N nase na anu 1934. Nha pai ku nha mai éra di Suísa i es bai mora na Timmins, ki é un sidadi na Ontáriu, na Kanadá. La txeu algen ta trabadja na tra minériu. Pa vólta di anu 1939, nha mai kumesa ta lé revista Sentinéla i ta sisti runion di Tistimunhas di Jeová. El ta lebaba mi i nhas 6 irmon ku el. Poku ténpu dipôs, el bira un Tistimunha di Jeová.

Nha pai ka fika kontenti pamodi nha mai bira un Tistimunha di Jeová. Má nha mai ta amaba verdadi i el staba disididu na kontinua lial pa Jeová. El faze kel-li, sikrê na komésu di anus 1940 trabadju di Tistimunhas di Jeová staba proibidu na Kanadá. I mésmu ki nha pai ta maltrataba el ku palavras, sénpri el ta trataba nha pai ku bondadi i ruspetu. Pamodi se bon izénplu, mi ku nhas irmon nu seta verdadi tanbê. Nu fika txeu kontenti pamodi ku ténpu nha pai muda di atitudi i el kumesa ta trata nos família ku más bondadi.

Duránti veron di anu 1950, N sisti kel asenbleia Aumento da Teocracia, na sidadi di Nova York. N staba txeu motivadu na faze más na sirvisu di Jeová dipôs di konxe irmons ku irmans di mundu interu i di obi entrivistas sábi di irmons ki forma na Skóla di Jiliádi! N fika más disididu inda na entra na sirvisu pa ténpu interu. Lógu dipôs ki N volta pa kaza, N prenxe pitison pa bira pioneru fíksu. Betel di Kanadá skrebe un karta ta fla-m ma N meste batizaba primeru. N batiza na dia 1 di otubru di 1950. Un mês dipôs, N bira pioneru fíksu i N resebe nha diziginason na Kapuskasing. Kel sidadi li ta fikaba txeu lonji di undi ki N ta moraba na kel ténpu.

Na primavéra di anu 1951, Betel konvida kes irmon ki sabia pâpia fransês si es krê ba  apoiaba na pruvínsia di Kebéki, undi pesoas ta papiaba fransês. La tinha txeu nisisidadi di publikadoris. Désdi pikinoti, N sabe papiaba fransês i inglês, pur isu N seta kel konviti i N diziginadu pa sidadi di Rouyn. N ka konxeba ningen la. Sima dja N flaba na komésu, úniku kuza ki N tinha éra un inderésu. Má tudu kóre dretu. Mi ku Marcel, nu bira txeu amigu, i N gostaba txeu di sirbi na Kebéki. Duránti kes kuatu anu ki N sirbi la, N foi pioneru spesial pa un ténpu.

Timenti N staba na Kebéki, N fika txeu kontenti di resebe un konviti pa bai kursa turma nunbru 26 di Skóla di Jiliádi, na South Lansing, na Nova York. Nha formatura foi na dia 12 di febreru di 1956 i dipôs N diziginadu pa kel país ki gósi é konxedu pa Gana, b na Áfrika. Má antis di N bai, N tevi ki volta pa Kanadá ti ki nhas dukumentu di viajen fikaba prontu. N pensa ma N ta fikaba na Kanadá sô pa dôs ô três simana.

N spera 7 mês na Torontu pa kes dukumentu. Duránti kel ténpu, N fika na kaza di família di irmon Cripps, i es mostra-m txeu bondadi. N konxe ses fidju-fémia ki txoma Sheila. Nu paxona pa kunpanheru. Kantu N staba kuazi ta pidi-l pa kazamentu, N resebe nha vistu. Mi ku Sheila nu ora sobri kel asuntu li i nu disidi ma N ta baba pa nha diziginason. Má tanbê, nu disidi ma nu ta kontinua ta skrebeba kunpanheru karta i nu ta speraba pa odja si dipôs nu ta kazaba. Kel-li ka foi un disizon fásil, má ku ténpu nu odja klaru ma kel-li foi un bon disizon.

Dipôs di un mês ta viaja na konboiu, na barku di karga i na avion, N txiga na Accra, na Gana. N diziginadu pa ser enkaregadu di distritu. N ta viajaba pa tudu párti di Gana i tanbê pa Kósta di Marfin (ki gósi ta txomadu di Côte d’Ivoire) i Togoland (ki gósi ta txomadu di Togu). Maior párti di kel ténpu, N viaja mi sô na un karu ki Betel daba mi. N gostaba txeu di viaja pa vizita irmons!

 Na fin di simana, N ta tinha diziginasons na asenbleia. Nu ka tinha ninhun Salon di Asenbleia, pur isu irmons ta kubriba un lugar ku banbu i fódjas di palmera pa faze sónbra i proteje irmons di sól kenti. Dja ki na kel lugar di faze kumida ka tinha jilera, kes irmon ta tinha animal bibu la pértu i es ta mataba es pa faze kumida pa kes algen ki ta sistiba asenbleia.

Nu tevi alguns spiriénsia divirtidu duránti kes asenbleia. Un dia, timenti irmon Herb Jennings, c ki éra un misionáriu, staba ta faze un diskursu, un vaka fuji di kel lugar di faze kumida. El kóre entri palku i kes algen ki staba ta sisti. Irmon Herb para di pâpia i kel vaka fika dizorientadu. Má kuatu irmon fórti konsigi pega-l i leba-l pa kel lugar di faze kumida i tudu algen fika ta da palmu.

Duránti kes simana di kes asenbleia, N mostra nos filmi A Sociedade do Novo Mundo em Ação pa kes vila ki ta fikaba pértu di undi ki nu ta fazeba asenbleia. Pa faze kel-li, N ta maraba un panu branku na dôs pósti ô na dôs arvi i N ta mostraba kel filmi na el. Kes algen di kes vila ta gostaba txeu. Pa txeu di kes algen, kel-la éra primeru filmi ki es staba ta odja. Es ta daba palmu ku txeu forsa óras ki es ta odjaba sénas di pesoas ta batiza. Kel filmi djuda kes algen ki staba ta odja da kónta ma Tistimunhas di Jeová é unidu i ma es sta na mundu interu.

Dipôs di dôs anu na Áfrika, N fika txeu kontenti di ba sisti kongrésu internasional na Nova York, na anu 1958 i di odja Sheila ki éra pioneru spesial na Kebéki i ki ba sisti kongrésu tanbê. Nu ta skrebeba karta pa kunpanheru, má gósi nu staba djuntu otu bês. N pergunta-l si el krê kazaba ku mi i el seta. N skrebe pa irmon Nathan Knorr d i N pergunta-l si Sheila podia baba pa skóla di Jiliádi i dipôs pa el bai atxaba mi na Áfrika, i el konkorda. Dipôs, Sheila bai atxa-m na Gana. Nu kaza na Accra na dia 3 di otubru di anu 1959. Nu xinti ma Jeová abensua-nu txeu pamodi nu pô-l na primeru lugar na nos vida.

Na anu 1961, nu diziginadu pa Kamarons. N staba txeu okupadu pamodi es pidi-m pa N djuda forma un novu Betel la. Dja ki N diziginadu pa ser enkaregadu di kel Betel di la, N tinha txeu kuza pa prende. Dipôs, na anu 1965 nu fika ta sabe ma Sheila staba grávida. Foi difísil imajina nos kabésa ta ser pai ku mai. Má kantu nu kumesa ta fika kontenti ku nos novu responsabilidadi i ta faze planu pa volta pa Kanadá, kontise un kuza orível.

Nos bebé móre antis di nase. Kel dotor fla-nu ma nos fidju éra un rapás. Dja ten más di 50 anu ki kel-li kontise, má nunka nu ka skese di kel-li. Enbóra nu staba tristi dimás ku kuzê ki kontise, nu kontinua na nos diziginason ki nu gostaba txeu.

Txeu bês, irmons na Kamarons pirsigidu pamodi es ka mete na asuntus di pulítika. Situason fika más difísil duránti kel ténpu ki es staba ta faze ileison pa skodje un prizidenti. Kuzê ki más nu tinha medu di el, kontise na dia 13 di maiu di 1970. Trabadju di Tistimunhas di Jeová proibidu. Govérnu toma kel Betel novu i bunitu ki dja tinha sô 5 mês ki nu mudaba pa el. Déntu di un simana tudu kes misionáriu, ki ta inkluiba mi ku Sheila, podu pa fóra di kel país. Foi txeu difísil pa nos dexa nos irmons ku irmans, pamodi nu gostaba txeu di es i nu staba preokupadu ku kuzê ki es ta ba pasaba pa el di la pa frenti.

Nu pasa 6 mês na Betel di Fransa. La N kontinua ta faze tudu kel ki N ta podeba pa djuda kes irmon na Kamaron tinha kes kuza ki es mesteba. Na dizenbru di kel anu, nu diziginadu pa Betel di Nijéria ki kumesa ta kuida di trabadju na Kamarons. Nos irmons ku irmans na Nijéria resebe-nu dretu i nu fika txeu kontenti di trabadja la duránti txeu anu.

Na anu 1973 nu tevi ki toma un disizon txeu difísil. Sheila staba ta sufri di un duénsa gravi. Timenti nu staba na un kongrésu na Nova York, Sheila fika kansadu dimás i el fla-m: “N ka ta pode más! N sta kansadu dimás i tudu óra N ta sta duenti.” El tevi más di 14 anu ta sirbi djuntu ku mi na Áfrika. N staba txeu orgulhozu di el pamodi se sirvisu fiel, má nu tevi ki faze alguns mudansa. Dipôs di pâpia di nos situason i di ora txeu, nu disidi ma nu debe voltaba pa Kanadá, undi nu ta konsigi kuidaba di se saúdi midjór. Dexa nos diziginason di misionáriu i sirvisu pa ténpu interu foi un di kes disizon más difísil ki dja nu toma na vida.

Kantu nu txiga na Kanadá un amigu ki N konxeba dja tinha txeu ténpu ranja-m un trabadju. El tinha un inpréza ki ta bendeba karu i kuzas di karu na un sidadi ki ta fikaba na nórti di Torontu. Nu renda un apartamentu pa nos i nu kunpra mobílias uzadu, asi nu konsigi muda sen faze dívidas. Nu kontinua ta leba un vida sinplis pamodi nu tinha speransa ma un dia nu ta voltaba pa  sirvisu pa ténpu interu. Nu fika dimiradu pamodi kel-li kontise más sédu di kel ki nu staba ta spera.

N kumesa ta sirbi di voluntáriu tudu sábadu na konstruson di un Salon di Asenbleia na Norval, na Ontariu. Ku ténpu N diziginadu pa ser enkaregadu di Salon di Asenbleias. Saúdi di Sheila staba ta midjora i nu disidi ma nu ta pode setaba kel novu diziginason. Nton na junhu di anu 1974 nu muda pa un apartamentu di Salon di Asenbleia. Nu fika txeu kontenti di volta pa sirvisu pa ténpu interu!

Filismenti saúdi di Sheila kontinua ta midjora. Dôs anu dipôs, nu seta diziginason di vizita kongregasons. Kel grupu di kongregasons ta fikaba na Manitoba, na un pruvínsia di Kanadá ki é konxedu pa un lugar ki é friu dimás. Nu staba txeu kontenti di sta djuntu ku kes irmon ku irmans di la ki ta mostraba txeu amor. Nu prende ma ka ta inporta na undi ki nu sta sirbi, kuza más inportanti é kontinua ta sirbi Jeová undi ki nu sta.

Dipôs di alguns anu na trabadju di vizita kongregason, nu konvidadu pa ba sirbi na Betel di Kanadá na anu 1978. Poku ténpu dipôs, N prende un lison difísil, má inportanti. N diziginadu pa faze un diskursu di un óra i meia na fransês na un runion spesial, na Montreal. Infilismenti, kes algen ki staba ta sisti ka konsigi kunpanha nha diskursu i dipôs un irmon di Dipartamentu di Sirvisu ben da-m konsedju. Pa ser sinseru, dipôs N da kónta ma mi é ka bon na faze diskursu. Má N ka seta kel konsedju dretu. Nos konbérsu ka bai dretu i N fika xatiadu pamodi N atxa ma el staba ta kritika-m dimás i el ka fla-m kuzê ki N faze dretu. N fadja pamodi N konsentra na kel irmon ki daba mi kel konsedju i na manera ki el da-m kel konsedju.

Alguns dia dipôs, un irmon di Kumison di Filial pâpia ku mi sobri kuzê ki kontise. N rekonhese ma N ka reaji dretu kantu kel irmon da-m kel konsedju i N pidi diskulpa. Dipôs N pâpia ku kel irmon ki daba mi kel konsedju. El seta nhas diskulpa. Kel kuza li ki kontise inxina-m un grandi lison di umildadi ki nunka N ka ta skese. (Pro. 16:18) N ora txeu pa Jeová sobri kel asuntu li i N sta disididu na nunka más odja un konsedju di manera negativu.

Dja N ten más di 40 anu na Betel di Kanadá, i désdi anu 1985 N ten priviléjiu di sirbi na Kumison di Filial. Na febreru di 2021, Sheila nha mudjer ki N krê txeu móre. Alén di xinti txeu sodadi di el, tanbê N sta ta pasa pa txeu prublémas di saúdi. Má Jeová tene-m txeu okupadu i kontenti ki nen N ‘ka ta pensa txeu na kes dia ki ta pasa faxi’. (Ecl. 5:20) Enbóra N tinha txeu prublémas na vida, kes spiriénsia sábi ki N pasa pa el ta pô-m mutu más filís. Poi Jeová na primeru lugar na nha vida i pasa 70 anu sábi na sirvisu pa ténpu interu é un benson grandi na nha vida. N ta ora pa nos irmons ku irmans ki sta jóven kontinua ta poi Jeová na primeru lugar na ses vida, pamodi N ten serteza ma es ta ten un vida txeu filís ki sô kes algen ki ta sirbi Jeová pode ten.