• ANU KI EL NASE: 1941

• PAÍS KI EL NASE: BENIN

• SE VIDA NA PASADU: KAZADU KU TXEU MUDJER, KÓNTRA TISTIMUNHAS DI JEOVÁ

MODI KI ÉRA NHA VIDA ANTIS:

Mi é di un sidadi grandi na Benin, ki txoma Cotonou. N kriadu na Igreja Katólika, má N ka ta baba mutu igreja. Na undi ki N ta moraba txeu katóliku éra kazadu ku más di ki un mudjer, pamodi na kel ténpu kel-la éra un kuza legal. Ku ténpu, N kaza ku kuatu mudjer.

Kantu kontise un revólta na anus 70, N atxa ma kel mudansa ta sérba bon pa nha país. N apoia kel revólta i N mete na pulítika. Kes algen ki staba ta faze kel revólta ka gostaba di Tistimunhas di Jeová pamodi es ka ta meteba na pulítika. I mi éra un di kes ki ta pirsigiba es. Kantu kes misionáriu di Tistimunhas di Jeová botadu fóra di Benin na anu 1976, N tinha sertéza ma nunka más es ka ta voltaba.

MODI KI BÍBLIA MUDA NHA VIDA:

Kel revólta tirmina na anu 1990. N fika dimiradu kantu misionárius di Tistimunhas di Jeová torna volta pa Benin. N kumesa ta pensa ma talvês Deus staba ku kel povu li. Na kel ténpu, N muda di trabadju. Un di nhas koléga di trabadju éra Tistimunha di Jeová, i el kumesa lógu ta pâpia ku mi sobri Bíblia. El mostra-m testus na Bíblia ki ta fla ma Jeová é un Deus di amor i justisa. (Deuteronómio 32:4; 1 João 4:8) Kes kualidadi li txoma-m atenson. N krê prendeba más sobri Jeová, pur isu N seta un studu di Bíblia.

Lógu dipôs, N kumesa ta sisti runion di Tistimunhas di Jeová. N fika dimiradu ku amor di verdadi ki N odja la. Es ta trataba tudu algen igual, ka ta nportaba ses rasa ô puzison na sosiadadi. Sima N ba ta pasa kada bês más ténpu ku Tistimunhas di Jeová, N odja klaru ma es éra kes sigidor verdaderu di Jizus. — João 13:35.

Nton, N da kónta ma si N krê sirbiba Jeová, N tinha ki larga Igreja Katólika. Kel-li ka éra fásil pamodi N tinha medu di kuzê ki otus algen ta pensaba. Dipôs di txeu ténpu, ku ajuda di Jeová, N fitxa koraji i N sai di igreja.

Má tinha otu mudansa grandi ki N tinha ki faze. N prende na Bíblia ma Deus ka gosta pa un ómi kaza ku más di ki un mudjer. (Génesis 2:18-24; Mateus 19:4-6) Pa Jeová, é sô nha primeru kazamentu ki ta kontaba. Nton, N rejista nha primeru kazamentu pa el fika legal i N sipara di kes otu mudjer, má N faze di tudu pa es kontinua ta ten kel ki es mesteba. Dipôs dôs di es bira Tistimunha di Jeová.

BENSONS KI N RESEBE:

Nbóra nha mudjer kontinua ta ser katólika, el ta ruspeta nha disizon di sirbi Jeová. Nos tudu dôs ta atxa ma N bira un maridu midjór.

Antis N ta atxaba ma N pode midjoraba sosiadadi através di pulítika, má kel sforsu ki N faze ka sirbi pa nada. Gósi N sabe ma Reinu di Deus é úniku soluson pa nos prublémas. (Mateus 6:9, 10) N ta agradese Jeová pamodi el mostra-m modi ki N pode ten un vida filís di verdadi.

• ANU KI EL NASE: 1977

• PAÍS KI EL NASE: BRAZIL

• SE VIDA NA PASADU: PASTOR DI IGREJA PENTIKOSTAL

MODI KI ÉRA NHA VIDA ANTIS:

N kria na Itu, na un sidadi di São Paulo ki tinha txeu krimi.

Mi éra violéntu i N tinha konportamentu txeu mariadu. Tanbê N staba nvolvidu na nogósiu di dróga. Má N da kónta ma si N kontinuaba ku kel stilu di vida, ô N ta baba pa kadia ô es ta mataba mi. Nton, N sai di kel vida la, N bai pa Igreja Pentikostal i N bira pastor.

N ta atxaba ma dja ki mi éra pastor, N pode djudaba otus algen. Ti N ta daba un prugrama di igreja na rádiu, pur isu N bira konxedu. Má poku-poku, N da kónta ma igreja ka ta preokupaba ku kes algen di la, i mutu ménus inda ku Deus. Tudu kuza ki es kria éra tra kes algen ses dinheru. Pur isu N disidi sai di igreja.

MODI KI BÍBLIA MUDA NHA VIDA:

Kantu N kumesa ta studa Bíblia ku Tistimunhas di Jeová, N odja lógu ma es éra diferenti di otus relijion. Tevi dôs kuza ki N fika txeu dimiradu ku el. Primeru, é pamodi Tistimunhas di Jeová ka ta pâpia sô pâpia di ama Deus i prósimu, má es ta mostra amor. Sugundu, é pamodi es ka ta mete na pulítika i nen na géra. (Isaías 2:4) Kes dôs kuza li, da-m sertéza ma dja N atxaba relijion verdaderu, ki Jizus txoma di strada pertadu ki ta leba algen pa vida pa tudu ténpu. — Mateus 7:13, 14.

N da kónta ma si N krê agradaba Deus, N tinha ki faze alguns mudansa grandi. N tinha ki da nha família más atenson. Tanbê N mesteba ser más umildi. Ka foi fásil faze kes mudansa li, má ku ajuda di Jeová, N konsigi. Nha mudjer fika txeu dimiradu ku kes mudansa ki N faze. El kumesa ta studa Bíblia antis ki mi, má dipôs ki el odja kes mudansa ki N faze, el faze prugrésu faxi. Na poku ténpu nu da kónta ma nu kria ser Tistimunhas di Jeová. I nu batizadu na mésmu dia.

BENSONS KI N RESEBE:

Mi ku nha mudjer nu sta txeu kontenti pamodi nu djuda nos três fidju ten un amizadi fórti ku Jeová. Nos é un família filís. N ta agradese Jeová pamodi el djuda-m atxa kel verdadi ki sta na se Palavra, Bíblia. El ta muda vida di algen própi! I ami é próva klaru di kel-li.

• ANU KI EL NASE: 1957

• PAÍS KI EL NASE: AUSTRÁLIA

• SE VIDA NA PASADU: VIDA DIFÍSIL KANTU EL ÉRA MININU

MODI KI ÉRA NHA VIDA ANTIS:

N kria na Newcastle, ki ta fika na Nova Gales di Sul. Nos é 7 fidju i mi é kel más bédju. Nha pai ta bebeba txeu dimás i el ku nha mai éra txeu violéntu. Nha mai ta sotaba mi txeu i el ta maltrataba mi ku palavras tanbê. Sénpri el ta flaba mi, ma mi éra mau i ma N ta sérba tormentadu na inférnu. Kel-li ta dexaba mi ku txeu medu.

Nha mai ta sotaba mi txeu dimás ki alvês nen N ka ta konsigiba bai pa skóla. Kantu N tinha 11 anu, autoridadis tra-m di nha mai ku nha pai i es toma kónta di mi. Dipôs es manda-m pa un kaza di frera. Kantu N faze 14 anu, N fuji di la. N ka kria volta pa kaza, pur isu N fika ta mora na kes rua di Kings Cross, ki ta fika na sidadi di Sidnei.

Timenti N staba ta mora na rua, N fika ta uza dróga ku bebida, ta odja pornografia i N mete na prostituison. Un dia, N pasa pa un kuza ki dexa-m ku txeu medu. Duránti un ténpu N fika na kaza di dónu di un diskotéka. Un dia di noti, dôs ómi bai ti se kaza. El manda-m bai pa kuartu, má N konsigi obi-s ta pâpia. Kel dónu di kel diskotéka krê bendeba mi pa kes ómi. Ses planu éra leba-m sukundidu na un barku pa Japon, pa N bai trabadja na un bar. N fika uma dizusperadu ki N salta di varanda i N kóre ta djobe ajuda.

N nkontra ku un ómi ki staba ta vizita Sidnei, i N konta-l nha situason. N pensa ma el ta daba mi algun dinheru, má envês di kel-li el fla-m pa N bai pa kel lugar undi ki el staba, pa N toma banhu i dipôs pa N kume algun kuza. Má, nu kaba pa fika djuntu i un anu dipôs nu kaza.

MODI KI BÍBLIA MUDA NHA VIDA:

Kantu N kumesa ta studa Bíblia ku Tistimunhas di Jeová, N xinti raiba i omésmu ténpu N xinti aliviadu. Primeru, N xinti raiba pamodi N prende ma é Satanás ki é kulpadu pa tudu sufrimentu na mundu. Má antis es inxinaba mi ma é Deus ki ta pô-nu ta sufri. Má tanbê, N xinti aliviadu pamodi N prende ma Deus ka ta tormenta algen na inférnu, ki éra un ensinu ki tormentaba mi nha vida interu.

N fika dimiradu kantu N odja ma Tistimunhas di Jeová ta toma tudu disizon ku bazi na Bíblia. Es ta aplika kel ki Bíblia ta fla na ses vida. N tinha un manera di ser difísil, má ka ta nportaba kuzê ki N fazeba ô ki N flaba, Tistimunhas di Jeová ta trataba mi ku amor i ruspetu.

Kuza ki éra más difísil pa N lida ku el é pamodi N ta xintiba sen valor. N ta odiaba nha kabésa i N xinti si pa txeu ténpu, mésmu dipôs ki N batiza. N sabia ma N ta amaba Jeová, má N tinha sertéza ma nunka el ka ta amaba un algen sima mi.

Uns 15 anu dipôs ki N batiza, kontise un kuza ki muda nha manera di pensa. Timenti un irmon staba ta faze un diskursu na Salon di Reinu, el pâpia di Tiago 1:23, 24. Kes versíklu li ta konpara Palavra di Deus ku un spedju, ki ta djuda-nu odja nos kabésa sima Jeová ta odja-nu. N fika ta pensa si kel manera ki Jeová ta odjaba mi éra diferenti di manera ki ami N ta odjaba nha kabésa. Na komésu, N ka krê setaba ma Jeová pode amaba mi. N ta atxaba ma kel-li éra bon dimás pa ser verdadi.

Alguns dia dipôs, N lé un testu di Bíblia ki muda nha vida. Kel testu éra Isaías 1:18, undi ki Jeová ta fla: ‘Nhos ben i nu rezolve kuzas entri nos. Sikrê nhos pekadu é sima skarlati, es ta biradu branku sima névi’. Éra sima si Jeová staba ta fla-m: “Vicky, nha fidju-fémia, nu ben rezolve nos prubléma. N konxe-u, N konxe bus pekadu, N konxe bu korason, i N krê-u txeu.”

Kel noti la N ka durmi nada. Inda N staba ku dúvida si Jeová ta amaba mi mê. Má N kumesa ta pensa na sakrifisiu di resgati di Jizus. Di rapenti, N da kónta ma Jeová staba ta mostra txeu paxénxa ku mi duránti txeu ténpu, i ma el mostra-m txeu bês ma el ta amaba mi. Má éra sima si N staba ta fla-l: “Bu amor ka ta txiga-m. Sakrifisiu di bu Fidju ka ta txiga pa kubri nhas pekadu.” Éra sima si N staba ta nega sakrifisiu ki Jeová faze pa mi. Má gósi, pamodi N pensa dretu na kel prezenti di resgati, N kumesa ta xinti ma Jeová ta ama-m.

BENSONS KI N RESEBE:

N ta xinti linpu i N ten un vida sábi. Nha kazamentu midjora i N ta xinti kontenti pamodi N pode uza stória di nha vida pa N djuda otus algen. N ta xinti ma nha amizadi ku Jeová sta kada bês más fórti.

• ANU KI EL NASE: 1974

• PAÍS KI EL NASE: RÚSIA

• SE VIDA NA PASADU: TA AMABA MÚZIKA HEAVY-METAL

MODI KI ÉRA NHA VIDA ANTIS:

N nase na Votkinsk, na mésmu sidadi ki un múziku konxedu, ki txoma Pyotr Ilich Tchaikovsky, nase tanbê. Nos família éra póbri. Nha pai éra un bon ómi má el ta bebeba txeu, pur isu nos kaza ka tinha pas.

N ka tinha bons nóta na skóla i sima anu ba ta pasa, N fika ta xinti ma nunka N ka ta sérba bon sima otus algen. N bira un algen kétu na nha kantu i ta diskunfia di tudu algen. N ka gostaba di bai pa skóla. Pur izénplu, óras ki N tinha ki aprizenta un trabadju na frenti di turma, N ta fikaba nervozu dimás ki N ka ta konsigi splikaba nen kes kuza más sinplis, ki na otus momentu N ta splikaba dretinhu. Kantu N tirmina oitavu anu, nha rilatóriu di skóla ta flaba si: “El ka konxe txeu palavra, i el ka ta konsigi splika kuzas dretu.” Kes palavra li kaba ku mi i es pô-m ta xinti sen valor inda más txeu. N kumesa ta pensa si nha vida tinha algun obijetivu.

Kantu N bira rapás N kumesa ta bebe. Na komésu, N ta xintiba sábi óras ki N ta bebeba. Má óras ki N ta bebeba dimás nha konsénsia ta fikaba pizadu. N ta atxaba ma nha vida ka tinha sentidu. N kumesa ta fika inda más diprimidu, i alvês N ta fikaba fitxadu déntu kaza duránti txeu dia. Nton, N kumesa ta pensa na mata kabésa.

Kantu N tinha 20 anu, N kumesa ta obi múzika heavy-metal. Kel-la pô-m ta xinti midjór má pa poku ténpu. Kel múzika li ta daba mi inerjia, i N kria konxeba otus algen ki ta gostaba di obi múzika heavy-metal tanbê. N dexa kabélu kria, N fra orédja i N bira ta bisti sima kes kantor ki N ta dimiraba. Poku-poku N bira un algen sen responsabilidadi, violéntu i sénpri N ta diskutiba ku nha família.

N pensa ma múzika heavy-metal ta poba mi ta ser un algen más filís, má é ka kel-la ki kontise. N sta ta biraba un otu algen! Kantu N fika ta sabe di alguns kuza mariadu di kes kantor ki N ta dimiraba, N xinti traídu.

N kumesa ta pensa na mata kabésa otu bês i di es bês inda más txeu. Úniku kuza ki inpidi-m di faze kel-la é pamodi N fika ta pensa modi ki nha mai ta fikaba. El ta amaba mi txeu, i el faze txeu kuza pa mi. N ka kria sta bibu, má tanbê N ka podia kaba ku nha vida. Kel kuza la ta dexaba mi frontadu.

N kumesa ta lé alguns livru konxedu na Rúsia, asi pa N xinti midjór. Un di kes stória ki N lé ta papiaba di un ómi ki ta sirbiba na un igreja. Dirapenti, N xinti gana di faze algun kuza pa Deus i pa otus algen. N faze un orason di tudu korason pa Deus. Nunka N ka fazeba kel-li antis. N pidi Deus pa djuda-m atxa un obijetivu na vida. Timenti N staba ta ora, N xinti un pas déntu mi sen konparason. Otu kuza ki dexa-m más dimiradu inda é kuzê ki kontise dôs óra dipôs. Un Tistimunha di Jeová konku na nha pórta i el fla-m si N kria studa Bíblia. N ta atxa ma kel-la éra respósta pa nha orason. Kel-la foi primeru dia di un vida novu i filís.

MODI KI BÍBLIA MUDA NHA VIDA:

Ka foi fásil, má N bota fóra tudu kuza ki tinha aver ku múzika heavy-metal. Má simé, duránti txeu ténpu kes múzika ka krê saíba di nha kabésa. Tudu bês ki N ta pasaba pértu di un lugar ki N ta obiba kes tipu di múzika li, N ta lenbraba lógu di kel algen ki mi éra antis. N ka kria dexa kes lenbransa kasábi, kaba ku kes kuza sábi ki N staba ta prende. Pur isu, N ta fazeba di tudu pa N fikaba lonji di kes lugar. I tudu bês ki N ta lenbraba di nha pasadu, N ta oraba di korason. Óras ki N ta fazeba kel-li, N ta xintiba kel ‘pas di Deus, ki ningen ka ta konsigi ntende’. — Filipenses 4:7.

Sima N ba ta studa Bíblia, N prende ma tudu sigidor di Jizus debe pâpia ku otus algen sobri ses fé. (Mateus 28:19, 20) N ta atxaba ma nunka N ka ta konsigiba faze kel-li. Má omésmu ténpu kes kuza novu ki N staba ta prende, da-m un pas déntu mi i djuda-m xinti kontenti. N sabia ma otus algen mesteba obi kes verdadi li tanbê. Pur isu, N kumesa ta pâpia ku otus algen sobri kuzê ki N staba ta prende sikrê N tinha medu. N fika dimiradu pamodi N da kónta ma óras ki N ta papiaba ku otus algen sobri Bíblia, N ta xintiba más midjór ku nha kabésa. Tanbê kel-li djuda-m ten un fé más fórti na kel ki Bíblia ta fla.

BENSONS KI N RESEBE:

Gósi N sta kazadu i mi é filís. N ta xinti kontenti pamodi N djuda txeu algen prende sobri Bíblia, i nha mai ku nha irman é un di kes ki N djuda. Sirbi Deus i djuda otus algen prende sobri el, da nha vida un obijetivu di verdadi.