Poku dipôs di anu 1940, nha pai ku nha mai ta studaba Bíblia ku Tistimunhas di Jeová. Nbóra es para di studa, nha mai kontinua ta resebe revistas Sentinéla i Nhos korda!. Na anu 1950, fazedu un kongrésu internasional na sidadi di Nova York i nha família ba sisti.

Poku ténpu dipôs, irmon Lawrence Jeffries kumesa ta vizita-nu. El tenta djuda-m prende verdadi. Na komésu, N ta atxaba ma Tistimunhas di Jeová debe partisipaba na pulítika i ba trópa. N fla-l ma si tudu algen na Mérka nega baba géra, inimigus pode binha i tomaba kónta di país interu. Ku paxénxa, irmon Lawrence fla-m: “Kuzê ki bu ta atxa ma Jeová pode faze si tudu algen na Mérka ta sirbi-l i inimigus ben ataka-s?” Kel kuza ki el fla-m sobri kel asuntu li i sobri otus asuntu djuda-m odja ma N staba eradu. Kel-li pô-m ku más gana di studa Bíblia.

N pasa txeu ténpu ta lé kes revista Sentinéla i Nhos korda! antigu ki nha mai tinha guardadu na kávi. Ku ténpu, N da kónta ma N staba ta prende verdadi. Pur isu, N seta studa Bíblia ku irmon Lawrence. Tanbê N kumesa ta sisti tudu runion. N ta amaba kuzê ki N staba ta prende i N bira publikador. Nhas méta muda kantu N ntende ma ‘kel grandi dia di Jeová [staba] kuazi ta txiga!’ (Sofonias 1:14) N ka fika ku gana di bai universidadi más, má N krê djudaba otus algen prende verdadi di Bíblia.

N tirmina liseu na dia 13 di junhu di 1956, i três dia dipôs N batiza na un asenbleia. N ka ta fazeba ideia ma N ta ben resebeba txeu kuza sábi di Jeová pamodi N skodje uza nha vida pa prende i inxina otus sobri Jeová.

N bira pioneru fíksu 6 mês dipôs ki N batiza. Ministério do Reino di dizenbru di 1956, na inglês tinha un artigu ku téma: “Bu pode sirbi na undi ki ten más nisisidadi?” Kel konviti li éra pa mi tanbê. N tinha gana di ba djudaba na undi ki tinha poku algen ta prega notísias sábi. — Mat. 24:14.

N muda pa sidadi di Edgefield, na stadu di Karolina di sul. Kel kongregason la tinha sô kuatu publikador i ku mi bira sinku. Nu ta fazeba runion na sala di kaza di un irmon. Tudu mês N ta daba 100 óra na pregason. N ta staba okupadu pamodi N ta organizaba trabadju di pregason i N ta fazeba diskursus na kongregason. Óras ki N ta fazeba más txeu na pregason i na kongregason, N ta prendeba más txeu sobri Jeová.

Un mudjer ki N ta studaba Bíblia ku el tinha un lója ki ta bendeba kaxon na sidadi di Johnston, ki éra pértu di Edgefield. Ku bondadi, el ranja-m un trabadju di meiu piriúdu i el dexa-nu uza un lugar pikinoti pa nu faze runion.

Irmon Jolly Jeffries, ki é fidju di kel irmon ki fazeba mi studu, ben di Brooklyn, stadu di Nova York. El éra pioneru i el bira nha koléga. Nu ta moraba na un karu ki éra sima un kaza pikinoti ki un irmon dexa-nu uza.

Na sul di país, algen ta ganhaba poku. Nu ta ganhaba dôs ô três dóla pa un dia di trabadju. Un bês, N gasta kes últimu muéda ki N tinha pa kunpra kumida na un lója. Kantu N sai di la un ómi txiga na mi i el pergunta-m: “Bu krê trabadju? N ta paga-u un dóla pa óra.” N ten três dia ta trabadja ku el na linpa un lugar di konstruson. N odja klaru ma Jeová staba ta djuda-m pa N kontinua na Edgefield. Má sikrê N tinha poku dinheru, N ba kongrésu internasional ki fazedu na sidadi di Nova York na 1958.

Na sugundu dia di kongrésu, kontise un kuza spesial. N konxe Ruby Wadlington, ki éra pioneru fíksu na sidadi di Gallatin, na stadu di Tennessee. Dja ki nos tudu dôs nu krê sérba misionáriu, na kel kongrésu nu ba sisti runion pa bai Skóla di Jiliádi. Dipôs nu kumesa ta skrebe kunpanheru karta. Ku ténpu, N konvidadu pa ba faze un diskursu pa públiku na Gallatin. N pruveta kel oportunidadi pa N pidi Ruby na kazamentu. Dipôs di kel-la, N muda pa kongregason di Ruby i nu kaza na 1959.

Na Gallatin, kantu N tinha 23 anu N diziginadu pa N bira sérvu di kongregason (ki gósi ta txomadu kordenador di grupu di ansions). Nos éra primeru kongregason ki Charles Thompson vizita kantu el bira enkaregadu di grupu di kongregason. El tinha txeu spiriénsia, má simé el pidi-m nha opinion sobri kuzê  ki kes irmon mesteba i modi ki kes otu enkaregadu di grupu di kongregason ta kuidaba di kes kongregason. N prende ku el ma é bon faze perguntas i sabe tudu kuza ki sta nvolvidu antis di toma un disizon.

Na maiu di 1964, N konvidadu pa bai Skóla pa trabadju di Reinu di un mês ki fazedu na sidadi di South Lansing, na stadu di Nova York. Kes irmon ki éra instrutor na kel skóla pô-m ta krê prende mutu más sobri Jeová i ta bira nha amizadi ku el más fórti.

Mi ku Ruby nu konvidadu pa nu kumesa ta vizita kongregasons na janeru di 1965. Nos primeru grupu di kongregason éra grandi. El ta baba di sidadi di Knoxville, na stadu di Tennessee, ti kuazi na sidadi Richmond, na stadu di Virjínia. El ta inkluiba kes kongregason na Karolina di nórti, Kentucky i Virjiínia osidental. Na kel ténpu N ta vizitaba sô kes kongregason ki tinha irmons prétu, pamodi leis na sul di Mérka ka ta dexaba algen prétu sisti runion djuntu ku algen branku. Kes irmon éra póbri, nton nu prende dividi kel ki nu tinha ku kes irmon ki staba ta meste. Un irmon ki dja tinha txeu ténpu ta vizita kongregasons inxina-m un lison txeu inportanti. El fla-m: “Ser un irmon. Óras ki bu ta vizita un kongregason ka bu konporta sima si é bo ki ta manda la. Sô bu ta pode djuda kes irmon si es ta xinti ma bo é ses irmon.”

Timenti nu staba ta vizita un kongregason pikinoti, Ruby kumesa ta studa Bíblia ku un jóven ki tinha un fidju-fémia di un anu. Óras ki ka tinha ningen na kongregason ki pode fazeba kel studu, Ruby ta fazeba el através di karta. Na kel otu vizita ki nu faze, kel mudjer bai sisti tudu runion. Kantu dôs pioneru spesial muda pa la, es kontinua ta studa ku kel mudjer i poku ténpu dipôs el batiza. Uns 30 anu dipôs, na 1995, na Betel di Patterson, un irman ben pâpia ku Ruby. Éra kel fidju-fémia di kel mudjer ki Ruby studaba ku el. El ku se maridu staba na turma nunbru 100 di Skóla di Jiliádi.

Nos sugundu grupu di kongregason éra na Flórida. Na kel ténpu, nu staba ta meste un karu, nton nu kunpra un ki staba baratu. Má na kel primeru simana, algun pésa na motor straga. Nu ka tinha dinheru pa konpo-l. N txoma un irmon ki N atxaba ma pode djudaba nos. El manda un di kes algen ki ta trabadjaba ku el pa konpo-nu karu, i el ka seta pa nu paga-l. Sô el fla-m: “Sta tudu dretu.” Ti el da-nu dinheru! Kel-li é un izénplu bunitu di modi ki Jeová ta kuida di se sérvus. Kel kuza li lenbra-nu ma nu debe gosta di da otus algen.

Sénpri ki nu ta vizitaba un kongregason, nu ta fikaba na kaza di irmons. Pur isu, nu faze txeu bons amigu. Un dia N kumesa ta skrebe rilatóriu sobri un kongregason i N dexa-l na nha mákina di skrebe. Di noti kantu N torna bai, N odja ma kel fidju di kel família ki tinha três anu skrebe na nha rilatóriu i el straga-m el. Duránti txeu anu N ta brinkaba ku el sobri kel-li.

Na 1971, N resebe diziginason pa N kumesa ta faze trabadju di distritu na sidadi di Nova York. Foi un grandi surpréza pa nos! Kantu nu muda pa la, N tinha sô 34 anu. Kes irmon resebe-m dretu. Ami éra ses primeru enkaregadu di distritu prétu.

Na trabadju di distritu, N gostaba txeu di inxina sobri Jeová tudu fin di simana na asenbleia. Txeu di kes enkaregadu di grupu di kongregason tinha más spiriénsia ki mi. Un di es faze nha diskursu di batismu. Otu irmon, ki é Theodore Jaracz, dipôs ben bira ta faze párti di Grupu Enkaregadu di Óbra. Tanbê, tinha txeu irmon ki tinha spiriénsia ki ta sirbiba na Betel di Brooklyn. N ta agradese txeu pamodi kes enkaregadu di grupu i kes betelita pô-m ta xinti avontádi. N odja ma kes irmon li ta mostraba amor, es ta kunfiaba na Palavra di Deus i es ta apoiaba organizason ku lialdadi. Ses umildadi djuda-m na nha trabadju di distritu.

Na 1974, Grupu Enkaregadu di Óbra skodje un otu grupu di enkaregadus di grupu di kongregason pa faze trabadju di distritu i N torna bira enkaregadu di grupu di kongregason, má di es bês na Karolina di sul. Filismenti gósi kes irmon branku ku prétu pode staba tudu djuntu, i es staba kontenti pamodi kel-li.

Na fin di anu 1976, N diziginadu pa un grupu di kongregason na Jiórjia ki ta fika entri sidadis di Atlanta i Columbus. N ta lenbra klaru ma N faze un diskursu di funeral di sinku kriansa prétu ki móre kantu ses kaza podu lumi. Ses mai fika internadu pamodi es panha pankada. Txeu Tistimunha di Jeová, branku ku prétu, ba ospital pa konsola kes pai ku kes mai. Kes irmon da un bon izénplu di amor. Kel tipu di amor li pode djuda sérvus di Jeová lida ku situasons difísil.

Na 1977, nu konvidadu pa nu pasa alguns mês na Betel di Brooklyn pa djuda na un prujétu. Kantu kel prujétu staba kuazi ta tirmina, dôs irmon di Grupu Enkaregadu di Óbra pâpia ku mi i es pergunta-m si mi ku Ruby nu krê fikaba na Betel. Nu seta kel konviti.

N trabadja 24 anu na Dipartamentu di Sirvisu. Na kel dipartamentu li txeu bês irmons ta djuda rezolve prublémas difísil. Sima anus ba ta pasa, Grupu Enkaregadu di Óbra da orientasons di akordu ku prinsípius di Bíblia. Kes orientason li ta djuda Dipartamentu di Sirvisu responde perguntas i tanbê es ta uza-s pa trena kes enkaregadu di grupu di kongregason, kes ansion i kes pioneru. Kel trenu li dja djuda txeu algen bira un kriston maduru. I kel-li poi organizason di Jeová bira más fórti.

Di 1995 ti 2018, ami éra reprizentanti di Sédi Mundial, ki antis ta txomadu enkaregadu di zóna i N vizita txeu filial. N ta fazeba runion ku kes irmon di Kumison di Filial, kes betelita i kes misionáriu pa nkoraja-s i pa djuda-s na kalker prubléma ki es tinha. Má kes spiriénsia ki kes irmon ta kontaba sénpri nkoraja mi ku Ruby. Pur izénplu, na anu 2000 nu vizita Ruanda. Kantu nu obi modi ki kes irmon i família di Betel salva na kel matansa di 1994, nu fika dimiradu. Família i amigus di txeu irmon móre. Sikrê es pasa pa txeu kuza, kes irmon li mostra fé, speransa i alegria.

Gósi nu tene más di 80 anu. Na kes últimu 20 anu, N faze párti di Kumison di Filial di Mérka. Nunka N ka bai universidadi, má N resebe kel midjór idukason ki ten, ki é di Jeová i di se organizason. Pamodi kel idukason li, N konsigi inxina otus algen verdadis di Bíblia ki pode djuda-s pa tudu ténpu. (2 Cor. 3:5; 2 Tim. 2:2) N odja modi ki verdadis di Bíblia djuda algen midjora ses vida i djuda-s ten un amizadi ku ses Kriador. (Tia. 4:8) Sénpri ki nu pode, mi ku Ruby nu ta kontinua ta nkoraja otus pa da valor pa priviléjiu di prende sobri Jeová i di inxina verdadis di Bíblia pa otus algen. Kel-li é kel priviléjiu más grandi ki un sérvu di Jeová pode ten!