Un jóven na Kulónbia, ki txoma Nicole, fla: “N gosta di nha Salon di Reinu! El é kel lugar undi ki N pode sta djuntu ku nhas irmon i irmans.” Bu ta xinti sima el?

 Na mundu interu ten uns 63 mil Salon di Reinu ki Tistimunhas di Jeová ta djunta pa sisti runion. Kes Salon di Reinu fazedu di un manera ki ta pô-nu ta xinti sábi pa adora Deus. Má é ka sô kel-li. Un pioneru fíksu na Kulónbia, ki txoma Davidi, fla: “Nos Salons di Reinu ta poi kel mensajen ki nu ta inxina más bunitu. Txeu algen ki ta vizita nos Salons di Reinu ta fika dimiradu óras ki es odja modi ki nu ta kuida dretu di kes lugar.” Má, kel-li ka ta kontise atoa. Nu ta sforsa txeu pa linpa i kuida di nos Salons di Reinu. Modi ki nu ta konsigi faze kel-li?

 Kes kongregason ki ta uza un Salon di Reinu ten responsabilidadi di kuida di el. Pur isu, irmons ku irmans sénpri ta linpa ses Salon di Reinu. Tanbê, sénpri es ta kuida i es ta konpo kes kuza pikinoti ki straga.

 Pa djuda kes kongregason, Dipartamentu di Dizenhu i Konstruson (LDC) ta skodje alguns irmon pa trena otus irmon ku irmans sobri modi ki es ta linpa i kuida di ses Salon di Reinu. Kada un di kes irmon ki skodjedu pa da kel trenu, ta kuida di 6 ti 10 Salon di Reinu. Es ta vizita i es ta trena kes publikador na kes kongregason sobri modi ki es ta kuida di ses Salon di Reinu. Kada três anu es ta analiza kada Salon di Reinu, i es ta djobe si ten algun kuza ki meste konpo ô si ten algun prubléma di suguransa.

 Nos irmons ku irmans ta fika txeu kontenti ku kes trenamentu ki kes irmon ta da-s. Un irman na Índia, ki txoma Indhumathi, fla: “Kel trenamentu foi sábi dimás! Foi bon prende modi ki nu ta konsigi kuida di nos Salon di Reinu dretu.” Un irmon na Kénia, ki txoma Evans, fla: “Nu prende modi ki nu pode popa txeu dinheru óras ki nu ta rezolve kes prubléma pikinoti, antis di es bira un prubléma grandi.”

 Duránti un anu ta gastadu txeu dinheru pa paga kes dispéza i pa kuida di un Salon di Reinu. Má, kel dinheru ki nu ta gasta ta dipende di undi ki kel Salon ta fika, di kantu ténpu ki el ten i di kantu kongregason ki ta uza kel Salon. Modi ki nu ta konsigi paga kes dispéza li?

 Nu ta uza kel dinheru di kes kontribuison ki ta fazedu pa paga kes dispéza. Un irmon na Kazakiston, ki txoma Alexander, fla: “Un párti di kel dinheru ta uzadu pa paga internet i otus kuza, sima agu i lus. Otu párti ta uzadu pa kunpra kuzas sima tuadja di papel, luva-s, produtu di linpéza i tinta.” I kes otu párti ta mandadu pa djuda na trabadju ki ta fazedu na mundu interu pa kes prujétu más grandi i ki ta gasta más dinheru.

 Si un Salon di Reinu meste konpodu, i kel trabadju ki es sta ta ba faze ta kusta más txeu di ki kel ki es ta kustuma gasta na dôs ô três mês pa kuida di kel Salon, ansions ten ki pâpia ku kel irmon di LDC ki ta da trenu. Si LDC aprova kel prujétu, normalmenti ta uzadu kel kontribuison ki ta fazedu pa trabadju na mundu interu. Duránti anu di sirvisu di 2023, uzadu 76,6 milhon di dóla a (uns 7,7 bilhon di skudu na dinheru di Kabu Verdi) pa faze 8.793 di kes prujétu. Nu ben odja dôs di kes prujétu li.

 Na Angola, un Salon di Reinu ki ten 15 anu staba ku txeu prubléma. Kel instalason di lus staba ta meste troka, kes paredi staba ratxadu i kes vizinhu da kónta ma agu staba ta kai na ses kaza. LDC faze un prujétu pa rezolve kes prubléma li. Na kel prujétu li, es gasta 9.285 dóla (kuazi mil kontu na dinheru di Kabu Verdi). Kes vizinhu fika gratu i es fika dimiradu ku kel manera ki es faze kel trabadju.

 Na Pulónia, un Salon di Reinu staba ku tétu ta pinga i tapeti staba stragadu di un manera ki ka ta daba pa konpo. LDC aprova un prujétu pa konpo kel tétu i pa troka kel tapeti. Pa faze kel prujétu, uzadu 9.757 dóla (kuazi mil kontu na dinheru di Kabu Verdi). Pamodi kel-li, es ka ta meste faze un trabadju más grandi na kel Salon pa alguns anu.

 Kes trabadju di linpa i kuida ka ta sô popa kes kontribuison, má tanbê ta lova Jeová. Un irmon na Tonga, ki txoma Shaun, fla: “Pamodi kel trabadju ki nu ta faze, nu ta pode adora Jeová na un Salon di Reinu linpu, organizadu i ki ta funsiona dretu. Kel-li ta poi pesoas di kel zóna ta pensa dretu di nómi di Jeová. Nu ta xinti orgulhu di konvida pesoas pa nos Salon di Reinu.”

 Nos tudu nu pode djuda linpa i kuida di nos lugar di adorason. Marino, ki é un di kes irmon ki ta da trenu na Austrália, fla: “Nos tudu nu pode faze párti di kel priviléjiu di kuida di nos Salons di Reinu. Óras ki nu ta djuda, nu sta ta faze txeu pa popa kes kontribuison i pa es uzadu na kes lugar ki más ta mestedu.”

 Un irmon na Índia, ki txoma Joel, gosta di kel trabadju ki ta fazedu pa kuida di se Salon di Reinu. El fla: “Trabadja djuntu ku nhas irmon ta djuda-m odja modi ki ta ben ser na mundu novu.” Nicole, ki dja nu papiaba di el antis, fla: “Ka dura li, N djuda linpa txon timenti irmons staba ta konpo kaza di banhu ki staba ta perde agu. Sikrê N ka partisipa pa konpo kel prubléma, N djuda pa ka ten asidenti.”

 Si bu ta gostaba di djuda na linpa i kuida di bu Salon di Reinu, pâpia ku ansions di bu kongregason. Tanbê, kes kontribuison ki bu ta faze, ka ta sô djuda na linpa i kuida di bu Salon di Reinu, má tanbê ta uzadu pa djuda otus Salon di Reinu na mundu interu. Kes kontribuison pode fazedu na kaxas di kontribuison na bu Salon di Reinu ô na donate.pr418.com. Obrigadu pa nhos kontribusions ki nhos ta faze di korason.