Kel anu li, un di kes kuza ki Tistimunhas di Jeová tinha más gana di odja é Drama 1 di Stória di vida i trabadju di pregason di Jizus. Milhons di algen dja odja-l. I kel-li é sô primeru di kes 18 drama! Kuzê ki irmons ku irmans sta ta faze pa djuda filma kes drama i modi ki bus kontribuison sta ta djuda-nu?

 Maior párti di kes drama di Vida i pregason di Jizus sta ta filmadu na filial di Australázia. Pa filma kada séna, uns 50 ti 80 algen ta sta na lugar di filma. a Es ta dadu almosu, lanxi i jantar. Pur isu, txeu ténpu antis, irmons ta disidi ki kumida ki es ta faze pa kes irmon. Irman Ester ki ta trabadja na Dipartamentu di Kumida, fla: “Nu ta kunpra kes kuza ki nu meste pa faze kumida na txeu lugar diferenti, asi nu ta ten serteza ma nu ta ten kumida di bon kualidadi na bon présu. Tanbê sénpri nu ta djobe dretu kuantidadi di kuzas ki nu ta poi na reseita, asi pa garanti ma nu ka ta dexa kumida straga.” Tudu dia nu ta gasta uns kuatu dóla b (uns 400 skudu di Kabu Verdi) pa kada algen, pa nu pode da-s kumida.

 Kes irmon ki ta trabadja na es prujétu ka meste sô di kumida, má di proteson tanbê. Pamodi ki es meste proteson? Na Austrália ten txeu dia ki ta sta kalor ku sol i tanbê ten txeu lus prigozu di sol. Pa proteje tudu algen di kes lus i pa ningen ka pasa mal pamodi kalor dimás, ten irmons ki ta trabadja duru pa arma ténda i lugar pa toma frésku. Tanbê, ten protetor solar, sonbrinha i agu pa tudu algen. Irmon Kevin, ki ta faze párti di Dipartamentu di Trabadjus di Son ku Vídiu, fla: “Maioria di irmons ki ta faze kel trabadju li ta mora fóra di Betel. Es ta faze kel trabadju li i txeu otus trabadju ku umildadi i alegria. Nu ka ta konsigi faze kel prujétu li sen es.”

 Nu ta kustuma filma na kes lugar di filma ki filial faze déntu ô fóra di stúdiu. Má alguns di kes séna ka ta parseba rial si nu filmaba es na kes lugar li. Pur isu, alvês nu ten ki filma na otus lugar. Pur izénplu, pa filma kes séna di ténpu di Jizus, txeu bês nu ten ki bai pa lugaris izoladu, ki ka ten pósti di lus, strada di alkatron i kazas modérnu. Kel-li krê fla ma kes ekipamentu, ropa i tudu kes otu kuza ki meste pa kes séna, ten ki podu na kaxa, lebadu pa kel lugar di filma i guardadu di manera suguru. Tanbê, antis di kumesa filma, alguns irmon ta skodjedu pa garanti ma ten mutor, agu i kaza-banhu. Kes irmon di ekipa ta kustuma fika na kaza di irmons di kel lugar, na karus ki é sima kaza pikinoti, na otel i na otus lugar.

 Filma na kes lugar izoladu pode ser kansadu i pode gastadu txeu ténpu i dinheru. Pur isu, na 2023, Grupu Enkaregadu di Óbra aprova pa kunpradu un paredi dijital ki kusta dôs milhon i meiu di dóla (uns 250 mil kontu na dinheru di Kabu Verdi). Kel tekinolojia li ta uza un konjuntu di ekran, ki ten un bon kualidadi di imajen, sinkronizadu ku lus ki ta poi ta parse ma un séna filmadu fóra di stúdiu. Di kel manera li, nu ta konsigi ivita gasta txeu dinheru pa ba filma na otus lugar. Darren, ki ta faze párti di Kumison di Filial di Australázia, fla: “Uza paredi dijital pa filma, ta djuda kes algen di ekipa ka fika kansadu dimás i ta da-nu xansi di torna filma alguns séna. Pur izénplu, óras ki nu ta filma fóra di stúdiu, nu ten sô alguns minutu pa filma sol ta kanba. Má ku un paredi dijital, nu pode kontinua ta poi sol ta kanba ti ki nu konsigi kel séna ki nu krê.”

 Pa faze kada un di kes drama di Vida i pregason di Jizus, mestedu txeu ator i más txeu algen inda pa djuda filma. Modi ki es ta xinti óras ki es ta odja tudu kuza ki sta fazedu pa kuida di es?

 Amber, ki ta mora na Melbourne, faze un viajen di más di 700 kilómetru, (435 milha) pa el pode partisipa na kel prujétu li. El skrebe: “Lógu ki N txiga na aeroportu, irmons di Betel kuida dretu di mi. Txeu betelita konvida-m pa N ba kume ku es ô toma un xá. Na lugar di filma, tudu algen mostra-m amor i pô-m xinti avontádi. Kel ténpu ki N pasa la foi xeiu di benson. Pa mi, kel-li ka foi un sakrifisiu!”

 Derek ta trabadja na ekipa ki ta faze kes vídiu. El fla: “Désdi ki prujétu kumesa, txeu dipartamentu apoia-nu. N ta xinti txeu gratidon na nha korason pamodi N sta djuntu ku irmons i irmans ki sakrifika ses ténpu, kuzas ki es ten i forsa pa es prujétu. Es tudu é bondozu i dispostu na djuda na kel ki nu meste. Ta fika klaru ma Jeová sta ta abênsua nos tudu. N ten serteza ma Jeová ta preokupa ka sô ku rezultadu di nos trabadju, má tanbê ku manera ki nu sta konsigi faze-l.”

 Obrigadu pa kes kontribuison ki nhos faze ki sta djuda pa kes drama li fazedu. Kel-li ta inklui kes kontribuison ki ta fazedu na donate.pr418.com.