Dja ten más di 10 anu, ki sta ta uzadu karinhus di publikason na pregason pa txoma atenson di pesoas. Na mundu interu, óras ki pesoas odja kes karinhu li, é faxi di es sabe es é di kenha. Kes karinhu ka sô ta txoma atenson, má tanbê es é fásil di uza. Talvês bu ta konkorda ku un irman di Pulónia, ki txoma Asenata, ki fla: “Karinhus ta parse sinplis, má tanbê es é bunitu. É faxi di uza-s i di leba-s pa algun lugar.”

 Dja bu kustuma pergunta modi ki kes karinhu li fazedu?

 Na anu 2001, Grupu Enkaregadu di Óbra aprova pa nos irmons i irmans na Fransa kumesa ta sprimenta maneras diferenti di da tistimunhu pa públiku, i kel-li ta inkluiba uza karinhus. Es sprimenta alguns tipu di karinhu. Pur izénplu, es faze alguns mudansa na maléta di viajen i karinhus di super-merkadu pa mostra i guarda publikasons. Dipôs di un ténpu, filial di Fransa skodje un tipu di karinhu ki publikadoris fika ta uza pa txeu ténpu.

 Irmons na Fransa fika txeu kontenti ku kes rezultadu ki es tevi na da tistimunhu pa públiku ku karinhu. Pur isu, na anu 2011, Grupu Enkaregadu di Óbra aprova tistimunhu pa públiku ku karinhus i ku mézas na sidadi di Nova York, na Mérka. Kes pioneru ki partisipa na kel tipu di tistimunhu, lógu da kónta ma karinhus tinha txeu vantaji. Pur izénplu, éra faxi di leba-s di un lugar pa kel otu. Kes pioneru tanbê da bons sujiston sobri modi ki pode midjora kes karinhu. Kes primeru karinhu éra fetu di madera i es éra txeu pizadu, pur isu éra difísil subi i dixi skada ku es. Pamodi kel-li, es torna fazedu pa es ser más levi, má ka txeu levi ki béntu ta bota-s faxi na txon. Kel novu karinhu tanbê tinha ródas más grandi i más riju, asi éra más fásil anda ku es na kes txon más difísil. Tanbê kes novu karinhu tinha un kaxa pikinoti pa guarda publikasons.

 Kel tipu di tistimunhu li tevi bons rezultadu! Pur isu na anu 2012, Grupu Enkaregadu di Óbra aprova pa irmons ku irmans di mundu interu uza karinhus di publikason. Irmons faze akordu ku un inpréza ki ta konsigiba faze txeu karinhu ku un material ki ka éra pizadu, má ki ta duraba pa más ténpu.

 Ku ténpu, ba ta fazedu mudansas pikinoti pa midjora karinhus. Pur izénplu, na anu 2015, karinhus pasa tanbê ta ten un kapa pa proteje di txuba, ki ten párti frenti transparenti. Dina, ki ta mora na país di Jiórjia, gosta txeu di kel kapa. El fla: “karinhu ten se própi ‘kapa di txuba’ pa proteje kes publikason.” Alguns kartás ku íman fika disponível na alguns língua na anu 2017. Tomasz, ki é un irmon di Pulónia, fla: “Antis éra txeu difísil muda kes imajen na kartás. Kes kartás ku íman foi un bon ideia.” Na anu 2019, fazedu más mudansa na material ki ta uzadu pa faze karinhus i tanbê na modi ki es ta fazedu pa es pode duraba pa más ténpu inda.

 É sô un inpréza ki ta faze tudu karinhu di publikason, i kes karinhu li ta mandadu pa kongregasons na mundu interu. Oji, un karinhu di publikason ta kusta 43 dóla (uns 4 mil skudu na dinheru di Kabu Verdi), sen konta ku dinheru di transpórti i di otus kuza. Ti gósi, dja gastadu ku karinhus más di 16 milhon di dóla. I dja mandadu más di 420 mil karinhu pa kongregasons na mundu interu.

 Pa pode uzadu dretu kontribuisons di irmons, nu ta manda faze karinhus na txeu kuantidadi di un bês. Alén di kel-li, óras ki algun pésa di karinhu straga, kongregasons pode pidi un otu pésa pa konpo-l envês di troka kel karinhu.

 Publikadoris na mundu interu sta ta gosta di uza karinhus di publikason. Martina, ki é di Gana, fla: “Na kuazi tudu kes manera di prega, é nos ki ta txiga na pesoas. N gosta di tistimunhu ku karinhu pamodi é pesoas ki ta txiga na nos. I nu ta da tistimunhu ti mésmu pa kes algen ki ka para, má ki pasa pértu di nos karinhu.”

 Na un otu país di Áfrika, un ómi txiga pértu di un karinhu i el toma publikasons na se língua. El volta na kel otu simana i el fla: “N lé tudu kes publikason. Kes informason ki sta na es é txeu inportanti. N ta ba pâpia di es ku nha família na nha vila”. Kel vila ta fika uns 500 kilómetru lonji di la. Dôs mês dipôs, el volta i el fla: “Kes algen na nha vila lé tudu kes publikason, i es fika txeu kontenti ku kes informason ki sta na es. Es krê bira Tistimunhas di Jeová. Má es ten alguns dúvida. Pur izénplu, es intende ma pa es batiza, es meste murgudjadu na águ. Má ka ten un riu pértu di nos vila. Nu ten ki ben pa li pa nu ser batizadu?” Kes irmon ki staba na karinhu pâpia ku un pioneru ki ta pâpia língua di kel ómi, pa ba vizita-l. Désdi kel ténpu, es dôs sta ta pâpia sénpri sobri Bíblia i es sta ta gosta di faze kel-li.

 Nu ta fika txeu kontenti di odja karinhus di publikason ta uzadu pa prega “na mundu interu pa sirbi di tistimunhu na tudu nason”. (Mateus 24:14) Di undi ki ta ben dinheru pa faze kes karinhu di publikason? El ta ben di kes kontribuison ki ta fazedu pa trabadju na mundu interu. Txeu di kes kontribuison ta fazedu através di donate.pr418.com. Obrigadu pa kes kontribuison ki nhos ta faze di korason.