1. Modi ki alguns algen ta xinti óras ki un algen ki es ta ama dizasosiadu?

BU TEN algun família ô amigu ki dizasosiadu? Kel-li pode ser un kuza txeu difísil! Un irman ki txoma Ilda fla: “Dipôs di sta 41 anu kazadu ku nha maridu, el móre. N ta atxaba ma kel-li éra piór kuza ki podia kontiseba ku mi. * Má kantu nha fidju bandona kongregason, se mudjer i se fidjus, kel-li foi mutu más difísil pa mi.”

2-3. Sima sta na Salmo 78:40, 41, modi ki Jeová ta xinti óras ki se sérvus ta bandona-l?

² Pensa na modi ki foi difísil pa Jeová kantu alguns anju ki ta fazeba párti di se família bandona-l! (Judas 6) I imajina modi ki el fika tristi kantu el odja israelitas, ki éra kel povu ki el ta amaba txeu, ta rabela kóntra el monti bês. (Lé Salmo 78:40, 41.) Bu pode ten sertéza ma óras ki un algen ki nu ta ama bandona verdadi, Jeová ta fika txeu tristi i el ta ntende kel dór ki bu sta xinti! Ku bondadi, el ta da-u koraji i kel ajuda ki bu sta meste.

³ Na kel studu li, nu sta ben odja kuzê ki nu pode faze pa nu resebe ajuda di Jeová óras ki un algen ki nu ta ama para di sirbi-l. Tanbê, nu sta ben odja modi ki nu pode djuda kes algen na kongregason ki sta pasa pa mésmu situason. Má primeru, nu ben pâpia di un pensamentu mariadu ki nu debe ivita.

4. Modi ki txeu pai ku mai ta xinti óras ki un fidju bandona Jeová?

⁴ Pai ku mai krê ses fidjus txeu. Pur isu, óras ki un di ses fidju ta bandona Jeová, é normal es fika ta pergunta kuzê  ki es podia fazeba pa djudaba ses fidju kontinua ta sirbi Jeová. Un irmon ki txoma Lúkas fla modi ki el xinti dipôs ki se fidju dizasosiadu: “N fika ta kulpa nha kabésa. I ti N ta sunhaba ku kuzas mariadu sobri kel-li. Alvês N ta txoraba i N ta xintiba dór na korason.” Tanbê un irman ki txoma Elizabeti, ki pasa pa mésmu situason, txeu bês ta pensaba: “Na undi ki N fadja? N ta atxa ma N ka sforsa txeu pa poi verdadi na korason di nha fidju.”

5. Kulpa é di kenha óras ki un algen ta bandona Jeová?

⁵ Nu meste lenbra ma Jeová da kada un di nos liberdadi di skodje. Kel-li krê fla ma kada un di nos pode skodje si nu ta obi ku Jeová ô nau. Pur izénplu, alguns jóven ka tevi bon izénplu di ses pai ku ses mai, má simé es disidi sirbi Jeová. Tanbê ten kes jóven ki ses pai ku ses mai faze ses midjór pa inxina-s kes prinsípiu di Bíblia, má simé kantu es bira más grandi es disidi bandona verdadi. Kuzê ki kel-li ta mostra? É kada algen ki debe disidi si el ta sirbi Jeová. (Jos. 24:15) Pur isu, si bo é un pai ô un mai i bu sta xinti tristi pamodi bu fidju bandona Jeová, lenbra ma kulpa é ka di bo. I si bu kontinua ta pensa asi, luta pa bu vense kel pensamentu li!

6. Modi ki un jóven pode xinti óras ki se pai ô se mai bandona Jeová?

⁶ Alvês un pai ô un mai pode bandona verdadi i ti mésmu se família. (Sal. 27:10) Kel-li pode ser un situason difísil pa kes fidju ki ta odja ses pai ku ses mai sima un izénplu. Un irman ki txoma Ester ki se pai dizasosiadu, fla: “Txeu bês N ta txoraba pamodi N da kónta ma nha pai ka staba ta bandona sô verdadi, má el disidi ma el ka krê sirbiba Jeová más. N ta ama nha pai, pur isu kantu el dizasosiadu N fika txeu preokupadu ku el i ti N ta xintaba medu ta tomaba kónta di mi.”

7. Kuzê ki Jeová ta xinti pa kes jóven ki ses pai ô ses mai sta dizasosiadu?

⁷ Jóvens, si nhos pai ô nhos mai sta dizasosiadu, nhos pode ten sertéza ma nu sta tristi tanbê! Favor, nhos ten sertéza ma Jeová ta ntende nhos dór. El ta ama nhos i el sta kontenti pamodi nhos sta kontinua fiel ta sirbi-l. I anos, ki é nhos irmons ku irmans di kongregason, nu sta kontenti tanbê. Nhos lenbra tanbê ma nhos é ka kulpadu pa disizon ki nhos pai ku nhos mai toma. Sima dja nu flaba antis, Jeová da kada algen liberdadi di toma se disizon. Kada algen ki da se vida pa Jeová i batiza ten ki ‘leba se própi karga di responsabilidadi.’ — Gál. 6:5, nóta di rodapé.

8. Timenti nu sta spéra pa un algen ki nu ta ama volta pa Jeová, kuzê ki nu pode faze? (Tanbê odja kuadru “ Volta pa Jeová”.)

⁸ Óras ki un algen ki bu ta ama bandona Jeová, é normal bu kontinua ku speransa ma un dia el ta volta pa Jeová. Kuzê ki bu debe faze timenti bu sta spéra? É inportanti bu kontinua ta kuida di bu amizadi ku Jeová. Si bu faze si, bu ta da un bon izénplu pa otus algen di bu família i talvês ti pa kel dizasosiadu. Tanbê,  kel-li ta djuda-u ten kel forsa ki bu meste pa bu lida ku kel dór. Nu ben odja alguns kuza ki bu pode faze.

9. Kuzê ki bu pode faze pa bu resebe forsa di Jeová? (Tanbê odja kuadru “ Testus ki pode konsola-u si un algen ki bu ta ama bandona Jeová”.)

⁹ Faze tudu kel ki bu pode pa bu kontinua ta ten un amizadi fórti ku Jeová. É txeu inportanti bu kontinua ta bira bu fé i fé di kes algen di bu família más fórti. Modi ki bu pode faze kel-li? Jeová pode djuda-u si bu kontinua ta lé Bíblia tudu dia, pensa na kel ki bu lé i sisti tudu nos runion. Juana, ki se pai ku se irman bandona Jeová fla: “Óras ki N ta lé kes stória di pesoas ki Bíblia ta pâpia di el, sima Abigail, Ester, Jó, Juzé i Jizus, N ta xinti un pas déntu di mi. Ses izénplu ta nkoraja-m, ta djuda-m pensa di manera puzitivu i ta alivia-m nha dór. Tanbê kes múzika di nos organizason ta nkoraja-m txeu.”

10. Modi ki Salmo 32:6-8 ta djuda-nu óras ki nu sta xinti txeu tristi?

¹⁰ Konta Jeová tudu kel ki sta ta preokupa-u. Óras ki bu sta txeu tristi, ka bu para di faze orason. Pidi Jeová pa djuda-u odja kel situason sima el ta odja-l i tanbê pa el ‘da-u sabedoria i pa el inxina-u na ki kaminhu ki bu debe anda’. (Lé Salmo 32:6-8.) É klaru ki nen sénpri é ka fásil fla Jeová modi ki bu sta xinti di verdadi. Má el ta ntende bu dór. Jeová ta ama-u txeu i el ta insentiva-u pa bu abri bu korason pa el. — Êxo. 34:6; Sal. 62:7, 8.

11. Sima sta na Hebreus 12:11, pamodi ki nu debe kunfia na disiplina ki Jeová ta da ku amor? (Tanbê odja kuadru “ Dizasosiason é un próva di amor di Jeová”.)

¹¹ Apoia disizon di ansions. Dizasosiason  é un manera ki Jeová ta disiplina un algen ku amor. Kel-li é midjór manera di djuda kel algen ki para di sirbi Jeová, i tanbê é bon pa tudu algen na kongregason. (Lé Hebreus 12:11.) Alguns algen na kongregason pode pâpia mal di ansions óras ki un algen ta dizasosiadu. Má talvês kel algen ka ta krê pâpia di kes kuza mariadu ki un dizasosiadu faze. Lenbra ma nu ka sabe di tudu kuza. Bu pode ten sertéza ma kes ansion ki partisipa na kel kumison pa julga faze ses midjór pa sigi prinsípius di Bíblia i pa faze kel julgamentu ‘pa Jeová’. — 2 Cró. 19:6.

12. Ki bons rezultadu alguns algen tevi pamodi es apoia disiplina di Jeová?

¹² Si bu apoia disizon di ansions, bu pode djuda kel dizasosiadu volta pa Jeová. Elizabeti ki dja nu papiaba di el antis fla: “Dexa di pâpia ku nos fidju foi txeu difísil. Má kantu el volta pa Jeová, el rekonhese ma foi un bon disizon kantu el dizasosiadu. Dipôs, el fla-m ma el prende txeu lison inportanti. Kel-li djuda-nu odja ma disiplina di Jeová sénpri é midjór.” Markus, maridu di Elizabeti tanbê fla: “Algun ténpu dipôs, nos fidju fla-m ma un di kes kuza ki pô-l ta volta pa Jeová é pamodi nu dexa di pâpia ku el. N sta txeu kontenti pamodi Jeová djuda-nu obi ku el.”

13. Kuzê ki pode djuda-u lida ku dór?

¹³ Pâpia ku amigus ki ta ntende bu situason. Pasa ténpu djuntu ku kes irmon ku irmans ki ten spiriénsa i ki pode djuda-u ka perde speransa. (Pro. 12:25; 17:17) Juana, ki dja nu papiaba di el antis, fla: “Na nha korason, N ta xintiba mi sô. Má óras ki N ta papiaba ku kes amigu di kunfiansa, N ta xintiba mutu más midjór.” Má i si alguns na kongregason fla ô faze algun kuza ki pô-u ta xinti más piór? 

14. Pamodi ki nu debe ‘kontinua ta suporta kunpanheru i ta púrdua kunpanheru di korason’?

¹⁴ Ten paxénxa ku bus irmon i irmans. Ka bu spéra ma tudu algen ta fla-u kel ki é dretu. (Tia. 3:2) Nos tudu é inperfetu. Nton, ka bu fika spantadu si alguns algen ka sabe kuzê ki es ta fla, ô si ti mésmu es fla algun kuza ki dexa-u maguadu. Lenbra di konsedju ki apóstlu Polu da: ‘Nhos kontinua ta suporta kunpanheru i ta púrdua kunpanheru di korason, sikrê algen tene algun razon di kexa kóntra kel otu’. (Col. 3:13) Un irman ki ten un família dizasosiadu fla: “Alguns irmon bai tenta nkoraja-m, má es dexa-m más maguadu. Má Jeová djuda-m purdua-s.” Kuzê ki kongregason pode faze pa djuda kes algen ki ten família dizasosiadu?

15. Modi ki nu pode djuda un algen ki se família dizasosiadu ka dura li?

¹⁵ Bira amigu di kes algen ki ten família dizasosiadu. Un irman ki txoma Mirian fla ma dipôs ki se irmon dizasosiadu, el  ta xintiba txeu preokupadu óras ki el ta baba runion. El fla: “N tinha medu di kuzê ki otus algen podia flaba. Má tinha txeu irmon ku irmans ki staba tristi ku kuzê ki kontise i es ka fla nada mariadu sobri nha irmon. Ku ajuda di kes irmon li, N konsigi lida ku nha dór.” Un otu irman fla: “Kantu nos fidju dizasosiadu, txeu irmon ki nu krê txeu ben konsola-nu. Alguns fla ma es ka sabia kuzê ki es podia flaba nos. Má simé, alguns di es txora ku mi i otus skrebe-m karta pa nkoraja-m. Kuzê ki es faze pa mi djuda-m txeu!”

16. Modi ki kongregason pode kontinua ta djuda un algen ki ten família dizasosiadu?

¹⁶ Kontinua ta apoia kes algen ki ten família dizasosiadu. Es meste bu amor i nkorajamentu, prinsipalmenti gósi. (Heb. 10:24, 25) Alvês, alguns irmon ta para di pâpia ku kes algen ki ten família dizasosiadu. I kes algen li ta xinti sima ki es sta dizasosiadu tanbê. Ka bu dexa kel-li kontise! Kes jóven ki ten pai ô mai dizasosiadu meste nkorajamentu i ilojiu mutu más txeu inda. Maria, ki odja se maridu ta dizasosiadu i ta bandona Jeová, fla: “Alguns di nhas amigu ben ti nha kaza, es kuzinha pa nos i es djuda-nu faze adorason na família. Es xinti nha dór i es txora ku mi. Kantu spadja alguns mintira sobri mi, es difende-m. Es nkoraja-m di verdadi!” — Rom. 12:13, 15.

17. Kuzê ki ansions pode faze pa konsola kes algen ki ten família dizasosiadu?

¹⁷ Ansions, nhos pruveta tudu oportunidadi pa djuda kes algen ki ten família dizasosiadu bira ses fé más fórti. Nhos ten un responsabilidadi inportanti di konsola kes irmon ki ten família ki bandona Jeová. (1 Tes. 5:14) Nhos nkoraja-s antis i dipôs di runion. Nhos vizita-s i nhos faze orason ku es. Nhos trabadja ku es na pregason, i si ta da, nhos konvida-s pa nhos adorason na família. Ansions sabe ma es meste mostra amor, karinhu i da atenson pa kes ovelha di Jeová ki sta ta sufri. — 1 Tes. 2:7, 8.

18. Sima sta na 2 Pedro 3:9, kuzê ki Jeová krê pa kes algen ki para di sirbi-l faze?

¹⁸ Jeová ‘ka krê pa ningen ser distruídu, má el krê pa tudu algen rapende.’ (Lé 2 Pedro 3:9.) Sikrê un algen faze un pekadu gravi, se vida inda ten txeu valor pa Deus. Lenbra ma Jeová paga un présu altu, ki é vida di se Fidju ki el krê txeu pa kada un di nos. Ku txeu amor, Jeová sta tenta djuda kes algen ki bandona-l pa torna volta pa el. Sima kel ilustrason di Jizus sobri kel fidju ki perde ta mostra, Jeová ta spéra ma es ta seta se ajuda. (Luc. 15:11-32) Txeu di kes ki bandona verdadi torna volta pa organizason di Jeová. I kongregason resebe-s di brasu abértu. Elizabeti ki dja nu papiaba di el antis, xinti kel alegria di odja se fidju ta readimitidu. Ta lenbra di kel ténpu, el fla: “N ta agradese txeu tudu kes ki djuda-m ka perde speransa.”

19. Pamodi ki nu pode kontinua ta kunfia na Jeová?

¹⁹ Nu pode kunfia na Jeová sénpri. Se konsedjus sénpri ta djuda-nu. El é un Pai ki gosta di da i el ten txeu amor pa kes ki ta ama-l i ki ta adora-l. Bu pode ten sertéza ma óras ki bu sta pasa pa kes situason difísil, Jeová nunka ka ta bandona-u. (Heb. 13:5, 6) Markus, ki dja nu papiaba di el antis, fla: “Jeová nunka ka bandona-nu. Nunka el ka ta sta lonji di nos óras ki nu sta pasa pa situason difísil.” Jeová ta kontinua ta da-u kel ‘puder alén di normal’. (2 Cor. 4:7) Pur isu, sikrê un algen di bu família bandona Jeová, bu pode ten sertéza ma bu ta kontinua fiel i ma nunka bu ka ta perde speransa.