia sábi di Reinu.

16. Sima sta na Salmo 46:1-3, modi ki fé na Jeová i na Jizus pode djuda-nu sta más disididu na prega?

¹⁶ Tanbê nu ten fé na Jeová, ki é Fonti di kel mensaji ki nu ta prega i nu ten fé na Jizus, ki é kel ki Jeová skodje pa ser Rei di Reinu. (João 14:1 ) Ka ta nporta kal ki é nos situason, Jeová sénpri ta ser nos proteson i nos forsa. (Lé Salmo 46:1-3.) Tanbê, nu ten sertéza ma la di Séu Jizus sta ta orienta trabadju di pregason, i el sta ta uza puder i autoridadi ki Jeová da-l. — Mat. 28:18-20.

17. Da un izénplu ki ta mostra pamodi ki nu debe kontinua ta prega.

¹⁷ Fé ta djuda-nu ten más kunfiansa ma Jeová ta abênsua sforsu ki nu ta faze. I kel-li pode kontise di un manera ki nu ka sta ta spéra. (Ecl. 11:6) Pur izénplu,  nu sabe ma tudu dia milhons di algen ta odja nos karinhu di publikasons. Má kel-li é un bon manera di prega? Klaru ki sin! O Nosso Ministério do Reino di novénbru di 2014, konta spiriénsa di un minina ki staba na universidadi i ki kria fazeba un trabadju sobri Tistimunhas di Jeová. El ka konsigi atxa un Salon di Reinu, má el atxa un karinhu di publikasons na un universidadi i tanbê el atxa informasons ki ta djudaba el faze se trabadju di skóla. Ku ténpu, el bira un Tistimunha di Jeová i oji el é pioneru fíksu. Kes tipu di spiriénsa li ta djuda-nu kontinua ta prega pamodi inda ten pesoas ki meste atxa i obi mensaji di Reinu.

18. Pamodi ki nu pode ten sertéza ma trabadju di pregason ta kaba na óra ki Jeová krê?

¹⁸ Nu pode ten sertéza ma trabadju di pregason ta kaba na óra sértu. Pensa na kuzê ki kontise na ténpu di Nué. Jeová prova ma el ta kontrola ténpu di manera perfetu. Uns 120 anu antis, Jeová dja disidiba ki ténpu ki Dilúviu ta binha. Txeu anu dipôs, Jeová manda Nué faze arka. Talvês, Nué kontinua ta trabadja duru duránti uns 40 ô 50 anu antis di Dilúviu. Sikrê kes algen ka obi ku el, Nué kontinua ta prega kel mensaji di avizu ti kel dia ki Jeová fla ma dja éra ténpu pa lebaba kes animal pa déntu di arka. Nton, na óra sértu ‘Jeová fitxa pórta.’ — Gén. 6:3; 7:1, 2, 16.

19. Kuzê ki nu pode spéra si nu ka diskansa nos mô?

¹⁹ Ka ta dura, Jeová ta ben dexa-nu sabe ma trabadju di pregason di Reinu dja kaba. El ta ben ‘fitxa pórta’ di es mundu di Satanás i el ta ben traze un mundu novu di justisa. Timenti kel dia ka txiga, nu pode imita Nué, Abakuki i otus ki ka dexa ses mô diskansa. Pur isu, mante konsentradu, ten paxénxa i ten un fé fórti na Jeová i na se promésas.