1. Modi ki Jeová uza apóstlu Pedru poku ténpu antis di el móre?

 APÓSTLU Pedru sabia ma el staba kuazi ta móre. Dja el tinha txeu anu ta sirbi Jeová di manera fiel. El kunpanha Jizus, el kumesa trabadju di pregason pa kes algen ki ka éra judeu i dipôs el bira ta faze párti di grupu enkaregadu di óbra. Má, Jeová da-l más trabadju pa el faze. Pa vólta di anu 62 ti 64 D.J., Jeová uza-l pa skrebe dôs karta ki ta faze párti di Bíblia, ki é 1 i 2 Pedru. Pedru tinha speransa ma dipôs di se mórti kes karta li ta djudaba irmons. — 2 Ped. 1:12-15.

2. Pamodi ki Pedru skrebe kes karta déntu di óra?

² Pedru skrebe se dôs karta na un ténpu ki se irmons staba tristi “pamodi txeu provason”. (1 Ped. 1:6) Ómis mau staba ta tenta poi ensinus falsu i konportamentu mariadu déntu di kongregason. (2 Ped. 2:1, 2, 14) Irmons ki ta moraba na Jiruzalen staba kuazi ta pasa pa “fin di tudu kes kuza”, ki éra distruison di Jiruzalen i di se ténplu, ki romanus ta ben fazeba. (1 Ped. 4:7) Di serteza kes karta di Pedru djuda kes irmon odja kuzê ki es pode fazeba pa aguenta firmi na kes prubléma ki es staba ta pasa pa el i priparaba pa kes ki staba pa ben. b

3. Pamodi ki nu debe analiza kes karta di Pedru?

³ Enbóra Pedru skrebe pa kes irmon na ténpu di apóstlus,  Jeová poi kes karta li na se Palavra. Nton, es pode djuda-nu gósi. (Rom. 15:4) Nu sta vive na un mundu ki ten txeu konportamentu mariadu. Tanbê, nu ta pasa pa prublémas ki pode trapadja-nu na sirbi Jeová. Alén di kel-li, ka ta dura nu ta ben pasa pa un tribulason más grandi ki kel ki judeus pasa pa el duránti distruison di Jiruzalen i se ténplu. Nu ta atxa alguns konsedju inportanti na kes dôs karta di Pedru. Es ta djuda-nu kontinua ta spera dia di Jeová, ka dexa medu di ómi toma kónta di nos i ten amor fórti pa kunpanheru. Kes konsedju li tanbê ta djuda ansions odja modi ki es pode kuida dretu di irmons.

4. Sima sta na 2 Pedru 3:3, 4, kuzê ki pode frakise nos fé?

⁴ Nu sta na meiu di algen ki ka ten fé na profesias di Bíblia. Kes algen ki é kóntra nos pode faze-nu trósa pamodi dja ten txeu anu ki nu ta fla ma fin sta ta ben. Alguns algen ta fla ma fin nunka ka ta ben. (Lé 2 Pedru 3:3, 4.) Si nu obi un algen ki nu ta da tistimunhu, un koléga di trabadju ô un algen di nos família ta fla kes kuza li, nos fé pode bira fraku. Pedru pâpia sobri kuzê ki pode djuda-nu.

5. Kuzê ki ta djuda-nu kontinua ta spera ku paxénxa pa fin di kel mundu li? (2 Pedru 3:8, 9)

⁵ Pa alguns algen ta parse ma Jeová sta ta dura pa kaba ku kel mundu mau li. Kuzê ki Pedru fla, pode djuda-nu kontinua ta spera ku paxénxa i lenbra ma manera ki Jeová ta odja ténpu é diferenti di manera ki nu ta odja-l. (Lé 2 Pedru 3:8, 9.) Pa Jeová, mil anu é sima un dia. Jeová ten paxénxa, el ka krê pa ningen distruídu. Má, óras ki txiga kel dia markadu, el ta kaba ku kel mundu li. Nu ten priviléjiu di uza kel ténpu ki sta falta pa prega pa algen di mundu interu.

6. Modi ki nu pode kontinua ta “spera ku xintidu na dia di Jeová”? (2 Pedru 3:11, 12)

⁶ Pedru insentiva-nu pa nu “spera ku xintidu na dia di Jeová”. (Lé 2 Pedru 3:11, 12.) Modi ki nu pode faze kel-li? Nu debe midita tudu dia na kes benson ki nu ta ben ten na mundu novu. Imajina abo ta respira ar puru, ta kume kumida ki é bon pa saúdi, ta resebe kes algen ki móre óras ki es ben resusitadu i ta inxina kes algen ki vive na ténpu antigu sobri kes profesia di Bíblia ki kunpri. Midita na kes kuza li, ta djuda-u kontinua ta spera i kunfia ma fin di kel mundu li sta kuazi ta ben. Sabe di kes kuza li ta djuda-nu ka dexa kes instrutor falsu disvia-nu. — 2 Ped. 3:17.

7. Modi ki xinti medu di ómi pode afeta-nu?

⁷ Óras ki nu ta lenbra di dia di Jeová, nu ta xinti motivadu pa prega notísia sábi pa otus algen. Má, na algun situason nu pode ka xinti koraji di pâpia. Pamodi? Pamodi nu ten medu di kuzê ki algen pode pensa di nos ô faze ku nos. É kel-li ki kontise ku Pedru. Na kel noti ki Jizus julgadu, Pedru xinti medu di fla ma el éra un di se disiplus i ti el nega más di un bês ma el konxeba Jizus. (Mat. 26:69-75) Má dipôs, kel apóstlu li fla ku serteza: “Ka nhos ten medu di  kuzê ki es ten medu, i nen ka nhos fika trapadjadu.” (1 Ped. 3:14) Kuzê ki Pedru fla ta da-nu serteza ma nu ta konsigi ka dexa medu di ómi toma kónta di nos.

8. Kuzê ki pode djuda-nu ka dexa medu di ómi toma kónta di nos? (1 Pedru 3:15)

⁸ Kuzê ki pode djuda-nu ka dexa medu di ómi toma kónta di nos? Pedru fla: “Nhos santifika Kristu sima Sinhor na nhos korason”. (Lé 1 Pedru 3:15.) Nu pode lenbra ma Jizus Kristu é nos Rei i ma el ten txeu puder. Si bu ta fika nervozu ô ku medu óras ki parse oportunidadi di pâpia di kes notísia sábi ku otus algen, lenbra di nos Rei. Imajina Jizus ta governa na séu djuntu ku milhons di anju. Lenbra ma el “dadu tudu autoridadi... na séu i na téra” i ma el ta ben sta ku nos “tudu dia, ti fin di es mundu.” (Mat. 28:18-20) Pedru fla-nu pa nu sta “sénpri prontu” pa difende nos fé. Bu ta gostaba di da tistimunhu pa algun algen na trabadju, na skóla ô na algun otu lugar? Pensa antis na ki óra ki bu pode faze-l i dipôs pripara kuzê ki bu ta fla. Faze orason ta pidi koraji ku kunfiansa ma Jeová ta djuda-u ka dexa medu di ómi toma kónta di bo. — Atus 4:29.

9. Un bês, modi ki Pedru fadja na mostra amor? (Odja dizenhu.)

⁹ Pedru prende mostra amor. El obi Jizus ta fla: “N ta da nhos un mandamentu novu, pa nhos ama kunpanheru. Sima N ama nhos, nhos ama kunpanheru tanbê.” (Juan 13:34) Má simé, dipôs Pedru ka kume ku se irmons ki ka éra judeu pamodi el tinha medu di kes irmon judeu. Apóstlu Paulu fla ma kel ki Pedru faze éra un “finjimentu”. (Gál. 2:11-14) Pedru seta kel koreson i el prende ku el. Na kes dôs karta ki el skrebe, el fla ma nu ka debe sô xinti amor pa nos irmons ku irmans má tanbê mostra amor.

10. Kuzê ki ta djuda-nu “ama kunpanheru sima irmon i sen finjimentu”? (1 Pedru 1:22)

¹⁰ Pedru fla ma nu debe “ama kunpanheru sima irmon i sen finjimentu”. (Lé 1 Pedru 1:22.) Nu ta ten kel amor li si nu “obi ku verdadi”. Kel verdadi li ta inklui kel ensinu ma “Deus ta trata tudu algen igual”. (Atus 10:34, 35) Nu ka pode obi ku órdi di Jizus sobri amor si nu ta mostra amor sô pa alguns na kongregason i pa otus nau. É klaru ki sima Jizus, nu pode ser más amigu di alguns. (Juan 13:23; 20:2) Má Pedru ta lenbra-nu ma nu debe sforsa pa ama tudu irmon ku irmans pamodi es ta faze párti di nos família. — 1 Ped. 2:17.

11. Kuzê ki “ama kunpanheru txeu i di korason” krê fla?

¹¹ Pedru fla pa nu “ama kunpanheru txeu i di korason.” Na kel versíklu li, ama “txeu” krê fla ama un algen sikrê é difísil mostra amor pa el. Pur izénplu, i si un irmon ofende-nu ô magua-nu? Na komésu, talvês nu ta krê vinga envês di mostra amor. Má, Pedru prende ku Jizus ma Deus ka ta fika kontenti si nu vinga. (Juan 18:10, 11) Pedru fla: “Ka nhos paga mal ku mal, nen insultu ku insultu. Envês di kel-li, nhos paga ku un benson”. (1 Ped. 3:9) Óras ki bu ten amor fórti, bu ta mostra bondadi ti pa kes ki talvês magua-u.

12. (a) Kuzê más ki kel amor fórti ta djuda-nu faze? (b) Sima sta na vídiu Nos union ten txeu valor, kuzê ki bu pode sforsa pa faze?

¹² Na primeru karta ki Pedru skrebe, el uza palavras “amor fórti”. Kel tipu di amor li ta kubri ka sô alguns pekadu má “un monti pekadu.” (1 Ped. 4:8) Talvês Pedru lenbra di kel lison ki Jizus inxinaba el sobri púrdua txeu anu antis. Na kel ténpu, talvês Pedru ta atxaba ma el éra bon algen kantu el fla ma el ta purduaba se irmon “ti seti bês”. Má Jizus inxina-l, i anos tanbê, pa púrdua “ti 77 bês.” Kel-li krê fla ma nu ka debe konta kantu bês ki nu ta púrdua. (Mat. 18:21, 22) Si é difísil pa bo sigi kel konsedju li, ka bu dizanima. Tudu sérvu di Jeová inperfeitu, alvês ta atxa ma é difísil púrdua. Un kuza inportanti gósi é faze kel ki bu ta konsigi pa púrdua bu irmon i faze pas ku el. c

13. Pamodi ki é difísil pa ansions atxa ténpu pa da ses irmons ku irmans koraji?

¹³ Di serteza Pedru nunka ka skese kuzê ki Jizus fla-l dipôs ki el resusitadu: “Pastora nhas ovelhinha.” (Juan 21:16)  Si bo é ansion, bu sabe ma kel orientason li é pa bo tanbê. Má, pode ser difísil pa un ansion atxa ténpu pa faze kel diziginason inportanti li. Primeru ansions debe da ses família kes kuza ki es meste, mostra-s amor i djuda-s bira ses amizadi ku Jeová más fórti. Tanbê, es debe mostra zelu na trabadju di pregason, na pripara i faze pártis na runion, asenbleia i kongrésu. Alguns ta faze párti di Kumison di Ligason ku Ospital ô es ta trabadja ku Dipartamentu di Dizenhu i Konstruson. Ansions ten txeu responsabilidadi.

14. Kuzê ki pode motiva ansions pa kuida di irmons? (1 Pedru 5:1-4)

¹⁴ Pedru fla kes irmon ki éra ansion sima el: “Nhos pastora ribanhu di Deus”. (Lé 1 Pedru 5:1-4.) Si bo é ansion, nu sabe ma bu ta ama bus irmon ku irmans i ma bu krê kuida di es. Má pode ser ki alvês, bu pode atxa ma bu sta okupadu ô kansadu dimás ki bu ka ta konsigi faze kel-li. Kuzê ki bu pode faze? Abri bu korason pa Jeová. Pedru fla: “Si un algen ta sirbi, pa el faze-l sima ken ki ta dipende di kel forsa ki Deus ta da”. (1 Ped. 4:11) Bus irmon ku irmans pode sta ta pasa pa prublémas ki ka ten soluson na kel mundu li. Má lenbra ma Jizus Kristu, ki é “kel pastor prinsipal”, pode djuda-s más di ki bo. El pode faze kel-li gósi i na mundu novu. Kuzê ki Jeová krê pa ansions faze é ama ses irmons, kuida di es i bira “izénplu pa ribanhu.”

15. Modi ki un ansion ta faze vizita di pastoreiu? (Odja fotu.)

¹⁵ William, ki dja ten txeu anu ki é ansion, ta intende ma é inportanti faze vizita di pastoreiu. Kantu COVID-19 kumesa, el i kes otu ansion di se kongregason poi méta di pâpia ku kada algen na ses grupu pa pregason tudu simana. El fla: “Nu faze kel-li pamodi txeu irmon staba na kaza es sô i éra fásil es kumesa ta ten pensamentus negativu.” Óras ki un irmon tene un prubléma, William ta obi-l ku atenson pa sabe kuzê ki tene-l preokupadu i kuzê ki el meste. Dipôs el ta atxa matéria, i txeu bês vídius na jw.org, pa djuda kel irmon.  El fla: “Gósi nu meste faze vizita di pastoreiu mutu más ki antis. Nu ta sforsa txeu pa djuda algen konxe Jeová. Nton, nu meste sforsa di mésmu manera pa faze vizita di pastoreiu i djuda nos irmons kontinua na verdadi.”

16. Di ki maneras nu pode aplika kes lison ki nu prende na kes karta di Pedru?

¹⁶ Nu pâpia sô di alguns lison di kes dôs karta ki Pedru skrebe. Talvês bu odja algun kuza ki bu krê midjora. Pur izénplu, bu ta gostaba di midita más txeu na kes benson di mundu novu ki sta pa ben? Bu poi méta di da tistimunhu na trabadju, na skóla ô na algun otu lugar? Bu ta konsigi odja alguns manera ki bu pode mostra amor fórti pa bus irmon ku irmans más txeu? Ansions, nhos sta disididu na kuida di ovelhas di Jeová di livri vontadi i ku inpenhu? Si bu ser onéstu ku bo mê, bu pode da kónta ma ten kuzas ki bu meste midjora. Má ka bu dizanima. “Sinhor é bon” i el ta djuda-u midjora. (1 Ped. 2:3) Pedru ta garanti-nu: “Deus... ta ben konpleta nhos trenu. El ta ben poi nhos ta fika firmi, el ta ben poi nhos ta fika fórti, el ta ben poi nhos riba di alisérsi firmi.” — 1 Ped. 5:10.

17. Kal ki ta ser rezultadu si nu ka dizisti i nu dexa Jeová trena-nu?

¹⁷ Un bês, Pedru xinti ma el ka merese staba djuntu ku Fidju di Deus. (Luk. 5:8) Má Jeová ku Jizus djuda Pedru ku amor i el kontinua ta sigi Jizus di manera lial. Pur isu, Jeová dexa Pedru entra “na kel Reinu pa tudu ténpu di nos Sinhor i Salvador Jizus Kristu.” (2 Ped. 1:11) Fórti rekonpénsa sábi! Si sima Pedru, bu ka dizisti i bu dexa Jeová trena-u, abo tanbê bu ta ben resebe rekonpénsa di vida pa tudu ténpu. Bu ta ‘alkansa obijetivu di bu fé, ki é bu salvason.’ — 1 Ped. 1:9.