Nu ka debe pensa ma sô pamodi kes 70 disiplu ka staba la kantu Jizus faze Seia di Sinhor ma kel-li krê fla ma es ka tinha se aprovason ô ma es bandonaba el. Jizus krê staba djuntu ku se apóstlus na kel momentu.

Kes 12 i kes 70 tudu éra disiplu di Jizus. Entri kes txeu disiplu, primeru Jizus skodje 12 ki el txoma di apóstlus. (Luk. 6:12-16) Jizus staba na Galilea kantu ki el “djunta kes Dozi” apóstlu i “el manda-s pa es prega Reinu di Deus i pa es kura kes ki staba duenti”. (Luk. 9:1-6) Dipôs na Judea, Jizus “skodje más 70 i el manda-s dôs-dôs”. (Luk. 9:51; 10:1) Pamodi kel-li Jizus tinha disiplus na txeu lugar ta pregaba sobri el.

Kes judeu ki bira disiplu di Jizus ta fazeba Páskua tudu anu, talvês djuntu ku ses família. (Êxo. 12:6-11, 17-20) Poku ténpu antis di Jizus móre, el ku se apóstlus bai pa Jiruzalen. Má el ka pidi tudu se disiplus di Judea, Galilea i Perea pa ba komemoraba Páskua tudu djuntu. Ta parse ma Jizus krê staba sô ku se apóstlus na kel momentu. El fla-s: “N staba ku gana di kume kel kumida di Páskua li ku nhos antis di N sufri”. — Luk. 22:15.

Jizus tinha un bon razon pa fazeba kel-li. Jizus staba ta ba móre sima “Korderu di Deus ki ta tra pekadu di mundu”. (Juan 1:29) El ta ba moreba na Jiruzalen, na undi ki dja es tinha txeu anu ta fazeba sakrifisiu pa Deus. Páskua ta lenbraba kes israelita kuzê ki Jeová fazeba pa libertaba es di Ijitu, má sakrifisiu di Jizus é mutu más di ki kel-la. El ta liberta tudu algen na téra di pekadu i di mórti. (1 Kor. 5:7, 8) Pamodi sakrifisiu di Jizus, kes 12 apóstlu bira kes primeru ki forma kongregason kriston. (Efé. 2:20-22) É interesanti ki Jiruzalen, kel sidadi santu, tinha “12 pédra di alisérsi” ki staba skrebedu na es “nómi di kes 12 apóstlu di Korderu.” (Apo. 21:10-14) Nton, kes apóstlu fiel tinha un párti inportanti na kunprimentu di vontadi di Deus. Pur isu, nu ta intende pamodi ki Jizus krê pa es staba djuntu ku el na kel últimu Páskua i lógu dipôs el faze komemorason di se mórti.

Kes 70 i kes otu disiplu ka staba ku Jizus na kel komemorason. Má simé, tudu kes disiplu fiel ta pode traba pruvetu di kel komemorason ô Seia di Sinhor ki Jizus faze. Tudu kes disiplu ku ténpu ben bira kristons skodjedu ki ta ben faze párti di kel kontratu di un reinu ki Jizus papiaba di el ku se apóstlus na kel noti. — Luk. 22:29, 30.