Spiriénsas di pregadoris di Reinu

El atxa un obijetivu na vida

JIZUS fla ma el konxe se ovelhas. (João 10:14) Kenha ki ten un bon korason i ki ta ama pas i justisa ta krê sigi Jizus. Kes algen ki ta faze si ta atxa un obijetivu na vida sima un sinhora di Béljika. Kel-li é se stória:

“Kantu Tistimunhas di Jeová konku na nha pórta, N staba txeu diprimidu i ta pensa na mata kabésa. N gosta di kuzê ki Tistimunhas di Jeová fla sobri soluson pa kes prubléma di kel mundu mau li, má N ka gosta di kel ideia ma é Deus ki ta ben rezolve kes prubléma. Dja tinha 8 anu ki N para di bai igreja pamodi kel finjimentu ki N ta odjaba la. Má N ntende ma Tistimunhas di Jeová ta inxinaba verdadi i N ntende tanbê ma é difísil vive sen Deus.

“Má infilismenti dipôs di alguns vizita ki Tistimunhas di Jeová faze-m, nu fika ka ta nkontra ku kunpanheru más. N ta xintiba sen valor. N ta fumaba dôs masu di sigaru tudu dia i ti N kumesa ta uza dróga. N mete na fitisaria ô bruxaria pa N tenta pâpia ku nha avó ki dja moreba. Pamodi kel-li dimónis ta atakaba mi di noti i kel-li ta dexaba mi ku txeu medu! Kel-li dura txeu mês. Tudu dia di noti, N ta fikaba xeiu di medu sô di pensa ma N ta staba mi sô.

“Un dia N bai pâsia i N bai pa un kaminhu diferenti di kel ki N staba kustumadu. N txiga na un konstruson grandi ki staba ta fazedu. N fika dimiradu kantu N odja un monti di algen. N txiga más pértu i N odja ma éra Tistimunhas di Jeová ki staba ta faze un Salon di Reinu. N lenbra di kes vizita ki es ta fazeba mi na kaza i N pensa ma ta sérba rei di sábi si tudu algen ta viveba sima es.

“N xinti gana pa Tistimunhas di Jeová torna volta pa nha kaza, nton N pâpia ku alguns di kes ki staba ta trabadja na konstruson di kel Salon. N ora pa Deus i 10 dia dipôs kel ómi ki papiaba ku mi pa primeru bês bai ti nha kaza. El fla-m pa nu kontinua ta studa Bíblia i N konkorda kel óra. Lógu dipôs el konvida-m pa N bai pa runion na Salon di Reinu i N bai. Nunka na nha vida N ka odjaba un kuza sima kel-la! Duránti txeu ténpu, N djobe algen ki ta amaba kunpanheru i ki éra filís. I ti ki enfin N atxa-s!

“Dipôs di kel-li, N fika ta sisti tudu runion. I dipôs di uns três simana, N para ku kel vísiu ki N tinha di fuma. N bota fóra tudu kes livru ki N tinha di fitisaria ô bruxaria i kes múzika ki staba ligadu ku kuzas di Satanás i N xinti ma dimónis fika ta kontrola-m kada bês más poku. N kumesa ta sforsa pa obi ku Jeová i vive sima Bíblia ta fla, i dipôs di três mês N kumesa ta prega notísias sábi. Dipôs di 6 mês, N batiza i dôs dia dipôs di nha batismu, N bira pionera ajudanti.

“N ta agradese Jeová pa tudu kuza bon ki el faze pa mi. Gósi nha vida ten un obijetivu. Nómi di Jeová é un tori fórti mê. N atxa proteson na el. (Provérbios 18:10) N ta xinti sima salmista fla kantu ki el skrebe na Salmo 84:10: ‘Un dia na bus pátiu é midjór di ki mil dia na kalker otu lugar! N skodje fika sakédu na pórta di kaza di nha Deus, envês di mora na kes ténda di maldadi.’”

Kel sinhora umildi li atxa un obijetivu na vida. Mésmu kuza pode kontise ku tudu kes ki ta buska Jeová i ki ten un bon korason.