1-2. Pamodi ki studa stória di Sanson é bon pa nos?

 KUZÊ ki bu ta pensa na el óras ki bu ta obi nómi Sanson? Talvês bu ta pensa na un ómi ki tinha txeu forsa. I kel-li é verdadi. Má Sanson toma un disizon mariadu ki pô-l ta sufri txeu. Má simé, Jeová konsentra na tudu kel ki Sanson faze pa sirbi-l i Deus poi izénplu di fé di Sanson na Bíblia pa djuda-nu.

² Jeová uza Sanson pa faze kuzas ki ta dexa-nu dimiradu pa djuda israelitas, ki éra Se povu. Txeu ténpu dipôs ki Sanson móre, Jeová poi apóstlu Paulu pa skrebe nómi di Sanson na un lista di ómis ki tinha txeu fé. (Ebr. 11:32-34) Izénplu di Sanson pode da-nu koraji. El kunfia na Jeová sikrê na situasons difísil. Na kel studu li, nu ta ben odja kuzê ki nu pode prende ku Sanson i modi ki se izénplu pode da-nu koraji.

3. Ki diziginason Sanson resebe?

³ Kantu Sanson nase, filisteus staba ta governa Israel i ta fronta-s. (Juí. 13:1) Kes israelita sufri txeu pamodi kes filisteu éra mau. Jeová skodje Sanson pa ‘salva Israel di mô di kes filisteu.’ (Juí. 13:5) Má faze kel-li éra difísil. Pa faze kel diziginason difísil li, Sanson meste kunfiaba na Jeová.

4. Modi ki Jeová djuda Sanson liberta di kes filisteu? (Juízes 15:14-16)

 ⁴ Odja un izénplu di modi ki Sanson kunfia na Jeová i na ajuda ki Deus da-l. Un bês, kes trópa filisteu ba pega Sanson na Leí, ki talvês ta fikaba na Judá. Kes ómi di Judá staba ku medu, pur isu es disidi intrega Sanson pa kes filisteu. Povu di Sanson mara-l ku dôs kórda novu i es intrega-l pa kes filisteu. (Juí. 15:9-13) Má, ‘spritu di Jeová da-l puder’ i Sanson konsigi skapa di kes kórda. Dipôs el ‘atxa un kexada frésku di un buru,’ el panha-l i el uza-l pa mata mil filisteu! — Lé Juízes 15:14-16.

5. Modi ki Sanson mostra ma el ta kunfiaba na Jeová?

⁵ Pamodi ki Sanson uza kexada di un buru? Kel-li ka éra un arma ki algen ta kustuma uzaba. Di serteza Sanson sabia ma Jeová ta djudaba el mata kes filisteu ka ta inporta ki arma ki el uzaba. Kel ómi di fé li, uza kel ki el tinha pa faze vontadi di Jeová. Pamodi Sanson kunfia na Jeová el tevi bon rezultadu.

6. Kuzê ki nu pode prende ku Sanson óras ki nu ta faze nos diziginasons na organizason?

⁶ Jeová tanbê pode da-nu kel forsa ki nu meste pa faze nos diziginasons, sikrê kes ki ta parse difísil dimás. I Deus pode faze kel-li di un manera ki talvês ta dexa-nu dimiradu. Si bu kunfia na Jeová, ki da Sanson forsa, El ta djuda-u faze se vontadi. — Pro. 16:3.

7. Ki izénplu ta mostra ma é inportanti djobe orientason di Jeová?

⁷ Txeu irmon ku irmans ki ta djuda na prujétus di konstruson di organizason, mostra kunfiansa na Jeová. Na pasadu, normalmenti irmons ta fazeba prujétu i konstruson di maioria di Salons di Reinu i otus prédiu. Má pamodi txeu algen batiza, organizason meste fazeba un mudansa. Kes irmon ki staba ta toma kónta, pidi ajuda di Jeová  i es tenta otus manera, sima kunpra prédius i konpo-s. Robert, ki na kes últimu anu trabadja na txeu prujétu di konstruson na mundu interu, fla: “Na komésu, ka foi fásil pa alguns irmon faze kuzas di kel manera novu li. Éra un kuza diferenti di kel ki nu staba kustumadu duránti txeu anu. Má irmons tinha gana di sprimenta. I fika klaru ma Jeová abênsua kes mudansa li.” Kel-li é sô un izénplu di modi ki Jeová sta ta orienta se povu pa faze se vontadi. Di vês en kuandu nos tudu nu debe pensa na kel pergunta li: ‘N sta ta djobe orientason di Jeová i N tene gana di muda algun kuza pa-m sirbi-l di midjór manera ki N ta konsigi?’

8. Kuzê ki Sanson faze kantu el staba ku txeu sedi?

⁸ Talvês bu ta lenbra di otus kuza ki Sanson faze ki ta dexa algen dimiradu. El sô, el mata un lion i dipôs el mata 30 ómi na un sidadi di filisteus ki txomaba Askalon. (Juí. 14:5, 6, 19) Sanson sabia ma nunka el ka ta konsigi fazeba kes kuza la sen ajuda di Jeová. Kel-li fika klaru un bês kantu el staba ku txeu sedi dipôs di mata mil filisteu. Kuzê ki el faze? Envês di tenta atxa agu di el pa el, el pidi ajuda di Jeová. — Juí. 15:18.

9. Kuzê ki Jeová faze kantu Sanson pidi-l ajuda? (Juízes 15:19 i nóta di rodapé)

⁹ Jeová responde pididu di ajuda di Sanson i el faze un milagri pa da-l agu. Kantu Sanson bebe kel agu, ‘el ganha forsa otu bês i el fika dretu.’ (Lé Juízes 15:19 i nóta di rodapé.) Ta parse ma kel fonti di agu li, kontinua ta izisti txeu ténpu dipôs kantu proféta Samuel skrebe livru di Juízes ku ajuda di spritu santu. Kes israelita ki odja kel agu talvês lenbra ma si es kunfiaba na Jeová, el ta djudaba se sérvus fiel óras ki es mesteba.

10. Kuzê ki nu debe faze pa resebe ajuda di Jeová? (Odja dizenhu i fotus.)

¹⁰ Nos tanbê nu meste djobe ajuda di Jeová, ka ta inporta ki kapasidadis ki nu pode ten ô kuzê ki dja nu faze na se sirvisu. Nu debe ser umildi i seta ma sô nu ta konsigi faze kel ki Jeová ta pidi-nu si nu kunfia na el. Sima Sanson ganha forsa kantu el bebe kel agu ki Jeová da-l, nos amizadi ku Jeová ta bira más fórti óras ki nu ta pruveta tudu kes kuza ki Jeová ta da-nu pa nu kontinua fiel pa el. — Mat. 11:28.

11. Modi ki nu pode pruveta dretu kel ajuda ki Jeová ta da-nu? Da un izénplu.

¹¹ Odja izénplu di Aleksei, ki é un di kes irmon na Rúsia ki sta ta pasa pa txeu pirsigison. Kuzê ki djuda-l kontinua fórti na situasons difísil? El ku se mudjer, es ten un bon prugrama pa studa Bíblia i adora Jeová. El fla: “N ta tenta kontinua ta faze nha studu pesoal i ta lé Bíblia tudu dia. Tudu palmanhan, mi ku nha mudjer, nu ta pâpia sobri testu di dia i nu ta faze orason djuntu.” Kuzê ki kel-li ta inxina-nu? Envês di faze kuzas di nos manera, nu debe kunfia na Jeová. Nu ta kunfia na Jeová óras ki sénpri nu ta faze kuzas ki ta bira nos fé más fórti, sima studa Bíblia, faze orason, sisti runion i partisipa na pregason. Asi, Jeová ta da-nu  kel ajuda ki nu meste pa nu kontinua ta sirbi-l. Deus da Sanson forsa i di serteza El pode da-nu forsa tanbê.

12. Ki disizon mariadu Sanson toma i modi ki se situason ku Dalila éra diferenti?

¹² Sanson éra inperfeitu sima nos, pur isu alvês el toma disizons mariadu. Pur izénplu, tevi un disizon ki el toma ki traze maus rezultadu. Dipôs di algun ténpu ki Sanson éra juís, ‘el paxona pa un mudjer di Vali di Soreki, ki txomaba Dalila.’ (Juí. 16:4) Antis, Sanson staba noivu di un mudjer di téra di filisteus. Má kel-li ‘éra vontadi di Jeová, ki staba ta djobeba un xansi pa botaba kes filisteu mô.’ Dipôs, Sanson fika na kaza di un prostituta na sidadi di Gaza na téra di filisteus. I Deus da Sanson forsa pa rinka porton di kel sidadi, asi pa sidadi fikaba sen proteson. (Juí. 14:1-4; 16:1-3) Situason di Dalila pode parseba diferenti, pamodi talvês el éra israelita.

13. Kuzê ki Dalila faze pa poi Sanson ta toma un disizon mariadu?

¹³ Dalila seta txeu dinheru di filisteus pa trai Sanson. Sanson staba paxonadu di tal manera, ki el ka da kónta di kuzê ki Dalila krê fazeba? Dalila faze Sanson preson txeu bês pa fla-l kuzê ki ta daba el forsa i dipôs Sanson fla-l. Infilismenti, éru di Sanson pô-l ta perde se forsa i aprovason di Jeová pa un ténpu. — Juí. 16:16-20.

14. Kuzê ki kontise ku Sanson pamodi el kunfia na Dalila?

¹⁴ Sanson sufri txeu pamodi el kunfia na Dalila envês di kunfia na Jeová.  Kes filisteu prende Sanson i es sega-l. Es pô-l prézu na Gaza, na undi ki el rinkaba portons di sidadi. Es pô-l ta bira skravu i ta trabadja na un muinhu. Dipôs, kantu filisteus faze un fésta, es pô-l pasa vergónha. Es oferese un grandi sakrifisiu pa ses deus falsu Dagon, pamodi es ta kriditaba ma el djuda-s pega Sanson. Es traze Sanson di kadia pa kel fésta pa ‘divirti-s’ i pa es faze trósa di el. — Juí. 16:21-25.

15. Modi ki Sanson mostra ma el kunfia otu bês na Jeová? (Juízes 16:28-30) (Odja dizenhu na kapa.)

¹⁵ Sanson faze un éru gravi, má el ka dizisti di sirbi Jeová. El djobe un manera di faze kel diziginason ki Deus da-l di luta kóntra filisteus. (Lé Juízes 16:28-30.) Sanson pidi Jeová: ‘Dexa-m vinga di kes filisteu’. Deus verdaderu responde Sanson i el faze un milagri pa da-l forsa otu bês. Nton, na kel dia la, Sanson mata más filisteu di ki antis.

16. Kuzê ki nu pode prende ku éru di Sanson?

¹⁶ Enbóra Sanson sufri txeu pamodi se éru, el ka para di tenta faze vontadi di Jeová. Sikrê nu faze un kuza mariadu i nu meste un reprenson ô nu perde un priviléjiu, nu ka debe dizisti. Lenbra ma Jeová ka ta dizisti di nos. (Sal. 103:8-10) Sikrê ku nos érus, Jeová pode da-nu forsa pa faze se vontadi, sima el da Sanson.

17-18. Pamodi ki izénplu di Michael da-u koraji? (Odja fotus.)

¹⁷ Odja izénplu di un irmon jóven ki txoma Michael. El staba okupadu na sirvisu di Jeová. El éra ajudanti di kongregason i pioneru fíksu. Má infilismenti el faze un kuza mariadu i pur isu, el perde se priviléjius na kongregason. El fla: “Antis di kel-li kontise, N staba txeu okupadu na nha sirvisu pa Jeová. Má dirapenti, N xinti sima si N da ku kabésa na un paredi di pédra. Nunka N ka pensaba si Jeová ta bandonaba mi. Má N ta perguntaba si nha amizadi ku el algun bês ta biraba sima antis ô si algun dia N ta konsigi sirbiba el na kongregason sima N ta fazeba antis.”

¹⁸ Nu ta fika kontenti pamodi Michael ka dizisti. El fla: “N konsentra na abri nha korason sénpri pa Jeová na orason,  na studa i na midita pa N pode rekuperaba nha amizadi ku Jeová.” Ku ténpu, Michael rekupera se priviléjius na kongregason. Gósi, el é ansion i pioneru fíksu. El fla: “Apoiu i koraji ki N resebe prinsipalmenti di ansions, djuda-m da kónta ma Jeová inda ta ama-m. N ta konsigi sirbi na kongregason otu bês ku un konsénsia linpu. Kuzê ki kontise inxina-m ma Jeová ta púrdua kalker algen ki rapende di korason.” Sikrê nu faze un kuza mariadu, si nu kontinua ta faze tudu kel ki nu pode pa koriji nos manera di konporta i kontinua ta kunfia na Jeová, nu pode ten serteza ma el ta uza-nu i ma el ta abensua-nu. — Sal. 86:5; Pro. 28:13.

19. Modi ki izénplu di Sanson da-u forsa?

¹⁹ Na kel studu li, nu odja alguns kuza ki kontise na vida di Sanson. El ka éra perfeitu, má el ka dizisti di sirbi Jeová, sikrê dipôs di kel éru ku Dalila. I Jeová ka dizisti di el. Deus uza Sanson otu bês di un manera poderozu. Jeová kontinua ta atxa ma Sanson éra un ómi ki tinha un fé fórti i el poi se nómi na kel lista di kes sérvu fiel ki sta na Ebreus kapítlu 11. Nu ta fika kontenti di sabe ma nu ta sirbi un Pai na séu ki ta ama-nu i ki tene gana di da-nu forsa, prinsipalmenti óras ki nu sta fraku! Nton sima Sanson, nu debe pidi Jeová: ‘Favor, lenbra di mi i da-m forsa’. — Juí. 16:28.