STUDU 40
‘Txeu algen ta ben lebadu pa justisa’
‘Kes ki ta leba txeu algen pa justisa ta ben brilha sima strélas, pa tudu ténpu.’ — DANIEL 12:3.
KÁNTIKU 151 Jeová ta ben txoma-s
KUZÊ KI NU STA BEN STUDA *
1. Kuzê ki ta ben kontise na Govérnu di mil anu di Jizus?
ÓRAS ki resureison ben kumesa li na Téra na Govérnu di mil anu di Jizus, ta ben ser un ténpu rei di sábi! Nos tudu nu tene gana di odja otu bês kes algen ki nu ta ama ki dja móre. É si tanbê ki Jeová ta xinti. (Jó 14:15) Imajina modi ki tudu algen na Téra ta ben fika kontenti óras ki es odja kes algen ki es ta ama ta resusitadu. Sima nu odja na kel studu ki pasa kes ‘algen justu’, ki ses nómi sta skrebedu na livru di vida, ta ben ten ‘resureison di vida’. (Atos 24:15; João 5:29) Talvês txeu di kes algen ki nu ta ama ta ben resusita lógu dipôs di Armajedon. * Tanbê kes ‘algen injustu’, sima kes ki ka tevi oportunidadi di konxe Jeová dretu ô di sirbi-l di manera fiel antis di es móre, ta ben ten ‘resureison di julgamentu.’
2-3. (a) Sima sta na Isaías 11:9, 10, modi ki kel trabadju más grandi pa inxina algen ta ben fazedu? (b) Kuzê ki nu ta ben odja na kel studu li?
2 Tudu kes resusitadu ta ben inxinadu. (Isa. 26:9; 61:11) Pur isu, kel trabadju más grandi ki dja fazedu pa inxina algen ta ben kontise. (Lé Isaías 11:9, 10.) Pamodi? Primeru, pamodi kes algen injustu ki ta ben resusitadu meste prende sobri Jizus Kristu, Reinu di Deus, sakrifisiu di resgati, nómi di Jeová i pamodi ki é sô el ki ten direitu di governa. Ti mésmu kes algen justu ta ben prende poku-poku kuzê ki Jeová inxina se povu sobri kal ki é se vontadi pa Téra. Alguns di kes algen fiel li móre txeu ténpu antis di Bíblia interu skrebedu. Pur isu, kes algen justu i kes algen injustu ta ben prende txeu kuza.
3 Na kel studu li, nu ta ben responde kes pergunta li: Modi ki kel trabadju más grandi pa inxina algen ta ben fazedu? Modi ki el ta ben afeta kes ki ses nómi sta skrebedu na livru di vida? Respósta pa kes pergunta li é inportanti pa nos oji. Sima nu ta ben odja, alguns di kes profesia ki sta na livru di Daniel i Apocalipse ki ta dexa-nu dimiradu, ta ben djuda-nu ntende midjór kuzê ki ta ben kontise óras ki kes algen ki móre ben resusitadu. Primeru, nu ta ben odja ki kuzas inportanti ki sta na profesia di Daniel 12:1, 2.
‘KES KI STA DURMI NA TÉRA TA BEN KORDA’
4-5. Kuzê ki Daniel 12:1 ta fla sobri ténpu di fin?
4 Lé Daniel 12:1. Livru di Daniel ta fla modi ki kuzas ta ben kontise duránti ténpu di fin. Pur izénplu, Daniel 12:1 ta fla ma Migel, ki é Jizus Kristu, ta ‘sta sakédu pa djuda povu’ di Deus. Kel párti di es profesia kunpri na anu 1914 kantu Jizus skodjedu pa ser Rei di Reinu di Deus na Séu.
5 Má, Daniel tanbê fla ma Jizus ‘ta ben labanta’ duránti ‘ténpu di frónta, ki sima kel-la nunka ka kontise, désdi ki nasons kumesa ta izisti ti kel ténpu.’ Kel ‘ténpu di frónta’ li é ‘grandi tribulason’ ki Mateus 24:21 ta pâpia di el. Jizus ta ben labanta ô el ta ben aji pa difende povu di Deus na fin di kel ténpu di frónta, ki é na Armajedon. Livru di Apocalipse ta fla ma kes algen li é kel ‘monti di algen ki ta sai di grandi tribulason’. — Apo. 7:9, 14.
6. Kuzê ki ta ben kontise dipôs ki kel monti di algen salva na grandi tribulason? Splika. (Pa sabe más sobri resureison pa vive li na Téra, odja “Perguntas ki leitoris ta faze”, na kel revista li.)
6 Lé Daniel 12:2. Kuzê ki ta ben kontise dipôs ki kel monti di algen salva na kel ténpu di frónta? Antis nu ta ntendeba ma Daniel 12:2 staba ta pâpia di modi ki trabadju di pregason ta ben omentaba dipôs ki kes algen ki éra kóntra organizason pô-l fika kuazi paradu na 1918. * Má gósi nu ta ntende ma el sta ta pâpia di un resureison ki ta ben kontise na mundu novu. Pamodi ki nu ta fla kel-li? Palavra ‘téra’ ki sta na Daniel 12:2 traduzidu pa ‘baxu txon’ na Jó 17:16 i el krê fla mésmu kuza ki palavra ‘Sipultura’. Kel-li krê fla ma Daniel 12:2 sta ta pâpia di un resureison ki ta ben kontise dipôs di ténpu di fin i dipôs di géra di Armajedon.
7. (a) Modi ki alguns algen ta ben resusitadu pa vive pa ‘tudu ténpu’? (b) Pamodi ki kel-li é ‘un resureison midjór’?
7 Má kuzê ki Daniel 12:2 krê fla sobri kes algen ki ta ben resusitadu pa ben vive pa ‘tudu ténpu’? Kel-li krê fla ma kes algen ki ta ben resusitadu ki konxe, ô ki kontinua ta konxe i ta obi ku Jeová i Jizus duránti kes mil anu, na fin es ta ben resebe vida pa tudu ténpu. (João 17:3) Kel-li ta ben ser ‘un resureison midjór’ di ki kes ki kontise na pasadu. (Heb. 11:35) Pamodi? Pamodi kes algen inperfeitu ki resusitadu na pasadu móre otu bês.
8. Modi ki otus ta ben resusitadu ‘pa dizónra i pa disprézu pa tudu ténpu’?
8 Má nen tudu algen ki ta ben resusitadu ka ta seta pa Jeová inxina-s. Profesia di Daniel ta fla ma alguns algen ta resusitadu ‘pa dizónra i pa disprézu pa tudu ténpu.’ Pamodi ses atitudi rebéldi, ses nómi ka ta ben skrebedu na livru di vida i es ka ta ben resebe vida pa tudu ténpu. Má envês di kel-li, es ta ben resebe ‘disprézu pa tudu ténpu’ ô es ta distruídu. Nton, Daniel 12:2 ta pâpia sobri kuzê ki ta ben kontise ku tudu kes ki resusitadu ku bazi na kuzê ki es faze dipôs di resureison. * (Apo. 20:12) Alguns ta ben ten vida pa tudu ténpu i otus nau.
‘TXEU ALGEN TA BEN LEBADU PA JUSTISA’
9-10. Kuzê más ki ta ben kontise dipôs di grandi tribulason i kenha ki é kes ki ta ben ‘brilha klaru sima séu’?
9 Lé Daniel 12:3. Kuzê más ki ta ben kontise dipôs di kel ‘ténpu di frónta’? Dja nu odja kuzê ki Daniel 12:2 ta pâpia di el, má versíklu 3 ta pâpia di un otu kuza ki ta ben kontise dipôs di grandi tribulason.
10 Kenha ki é kes ki ta ben ‘brilha klaru sima séu’? Nu ta atxa respósta na kuzê ki Jizus fla na Mateus 13:43: ‘Na kel ténpu, kes justu ta ben límia klaru sima sól, na Reinu di ses Pai.’ Na kes versíklu antis, Jizus staba ta pâpia di ‘fidjus di Reinu’ ki é se irmons skodjedu ki ta ba governa djuntu ku el na Séu. (Mat. 13:38) Pur isu, Daniel 12:3 debe sta ta pâpia di kes skodjedu i di trabadju ki es ta ben faze duránti kel Govérnu di mil anu.
Kes 144 mil ta ben trabadja djuntu ku Jizus pa organiza kel trabadju más grandi di inxina algen ki ta ben fazedu duránti kes mil anu. (Odja parágrafu 11.)
11-12. Ki trabadju kes 144 mil skodjedu ta ben faze duránti kes mil anu?
11 Modi ki kes skodjedu ta ben leba ‘txeu algen pa justisa’? Kes skodjedu ta ben sta djuntu ku Jizus pa ben faze kel trabadju más grandi di inxina algen li na Téra duránti kes mil anu. Kes 144 mil ta ben governa sima reis, má tanbê es ta ben ser saserdótis. (Apo. 1:6; 5:10; 20:6) Di kel manera li, es ta ben djuda ‘kura nasons’, kel-li krê fla ma es ta ben djuda tudu algen li na Téra ba ta bira perfeitu poku-poku. (Apo. 22:1, 2; Eze. 47:12) Kel-li ta ben dexa kes skodjedu txeu kontenti!
12 Kenha ki ta ben sta na meiu di ‘kes txeu’ ki ta ben lebadu pa justisa? É kes ki resusitadu, kes ki salva na Armajedon i kalker mininu ki pode ben nase na mundu novu. Na fin di kes mil anu tudu kes ki ta vive li na Téra ta ben sta perfeitu. Nton, na ki ténpu ki ses nómi ta ben skrebedu ku kanéta envês di ku lápis na livru di vida pa tudu ténpu?
PRÓVA FINAL
13-14. Kuzê ki tudu algen perfeitu li na Téra meste mostra antis di es resebe vida pa tudu ténpu?
13 Nu debe lenbra ma ser perfeitu ka krê fla ma un algen ta ganha vida pa tudu ténpu lógu. Lenbra di Adon ku Eva. Es éra perfeitu, má antis di es resebe vida pa tudu ténpu es tinha ki provaba ma es ta obiba ku Jeová. Má é tristi pamodi es ka obi ku Jeová. — Rom. 5:12.
14 Modi ki algen li na Téra ta ben sta na fin di kes mil anu? Tudu algen ta ben sta perfeitu. Tudu kes algen li ta ben apoia direitu ki Jeová ten di governa pa tudu ténpu? Ô alguns di es ta ser sima Adon ku Eva, ki éra perfeitu má es ka kontinua fiel? Modi ki nu pode sabe respósta di kes pergunta li?
15-16. (a) Na ki ténpu ki tudu algen ta ben ten oportunidadi di mostra ses lialdadi pa Jeová? (b) Kal ki ta ser rezultadu di kel próva final?
15 Satanás ta ben podu prézu duránti kes mil anu. Na kel ténpu la, el ka ta konsigi ngana ningen. Má, na fin di kes mil anu, Satanás ta ben tradu di kadia. El ta ben tenta ngana kes algen perfeitu. Nton duránti kel próva li, tudu algen perfeitu li na Téra ta ben ten oportunidadi di mostra klaru si es ta ruspeta nómi di Deus i si es ta apoia direitu ki Deus ten di governa ô nau. (Apo. 20:7-10) Disizon ki kada algen ta ben toma sobri kes ataki di Satanás ta mostra si ses nómi ta ben skrebedu pa tudu ténpu ku kanéta na livru di vida.
16 Alguns algen, ki nu ka sabe é kantu, ta ben ser sima Adon ku Eva i es ka ta apoia direitu ki Deus ten di governa. Kuzê ki ta ben kontise ku es? Apocalipse 20:15 ta fla: ‘Kes ki ses nómi ka staba skrebedu na livru di vida botadu na kel lagu di lumi.’ Es ta ben distruídu pa tudu ténpu. Má maioria di kes algen perfeitu ta ben pasa na kel próva final. Ses nómi ta ben skrebedu pa tudu ténpu na livru di vida.
DURÁNTI ‘TÉNPU DI FIN’
17. Kuzê ki kel anju fla Daniel ma ta ben kontiseba na nos ténpu? (Daniel 12:4, 8-10)
17 Fórti sábi pensa na kes kuza ki ta ben kontise na futuru! Má Daniel tanbê resebe alguns informason inportanti di un anju sobri kuzê ki ta ben kontiseba na nos ténpu, ki é ‘ténpu di fin.’ (Lé Daniel 12:4, 8-10; 2 Tim. 3:1-5) Kel anju fla Daniel: ‘Konhisimentu di verdadi ta ben bira txeu dimás.’ Kel-li krê fla ma povu di Deus ta ben ntendeba más dretu kes profesia di kel livru li. Kel anju tanbê fla ma duránti kel ténpu li, ‘kes mau ta ben faze kel ki é mau i ninhun di kes mau ka ta ben ntende’.
18. Kuzê ki ka ta dura ta ben kontise ku kes algen mau?
18 Oji pode parse ma kes algen mau ka sta ta kastigadu pa kes kuza mariadu ki es ta faze. (Mal. 3:14, 15) Má ka ta dura, Jizus ta ben julga kes algen ki é sima kabritu i el ta ben pô-s siparadu di kes ki é sima ovelha. (Mat. 25:31-33) Kes algen mau ka ta ben salva na grandi tribulason, nen es ka ta ben resusitadu pa ben vive na mundu novu. Ses nómi ka ta ben sta na ‘livru di rekordason’, sima sta na Malaquias 3:16.
19. Gósi é óra di nu faze kuzê i pamodi? (Malaquias 3:16-18)
19 Gósi é óra di nu prova ma nos é ka algen mau. (Lé Malaquias 3:16-18.) Jeová sta ta djunta kes ki el ta atxa ma é ‘un propriadadi spesial’ ô ki ten txeu valor pa el. Di sertéza nu krê sta na meiu di kes algen li.
Ta ben ser sábi odja Daniel, kes algen ki nu ta ama i txeu otus algen ‘ta labanta’ pa resebe ses párti na mundu novu! (Odja parágrafu 20.)
20. Kuzê ki Jeová promete Daniel i pamodi ki bu tene gana pa kel promésa li kunpri?
20 Nu ka ten dúvida ma nu sta ta vive na un ténpu inportanti. Má ka ta dura, ta ben kontise txeu kuza ki ta dexa-nu dimiradu. Nu ta ben odja distruison di tudu kes kuza mariadu. Dipôs di kel-li, nu ta ben odja kel promésa ki Jeová fla Daniel ta kunpri. El fla-l: ‘Na fin di dias, bu ta ben labanta pa bu resebe bu párti.’ (Dan. 12:13) Bu tene gana pa txiga kel dia ki Daniel i kes algen ki bu ta ama ta ben ‘labanta’ otu bês? Nton, sforsa pa bu mante fiel gósi, asi bu pode ten sertéza ma bu nómi ta kontinua skrebedu na livru di vida di Jeová.
KÁNTIKU 80 ‘Sprimenta i odja ma Jeová é bon’
^ Kel artigu li ten un ntendimentu novu sobri kel trabadju grandi pa inxina algen ki sta na Daniel 12:2, 3. Nu ta ben odja ki ténpu ki kel-li ta ben kontise i kenha ki ta ben partisipa na el. Tanbê, nu ta ben odja modi ki kel trabadju li pa inxina algen ta ben pripara kes algen na Téra pa kel próva final ki ta ben kontise na fin di Govérnu di mil anu di Jizus.
^ Talvês resureison pode kumesa ku kes algen ki móre fiel pa Jeová na ténpu di fin i dipôs talvês kes ki móre antis di es ta ben resusitadu, un jerason tras di kel otu. Si resureison kontise na kel órdi li, kada jerason ta ben ten oportunidadi di resebe kes algen ki es konxeba. Nu ka ten sertéza di modi ki resureison ta ben kontise, má Bíblia ta fla ma kes ki resusitadu pa ba vive na Séu ta ben resusitadu ‘kada un na se própi órdi’. I tanbê nu pode fla ma resureison di kes algen ki ta ben vive li na Téra ta ben ser di manera organizadu. — 1 Cor. 14:33; 15:23.
^ Kel splikason li ta muda kel manera di ntende ki nu tinha ki sta na livru Preste Atenção à Profesia de Daniel!, kapítlu 17 i na Sentinéla di 1 di julhu di 1987, pájinas 21 ti 25.
^ Má kes palavra ‘justu’ i ‘injustu’ ki nu ta atxa na Atos 24:15, i kes palavra ‘kes ki faze kuzas dretu’ i ‘kes ki faze kuzas mariadu’ ki nu ta atxa na João 5:29, sta ta pâpia di kes kuza ki kes algen ki resusitadu faze antis di es móre.
