Na janeru di 2021, Grupu Enkaregadu di Óbra aviza ma ta tinha lansamentu di un novu feraménta pa studa Bíblia, ki é livru Vive filís pa tudu ténpu!. a Modi ki bu xinti kantu ki bu obi kel avizu li? Matthew, ki ta mora na Kanadá, fla: “N fika uma kontenti! I sima N ba ta obi kel splikason ki dadu na diskursus i kes vídiu ki splika pamodi ki kel publikason li fazedu i modi ki el sprimentadu, N ka staba ta odja óra di pega-l na mô i kumesa ta uza-l.”

 Livru Vive filís pa tudu ténpu! traze un novu manera di faze studus di Bíblia. Má, é ka sô kel-li ki ta poi kel novu livru li ta ser diferenti di kes otu feraménta di studa Bíblia. Si bu ta uza livru Vive filís pa tudu ténpu! na papel, talvês dja bu da kónta ma el fazedu ku un tipu di papel diferenti. Pa bu sabe pamodi, nu ben odja modi ki fazedu kel livru li.

 Papel más pizadu. Pamodi ki tinha ki ser si? Livru Vive filís pa tudu ténpu! ten más di 600 imaji ki ten txeu kor. Kel-li é 10 bês más txeu di ki kes imaji ki ten na livru Prende na Bíblia! Kel livru novu li tanbê ten más spasu vaziu, sen nada skrebedu i sen ninhun imaji na kes párti. Kes dôs kuza li pode ser un prubléma pamodi óras ki papel é lébi nu ta konsigi odja imajis ki ta parse na kel otu pájina. Pa ivita kel prubléma li irmons di Dipartamentu Internasional di Inpreson (IPD), na Wallkill, Nova York, na Mérka, sprimenta kuatu tipu di papel ki nu ta kustuma uza pa faze inpreson. Kumison di Redason di Grupu Enkaregadu di Óbra, analiza kada un di kes tipu di papel i es skodje kel más pizadu. Nbóra kel tipu di papel li é uns 16 pursentu más karu di ki kes otu papel ki nu ta kustuma uza pa faze nos publikasons, el ta djuda studantis lé kada un di kes pájina di livru Vive filís pa tudu ténpu! sen distrai ku kes imaji ki ta parse na kel otu pájina.

 Un proteson di kapa diferenti. Kapa di kel livru novu li é diferenti di kapa di kes otu livru pamodi el podu un proteson diferenti. Envês di el ten proteson sima kes otu livru, kel proteson ki podu na es livru novu ta distaka kel imaji ki el ten na kapa. Dja ki nu ta uza-l sénpri, kel proteson ki el ten, tanbê ta djuda pa livru ka straga faxi. Má, kel tipu di proteson li pode ser sinku bês más karu di ki kel otu ki nu ta kustuma uza. Nton txeu filial trabadja djuntu pa konsigi atxa kel tipu di proteson li más baratu.

 Pamodi ki nu skodje kes material más karu? Un irmon, ki ta trabadja na Dipartamentu Internasional di Inpreson, splika: “Nu ta spéra ma es livru li ta uzadu dretu, pur isu, nu krê pa el kontinua ku bon aparénsia sikrê el uzadu txeu.” Eduardo, ki ta trabadja na Skritóriu di Inpreson na Filial di Brazil, fla: “Nu ta fika txeu kontenti di odja modi ki organizason di Jeová uza material di kualidadi pa poi kel livru li ta fika bunitu, ta dura txeu i más sábi di uza. Má, omésmu ténpu es mostra sabedoria na uza kontribuisons ki irmons ta faze.”

 Nu kumesa ta inprimi livru Vive filís pa tudu ténpu! na marsu di 2021. Nu tevi alguns dizafiu pamodi COVID-19. Dja ki Betel staba fitxadu, nu ka resebe ajuda di irmons di fóra pa faze inpreson i nen nu ka podia konvida novus irmon pa sirbiba na Betel. Pamodi kel-li, alguns inpresora ka tinha irmons ki ta txigaba pa trabadja i otus fika paradu duránti algun ténpu pamodi órdi di govérnu.

 Modi ki nu vense kes dizafiu li? Kantu dipartamentu di inpreson kumesa ta funsiona, irmons ku irmans ki ta faze párti di otus dipartamentu di Betel diziginadu pa apoia na inpreson duránti algun ténpu. Un irmon ki txoma Joel, ki ta trabadja ku Dipartamentu Internasional di Inpreson, fla: “Ses atitudi i ses vontadi di prende kuzas novu foi rei di inportanti pa kel trabadju li pode kontise.”

 Sikrê ku kes dizafiu, dja nu konsigi inprimi milhons di kópia di livru Vive filís pa tudu ténpu!. Pa nu faze kel trabadju li nu ta meste di txeu tipu di material, sima plakas di inpreson, proteson di kapa, papel, tinta i kóla. Na kes primeru sinku mês ta inprimi, nu gasta más di 2,3 milhon di dóla (di Mérka) sô na material. Pa popa dinheru, nu inprimi sô kel kuantidadi di livru ki kongregasons meste.

 Kuzê ki kes instrutor i ses studanti sta atxa di es novu feraménta di studa Bíblia? Paul, un irmon ki ta mora na Austrália, fla: “Livru Vive filís pa tudu ténpu! é sábi dimás di uza ki N ta fika ku vontadi di faze studus di Bíblia. Kel livru li ta txoma atenson i é un livru sábi pa studa Bíblia. El ten informason klaru, perguntas ki ta toka korason, vídius, imajis, kuadrus i métas pa studanti. Tudu kes kuza li ta konbina ku kunpanheru. É un óbra di arti ki ta motiva-m pa N midjora nha manera di inxina.”

 Un studanti di Bíblia na Mérka, fla: “N gosta txeu di es livru novu. Kes vídiu, fotus i imajis ta djuda-m ntende kes pontu prinsipal. Kes vídiu ta toka nha korason i ta motiva-m pa N aji.” Kel studanti li sta ta studa dôs bês pa simana i el ta sisti tudu runion.

 Inda falta milhons di livru Vive filís pa tudu ténpu! pa inprimi na txeu língua. Na verdadi, ti gósi, Grupu Enkaregadu di Óbra dja aprova pa lansa kel livru li na 710 língua. Kel-li é 340 língua más txeu di ki kel ki aprovadu pa livru Prende na Bíblia.

 Modi ki nu ranja dinheru pa faze kes inpreson? Nu uza kes kontribuison ki ta fazedu pa trabadju na mundu interu. Txeu di kes kontribuison li ta fazedu na donate.pr418.com. Nu ta agradese nhos di korason pa nhos kontribuisons, ki ta djuda-nu faze feraméntas di studa Bíblia pa djuda kes ki krê prende sobri Jeová i vive filís pa tudu ténpu. — Salmo 22:26.