Na mês di marsu di 2020, kantu Organizason Mundial di Saúdi fla ma COVID-19 dja spadjaba na mundu interu, txeu algen ka imajinaba ma más ki un anu dipôs kel vírus li inda ta prujudikaba mundu interu. Milhons di algen, ku Tistimunhas di Jeová ku tudu, panha koronavírus, fika ku prubléma di dinheru i kel situason li afeta manera ki es ta xinti. Modi ki Tistimunhas di Jeová organiza pa djuda duránti kel situason difísil li?

 Kumison di Kordenadoris di Grupu Enkaregadu di Óbra di Tistimunhas di Jeová aprova pa más di 950 Kumison di ajuda na ténpu di dizastri djuda kes ki sta sufri pamodi COVID-19. Na alguns kazu, é irmons di kel lugar ki da ajuda i na otus kazu nos irmons resebe ajuda di govérnu. Na alguns lugar kes Kumison di ajuda na ténpu di dizastri tevi ki sforsa mutu más txeu pa djuda pamodi nisisidadi ki tinha.

 Pur izénplu, odja kuzê ki kontise na Paraguai. Un jornal fla ma pamodi kes monti prubléma di dinheru ki koronavírus traze, “un monti di algen na Paraguai sta ta pasa fómi na ses kaza.” Má Kumison di ajuda na Paraguai dja kumesa ta da kes bólsa di ajuda ki ta da pa uza duránti dôs simana. Na kes bólsa ta sta kumida, kuzas pa faze linpéza na kaza i na korpu, ki ta txiga pa un família di kuatu algen. Kada bólsa ta kusta uns 2.800 skudu.

 Modi ki kes algen ki ta sirbi na kes Kumison ta proteje ses kabésa i otus algen di COVID-19? Es ta uza maskra i es ta fika lonji di otus algen. Es ta djobe si kes inpréza ki es ta kunpra kumida na es é linpu i si es ta toma txeu kuidadu pa ka pasa vírus. Tanbê es ta djobe si tudu kes algen ki ta pega na kes bólsa ta uza kuzas pa proteje, pa linpa i dizinfeta ses karu, i pa poi kes bólsa na lugaris ki es dizinfeta. I kes ki ta ntrega kes bólsa ta sforsa pa mante lonji di kes irmon ki ta toma-s.

 Apartir di mês di janeru di 2021, Kumison di Kordenadoris aprova pa uza más di 25 milhons di dóla (ki ta da uns 2.336 milhon di skudu di Kabu Verdi) pa djuda na ténpu di COVID-19. Kes filial i kes Kumison di ajuda ta uza ku kuidadu kes kontribuison ki irmons ta da i es ta sforsa txeu pa atxa bons présu pa kunpra kes kuza ki mestedu. Pur izénplu, na Xili irmons krê kunpraba 750 kilu di lentilha. Má sô na un mês, présu di lentilha omenta dôs bês más txeu! Dôs óra dipôs ki es konkorda kunpra kel lentilha pa kel présu más altu, kel algen ki staba ta bende fla-s ma un algen ki kunpraba antis torna ntrega kel lentilha. Nton, envês di el bende irmons na kel présu más altu, el disidi bende-s na kel présu más baratu ki staba antis!

 Má kantu nos irmons bai buska kel lentilha, kel algen ki staba ta bende krê dizistiba di bende-l na présu más baxu, pamodi el akuza irmons di distribui kumida di manera injustu, sima otus organizason ta fazeba. Dipôs ki un irmon faze un orason brévi déntu di el, el splika kel algen ki staba ta bende ma kada kongregason fladu pa djobe dretu kenha ki staba ta meste di ajuda própi. Irmons tanbê splika-l ma dja ki kada kultura é diferenti, kada bólsa di ajuda ta fazedu di manera ki ta sirbi kes família. Dipôs es garanti-l ma tudu kontribuison ki Tistimunhas di Jeová ta faze ku dinheru ô ku trabadju é di livri vontadi. El fika dimiradu. Nton, el konkorda bende kel lentilha na présu más baratu i tanbê el da nos irmons más 400 kilu di lentilha kantu es torna bai kunpra.

 Un viúva di idadi na Libéria, ki txoma Lusu, ta mora ku sinku algen di se família. Un dia di palmanhan es staba ta toma kafé i ta lé testu di dia i nétu di Lusu, ki tinha 7 anu, da kónta ma es ka tinha kumida na kaza más. El fla: “Kuzê ki nu sta ben kume?” Lusu fla-l ma dja el oraba ta pidi ajuda i ma el tinha sertéza ma Jeová ta daba es kuzê ki es mesteba. Na kel dia di tardi, ansions di kongregason txoma Lusu pa el bai toma kumida. El fla: “Nha nétu fla ma gósi el sabe ma Jeová ta obi i ta responde orason pamodi el responde di meu.”

 Un mudjer na Repúblika Dimokrátika di Kongu é vizinhu di un família ki é Tistimunha di Jeová. Kantu el odja otus Tistimunha di Jeová ta da kel família kumida, el fla: “Óras ki koronavírus pasa nu ta bira Tistimunha di Jeová pamodi es kuida di ses irmons ku irmans duránti es ténpu difísil.” Se maridu pergunta-l: “Bu sta bira Tistimunha di Jeová sô pamodi un saku di arôs?” El responde: “Klaru ki nau, má kel saku di arôs é un próva di amor di verdadi.”

 É pamodi nhos kontribuison ki Tistimunhas di Jeová sta ta konsigi djuda nos irmons ku irmans lógu ki es meste duránti es ténpu di koronavírus. Obrigadu pa kes kontribuison ki nhos ta faze através di kes manera ki sta splikadu na site donate.pr418.com.