Bíblia ta muda vida di algen

PAMODI ki un ómi volta pa kel relijion ki el kriadu na el? Modi ki un jóven atxa kel Pai ki el xinti falta di el se vida interu? Lé kuzê ki kes algen li ta konta.

“N xinti ma N mesteba volta pa Jeová.” — ELIE KHALIL

ANU KI EL NASE: 1976

PAÍS KI EL NASE: XIPRI

SE VIDA NA PASADU: FIDJU KI PERDE

MODI KI ÉRA NHA VIDA ANTIS: N nase na Xipri, má N kria na Austrália. Nha pai ku nha mai éra Tistimunhas di Jeová i es faze kel ki es pode pa djuda-m ama Jeová i se Palavra, Bíblia. Má sima N ba ta kria, N kumesa ta rabela. N ta saíba di noti sukundidu pa N ba nkontraba ku otus jóven. Nu ta furtaba karu i nu ta fazeba otus kuza mariadu.

Na komésu, N ta fazeba kuzas sukundidu pamodi N tinha medu pa nha pai ku nha mai ka fikaba tristi ku mi. Má ku ténpu, N perde medu. N faze amizadi ku pesoas más grandi di ki mi i ki ka ta amaba Jeová, kes amizadi li ka djuda-m na nada. Dipôs, N fla nha pai ku nha mai ma N ka kreba nada ku ses relijion. Ku paxénxa es sforsa pa djuda-m txeu, má N ka krê sabeba di nada. I es fika txeu tristi ku mi.

Kantu ki N sai di kaza, N kumesa ta uza dróga. Ti N fika ta planta i ta bende padjinha. N ta lebaba un vida mariadu i N ta baba txeu pa diskotéka. N bira un algen ki ta xatiaba faxi. Si un algen flaba mi ô fazeba mi algun kuza ki N ka gostaba, N ta fikaba xeiu di raiba i txeu bês N ta gritaba ô ti N ta brigaba ku el. N fika ta faze tudu kes kuza ki N prende ma N ka devia fazeba.

MODI KI BÍBLIA MUDA NHA VIDA: N bira amigu di un rapás ki ta uzaba dróga sima mi. Se pai móre kantu el staba pikinoti. Nu ta fikaba ta pâpia ti astanta di noti. Nton, alvês el ta flaba mi ma el ta xintiba txeu falta di se pai. Dja ki N sabia di speransa di resureison, N kumesa ta pâpia ku el sobri resureison. N fla-l ma Jizus resusitaba pesoas i ma na futuru el ta ben faze kel-li otu bês. (João 5:28, 29) Un dia N fla-l: “Bu ta imajina odja bu pai otu bês? Nos tudu nu pode ben vive pa tudu ténpu na paraízu li na Téra.” Kel-li toka korason di nha amigu.

Alvês nha amigu ta kumesaba ta pâpia sobri ténpu di fin ô sobri Trindadi. N ta panhaba se Bíblia i N ta mostraba el un monti testu ki ta pâpia sobri Jeová, Jizus i ténpu di fin. (João 14:28; 2 Timóteo 3:1-5) N da kónta ma sima N ba ta pâpia sobri Jeová, N fika ta pensa más txeu na el.

Poku-poku, kes verdadi di Bíblia ki staba na nha korason, ki nha pai ku nha mai inxinaba mi, kumesa ta volta otu bês. Pur izénplu, alvês óras ki N staba na un fésta ta uza dróga ku nhas amigu, dirapenti N ta kumesaba ta pensa na Jeová. Txeu di nhas amigu ta flaba ma es ta amaba Deus, má kuzas ki es ta fazeba ka ta mostraba kel-li. N ka kria fazeba kel-la. N sabia kuzê ki N tinha ki fazeba. N xinti ma N mesteba volta pa Jeová.

Ten grandi diferénsa entri sabe kuzê ki bu ten ki faze i faze kel kuza. Foi faxi faze alguns mudansa. Pur izénplu, N konsigi para di uza dróga. Tanbê, N larga kes mau amizadi ki N tinha i N kumesa ta studa Bíblia ku un ansion.

Má, otus kuza ka foi fásil muda. Éra difísil pa mi kontrola nha raiba. Alvês N ta konsigiba má otus bês N ka ta konsigiba. I óras ki N ka ta konsigiba, N ta xintiba rei di mal i N ta atxaba ma N ka ta konsigi muda. N ta xintiba dizanimadu i N ta djobeba kel ansion ki ta studaba Bíblia ku mi. El tinha txeu paxénxa ku mi, el ta trataba mi ku amor i el ta nkorajaba mi txeu. Un bês el fla-m pa N lé un artigu di Sentinéla ki ta mostraba pamodi ki nu ka debe dizisti. * Nu djobe alguns kuza djuntu ki N pode fazeba óras ki N fikaba xatiadu dimás. Poku-poku, kel artigu la djuntu ku txeu orason ki N ta fazeba pa Jeová, djuda-m kontrola nha raiba. Ti ki enfin, na abril di 2000, N bira un Tistimunha di Jeová. N ka meste nen fla modi ki nha pai ku nha mai fika uma kontenti.

BENSONS KI N RESEBE: Oji N ta xinti pas déntu mi i N ten un konsénsia linpu pamodi N ka ta suja nha korpu más ku dróga ô ku konportamentu seksual mariadu. Ka ta nporta si N sta ta trabadja, si N sta na runion ô si N sta ta divirti, ami é mutu más filís gósi. N ta odja vida di un manera puzitivu.

N ta agradese Jeová pa pai ku mai ki N ten, pamodi nunka es ka skese di mi. Tanbê, N ta lenbra di kuzê ki Jizus fla na João 6:44: ‘Un algen sô pode ben pa mi, si Pai, ki manda-m, atrai-l’. N ta xinti sábi óras ki N pensa ma N konsigi volta pa Jeová pamodi el atrai-m pa el otu bês.

“N ta xintiba txeu falta di un pai.” — MARCO ANTONIO ALVAREZ SOTO

ANU KI EL NASE: 1977

PAÍS KI EL NASE: XILI

SE VIDA NA PASADU: EL TA FAZEBA PÁRTI DI UN BANDA DI HEAVY-METAL

MODI KI ÉRA NHA VIDA ANTIS: N kria ku nha mai na Punta Arenas, un sidadi bunitu ki ta fika na párti sul di Mérka di Sul. Nha pai ku nha mai sipara kantu N tinha sinku anu. Pamodi kel-la, N xinti bandonadu. N ta xintiba txeu falta di un pai.

Nha mai ta studaba Bíblia ku Tistimunhas di Jeová i el ta lebaba mi pa runions na Salon di Reinu. Má, N ka gostaba di bai runion, pur isu N ka ta konportaba dretu na kaminhu. Kantu N faze 13 anu, N dexa di bai runion.

N ta amaba múzika i N da kónta ma N tinha taléntu. Ku 15 anu N ta tokaba heavy-metal na alguns festival, na alguns bar i na féstas ki algen ta fazeba. N konxe txeu múziku ki tinha taléntu i kel-li pô-m ta gosta di otus tipu di múzika. N kumesa ta studa na un skóla di múzika na undi ki N ta moraba. Ku 20 anu, N muda pa Santiagu, ki é kapital di Xili, pa N kontinua ta studa. N kontinua ta toka na bandas di heavy-metal.

Duránti tudu kel ténpu li, N ta xintiba un vaziu déntu mi. Pa N xinti midjór, N ta bebeba dimás i N ta uzaba dróga djuntu ku nhas koléga di banda, ki pa mi éra nha família. Ami éra rebéldi, N ta bistiba ropa sukuru, N ta dexaba nha barba kria i N dexa nha kabélu kria ti ki ta daba mi ti sintura.

N ta brigaba txeu, pur isu N tinha txeu prubléma ku autoridadi. Un bês, N bebe dimás i N ranja géra ku un grupu di trafikantis di dróga ki ta buskaba mi ku nhas amigu. Kes trafikanti da-m pankada di tal manera ki es kebra-m kexada.

Má kuzê ki pô-m ta sufri más txeu é kuzas ki kes algen ki N ta gostaba txeu di es faze-m. Un dia, N diskubri ma nha namorada dja tinha txeu ténpu ta traíba mi ku nha midjór amigu i tudu nhas amigu sabia di kel-li. Má nada es ka fla-m. N fika tristi dimás.

N volta pa Punta Arenas, undi ki N kumesa ta da aula di múzika i ta trabadja ku múzika. Tanbê, N kontinua ta toka i ta grava ku bandas di heavy-metal. N konxe un minina txeu bunita ki txoma Susan i nu ba mora djuntu. Ku ténpu, Susan da kónta ma N ka ta kriditaba na trindadi sima se mai. El pergunta-m: “Nton kal ki é verdadi?” N fla-l ma N sabia ma ensinu di trindadi éra falsu. Sô ki N ka ta konsigi mostraba el na Bíblia. Má, N sabia kenha ki podia mostraba el. N fla-l ma Tistimunhas di Jeová ta mostraba el verdadi na Bíblia. Nton, N faze un kuza ki dja tinha un monti anu ki N ka fazeba. N ora pa Deus i N pidi-l ajuda.

Alguns dia dipôs, N odja un ómi ki ta parseba konxedu i N pergunta-l si el éra Tistimunha di Jeová. Nbóra el fika spantadu ku nha aparénsia, ku amor el responde-m nhas pergunta sobri runions na Salon di Reinu. N tinha sertéza ma nkontra ku kel irmon, foi respósta pa nha orason. N bai Salon di Reinu i N xinta na últimu fila, asi pa ningen ka reparaba mi. Má, dja ki N ta baba runion kantu mi éra mininu, txeu irmon lenbra di mi. Es resebe-m dretu, es brasa-m ku txeu karinhu i N xinti un pas déntu mi. Éra sima si N staba ta volta pa kaza. Kantu N odja kel irmon ki studa Bíblia ku mi kantu N staba pikinoti, N pidi-l pa el studa ku mi otu bês.

MODI KI BÍBLIA MUDA NHA VIDA: Un dia, N lé Provérbios 27:11, ki ta fla: ‘Aji ku sabedoria, nha fidju, i poi nha korason ta fika kontenti’. N fika dimiradu sô di pensa ma un pekador móda mi pode dexa kel algen ki kria tudu kuza kontenti. N da kónta ma Jeová éra kel Pai ki N staba ta djobe duránti tudu nha vida!

N kria agradaba nha Pai ki sta na Séu i faze se vontadi. Má, dja tinha txeu anu ki mi éra skravu di dróga i bebida alkólika. N pasa ta ntende kuzê ki Jizus inxina na Mateus 6:24, ki ta fla: ‘Ningen ka ta pode ser skravu di dôs sinhor’. Timenti N staba ta luta pa N muda, kel prinsípiu ki sta na 1 Coríntios 15:33 toka-m txeu. El ta fla: ‘Maus koléga ta straga bons ábitu.’ N odja ma N ka ta konsigiba larga nha vísiu si N kontinuaba ta bai pa kes mésmu lugar i sta djuntu ku kes mésmu algen. Konsedju di Bíblia é klaru: N tinha ki faze un mudansa grandi pa N fika lonji di kes kuza ki ta poba mi ta tropesa. — Mateus 5:30.

Dja ki N gostaba txeu di múzika, un di kes kuza más difísil foi para di toka i di obi heavy-metal. Má ku ajuda di nhas amigu na kongregason, N konsigi para. N para di bebe dimás i N para di uza dróga. N tra kabélu, N faze barba i N dexa di bisti sô di prétu. Kantu N fla Susan ma N kria korta nha kabélu, el fika ku txeu kuriozidadi ki el fla: “N ten ki bai odja kuzê ki ta kontise na Salon di Reinu!” El gosta txeu di kuzê ki el odja la ki el kumesa ta studa Bíblia lógu. Dipôs mi ku Susan nu kaza. Na anu 2008 nu batiza i nu bira Tistimunhas di Jeová. Nu sta txeu kontenti di sirbi Jeová djuntu ku nha mai.

BENSONS KI N RESEBE: N sai di un mundu ki ka ten filisidadi i ki ka ten amigus di verdadi. Inda N gosta di múzika. Má gósi, N ta skodje ku kuidadu ki tipu di múzika ki N ta obi. N ta uza nha spiriénsia pa N djuda nhas família i otus algen, prinsipalmenti kes jóven. N krê djuda-s odja ma txeu di kes kuza di mundu ta parse ma é sábi, má na verdadi é sô ‘lixu’. — Filipenses 3:8.

N atxa amigus lial na kongregason, undi ten amor i pas di verdadi. I más inportanti inda, N bira más amigu di Jeová. I ti ki enfin, N atxa un Pai.

[Nóta di rodapé]

[Lejenda]

“N konsigi volta pa Jeová pamodi el atrai-m pa el otu bês.”