Tudu anu senténas di milharis di algen ta batiza. Pur isu, nu meste kada bês má txeu di prédius pa nu uza na nos adorason pa Jeová. Pa faze kel-li, kes Dipartamentu di Dizenhu i Konstruson di kada lugar na mundu interu, tinha planu pa faze i pa konpo más di 2.700 lugar di adorason duránti anu di sirvisu di 2020. a

 Má pamodi COVID-19 kumesa ta spadja, kes planu muda. Pa proteje nos irmons i pa obi ku kes orientason ki govérnus da, Kumison Editora di Grupu Enkaregadu di Óbra para maioria di kes prujétu di konstruson na mundu interu. Má duránti anu di sirvisu di 2020, más di 1.700 lugar di adorason fazedu ô konpodu antis di koronavírus kumesa ta spadja na mundu. Alén di kel-li, más di 100 prujétu grandi na prédius ki filial ta uza, fazedu tudu. Odja modi ki dôs prujétu di konstruson ki fazedu tudu djuda nos irmons.

 Filial di Kamarons. Kel filial ki es ta uzaba antis na sidadi di Douala, éra pikinoti dimás i el staba ta meste konpo alguns kuza. Kumison Editora pensa na torna konpo kel filial, má valor pa faze kel-la éra más txeu di ki valor di kel prédiu. Tanbê es pensa na kunpra un txon i faze un betel novu ô kunpra un prédiu ki dja staba fetu i konpo-l. Má ninhun di kes planu li ka da sértu.

 Na kel ténpu la, irmons da kónta ma govérnu staba ta faze planu pa faze un strada ki ta pasaba na ladu di nos Salon di Asenbleia, na nórti di Douala. Konstruson di kel strada ta djudaba pa algen txiga más faxi la i ta djudaba pa kel prédiu tinha alguns sirvisu sima lus, agu i otus kuza. Éra kel-li própi ki filial staba ta meste. Nton, Grupu Enkaregadu di Óbra da aprovason pa fazedu kel betel novu na un párti di kel txon di Salon di Asenbleia.

 Irmons i alguns algen di kes inpréza ki kontratadu trabadja djuntu na kel prujétu. Kel planu li popa ténpu i dinheru. Na verdadi es gasta mutu ménus di ki kel ki es tinha na planu! Es popa más di 2 milhon di dóla (uns 185 milhon di skudu di Kabu Verdi). Família di betel konsigi muda pa kel prédiu novu poku ténpu antis di COVID-19.

 Kes betelita di Kamarons ta vive i ta trabadja midjór na kel betel novu. Pa es, kel-li é un prezenti di Jeová. Un kazal fla: “Nu krê trabadja inda más txeu i nunka nu ka krê dexa di da valor pa kel prezenti ki nu resebe.”

 Skritóriu di traduson (RTO) di tojolabal na Méxiku. Duránti txeu anu, ekipa di traduson di língua tojolabal trabadja na filial di Mérka Sentral, ki ta fika pértu di sidadi di Méxiku. Má kel língua li ta papiadu prinsipalmenti na kes sidadi di Altamirano i Las Margaritas, ki ta fika kuazi mil kilómetru lonji di betel! Pur isu, éra difísil pa kes tradutor kunpanha kes mudansa ki ta ten na língua. Tanbê éra difísil es atxa irmons ku irmans pértu di betel ki ta djudaba es na traduson ô na gravason na kel língua li.

 Pamodi kel-li, Kumison di Redason di Grupu Enkaregadu di Óbra kria pa kel ekipa di traduson pa língua tojolabal fika na un lugar undi ki kel língua ta papiadu. Nton, filial disidi kunpra i konpo un prédiu ki dja staba fetu. Kel-li fika más baratu di ki faze ô renda un lugar.

 Un tradutor fla modi ki kel mudansa pa kel RTO novu djuda-l: “Duránti kes 10 anu ki N trabadja na traduson na filial, N ka konxe ninhun família ki ta papiaba nha língua na kel lugar. Gósi nos skritóriu sta justu na kel lugar undi ki tojolabal ta papiadu. Tudu dia N ta pâpia ku algen ki ta pâpia tojolabal. Kel-li sta djuda-m konxe más palavra i midjora kualidadi di nha trabadju.”

 Si situason da, na anu di sirvisu di 2021 sta fazedu planu pa faze ô konpo 75 RTO i prédius pa uzadu na skólas di Reinu. Trabadju tanbê ta kontinua na otus prujétu grandi di prédius di filial, i kel-li ta inklui kel prujétu novu di sédi mundial na Ramapo, na Nova York, i kes mudansa di filial di Arjentina i di Itália. Alén di kel-li, nu meste faze más mil Salon di Reinu, troka 6 mil lugar ki ta fazedu runion pamodi es ka sta na bons kondison i konpo 4 mil Salon di Reinu.

 Di undi ki ta ben tudu kel dinheru pa faze i konpo kes lugar di adorason? Un irmon di Kumison di Filial na Mérka Sentral, ki txoma Lázaro González, responde kel pergunta li timenti el staba ta pâpia sobri kel prujétu di RTO di tojolabal. El fla: “Tiritóriu di nos filial é póbri, nton sen ajuda di nos irmons na mundu interu nunka nu ka ta konsigiba faze skritóriu di traduson pa nos irmons di li. Gósi kes irmon ki ta traduzi pode fika pértu di lugar undi ki pesoas ta pâpia kel língua pamodi kontribuison ki tudu nos irmons ta faze. Nu ta agradese nos irmons na mundu interu di korason pa kes kontribuison ki es ta faze ku amor.” É simé, sô nu ta konsigi faze kes konstruson li pamodi kes kontribuison ki ta fazedu pa óbra na mundu interu. Txeu di kes kontribuison li ta fazedu através di site donate.pr418.com.