“Grupu Enkaregadu di Óbra disidi ma si govérnu na lugar ki nu ta mora ka tiver ninhun régra ki ta inpidi, tudu kongregason ta insentivadu pa kumesa ta faze runions na Salon di Reinu na simana di 1 di abril.” Kel avizu li, ki podu na jw.org na komésu di marsu di 2022, poi Tistimunhas di Jeová na mundu interu ta fika txeu kontenti. Má koronavírus inda ka kababa. a Pur isu, ki mudansas i ekipamentus es ta mesteba pa proteje kes algen ki ta ba sistiba runion? Nos Salons di Reinu staba priparadu pa uzadu dipôs di uns dôs anu sen nu sisti runion la?

 Na verdadi dja tinha alguns mês ki irmons dja staba ta pripara pa runions torna fazedu na Salon di Reinu otu bês.

 Un mês dipôs ki nu para di faze runion na Salon di Reinu na 2020, Dipartamentu Mundial di Dizenhu i Konstruson, na Warwick, Nova York, kumesa ta analiza modi ki koronavírus ta ben afetaba manera ki nu ta ben uzaba nos Salon di Reinu i kuzê ki nu meste fazeba pa nos Salon di Reinu sérba un lugar suguru pa sisti runion.

 Nton es odja ma kel ki ta mesteba na un párti di mundu, txeu bês éra diferenti di kel ki es ta mesteba na un otu lugar. Irmon Matthew De Sanctis, ki ta trabadja na kel dipartamentu li, fla: “Na alguns país, prubléma é ranja lugar pa laba mô. Óras ki un Salon di Reinu ka ten agu na redi, es ta meste kunpra agu ô es ta meste panha-l na un riu ô na un posu. Na otus país, alguns govérnu tevi ki muda ses régra sobri modi ki ar-kondisionadu debe uzadu, modi ki debe fazedu pa ar sirkula na un lugar fitxadu i kes sinal ki es debe poi sobri saúdi i linpéza.”

 Modi ki nos irmons lida ku kel dizafiu li? Irmon Matthew fla ma irmons da kónta ma kes midjór soluson pa txeu Salon di Reinu, éra “sinplis, i ta kustaba poku dinheru.” Pur izénplu, na Papua Nova-Giné, es uza un baldi sinplis di 20 litru ku tornera na el pa laba mô. Nos irmons konsigi ranja tudu kes kuza ki meste pa laba mô pa poi na un Salon di Reinu fóra di sidadi i kusta-s sô 40 dóla di Mérka (uns 4.400 skudu). Pa Salons di Reinu na Áfrika, es kunpra más di 6 mil ekipamentu di bon kualidadi pa laba mô na un enpréza ki ta fika na Ázia.

 Otus mudansa ki es faze ta inklui poi ô konpo ventuínhas i poi kuzas ki ta djuda ar sirkula midjór déntu di Salon di Reinu. Txeu kongregason kunpra vara pa poi mikrofóni na el asi óras ki irmons ta da komentáriu es ka meste ki toka na mikrofóni. Tanbê, es sforsa pa linpa kes lugar ki algen ta poi mô na el sénpri, sima mô di pórta i tornera, pamodi pode sta vírus na es. Alguns kongregason poi tornera na kaza di banhu ki ta funsiona sen algen toka na es. Na Xili, pa es faze tudu kes mudansa ki mesteba es gasta uns 1.400 dóla di Mérka (uns 155 kontu) na kada Salon di Reinu.

 Nbóra éra inportanti pa nos irmons poi Salon di Reinu ta fika suguru, es sforsa pa popa dinheru, asi pa kontribuisons dura más ténpu. Pur izénplu, na alguns país irmons pruveta kes diskontu ki govérnu ta faze pa es kunpra kes ekipamentu pa laba mô i varas pa mikrofóni. Alguns filial djunta pa kunpra un monti ekipamentu di un bês, asi pa es popa dinheru. Txeu bês alguns filial i Dipartamentu di Kónpra pa Mundu Interu kunpra ekipamentus dirétu na fábrikas, asi pa fika más baratu i tanbê pa es resebe kes kuza ki es kunpra más faxi.

 Tudu kes kuza ki fazedu pa poi Salons di Reinu ta fika más suguru sta ta proteje i ta poi kes ki ta sisti runion fika más trankilu. Un irman na Peru, ki txoma Dulsine, fla ma el xinti “un bokadinhu di medu” kantu el obi ma runion sta kumesa ta fazedu na Salon di Reinu otu bês. El kontinua ta fla: “N panha koronavírus lógu na komésu ki kel vírus li kumesa ta spadja, pur isu N tinha medu bai Salon pamodi N podia panhaba vírus otu bês. Má kantu N bai Salon di Reinu, N odja ma ansions dja fazeba txeu kuza pa nu xintiba más suguru. Pur izénplu, tinha txeu lugar di dizinfeta mô i varas di mikrofóni, i tanbê un prugrama pa linpa i dizinfeta Salon antis i dipôs di runion. N xinti más suguru ku tudu kes kuza ki fazedu.” b

 Un irman na Zánbia ki txoma Sara, pasa pa un situason diferenti. El fla: “Dja ten alguns mês ki nha maridu móre pamodi koronavírus. N staba ta pensa na modi ki N ta xintiba óras ki N ba sistiba runion pa primeru bês sen el.” Modi ki el xinti kantu ki el bai? El fla: “Sisti runion na Salon di Reinu djuda-m odja ma Jeová sta ku nos na es ténpu di fin. Gósi N sta xinti más inda ma N sta resebe nkorajamentu, amor i apoiu di ansions i di nhas irmon ku irmans.”

 Nos irmons ku irmans na mundu interu sta kontenti di bai sisti runion na Salon di Reinu otu bês. Nu ta agradese nhos pa kes kontribuison ki nhos ta faze di korason. Txeu di kes kontribuison li ta fazedu na donate.pr418.com. Kes kontribuison li ta djuda-nu ten un lugar pa nu adora Jeová ki ta pô-nu xinti sábi i suguru.