1-2. Sima sta na 1 Timóteo 6:20, kuzê ki Timótiu dadu?

TXEU bês nu ta kustuma pidi otus algen pa guarda-nu nos kuza di valor. Pur izénplu, nu pode poi nos dinheru na banku. Óras ki nu faze kel-li, nu ta spéra ma nos dinheru ta fika suguru, ka ta perde nen ka ta furtadu. Pur isu, nu ta ntende kuzê ki siginifika da un algen un kuza di valor pa guarda-nu el.

² Lé 1 Timóteo 6:20. Apóstlu Polu lenbra Timótiu ma el resebe un kuza di txeu valor, ki é konhisimentu izatu di kes kuza ki Deus ta ben faze pa tudu algen. Timótiu tanbê dadu responsabilidadi pa ‘prega palavra’ i ‘pa prega notísias sábi’. (2 Tim. 4:2, 5) Pur isu, Polu insentiva Timótiu pa guarda kel kuza ki el dadu. Sima Timótiu, Jeová da-nu txeu kuza di valor pa nu kuida di el. É kuzê? I modi ki nu pode proteje kel tizoru ki Jeová da-nu?

3-4. Kal ki é alguns motivu ki ta mostra ma verdadis di Bíblia ten txeu valor?

³ Pamodi se bondadi, Jeová ta da-nu konhisimentu izatu di verdadis ki ten txeu valor ki sta na Bíblia, ki é se Palavra. Kes verdadi ten txeu valor pamodi es ta inxina-nu modi ki nu pode ten un bon amizadi ku Jeová i es ta fla kuzê ki ta pô-nu ser filís. Óras ki nu ta seta kes verdadi i nu ta vive sima es ta fla, nu ta liberta di ensinus falsu i di kes konportamentu mariadu. — 1 Cor. 6:9-11.

⁴ Un otu motivu ki ta mostra pamodi ki kes verdadi di Palavra di Deus ten txeu valor, é pamodi Jeová ta inxina-s sô pa kes ki é umildi i ki ten ‘bon inklinason’. (Atos  13:48 ) Kes algen li ta seta ma Jeová sta uza skravu fiel i prudenti pa inxina kes verdadi oji. (Mat. 11:25; 24:45) Nunka nu ka ta konsigi ntendeba kes verdadi li nos sô, i ka ten nada ki ta konpara ku es. — Pro. 3:13, 15.

5. Kuzê más ki Jeová da-nu?

⁵ Jeová tanbê da-nu priviléjiu di inxina otus algen kes verdadi sobri el i se vontadi. (Mat. 24:14) Kel mensaji ki nu ta prega ten txeu valor. El ta djuda pesoas bira párti di família di Jeová i el ta da-s xansi di vive pa tudu ténpu. (1 Tim. 4:16) Ka ta nporta si nu ta faze txeu ô poku na pregason, nos tudu nu sta apoia kel trabadju más inportanti ki sta fazedu gósi. (1 Tim. 2:3, 4) Di sertéza, é un priviléjiu grandi trabadja ku Jeová! — 1 Cor. 3:9.

6. Kuzê ki kontise ku alguns kriston ki dexa di da valor pa priviléjiu di trabadja ku Jeová?

⁶ Alguns kriston ki vive na mésmu ténpu ki Timótiu, dexa di da valor pa priviléjiu di trabadja ku Jeová. Pur izénplu, Demas ta amaba mundu, pur isu el abri mô di kel priviléjiu di trabadja djuntu ku apóstlu Polu. (2 Tim. 4:10) Ta parse ma Fijelu ku Ermójinis, tanbê bandona ses trabadju di pregason pamodi es tinha medu di sufreba pirsigison sima Polu. (2 Tim. 1:15) Imineu, Alexandri i Filetu, bira kóntra verdadi i es para di sirbi Jeová. (1 Tim. 1:19, 20; 2 Tim. 2:16-18) Ta parse ma tudu kes ómi ta amaba Jeová, má es dexa di da valor pa kel ki éra más inportanti.

7. Ki armadilhas Satanás ta uza kóntra nos?

⁷ Oji Satanás tanbê krê pa nu abri mô di kes kuza di valor ki Jeová da-nu. Kal ki é alguns di kes armadilha ki el ta uza? Primeru el ta uza prugramas di tilivizon, filmis, internet, jornal, livrus i revistas. Através di kes kuza li, el ta spadja konportamentu i manera di pensa ki pode pô-nu ta abri mô di verdadi. Sugundu armadilha é medu. El ta uza preson di kolégas ô pirsigison pa tenta pô-nu ta para di prega. I tirseru, el ta uza kes algen ki bandona i bira kóntra organizason di Jeová. El ta tenta pô-nu ta kai na armadilha di konhisimentu falsu ki es ta spadja, asi pa nu pode bandona verdadi. — 1 Tim. 6:20, 21.

8. Kuzê ki bu prende di kuza ki kontise ku un irmon ki txoma Daniel?

⁸ Si nu ka toma kuidadu, nu pode abri mô di verdadi poku-poku. Odja izénplu  di Daniel, * ki gostaba txeu di jogus na aparelhus iletróniku. El fla: “N kumesa ta djuga kantu N tinha uns 10 anu. Na komésu, kes jogu ka tinha nada mariadu. Má poku-poku N kumesa ta djuga jogus ki éra violéntu i ki tinha fitisaria ô bruxaria.” Dipôs, Daniel kumesa ta pasa uns 15 óra ta djuga tudu dia. El fla: “Déntu mi, N sabia ma kel ténpu ki N staba ta gasta i kel tipu di jogu la, staba ta pô-m ta afasta di Jeová. Má nha korason fika duru i N ta atxaba ma kes konsedju di Bíblia ka ta sirbiba pa mi.” Kel-li pode kontise ku nos tudu. Si nu ka toma kuidadu, diverson pode pô-nu ta abri mô di verdadi sen nu da kónta. Si kel-li kontise, nu pode perde kes kuza di valor ki Jeová da-nu.

9. Sima sta na 1 Timóteo 1:18, 19, ku kuzê ki Polu konpara Timótiu?

⁹ Lé 1 Timóteo 1:18, 19. Polu konpara Timótiu ku un trópa i el insentiva-l pa el ‘kontinua ta faze un bon luta’. Polu ka sta papiaba di un géra kóntra otus trópa. Nton, modi ki kristons é sima trópas ki sta na géra? Dja ki nos é trópas di Kristu, ki kualidadis nu meste ten? Nu ben odja sinku lison ki nu pode prende ku ilustrason di Polu. Kes lison ta ben djuda-nu pega verdadi riju.

10. Pamodi ki nu meste ten un amor fórti pa Deus?

¹⁰ Ten un amor fórti pa Deus. Un bon trópa é lial. El ta luta ku tudu se forsa pa proteje un algen ki el ta ama ô algun kuza ki ten txeu valor pa el. Polu insentiva Timótiu pa adora Deus, ô pa ten un amor fórti pa Deus. (1 Tim. 4:7) Sima nos amor pa Deus ta ba ta bira más fórti, nu ta ten más vontadi di pega verdadi riju. — 1 Tim. 4:8-10; 6:6.

11. Pamodi ki nu meste disiplina nos kabésa?

¹¹ Disiplina bu kabésa. Un trópa meste disiplina se kabésa pa el pode sta priparadu pa géra. Timótiu konsigi luta kónta influénsia di Satanás pamodi el sigi kes konsedju ki Polu da-l: el fuji di dizejus mariadu, el npenha pa ten bons kualidadi i el pasa ténpu ku irmons. (2 Tim. 2:22) Pa kel-li, el tevi ki disiplina se kabésa. Anos tanbê, nu meste disiplina nos kabésa pa nu pode ganha géra kóntra kes dizeju mariadu. (Rom. 7:21-25) Tanbê, nu meste disiplina nos kabésa pa nu pode tra kel manera di ser bédju i bisti di kel manera di ser novu. (Efé. 4:22, 24) I talvês óras ki nu sta kansadu dipôs di un dia di trabadju, nu meste disiplina nos kabésa pa nu pode sisti un runion. — Heb. 10:24, 25.

12. Modi ki nu pode midjora nos manera di uza Bíblia?

¹² Un trópa meste trena pa el pode sabe modi ki el ta uza se armas. El meste faze kel-li sénpri pa el pode bira bon na uza-s. Di mésmu manera, nu meste bira bon na uza Palavra di Deus. (2 Tim. 2:15) Nu pode prende alguns manera di faze kel-li na nos runions. Má si nu krê djuda otus kridita ma verdadis di Bíblia pode djuda-s, nu meste studa Bíblia sénpri. Nu meste uza Palavra di Deus pa bira nos fé más fórti. Kel-li é mutu más di ki sô lé Bíblia. Nu meste pensa na kuzê ki nu lé i faze piskiza na nos publikasons. Asi, nu ta konsigi ntende Skrituras dretu i faze sima nu prende. (1 Tim.  4:13-15) Si nu faze si, nu ta konsigi uza Palavra di Deus pa inxina otus. Más un bês, kel-li é mutu más di ki sô lé un testu di Bíblia. Nu krê djuda kes algen ntende kuzê ki kes testu ta fla i modi ki es pode aplika-s na ses vida. Nton, óras ki nu ten un prugrama di studa Bíblia sénpri, nu pode midjora kada bês más nos manera di inxina Palavra di Deus. — 2 Tim. 3:16, 17.

13. Sima sta na Hebreus 5:14, pamodi ki nu meste uza nos kapasidadi di pensa?

¹³ Uza kapasidadi di pensa. Un trópa meste prende odja prigu i ivita-l. Nos tanbê nu meste prende odja situasons ki pode pô-nu na prigu i faze algun kuza pa ivita-s. (Pro. 22:3; lé Hebreus 5:14.) Pur izénplu, nu meste skodje dretu kuzê ki nu ta divirti ku el. Txeu filmi i prugramas di tilivizon ta mostra konportamentu seksual mariadu. Kes tipu di konportamentu li ta ofende Deus, i sédu ô tardi es ta kaba pa prujudika-nu. Pur isu, nu ivita kalker tipu di diverson ki pode kaba ku nos amor pa Deus poku-poku. — Efé. 5:5, 6.

14. Modi ki kapasidadi di pensa djuda Daniel?

¹⁴ Daniel, ki dja nu papiaba di el antis, odja ma kes jogu ki tinha violénsia i fitisaria ô bruxaria éra un prubléma. Nton, el piskiza na Watchtower Library kes artigu ki ta djudaba el lida ku se prubléma. Modi ki kel-li djuda-l? El para di djuga kes jogu mariadu. El tra se nómi di kes jogu na internet i el para di djuga otus jogu. Daniel fla: “Envês di N djuga, N kumesa ta pasa más ténpu ta faze kuzas fóra di kaza i ta pasa ténpu ku irmons di kongregason.” Gósi, Daniel é pioneru fíksu i ansion.

15. Pamodi ki stórias falsu é prigozu?

¹⁵ Sima Timótiu, anos tanbê, nu meste toma kuidadu ku un otu prigu. Kes algen ki fika kóntra organizason di Jeová ta spadja informason falsu. (1 Tim. 4:1, 7; 2 Tim. 2:16) Pur izénplu, es pode tenta spadja stórias falsu sobri nos irmons ô pô-nu ku dúvida sobri organizason di Jeová. Kes informason li pode frakise nos fé. Nu meste toma txeu kuidadu pa nu ka kridita na kes mintira. Pamodi? Pamodi kenha ki ta spadja kes  stória li, é ‘ómis ki tene menti stragadu i ki ka tene verdadi’. Ses obijetivu é traze ‘diskuson i dibatis’. (1 Tim. 6:4, 5) Es krê pa nu kridita na ses mintira i pa nu para di kunfia na nos irmons.

16. Kuzê ki pode distrai-nu?

¹⁶ Ka bu distrai. Timótiu éra ‘un bon trópa di Kristu Jizus’. Pur isu, el tinha ki staba konsentradu na se trabadju pa Deus. El ka pode dexaba dinheru ô otus kuza distraíba el di se obijetivu. (2 Tim. 2:3, 4) Sima Timótiu, nu ka pode dexa dizeju di ten más kuzas material distrai-nu. ‘Puder di rikézas, ki ta ngana’, pode sufoka nos amor pa Jeová, pa se Palavra i nos dizeju di faze pregason. (Mat. 13:22) Nu meste leba un vida sinplis i uza nos ténpu i nos forsa pa nu ‘kontinua ta buska Reinu primeru’. — Mat. 6:22-25, 33.

17-18. Kuzê ki nu pode faze pa nu proteje nos amizadi ku Jeová?

¹⁷ Sta priparadu pa aji faxi. Un trópa meste faze planu antis pa el pode sabe modi ki el ta aji. Si nu krê proteje kel ki Jeová da-nu, tanbê nu meste aji lógu óras ki nu odja prigu. Kuzê ki pode djuda-nu aji faxi? Nu meste faze planu antis pa nu pode sabe modi ki nu ta aji óras ki kontise prigu.

¹⁸ Pur izénplu, óras ki ten algun atividadi, kes algen ki sta la, ta kustuma pididu pa es djobe un lugar di sai más pértu di es. Pamodi? Si kontise algun kuza, es ta sta prontu pa sai faxi di kel lugar. Di mésmu manera, óras ki nu sta odja tilivizon ô nu sta na internet, nu meste pripara pa nu “sai” si dirapenti parse un imaji mariadu, un párti txeu violéntu ô un informason ki ta pâpia kóntra organizason. Si nu pripara antis, nu ta konsigi aji faxi pa nu proteje nos amizadi ku Jeová i pa nu kontinua linpu dianti di Jeová. — Sal. 101:3; 1 Tim. 4:12.

19. Ki bensons nu ta ten si nu proteje kes kuza di valor ki Jeová da-nu?

¹⁹ Nu meste proteje kes kuza di valor ki Jeová da-nu, ki é kes verdadi di Bíblia i priviléjiu di inxina-s pa otus algen. Óras ki nu faze si, nu ta ten un konsénsia linpu, un vida ki bale péna i alegria di djuda otus konxe Jeová. Ku se ajuda, nu ta pode proteje kes kuza ki nu dadu. — 1 Tim. 6:12, 19.