Tudu mês nu ta fika ku gana di sisti kes prugrama i vídius di JW Broadcasting. Má txeu irmon na Áfrika ka ta konsigi odja kes prugrama através di internet. Pamodi?

 Internet ta da mariadu na txeu lugar na Áfrika. I mésmu na kes lugar undi ki el ta da, normalmenti el é léntu i el é karu dimás. Pur izénplu, un enkaregadu di grupu di kongregason di Madagáskar, un bês diskarega un prugrama di JW Broadcasting na un lugar ki algen ta toma kafé. El tevi ki paga uns 1.400 skudu na dinheru di Kabu Verdi, ki é más txeu di ki kel ki alguns algen ta ganha la na un simana!

 Má sikrê ku kes difikuldadi li, milhons di algen na Áfrika gósi pode sisti prugrama di JW Broadcasting sen uza internet. Modi ki es ta faze kel-li?

 Désdi 2017, kes algen ki ta mora na kes país ki ta fika pa baxu di dizértu di Sara pode sisti kes prugrama di JW Broadcasting na un kanal di tilivizon ki ta dadu através di satéliti. Kel kanal li ta dadu di grasa, 24 óra pa dia, 7 dia pa simana i na 16 língua.

 Pa konsigi kel-li, Tistimunhas di Jeová kontrata un sirvisu di tilivizon ki ta dadu através di satéliti. Kel satéliti ki ta uzadu, ta panha uns 35 di kes país di Áfrika ki ta fika pa baxu di dizértu di Sara. Kel kontratu li ta kusta uns mil kontu pa mês. Di vês en kuandu, óras ki meste dadu un prugrama dirétu ta pagadu más txeu pa kel prugrama dadu na otu kanal. Asi milharis di algen ta pode sisti kongrésu ô kes runion spesial di kes vizita ki reprizentanti di sédi ta faze na filial.

 Txeu algen, i kel-li ta inklui kes ki ka é Tistimunha di Jeová, ta sisti kel kanal di satéliti li na tilivizon na ses kaza. Txeu irmon ka ta pode kunpra ekipamentu ki es meste pa sisti kel kanal di satéliti li. Nton, más di 3.670 Salon di Reinu resebe ekipamentu ki es meste pa panha sinal di satéliti, asi pa irmons pode sisti kes prugrama di JW Broadcasting. Kel ekipamentu li ta kusta uns 6.500 skudu ku ntrega ku tudu, si Salon di Reinu dja ten un tilivizon i un projetor. Má si Salon di Reinu ka ten, tudu kes ekipamentu pode kusta uns 49 mil skudu.

 Irmons ku irmans gosta txeu di kel kanal li. Un ansion di Kamarons fla: “Pa nos família, el é sima maná na meiu di dizértu.” Un irmon, ki txoma Odebode, di Nijéria, fla: “Nos família ta sisti kel kanal li três bês pa simana. Nos fidjus ta sta sénpri ku gana pa kes dia txiga i ti na otus momentu es ta pidi pa nu muda pa kanal di Tistimunhas di Jeová.” Un irman, ki txoma Rose, ki tanbê é di Nijéria, fla: “N sta kontenti pamodi gósi N pode sisti kanal di Tistimunhas di Jeová envês di N fika ta odja notísia tudu óra. Óras ki N ta odjaba notísia, N ta fikaba iritadu i tenson ta subiba mi. Má kes prugrama di JW Broadcasting ta nkoraja-m i es ta pô-m ta xinti kalmu! El é kel kanal ki N gosta más txeu. El é un grandi prezenti di Jeová.”

 Un enkaregadu di grupu di kongregason na Mosanbiki fla ma kes Salon di Reinu di kes kongregason undi ki el ta sirbi, resebe kes ekipamentu ki es meste pa panha kel kanal di satéliti. Alvês kes irmon di kes kongregason ta txiga un óra antis ô más pa sisti JW Broadcasting através di satéliti.

 Na kongrésu internasional di 2019 ki fazedu na Johannesburg, na Áfrika di Sul, kes diskursu prinsipal, sima kes ki irmons di Grupu Enkaregadu di Óbra faze, dadu na kel kanal, asi pa otus 9 lugar sisti kes diskursu tanbê. Un irmon, ki txoma Sphumelele, ki ta trabadja na kel dipartamentu ki ta poi prugramas di filial na Áfrika di Sul, fla: “Si nu ka tinha kel kanal li, nu tinha ki poi kes diskursu na internet, má pa kel-la nu ta mesteba un bon internet i nu tinha ki paga. Kel kanal di Tistimunhas di Jeová ki ta dadu através di satéliti fika más baratu i el ta da más dretu.”

 Kes kontribuison ki nhos ta faze di korason pa óbra na mundu interu, ta djuda irmons ku irmans di Áfrika sisti kel prugrama di JW Broadcasting através di satéliti. Nu ta agradese txeu pa kes kontribuison ki nhos ta faze na kes manera diferenti ki nhos ta atxa na site donate.pr418.com.