Odja modi ki Bíblia ta responde kel pergunta li.

Atos 24:15 ta fla ma ‘ta ben ten resureison di algen justu i tanbê di algen injustu.’ Justu é kes algen ki obi ku Deus antis di es móre, pur isu ses nómi sta skrebedu na livru di vida. (Mal. 3:16) Kes injustu ta inklui kes algen ki ka tevi oportunidadi di konxe Jeová dretu antis di es móre, pur isu ses nómi ka sta skrebedu na livru di vida.

João 5:28, 29 ta pâpia di kes dôs grupu ki sta na Atos 24:15. Jizus fla ma ‘kes ki faze kuzas dretu’ ta ben ten ‘un resureison di vida, i kes ki faze kuzas mariadu’ ta ben ten ‘un resureison di julgamentu.’ Kes justu faze kuzas dretu antis di es móre. Es ta ben ten un resureison di vida pamodi ses nómi inda ta sta skrebedu na livru di vida. Má kes algen injustu faze kuzas mariadu antis di es móre. Es ta ben ten un resureison di julgamentu. Ses nómi inda ka ta sta skrebedu na livru di vida i duránti un ténpu es sta ben pasa pa un testi, ô ta ben djobedu modi ki es ta konporta. Duránti kel ténpu la, es ta ben ten oportunidadi di prende sobri Jeová i di ten ses nómi skrebedu na livru di vida.

Apocalipse 20:12, 13 ta fla ma tudu kes algen ki resusitadu meste obi ku ‘kes kuza ki sta skrebedu na kes rolu’, ki é kes lei novu ki ta ben ten na mundu novu. Kes ki ka obi ta ben distruídu. — Isa. 65:20.

Daniel 12:2 ta fla ma alguns di kes algen ki móre ta ben korda ‘pa vida pa tudu ténpu,’ i ‘otus pa dizónra i pa disprézu pa tudu ténpu.’ Kel versíklu li sta ta pâpia di julgamentu final di kes algen ki ta resusitadu. Es ta ben ten ‘vida pa tudu ténpu’ ô ‘disprézu pa tudu ténpu.’ Nton na fin di kes mil anu alguns ta ben resebe vida pa tudu ténpu i otus ta ben distruídu pa tudu ténpu. — Apo. 20:15; 21:3, 4.

Pensa na kel ilustrason li. Situason di kes dôs grupu ki ta ben resusitadu pode konparadu ku kes algen ki krê ba vive na un otu país. Kes algen justu é sima kes algen ki ta resebe un vistu di trabadju ô pa mora na kel país i asi govérnu ta da-s algun liberdadi. Má kes algen injustu é sima kes algen ki dadu un vistu pa fika pa poku ténpu ô un vistu di turista. Má antis di kes dôs grupu di algen li dexadu kontinua ta vive na kel país novu, es ten ki mostra ma es merese dexadu na kel país. Di mésmu manera, kes algen injustu ki ta resusitadu meste obi ku leis di Jeová i mostra ma dja es bira justu, asi pa es pode kontinua ta vive na Paraízu. Má ka ta nporta ki vistu ki kes algen resebe kantu es entra na kel país, alguns talvês pode bira sidadon di kel país i otus pode mandadu pa ses téra. Tudu kel-li ta dipende di modi ki es konporta na kel país novu. Di mésmu manera, pa kes resusitadu ten vida pa tudu ténpu ô distruídu pa tudu ténpu, ta dipende di ses lialdadi i di modi ki es ta leba ses vida na mundu novu.

Jeová é un Deus ki ten txeu amor, má tanbê el é un Deus justu. (Deut. 32:4; Sal. 33:5) El ta ben mostra se amor óras ki el resusita kes algen justu i kes algen injustu. Má tanbê Jeová ta spéra ma tudu kes algen ki resusitadu ta obi ku se leis sobri kuzê ki é dretu i kuzê ki é mariadu. É sô kes algen ki ta ama Jeová i ki ta vive di akordu ku se leis ki ta pode kontinua ta vive na mundu novu.