“Ka ten txeu ténpu ki nen nu ka ta imajinaba ma nu ta resebeba kumida spritual na formatu dijital.” Bu ta konkorda ku kel-li? É si ki irmon Geoffrey Jackson fla, na un diskursu ki ta nkoraja na Relatóriu di Grupu Enkaregadu di Óbra di 2020 — Nunbru 6. Inda el fla: “Má gósi, talvês nu ta pergunta: Modi ki nu ta lidaba ku koronavírus sen kuzas sima JW Library? Jeová pripara-nu duránti tudu kes anu li pa nu sta prontu pa un kuza sima kel-li.”

 Modi ki Jeová sta pripara-nu? Ki trabadju fazedu pa kria aplikativu i kuzê ki meste fazedu pa el kontinua ta funsiona dretu i pa ba ta midjora-l?

 Na maiu di 2013, Grupu Enkaregadu di Óbra pidi pa irmons ki ta trabadja na un dipartamentu na Sédi Mundial ku MEPS, ki é Sistéma di Konputador pa Trabadja Testu na un Monti Língua, pa faze un aplikativu ki ten Tradução do Novo Mundo revizadu na el. Paul Willies, ki é un irmon ki ta trabadja ku sistéma di MEPS, fla: “Antis nu ka lansaba ninhun aplikativu pa aparelhus iletróniku na ninhun lója di aplikativus. Má nu kria un ekipa, nu para alguns prujétu i nu trabadja ku otus dipartamentu pa dizenha kel aplikativu, pa faze-l i pa pô-l kes kuza ki meste. Nu faze txeu orason i ku ajuda di Jeová, kel aplikativu lansadu na runion anual sô sinku mês dipôs, na kel mésmu anu!”

 Kel otu dizafiu éra ba ta poi na kel aplikativu más publikason i más língua asi pa el biraba na un bibliotéka di verdadi. Na janeru di 2015, txeu di kes últimu publikason na inglês dja staba disponível na kel aplikativu. I sô 6 mês dipôs, algen podia diskarega kes publikason na senténas di língua.

 Désdi kel ténpu, nos irmons dja midjora kel aplikativu di txeu manera. Es poi más vídiu, tudu publikason i fotus, vídius ku dizenhus pa runions na un párti. Tanbê nu pode sta na un versíklu di Bíblia Library i bai dirétu pa kes referénsia di Guia de Pesquisa.

 JW Library ta abridu tudu dia na 8 milhon di aparelhus iletróniku i tanbê el ta abridu na más di 15 milhon di aparelhus iletróniku tudu mês! Kuzê ki meste fazedu pa kel aplikativu li kontinua ta funsiona dretu na tudu kes aparelhu iletróniku? Irmon Paul Willies ta splika: “Un aplikativu pa aparelhus iletróniku, nunka ka ta fika konplétu. Nu meste sta sénpri ta trabadja na el pa pô-l funsons novu, ki ta djuda algen i ki ta ser más fásil di uza. Dja ki kes sistéma, ki ta poi aparelhus iletróniku ta funsiona, ta atualizadu sénpri, nu meste sta sénpri ta atualiza nos aplikativu pa el kontinua ta funsiona na kes sistéma. Tanbê nu ten ki atualiza software di nos aplikativu i faze alguns kuza pa el kontinua ta funsiona dretu, timenti nunbru di publikasons i di aúdiu ku vídiu na JW Library sta ta bira más txeu.” Si nu konta tudu língua ki ten na JW Library, gósi nu tene uns 200 mil publikasons i más di 600 mil gravasons di aúdiu ku vídiu!

 Ta meste más di ki sô ekipamentus di konputador pa mante kel aplikativu li ta funsiona. Tanbê ta meste paga pa pode uza alguns prugrama di konputador. Sô un lisénsa ta kusta 1.500 dóla di Mérka (uns 139 kontu) pa anu. Tanbê sistéma di MEPS ta gasta pa anu uns 10 mil dóla di Mérka (uns 928 kontu) na aparelhus iletróniku di inprézas diferenti asi pa nos aplikativu kontinua ta funsiona na kes konputador novu, tablet i telemóvel.

 Pamodi JW Library, gastadu mutu más poku dinheru na inprimi, nkaderna i manda publikasons. Un izénplu di kel-li é bruxura Izamina testu di dia. Nu inprimi kuazi 12 milhon di kópia di Izamina testu di dia di 2013. Má na 2020, nu inprimi sô uns sinku milhon, nbóra nu tinha más 700 mil publikador na mundu interu. Pamodi ki nu faze kel-li? Pamodi txeu di nos irmons ku irmans, gósi sta lé testu di dia na aplikativu JW Library. a

 JW Library tanbê ta djuda kes algen ki ta uza-l di monti otus manera. Geneviève, ki ta mora na Kanadá, da kónta ma pamodi aplikativu JW Library, el sta studa más txeu. El fla: “Pa N ser sinseru, si N tinha ki panha tudu livru ki N ta meste pa studa, N ta atxa ma N ka ta konsigi studaba tudu dia di sédu. Má ku kel aplikativu li, N ta panha sô nha tablet i N tene tudu kuza ki N ta meste pa N studa. Studa sénpri bira nha fé más fórti i N bira más amigu di Jeová.”

 Kel aplikativu li ta djuda inda mutu más txeu duránti es COVID-19. Charlyn, ki é di Mérka, fla: “Ku COVID-19 ta spadja na mundu, dja ten más di un anu ki N ka resebe ninhun di nos publikasons inprimidu. Má aplikativu JW Library sta da-nu tudu kel ki nu meste pa nu kontinua ku un fé fórti. N ta agradese Jeová pa es prezenti xeiu di amor.”

 Txeu algen ta xinti sima Faye, ki ta vive na Filipinas. El fla: “N ta uza kel aplikativu li pa N kontinua ku un amizadi fórti ku Jeová. É el ki N ta uza pa N lé primeru kuza lógu sédu palmanhan. N ta ba ta obi kuzas na el timenti N ta kuida di kaza. É el ki N ta uza pa N studa pa runion i é el ki N ta uza pa pripara pa nha studu di Bíblia. Óras ki N tene ténpu livri, N ta odja vídius na el. N ta lé artigus ô Bíblia na el, timenti N sta ta spéra na fila. El ta djuda rei di txeu.”

 Kel aplikativu li tanbê ta djuda txeu na pregason. Pur izénplu, timenti un irman staba na pregason na Kamaron, el krê uzaba un testu di Bíblia ki el odjaba un otu irman ta uza alguns simana antis. Má el ka lenbra na undi ki el ta atxa kel versíklu. El splika: “Filismenti N lenbra di un párti di kel testu. N abri Library, N bai na Bíblia i N piskiza kel párti. Kel óra, N atxa kel testu. Uza JW Library ta djuda-m atxa txeu testu ki alvês N ta skese.”

 Nhos kontribuisons di korason através di kes manera ki sta na donate.pr418.com, dja djuda-nu kria, midjora i mante JW Library ta funsiona dretu pa tudu nos irmons ku irmans na mundu interu. Obrigadu pa nhos kontruibuisons ki nhos ta faze di korason.

1. Na otubru di 2013 — Lansadu aplikativu i dja el tinha Tradução do Novo Mundo revizadu na el.

2. Na janeru di 2015 — Podu publikasons na inglês i dipôs na senténas di otus língua.

3. Na novenbru di 2015 — Podu funson di sublinha.

4. Na maiu di 2016 — Podu kel párti sô pa runion.

5. Na maiu di 2017 — Podu kel funson ki é pa toma nóta.

6. Na dizenbru di 2017 — Podu más alguns kuza na Bíblia di studu.

7. Na marsu di 2019 — Podu funsons di diskarega gravasons di aúdiu, odja vídiu sen diskarega i odja kes referénsia di Guia de Pesquisa na JW Library.

8. Na janeru di 2021 — Midjoradu kes funson pa uza midjór Vive filís pa tudu ténpu!.