1-2. Ki tremor proféta Ajeu dja flaba ma ta ben kontiseba na nos ténpu?

“NA POKU minutus, lójas i prédius kumesa ta kai na txon.” “Tudu algen fika dizusperadu. . . Txeu algen fla ma kel tremor di téra dura dôs minutu. Má pa mi, ta parse ma el dura mutu más txeu.” Kes-li é komentárius di alguns algen ki skapa di un tremor di téra ki kontise na Nepal na anu 2015. Si bu pasa pa un situason difísil sima kel-li, nunka más bu ka ta skeseba.

² Na nos ténpu sta kontise un tremor di téra diferenti. Kel tremor di téra li ka sta kontise sô na un país ô un sidadi, má na tudu nasons di mundu interu. I dja ten txeu ténpu ki el sta ta kontise. Proféta Ajeu dja flaba ma kel tremor di téra li ta ben kontiseba na nos ténpu. El skrebe: ‘É kel-li ki Jeová di izérsitu fla: “Di li poku ténpu, N ta poi séu, téra, mar i txon séku ta treme más un bês.”’ — Ageu 2:6.

3. Pamodi ki nu pode fla ma kel tremor ki Ajeu pâpia di el é diferenti di un tremor di téra?

³ Kel tremor ki profesia di Ajeu ta pâpia di el é ka sima un tremor di téra ki ta traze sô distruison, má el ta da bons rezultadu. Própi Jeová fla: ‘N ta ben poi tudu nasons ta treme i kuzas di valor di tudu nasons ta ben entra na kel kaza li; i N ta ben intxi es kaza di glória.’ (Ageu 2:7) Kuzê ki kel profesia li ta siginifikaba pa kes algen ki ta viveba na ténpu di Ajeu? I kuzê ki el ta siginifika pa nos oji? Nu sta ben odja respósta di kes pergunta li i nu sta ben odja modi ki nu pode partisipa na kel trabadju ki ta poi nasons ta treme.

4. Pamodi ki Jeová manda proféta Ajeu pa Se povu?

⁴ Jeová da proféta Ajeu un trabadju inportanti pa el faze. Odja kuzê ki kontise antis di el resebe kel diziginason li. Ta parse ma Ajeu staba entri kes judeu ki sai di Babilónia i volta pa Jiruzalen na anu 537 A.J. Lógu dipôs ki es txiga la, kes sérvu fiel di Deus kumesa ta faze lisérsi di ténplu, ô kaza di Jeová. (Esd. 3:8, 10) Má poku ténpu dipôs kontise un kuza txeu tristi. Alguns di ses inimigu pô-s ta dizanima i es para di konstrui kel ténplu. (Esd. 4:4; Ageu 1:1, 2) Nton na anu 520 A.J., Jeová manda Ajeu pa djuda se sérvus rekupera zelu i kumesa ta konstrui ténplu otu bês. * — Esd. 6:14, 15. 

5. Pamodi ki kel mensaji di Ajeu nkoraja povu di Deus?

⁵ Kel mensaji di Ajeu éra pa djudaba judeus ten un fé más fórti na Jeová. Ku txeu koraji, el fla kel povu ki staba dizanimadu: ‘“Nhos ser fórti, nhos tudu, povu di kel téra li”, é Jeová ki fla, ‘i nhos trabadja’. “Pamodi N sta ku nhos”, é Jeová di izérsitu ki fla.’ (Ageu 2:4) Kes palavra ‘Jeová di izérsitu’ devia nkorajaba se povu. Jeová ten un izérsitu grandi di txeu anju ki ta obi ku el. Nton si kes judeu krê tinha bons rezultadu, es tinha ki kunfiaba na Jeová.

6. Kal ki ta sérba rezultadu di kel tremor ki Ajeu pâpia di el?

⁶ Jeová manda Ajeu pa fla kes judeu ma el sta ba poba tudu nasons ta treme. Kel mensaji nkoraja kes judeu ki fika dizanimadu i ki para di faze kel ténplu. I kel-la éra un garantia ma Jeová ta ben poba Pérsia ta treme. Kel inpériu di Pérsia tinha txeu puder na kel ténpu i el éra formadu pa txeu nason. Kal ki ta sérba rezultadu? Primeru, povu di Deus ta konsigi tirminaba konstruson di ténplu. Dipôs, ti mésmu kes algen ki ka éra judeu ta ben adoraba Jeová djuntu ku es na kel ténplu ki fazedu. Na verdadi, kel mensaji di Ajeu nkoraja povu di Deus txeu! — Zac. 8:9.

7. Na ki trabadju nu sta partisipa oji ki ta poi nasons ta treme? Splika.

⁷ Kuzê ki profesia di Ajeu ta siginifika pa nos oji? Más un bês Jeová sta ta poi tudu nasons ta treme, má di es bês nu sta nvolvidu tanbê. Pensa na kel-li: na anu 1914, Reinu di Deus kumesa ta governa na Séu i Jeová poi Jizus ta bira Rei di se Reinu. (Sal. 2:6) Kel-li foi un mau notísia pa kes governanti di mundu. Kel ‘ténpu markadu di nasons’ dja kababa. Kel-li krê fla ma kaba kel ténpu ki ka tinha ninhun governanti ta reprizenta Jeová. (Luc. 21:24) Pur isu, prinsipalmenti désdi 1919, povu di Jeová kumesa ta fla pa tudu algen ma Reinu di Deus é úniku soluson pa mundu. Pregason di ‘notísias sábi di Reinu’ sta ta poi mundu interu ta treme désdi kel ténpu. — Mat. 24:14.

8. Sima sta na Salmo 2:1-3, modi ki maioria di pesoas ta reaji óras ki es obi mensaji di Reinu?

⁸ Modi ki maioria di pesoas ta reaji óras ki es obi mensaji di Reinu? Maioria di algen ka ta seta kel mensaji. (Lé Salmo 2:1-3.) Nasons sta tudu  ajitadu. Es nega seta kel Governanti ki Deus skodje. Pa es, kel mensaji di Reinu ki nu ta prega é ka ‘notísias sábi’. Na verdadi, alguns governanti ti proíbi trabadju di pregason! Nbóra txeu di kes governanti ta fla ma es ta sirbi Deus, es ka ta krê abri mô di puder i autoridadi ki es ten. Pur isu, es é sima kes governanti na ténpu di Jizus. Óras ki es ta pirsigi kes sigidor fiel di Jizus, es ta mostra ma es é kóntra Kel ki Jeová skodje. — Atos 4:25-28.

9. Kuzê ki Jeová sta ta faze mésmu ki nasons ka sta seta mensaji di Reinu?

⁹ Kuzê ki Jeová sta ta faze sikrê nasons ka sta seta mensaji di Reinu? Salmo 2:10-12 ta responde: ‘Má gósi, nhos ki é rei, nhos mostra sabedoria; nhos seta koreson, nhos ki é juízis di Téra. Nhos sirbi Jeová ku grandi ruspetu i nhos fika kontenti ta treme. Nhos onra Fidju, sinon Deus ta fika xatiadu i nhos ta móre na kaminhu, pamodi El ta xinti raiba faxi. Filís é tudu kes ki ta djobe proteson na El.’ Pamodi se amor, inda Jeová sta ta da ténpu pa se inimigus ten oportunidadi di muda di atitudi i seta Reinu di Deus. Oji nu sta vive ‘na ténpu di fin’ di kel mundu li. (2 Tim. 3:1; Isa. 61:2) Gósi, más di ki nunka é mutu más urjenti inda pa pesoas konxe verdadi i skodje sirbi Jeová.

10. Sima sta na Ageu 2:7-9, modi ki kel tremor na tudu nasons ta ben poba alguns algen ta reaji?

¹⁰ Sima Ajeu dja flaba, kel tremor sta poi alguns algen ta seta mensaji di Reinu. El fla-nu ma kel tremor ta poi ‘kuzas di valor [ô kes algen dretu] di tudu nasons ta ben’ adoraba Jeová. * (Lé Ageu 2:7-9.) Tanbê otus proféta, sima Izaías ku Mikeias, dja flaba ma ta ben kontiseba kuzas sima kes-li ‘na ténpu di fin’. — Isa. 2:2-4, nóta di rodapé; Miq. 4:1, 2, nóta di rodapé.

11. Modi ki un irmon reaji kantu el obi mensaji di Reinu pa primeru bês?

 ¹¹ Nu ben odja modi ki kel tremor li afeta vida di irmon Ken, ki oji ta sirbi na sédi mundial. Dja pasa uns 40 anu désdi ki el obi mensaji di Reinu pa primeru bês. Má ti inda el ta lenbra klaru modi ki el reaji. El fla: “Kantu N obi verdadi di Palavra di Deus pa primeru bês, N fika txeu kontenti di prende ma nu sta vive na ténpu di fin di kel mundu li. I N ntende ma pa N agrada Deus i ganha vida pa tudu ténpu, N tinha ki fujiba di kel mundu li i mante firmi na ladu di Jeová. Nton, N ora pa Jeová ta pidi-l ajuda i N faze kes mudansa li lógu. N dexa kel mundu li pa tras, i N djobe proteson na Reinu di Deus ki nunka ka ta distruídu.”

12. Modi ki ténplu spritual di Jeová sta ta intxi di glória na es ténpu di fin?

¹² Nu ka ten dúvida ma Jeová sta ta abênsua se povu. Na es ténpu di fin, nu sta ta odja txeu algen ta kumesa ta adora Deus. Na anu 1914, nu ka éra mutu txeu. Oji nos é más di 8 milhon ki sta ta adora Deus, i milhons di otus algen ta djunta ku nos tudu anu pa komemora mórti di Kristu. Pur isu, kel pátiu li na Téra di ténplu spritual di Jeová, ô manera di faze adorason puru, sta xeiu di kes ‘kuza di valor di tudu nasons’. Kel-li di sertéza ta da glória pa Jeová. Má otu kuza ki tanbê sta glorifika nómi di Jeová, é kes mudansa ki milhons di algen sta faze pa bisti di kel manera di ser novu. — Efé. 4:22-24.

13. Ki otus profesia di Bíblia sta ta kunpri dja ki kes algen ki ta adora Jeová sta bira más txeu? (Odja fotu na kapa.)

¹³ Tudu kes kuza li ki sta kontise sta kunpri otus profesia, sima kel ki nu ta atxa na Isaías kapítlu 60. Versíklu 22 di kel kapítlu li ta fla: ‘Kel poku ta ben bira mil; i kel pikinoti, ta ben bira un nason fórti. Ami, Jeová, N ta ben poi kel-li ta kontise faxi na ténpu sértu.’ Dja ki kes algen ki sta adora Jeová sta bira más txeu, un kuza rei di sábi sta ta kontise. Óras ki es ta ben pa organizason di Jeová, kes ‘kuzas di valor’ li ta traze txeu  taléntu i kapasidadi i tanbê es ta ben ku kel vontadi di prega ‘notísias sábi di Reinu’. Asi povu di Jeová ta pode uza kapasidadi di kes algen ki Izaías txoma di ‘leti di nasons’. (Isa. 60:5, 16) I ku ajuda di kes ómi ku mudjeris li ki ten txeu valor, trabadju di pregason sta ta fazedu na 240 país i nos publikason sta ta traduzidu na más di mil língua.

14. Ki disizon pesoas meste toma gósi?

¹⁴ Dja ki Jeová sta ta poi nasons ta treme na es ténpu di fin, pesoas ta xinti ma es ten ki toma un disizon. Ô es ta apoia Reinu di Deus ô es ta kunfia na govérnus di kel mundu li. Kel-li é un disizon inportanti ki tudu algen ten ki toma gósi li. Nbóra sérvus di Jeová ta obi ku leis di govérnu di lugar ki es ta vive, es ka ta mete na pulítika di kel mundu li. (Rom. 13:1-7) Nu sabe ma úniku soluson di kunfiansa pa tudu prublémas di mundu é Reinu di Deus. Kel Reinu li ka ta faze párti di es mundu. — João 18:36, 37.

15. Modi ki livru di Apocalipse ta mostra ma lialdadi di povu di Deus ta ben podu na próva?

¹⁵ Livru di Apocalipse ta fla ma na ténpu di fin povu di Deus ta ben pasa pa un próva di lialdadi. Ta ben ser un ténpu txeu difísil pa nos. Govérnus ta ben iziji pa nu adora-s i pa nu apoia-s i es ta ben pirsigi kes ki nega faze kel-li. (Apo. 13:12, 15) Es ta ben ‘poi tudu algen, kes pikinoti ku kes grandi, kes riku ku kes póbri, kes livri ku kes ki é skravu, na obrigason di resebe un marka na mô direita ô na tésta’. (Apo. 13:16) Na ténpu antigu, skravus ta resebeba un marka ki ta mostraba ken ki éra ses dónu. Di mésmu manera, na nos ténpu govérnus ta ben spéra pa tudu algen ten un marka na ses mô ô na ses tésta. Pesoas ta ben mostra pa ses manera di pensa i pa kuzas ki es ta faze ma es ta apoia govérnus.

16. Pamodi ki é urjenti nu bira nos lialdadi pa Jeová más fórti désdi gósi?

¹⁶ I nos? Nu ta ben dexa pa es pô-nu kel marka? Nu ta ben apoia kes govérnu? Ken ki nega resebe kel marka ta ben pasa pa txeu prigu i difikuldadi. Livru di Apocalipse ta fla tanbê: ‘Ningen ka ta konsigi kunpra ô bende, di fóra kel ki ten kel marka’. (Apo. 13:17) Má sérvus di Deus sabe tanbê kuzê ki el ta ben faze ku kes ki ten kel marka ki Apocalipse 14:9, 10 ta pâpia di el. Pur isu, envês di es dexa pa es podu kel marka, es ta ben skrebe na ses mô: ‘Un algen di Jeová’. (Isa. 44:5) Gósi é óra di nu djobe si nos lialdadi pa Jeová sta fórti. Si nos é lial, Jeová ta xinti orgulhu di fla ma nos é di sel!

17. Di kuzê ki nu meste lenbra sobri paxénxa di Jeová?

¹⁷ Jeová sta ta mostra txeu paxénxa na es ténpu di fin. El ka krê pa ningen distruídu. (2 Ped. 3:9) El sta ta da tudu algen xansi di rapende i di skodje sirbi-l. Má paxénxa di Jeová ten limiti. Kenha ki ka seta kel oportunidadi ki Jeová sta ta da, el sta poi se kabésa na mésmu situason ki Faraó na ténpu di Muizés. Jeová fla Faraó: ‘Pa gósi dja N stikaba nha mô pa kastigaba abo ku bu povu, ku un praga ki ta distrui, i nhos ta dizaparseba di Téra. Má, é pamodi kel-li própi ki N dexa-u fika bibu: pa N mostra-u nha puder i pa papiadu di nha nómi na Téra interu.’ (Êxo. 9:15, 16) Tudu nasons ta  ben rekonhese ma Jeová é úniku Deus verdaderu. (Eze. 38:23) Modi ki kel-li ta ben kontise?

18. (a) Ki otu tipu di tremor Ageu 2:6, 20-22 ta pâpia di el? (b) Modi ki nu sabe ma kes palavra di Ajeu ta ben kunpri na futuru?

¹⁸ Txeu ténpu dipôs ki Ajeu móre, spritu santu orienta apóstlu Polu pa fla ma kes palavra ki sta na Ageu 2:6, 20-22 ta ben kunpriba na futuru. (Lé.) El skrebe: ‘Má gósi el promete: “Más un bês N ta ben poi ka sô Téra ta treme, má séu tanbê.” Kes palavra “más un bês” ta mostra ma ta ben tradu kes kuza ki ta podu ta treme, kes kuza ki fazedu, pa pode fika kes kuza ki ka ta podu ta treme.’ (Heb. 12:26, 27) Má kel tremor li é diferenti di kel ki Ageu 2:7 ta pâpia di el. Kel-li krê fla ma kes algen, ki sima Faraó, nega rekonhese kel direitu ki Jeová ten di governa, ta ben kabadu ku el pa tudu ténpu.

19. Kuzê ki ka ta ben treme i modi ki nu sabe kel-li?

¹⁹ Kuzê ki ka ta ben treme i nen ka ta kaba? Polu kontinua ta fla: ‘Dja ki nu ta ben resebe un Reinu ki ka ta podu ta treme, nu ta kontinua ta resebe kel bondadi ki ka meresedu, asi nu ta pode faze un sirvisu sagradu pa Deus di manera ki el ta seta, ku tudu ruspetu i ónra.’ (Heb. 12:28) É sô Reinu di Deus ki ka ta ben treme dipôs di kel últimu tremor fórti. El ta kontinua firmi na se lugar! — Sal. 110:5, 6; Dan. 2:44.

20. Ki disizon pesoas meste toma i modi ki nu pode djuda-s?

²⁰ Gósi é ka óra di perde ténpu! Pesoas meste disidi si es ta kontinua ta apoia stilu di vida di kel mundu li ô si es ta sforsa pa vive di akordu ku vontadi di Deus. (Heb. 12:25) Kel primeru disizon ta leba pa distruison, má kel sugundu ta leba pa vida pa tudu ténpu. Através di trabadju di pregason, nu pode djuda kes algen toma es disizon inportanti. Nu kontinua ta djuda kes kuza di valor li i apoia Reinu di Deus. I nu lenbra sénpri di kuzê ki Jizus fla: ‘Kes notísia sábi di Reinu ta ben ser pregadu na mundu interu, pa sirbi di tistimunhu pa tudu nasons, i dipôs fin ta ben.’ — Mat. 24:14.