Jizus fla se disiplus: ‘Nhos ta ser nhas tistimunha ti na párti más lonji di Téra.’ (Atos 1:8) Oji Tistimunhas di Jeová sta npenhadu na faze kel trabadju li. Má, inda ten alguns lugar na Téra ki é grandi i ki ten txeu algen, undi pesoas meste obi notísias sábi. I ten alguns país ki ten poku Tistimunhas di Jeová. (Mateus 9:37, 38) Má kuzê ki nu sta faze pa nu pâpia ku tudu algen ki nu pode?

 Pa djuda kunpri kel órdi di Jizus, Kumison di Sirvisu di Grupu Enkaregadu di Óbra di Tistimunhas di Jeová ta manda misionárius pa kes lugar na mundu undi mestedu más algen pa prega notísias sábi. Oji nu ten 3.090 misionáriu na mundu interu. a Kuazi es tudu resebe trenamentu na un skóla di Bíblia, sima Skóla pa pregadoris di Reinu. Kes misionáriu sta dispostu na dexa ses kaza i muda pa un otu país. Pamodi es é pesoas maduru i es ten txeu spiriénsia, i pamodi kel trenamentu ki es resebe, kes misionáriu fiel li sta ta djuda prega notísias sábi i tanbê es sta ta da bons izénplu pa kes novu disiplu.

 Na kada filial, Skritóriu na Dipartamentu di Sirvisu ki ta kuida di diziginason di kes irmon na sirvisu spesial pa ténpu interu, ta trabadja djuntu ku Kumison di Filial pa kuida di kes kuza ki misionárius meste, sima un lugar sinplis pa es mora, kuzas ki ten aver ku ses saúdi i algun dinheru pa es sustenta ses kabésa. Duránti anu di sirvisu di 2020, Tistimunhas di Jeová gasta kuazi 27 milhon di dóla (kuazi 2.700 milhon di skudu) pa kuida di misionárius. Pamodi kel ajuda li, misionárius pode uza tudu ses ténpu i ses forsa na trabadju di pregason i tanbê pa djuda irmons na ses kongregason.

 Modi ki kes misionáriu na kanpu sta ta djuda na trabadju di pregason? Frank Madsen, ki ta sirbi na Kumison di Filial di Malauí, fla: “Pamodi ses koraji i kapasidadi ki es ten, kes misionáriu sta ta djuda kongregasons kumesa ta trabadja na kes tiritóriu ki é difísil di prega, sima na kes prédiu ô kes grupu di kaza ku txeu suguransa i tiritórius di língua stranjeru. Tanbê, tudu kel sforsu ki es ta faze pa prende língua i kultura di kel lugar ki es sta, ta nkoraja otus algen. I ses bon izénplu ta djuda kes más jóven poi méta di sirbi pa ténpu interu. Nu ta agradese Jeová pa tudu kes misionáriu na kanpu.”

 Un ménbru di Kumison di Filial di otu país, fla: “Kes misionáriu é prova ma povu di Deus sta unidu na mundu interu. Mésmu kes ki é ka Tistimunha di Jeová ta konsigi odja klaru ma nu ka ta dexa kultura dividi-nu, má kes kuza ki nu ta prende na Bíblia ta djuda-nu ser un família na mundu interu ki sta unidu.”

 Modi ki misionárius na kanpu sta ta djuda publikadoris na ses kongregason? Paulu, di Timor-Lésti, ta da txeu valor pa kes misionáriu ki diziginadu pa se kongregason. El fla: “Lugar ki nu ta mora é kenti dimás. Kes misionáriu ben di lugaris friu, má simé es ka ta dexa di prega pamodi kalor. Di palmanhan es ta sta sénpri na runion pa pregason. I txeu bês N ta odja-s ta faze revizitas na meiu di dia, óras ki sta txeu kalor i ti di noti tanbê. Dja es djuda txeu algen prende verdadi i ami é un di es. Es ten txeu zelu, es é animadu i es ta uza ses vida pa sirbi Jeová. I ses izénplu ta insentiva tudu kongregason pa es da ses midjór na sirvisu di Jeová.”

 Keti, ki é pionera na Malauí, fla modi ki un kazal di misionárius djuda se família: “Kantu es diziginadu pa nos kongregason, mi éra úniku Tistimunha di Jeová na nha família. Má kel kazal djuda-m txeu i es bira amigu di nha família. Ses bon izénplu djuda nhas fidju odja ma si nu sirbi Jeová, nu ta ten un vida sábi i filís. Pamodi bon izénplu di kes misionáriu, gósi nhas três fidju-fémia é pionera i nha maridu sta ta sisti runion.”

 Modi ki nu ta konsigi kuida di kes dispéza di kes misionáriu na kanpu? Nu ta faze kel-li ku ajuda di kontribuisons ki ta fazedu pa óbra mundial. Txeu di kes kontribuison ta fazedu di maneras diferenti na donate.pr418.com. Obrigadu di korason pa kes kontribuison ki nhos ta faze ku amor.