Na txeu país, présu di kumida, ropa i renda sta ta bira kada bês más karu, pur isu vida di pesoas sta ta fika difísil, i kel-li ta inklui Tistimunhas di Jeová. Má, envês di Tistimunhas di Jeová fika txeu preokupadu i ku ansiadadi, es ta xinti konsoladu pamodi es sabe ma Jeová ‘nunka ka ta bandona’ se sérvus. (Ebreus 13:5) Txeu bês, Jeová dja kunpri kel promésa li. El faze kel-li na Filipinas, ki é un lugar undi pesoas ta kontinua ta vive na pobréza. Má duránti dékada di 1970 i 1980, kel país li pasa pa un situason txeu difísil.

 Un irman ki txoma Vitória a fla: “Alvês N ta txoraba pamodi N ka tinha kumida ki ta txigaba. Na alguns momentu N tinha sô arôs, sal i agu.” Un irmon ki txoma Lorensu, ki ka staba ta atxa trabadju, fla: “N tinha sô três kamiza i três kalsa ki N ta bistiba pa sisti runion i asenbleia.” Modi ki povu di Jeová lida ku kel situason li? Kuzê ki djuda-s kontinua ta sirbi Jeová di manera fiel? I modi ki ses izénplu pode djuda-nu oji si nos situason muda di rapenti?

 Tistimunhas di Jeová na Filipinas tinha kunfiansa ma Jeová ta kuidaba di es duránti kel ténpu difísil. (Ebreus 13:6) I txeu bês el faze kel-li di manera ki pesoas ka staba ta spera. Pur izénplu, un irman ki txoma Sisília fla: “Un dia, dipôs ki nu kuzinha nos últimu xikra di arôs pa kafé, nos família ki tinha kuatu algen fika sen nada pa kume. Nton nu faze orason pa pidi Jeová kuzê ki nu mesteba pa kel dia. Timenti inda nu staba ta toma kafé, un irmon traze-nu sinku kilu (11 libra) di arôs. I nu txora pamodi nu staba txeu gratu i txeu kontenti ku kel benson di Jeová. Nu tevi txeu otus spiriénsia sima kel-li.”

 Tanbê povu di Deus aplika kes konsedju ki sta na Bíblia. (Provérbios 2:6, 7) Pur izénplu, un irman ki txoma Arminda, ki tinha poku ténpu batizadu i ki éra soltera, staba ta luta pa se sustentu. El abri se korason pa Jeová i el konta-l tudu se preokupasons. Nton el pensa na Provérbios 10:4, ki ta fla: ‘Algen ki ten mô prigisozu ta kai na pobréza, má ken ki ten mô trabadjador ta ten rikéza.’ El krê aplikaba kel testu li. Pur isu, el disidi faze un órta. El fla: Jeová abênsua-m nha sforsu. Na verdadi, N konsigi símia kumida ki ta txigaba pa N kume, pa N bende i ki ta daba mi dinheru pa transpórti.”

 Tanbê kes irmon ka tinha dinheru pa kunpra un txon i faze Salon di Reinu. Má kel-li ka inpidi-s di obi ku órdi di sta djuntu pa inkoraja kunpanheru. (Ebreus 10:24, 25) Es faze kel ki es ta podeba pa faze runion. Pur izénplu, un irman ki txoma Débura fla: “Uns 6 di nos ta sistiba runion na un kabana pikinoti ki mi i otu irman, ki éra nha koléga di sirvisu di pioneru, faze. Nu uza folha di un tipu di palmera pa kubri-l, folha di pé di koku pa faze paredi i tronkus di palmera pa faze bankus”.

 Txeu irmon ku irmans ta ofereseba ses kaza pa nu fazeba runions. Un irman ki txoma Virjínia fla: “Nos kaza pikinoti fazedu ku padja i banbu. Tudu sábadu nu tinha ki traba mobília asi pa tinha spasu pa irmons sisti runion na kel otu dia.” Na otu kaza kel tedja ta pingaba. Un irmon ki txoma Nuel fla: “Óras ki ta txobeba, nu ta poba baldis pa agu kaíba déntu di el. Má kuazi nu ka ta reparaba na kes prubléma pamodi nu staba ta adora Jeová djuntu ku nos irmons ku irmans.”

 Falta di dinheru ka poi irmons ta diminui ses zelu pa pregason. Linda, ki ta vive na ilha di Negros fla: “Dja ki nha família éra grandi i nha pai éra úniku algen ki ta trabadjaba, nen sénpri nu ta tinha dinheru pa transpórti. Pur isu, txeu bês nu tevi ki anda pa txigaba na nos tiritóriu. Má kel-li éra sábi pamodi nos família éra un grupu grandi. Tanbê nu sabia ma nos sforsu ta dexaba Jeová kontenti.”

 Un di kes prubléma más grandi ki nu tinha pa ba prega na kes tiritóriu lonji ku txeu montanha é pamodi tinha poku ô ninhun transpórti públiku. Ester, ki ta vive na un ilha ki txoma Luzon, fla: “Nos grupu ki tinha entri 6 i 12 Tistimunha di Jeová tinha ki bai sédu pamodi nu tinha ki anda txeu kilómetru. Nu ta pasaba dia interu ta prega. Nu ta lebaba kumida dja kuzinhadu ki nu pode kumeba na sónbra di arvis. Alguns di nos irmons ku irmans ka ta tinha nada pa kume. Má, es ta baba simé. Nu ta flaba: ‘Ka nhos preokupa. Nu ten kumida ki ta txiga pa tudu nos.’”

 Jeová abênsua txeu kes sakrifisiu ki es faze. Pur izénplu, na anu di 1970 tinha 54.789 publikador na Filipinas. Má, na anu di 1989, es éra 102.487 publikador. Kel-li é kuazi dobru di kel nunbru di publikador na anu di 1970. Na 2023, nunbru di publikadoris na Filipinas txiga na 253.876.

 Sikrê kes Tistimunha di Jeová éra póbri es staba filís i okupadu na ses sirvisu pa Jeová. Un irmon ki txoma Antóniu fla: “Ser póbri ka inpidi-nu di ama Jeová.” Irman Fernanda fla: “Kantu ami ku nha maridu staba ku falta di dinheru, nu bira más amigu di Jeová i nu xinti alegria di leba un vida sinplis. Pamodi kel-li nos fidjus tanbê prende kunfia na Jeová.”

 Lusília ki ta vive na ilha di Samar fla: “Ser póbri ka é un prubléma óras ki nu ta sirbi Jeová. Óras ki nu ta poi Deus na primeru lugar na nos vida, nu pode xinti kontenti i nu ta kontinua ku un atitudi puzitivu. Alén di kel-li, N xinti alegria di odja nhas studanti di Bíblia ta kumesa ta sirbi Jeová i dipôs sirbi di pioneru djuntu ku mi.”

 Pamodi nu sabe ma na futuru nu ta ben pasa pa ténpus difísil é bon nu lenbra kuzê ki un ansion, ki txoma Rodolfu, skrebe: “N xinti mô di Jeová na nha vida kantu N vive kes ténpu difísil na dékada di 1970 i 1980. Enbóra N tinha poku dinheru N ka ta xintiba póbri. Jeová kuida dretu di mi. N ten kel midjór vida gósi i N tene gana di ten kel ‘vida di verdadi’ na Paraízu ki sta pa ben.”—1 Timótiu 6:19.