Kongrésu di 2020 ta fika na stória! É nos primeru kongrésu ki gravadu i podu na internet pa tudu algen na mundu interu odja. Má na Malauí i na Mosanbiki, txeu di nos irmons ku irmans odja kongrésu sen uza internet. Modi ki es konsigi?

 Pamodi ses situason, Kumison di Kordenadoris i Kumison di Ensinu di Grupu Enkaregadu di Óbra aprova pa kongrésu dadu na tilivizon ku na rádiu na Malauí ku na Mosanbiki. Pamodi ki es toma kel disizon li? Malauí é un di kes lugar na mundu ki internet é más karu. Pur isu, é sô alguns Tistimunha di Jeová ki ta pode ten internet. Irmon William Chumbi, ki é ménbru di Kumison di Filial na Malauí, fla: “Rádiu ku tilivizon éra kes úniku manera ki irmons ku irmans tinha pa odja kongrésu.” Irmon Luka Sibeko, ki tanbê é ménbru di Kumison di Filial na Malauí, fla: “Na tiritóriu di nos filial, si prugrama ka dada na tilivizon ku na rádiu, é sô alguns irmons ki ta konsigi sistiba kongrésu.” Na Mosanbiki tanbê, kuazi ninhun irmon ka ta konsigi kunpra aparelhus iletróniku, inda más pa kunpra internet.

 Pamodi COVID-19, alguns kanal di tilivizon ku rádiu dja staba ta da prugrama di nos runions. a Nos irmons pâpia ku kes kanal pa es pode da-nu más ténpu pa nu pode mostra nos prugrama di kongrésu.

 Má na Malauí tinha un prubléma. Normalmenti, kes kanal di la ta da ses klienti sô un óra di prugrama. Es ten medu ma algen ka ta sisti ti fin kes prugrama ki ta dura más di ki un óra. Má nos irmons splika-s ma nos prugrama ta djuda pesoas. Sikrê ku es koronavínus, nu sta ta pâpia ku pesoas sobri kes notísia sábi ki sta na Bíblia, ki ta anima-s, ki ta djuda-s konporta más midjór na sosiadadi i ki ta djuda-s ten un família fílis. Kantu es obi kel-li, es seta pididu di nos irmons i es da-s más ténpu di prugrama.

 Na Malauí, prugrama di kongrésu dadu na un kanal di tilivizon i na un kanal di rádiu. Kes kanal li ta da na país interu i milhons di algen ta konsigi sisti. Má na Mosanbiki, prugrama di kongrésu dadu na un kanal di tilivizon i na 85 kanal di rádiu.

 Gastadu 28.227 dóla b (uns 2.623 kontu) pa da kongrésu na tilivizon i uns 20 mil dóla (uns 1.860 kontu) pa da kongrésu na rádiu na kes dôs país la. Présu ki kada kanal kobra é diferenti. Kes kanal más pikinoti kobra 15 dóla (uns 1300 skudu). Má kes kanal más grandi kobra 2.777 dóla (uns 258 kontu).

 Nos irmons sforsa txeu pa uza kes kontribuison di midjór manera. Pur izénplu, na Malauí nos irmons konsigi nogôsia i es baxadu présu. Tanbê es fazedu 30 purséntu di diskontu. Kes diskontu ki es fazedu popa 1.711 dóla (uns 159 kontu). Na Mosanbiki, alguns kanal di tilivizon staba dispostu na baxa présu pamodi es sabe ma nu ta paga kel ki nu konbina i na óra sértu.

 Nos irmons mostra gratidon pamodi es konsigi odja ô obi prugrama di kongrésu na kes kanal na undi ki es ta mora. Un ansion di Malauí, ki txoma Patrick, fla: “Nu ta agradese irmons di Grupu Enkaregadu di Óbra txeu, pa tudu kuza ki es sta faze pa nos prinsipalmenti na es ténpu di koronavírus.” Un irmon ki txoma Isaac, ki tanbê é di Malauí, fla: “Úniku aparelhu ki nu ten é rádiu. Pur isu, nu ta xinti txeu gratidon pa es provizon di organizason di Jeová pa nu obi kongrésu na rádiu. Pamodi kel provizon li, mi ku nha família interu nu prende txeu na kongrésu. Pa nos, kel-li é un próva di amor di Jeová pa se povu.”

 Primeru kongrésu ki un publikador na Mosanbiki sisti é di 2020. El fla: “Kuzas ki fazedu pa nu sisti kongrésu na tilivizon, lenbra-m ma Jeová é Deus Tudu-Poderozu. Koronavírus ka inpidi Jeová di da-nu kumida spritual inda más déntu di nha própi sala, na nha kaza. N odja próva di amor entri povu di Jeová i da-m sertéza ma kel-li ki é relijion verdaderu.”

 Un ansion, ki txoma Wyson, fla: “N ta gostaba di agradese Grupu Enkaregadu di Óbra pa manera ki es sta kuida di nos duránti es ténpu di koronavírus. Txeu di nos é póbri na kel país li. Má simé, nu konsigi sisti prugrama i prende txeu kuza pamodi kel provizon li di sisti kongrésu na rádiu ku na tilivizon.”

 Pa kongrésu di 2021, Kumison di Kordenadoris i Kumison di Ensinu aprova pa kongrésu dadu na tilivizon i na rádiu na alguns lugar. Modi ki nu ta konsigi paga tudu dispéza pa kongrésu dadu di kes manera li? Através di kes kontribuison ki ta fazedu pa trabadju na mundu interu. Txeu di kes kontribuison li, ta fazedu através di kes manera diferenti ki sta na donate.pr418.com. Obrigadu pa nhos kontribuisons di korason.