1. Modi ki Pedru reaji kantu Jizus faze un milagri pa es pega txeu pexi?

 PEDRU pasa un noti interu ta piska, má el ka pega nada. Nton, el fika dimiradu kantu Jizus fla-l: “Bai pa undi ki é fundu, i nhos bota nhos redi pa piska.” (Luk. 5:4) Pedru tinha dúvida si el ta pegaba algun pexi, má el faze sima Jizus fla-l. Kes redi ki es bota kumesa ta ratxa pamodi pézu di kes pexi ki es pega. Kantu Pedru i kes ki ta trabadjaba ku el da kónta ma kel-la éra un milagri, es “fika spantadu”. Pedru fla: “Afasta di mi Sinhor, pamodi ami é un ómi pekador.” (Luk. 5:6-9) Talvês Pedru xinti ma el ka merese staba djuntu ku Jizus.

2. Pamodi ki studa izénplu di Pedru pode djuda-nu?

² Pedru tinha razon, el éra “un ómi pekador.” Skrituras ta mostra ma alguns bês el fla i el faze kuzas ki dipôs el rapende. Algun bês bu xinti sima Pedru? Ten algun kuza na bu manera di ser ki bu sta ta sforsa pa midjora ô dja bu ten txeu ténpu ta luta kóntra un frakéza? Nton, studa izénplu di Pedru pode konsola-u. Di ki manera? Lenbra ma kes kuza mariadu ki Pedru faze pode ka staba na Bíblia. Má, ku ajuda di spritu santu es sta na Bíblia pa inxina-nu alguns lison. (2 Tim. 3:16, 17) Prende ku Pedru ki tinha frakézas i sentimentus sima di nos, pode djuda-nu odja ma Jeová ka ta spera pa nu ser perfeitu. El ka krê pa nu dizisti, má pa nu kontinua firmi sikrê ku frakézas.

3. Pamodi ki nu ka debe dizisti?

 ³ Pamodi ki nu ka debe dizisti? Si nu faze un kuza txeu bês, nu pode bira bon na faze-l. Pur izénplu, óras ki un algen ten txeu anu ta toka, el ta bira ta toka dretu. Duránti kes anu el pode da txeu éru, má si el kontinua ta toka el ta midjora. Sikrê dipôs ki el bira bon na toka, di vês en kuandu el pode fadja. Má simé, el ka ta dizisti. El ta kontinua ta trena pa el midjora. Di mésmu manera, sikrê nu xinti ma dja nu vense algun frakéza, nu pode ten un rekaída. Má simé, nu ta kontinua ta sforsa pa midjora. Nos tudu nu ta fla ô nu ta faze kuzas ki dipôs nu ta rapende. Má si nu ka dizisti, Jeová ta djuda-nu kontinua ta midjora. (1 Ped. 5:10) Nu ben odja izénplu di Pedru ki ka dizisti. Konpaxon ki Jizus mostra-l sikrê ku se fadjas, pode motiva-nu pa nu kontinua ta sirbi Jeová.

4. Sima sta na Lukas 5:5-10, kuzê ki Pedru fla ma el éra, má ki garantia Jizus da-l?

⁴ Skrituras ka ta fla pamodi ki Pedru ta atxaba ma el éra “un ómi pekador” ô ki pekadus ki el staba ta pâpia di el. (Lé Lukas 5:5-10.) Má talvês el faze alguns éru gravi. Jizus da kónta ma Pedru tinha medu, talvês pamodi Pedru ta atxaba ma el ka staba priparadu. Jizus tanbê sabia ma Pedru pode kontinuaba fiel. Pur isu, Jizus fla Pedru ku amor pa “para di ten medu.” Kunfiansa ki Jizus tinha na Pedru muda vida di Pedru. Dipôs Pedru ku se irmon André, bandona ses nogósiu di péska i es bira ta sigi Misías i Jeová abensua-s di txeu manera. — Mar. 1:16-18.

5. Ki bensons ki Pedru resebe pamodi el vense se medu i el seta konviti di Jizus?

⁵ Pedru tevi txeu spiriénsia sábi ta sigi Jizus. El odja Jizus ta kura algen duenti, ta tra dimónis i ti ta resusita mortus. b (Mat. 8:14-17; Mar. 5:37, 41, 42) Pedru tanbê tevi un vizon di Jizus na se glória na Reinu. Pedru nunka ka skese di kel-li. (Mar. 9:1-8; 2 Ped. 1:16-18) Pedru odja kuzas ki nunka el ka imajina ma el ta odjaba. Di serteza, el fika txeu kontenti pamodi el ka dexa ninhun di kes sentimentu negativu ki el tinha pô-l ta perde kes benson li!

6. Pedru vense se frakézas lógu? Splika.

⁶ Sikrê ku kes kuza ki Pedru odja i  el obi, el kontinua ta luta kóntra se frakézas. Odja alguns izénplu. Kantu Jizus fla ma el ta sufreba i ma el ta moreba pa kunpri profesias di Bíblia, Pedru txoma-l atenson. (Mar. 8:31-33) Txeu bês, Pedru i kes otu apóstlu diskuti sobri kal di es ki éra más grandi. (Mar. 9:33, 34) Na kel noti antis di Jizus móre, Pedru ataka un ómi i el korta-l orédja. (Juan 18:10) Na kel mésmu noti, Pedru xinti medu i três bês el nega ma el konxeba se amigu Jizus. (Mar. 14:66-72) Kel-li poi Pedru ta txora ku txeu mágua. — Mat. 26:75.

7. Dipôs ki Jizus resusitadu, ki oportunidadi el da Pedru?

⁷ Jizus ka dizisti di se apóstlu ki staba dizanimadu. Dipôs ki Jizus resusitadu, el da Pedru oportunidadi di mostra ma inda el ta amaba el. Jizus konvida Pedru pa ser pastor di se ovelhas ku umildadi. (Juan 21:15-17) Pedru staba prontu pa faze kuzê ki Jizus fla-l. El staba na Jiruzalen na dia di Pentikósti i el foi un di kes primeru ki skodjedu ku spritu santu.

8. Ki éru gravi ki Pedru faze na Antiokia?

⁸ Mésmu dipôs ki Pedru bira un kriston skodjedu ku spritu santu, el tevi ki lida ku se frakézas. Na anu 36 D.J., Pedru mandadu pa ba vizita Kornéliu ki ka éra judeu. I Kornéliu skodjedu ku spritu santu. Kel-li mostra klaru ma “Deus ta trata tudu algen igual” i ma kes algen ki ka éra judeu pode fazeba párti di kongregason. (Atus 10:34, 44, 45) Dipôs di kel-li, Pedru xinti avontádi pa kume ku kes algen ki ka éra judeu, ki éra un kuza ki nunka el ka fazeba antis. (Gál. 2:12) Má alguns irmon ki éra judeu ta atxaba ma kes judeu i kes ki ka éra judeu ka debe kumeba djuntu. Kantu kes irmon ki ta pensaba di kel manera li txiga na Antiokia, Pedru para di kume ku kes irmon ki ka éra judeu, talvês ku medu di ofende kes irmon ki éra judeu. Apóstlu Paulu odja ma Pedru staba ta finji i el txoma-l atenson na frenti di otus algen. (Gál. 2:13, 14) Sikrê ku kel rekaída li, Pedru ka dizisti. Kuzê ki djuda-l?

9. Modi ki Juan 6:68, 69 ta mostra ma Pedru éra lial?

⁹ Pedru éra lial. El ka dexa nada pô-l ta dizisti di sigi Jizus. Pur izénplu, un bês Jizus fla un kuza ki se disiplus ka intende. (Lé Juan 6:68, 69.) Txeu di es para di sigi Jizus i es ka spera pa el da-s un splikason. Má Pedru ka faze kel-li. El éra lial i el fla ma é sô Jizus ki tinha “palavras ki ta da vida pa tudu ténpu.”

10. Modi ki Jizus mostra ma el ta kunfiaba na Pedru? (Odja dizenhu.)

¹⁰ Jizus ka bandona Pedru. Jizus sabia ma na últimu noti di se vida li na téra, Pedru i kes otu apóstlu ta bandonaba el. Má Jizus tinha kunfiansa ma Pedru ta rekuperaba i ta kontinuaba lial. (Luk. 22:31, 32) Jizus intende ma “spritu sta prontu, má karni é fraku.” (Mar. 14:38) Pur isu, mésmu dipôs ki Pedru nega Jizus, el ka dizisti di se apóstlu. I dipôs ki Jizus resusitadu, el parse pa Pedru kantu Pedru staba el sô. (Mar. 16:7; Luk. 24:34; 1 Kor. 15:5) Pedru staba dizanimadu, má imajina modi ki kel-li da-l koraji!

11. Modi ki Jizus garanti Pedru ma Jeová ta kuidaba di el?

 ¹¹ Jizus garanti Pedru ma Jeová ta kuidaba di el. Dipôs ki Jizus resusitadu, el faze más un milagri ki poi Pedru i kes otu apóstlu ta pega pexi. (Juan 21:4-6) Kel milagri li da Pedru serteza ma pa Jeová ka éra difísil daba el kes kuza ki el staba ta meste. Talvês el lenbra ma Jizus flaba ma Jeová ta kuida di kes ki ta “kontinua ta buska Reinu primeru”. (Mat. 6:33) Tudu kel-li, djuda Pedru poi trabadju di pregason na primeru lugar na se vida, envês di se nogósiu di péska. Na dia di Pentikósti di anu 33 D.J., el prega ku koraji i el djuda monti algen seta kes notísia sábi. (Atus 2:14, 37-41) Dipôs, el djuda kes samaritanu i kes algen ki ka éra judeu prende sobri Kristu i sigi-l. (Atus 8:14-17; 10:44-48) Ta fika klaru ma Jeová uza Pedru dretu pa traze algen di tudu tipu pa kongregason.

12. Modi ki izénplu di Pedru pode djuda-nu, si dja nu ten txeu ténpu ta luta kóntra un frakéza?

¹² Jeová pode djuda-nu ka dizisti. Pode ser difísil kontinua, prinsipalmenti si dja ten txeu ténpu ki nu sta luta kóntra un frakéza. Alvês, nos frakézas pode parse más difísil di kes ki Pedru lida ku el. Má Jeová pode da-nu forsa pa nu ka dizisti. (Sal. 94:17-19) Pur izénplu, pensa na un irmon ki duránti txeu anu, antis di konxe verdadi, tinha un stilu di vida omoseksual. El muda se vida konpletamenti i el pasa ta vive sima Bíblia ta fla. Má simé, alvês el tevi ki luta kóntra dizejus mariadu. Kuzê ki djuda-l ka dizisti? El fla: “Jeová da-m forsa. Ku spritu santu di Jeová... N prende ma N ta konsigi [kontinua] na kaminhu di verdadi... Jeová sta ta uza-m i sikrê ku nhas fadja el ta kontinua ta da-m forsa.”

13. Modi ki nu pode imita izénplu di Pedru ki sta na Atus 4:13, 29, 31? (Odja fotus.)

¹³ Sima nu odja, más di ki un bês, Pedru dexa medu di ómi pô-l ta faze kuzas mariadu. Má Pedru faze orason ta pidi koraji i pur isu, el konsigi aji ku koraji. (Lé Atus 4:13, 29, 31.) Nos tanbê nu pode vense nos medu. Odja  kuzê ki kontise ku Horst, ki éra un irmon jóven ki ta moraba na Alimanha duránti Sugundu Géra na Mundu Interu. Más di ki un bês, el dexa preson na skóla pô-l ta fla “Heil Hitler!” Envês di pai ku mai di Horst txoma-l atenson, es faze orason ku el ta pidi Jeová pa da-l koraji. Ku ajuda di se pai ku se mai i kunfiansa na Jeová, Horst ganha forsa pa kontinua firmi. Dipôs el fla: “Jeová nunka ka bandona-m.” c

14. Modi ki ansions pode djuda kes ki sta dizanimadu?

¹⁴ Jeová ku Jizus ka ta dizisti di nos. Dipôs ki Pedru nega Jizus, el tinha ki tomaba un disizon inportanti. El ta dizistiba ô el ta kontinuaba ta ser disiplu di Jizus? Jizus inplora Jeová pa ka dexa Pedru perde se fé. Jizus fla Pedru sobri kel orason ki el faze i el mostra kunfiansa ma Pedru dipôs ta voltaba i el ta daba se irmons forsa. (Luk. 22:31, 32) Kantu Pedru lenbra di kuzê ki Jizus fla-l, kel-la da-l forsa. Óras ki nu ten un disizon inportanti pa nu toma, Jeová pode uza ansions pa da-nu kel forsa ki nu meste pa nu kontinua fiel. (Efé. 4:8, 11) Paulu, ki dja ten txeu ténpu ki é ansion, ta tenta faze kel-li. El ta tenta pidi kes algen ki sta pensa na dizisti pa pensa na modi ki Jeová atrai-s pa verdadi. Dipôs, el ta da-s serteza ma amor lial ka ta dexa Jeová dizisti di es. El fla: “Dja N odja txeu algen ki staba dizanimadu ta aguenta firmi ku ajuda di Jeová.”

15. Modi ki izénplu di Pedru i di Horst ta mostra ma Mateus 6:33 é verdadi?

 ¹⁵ Sima Jeová da Pedru i kes otu apóstlu kes kuza ki es staba ta meste, el ta da-nu kes kuza ki nu meste óras ki nu ta poi trabadju di pregason na primeru lugar na nos vida. (Mat. 6:33) Dipôs di Sugundu Géra na Mundu Interu, Horst, ki dja nu papiaba di el antis, pensa na bira pioneru. El éra txeu póbri i el tinha dúvida si el ta konsigi sustentaba se kabésa na trabadju di pioneru. Kuzê ki el faze? El disidi odja si Jeová ta kuidaba di el. Pur isu, el pasa un simana interu na pregason duránti vizita di enkaregadu di grupu di kongregason. Na fin di kel simana, el fika dimiradu kantu kel enkaregadu di grupu di kongregason da-l un invelópi ku dinheru, má ki ka tinha nómi. El tinha dinheru ki ta txigaba pa sustentaba el na se trabadju di pioneru duránti alguns mês. Pa Horst kel prezenti li éra un garantia ma Jeová ta kuidaba di el. El pasa réstu di se vida ta poi Reinu na primeru lugar. — Mal. 3:10.

16. Pamodi ki bale péna studa izénplu di Pedru i kes karta ki el skrebe?

¹⁶ Pedru fika kontenti pamodi Jizus ka afasta di el, sima Pedru pidiba el. Jizus kontinua ta trena Pedru pa ser un apóstlu fiel i un bon izénplu pa kes ki ta sirbi Deus. I nu ta prende txeu lison di kel trenu ki Pedru resebe. Na kes dôs karta ki Pedru skrebe ku ajuda di spritu santu, i ki el manda pa kes kongregason na ténpu di apóstlus, nu ta atxa alguns di kes lison li i otus kuza inportanti. Na kel otu studa nu ta ben odja alguns konsedju di kes karta i modi ki nu pode sigi-s gósi.