Di 1948 ti 1994, sistéma pulítiku na Áfrika di Sul staba divididu pamodi pesoas ki ka éra di mésmu rasa ta viveba siparadu. a Duránti kel ténpu, txeu algen ta trataba pesoas ki éra di otu rasa ku injustisa. Kallie fla ma na kel ténpu es ta txomaba el di “algen di kor” (mistisu). El fla: “Kes algen ki ka éra branku tanbê ta diskriminaba kunpanheru.”

 Tistimunhas di Jeová na Áfrika di Sul é di txeu rasa. Kuzê ki es faze duránti kel ténpu ki es ta siparaba pesoas pamodi rasa? I kuzê ki ses stória ta inxina-nu?

 Na Áfrika di Sul, alguns algen ki éra kóntra kel lei di siparason di rasa ta organizaba manifestason. Txeu di kes ki ta papiaba kóntra govérnu podu na kadia i alguns matadu. Pur isu, kes ki éra kóntra govérnu bira más violéntu inda. Má, Tistimunhas di Jeová obi ku kel lei i es ka mete na manifestason ô tenta muda kel govérnu. Di kel manera li, es imita kes kriston na ténpu di apóstlus ki kontinua “ta obi ku autoridadi.” — Romanus 13:1, 2.

 Txeu bês, Tistimunhas di Jeová fazedu preson pa mete na asuntus di mundu i pa es toma algun ladu. Má toma algun ladu pode poba es ta apoia govérnu na violénsia ô ti ta bai géra kóntra ses irmons na fé. Pur izénplu, Thembsie fla: “Duránti kes revólta ki kontise na 1976, txeu alunu di liseu fazedu preson pa djunta ku es i faze violénsia. Kes alunu ki djunta na kel revólta ta baba tudu pórta pa djobe otus alunu pa djunta ku es. Si bu negaba, es podia kemaba bu kaza ô sotaba bo ti móre.” Un xéfi di partidu di opozison fla un Tistimunha di Jeová ki txoma Theophilus: “Óras ki nu ganha géra kóntra kes ómi branku, nu ta ben mata nhos pamodi nhos ka ta briga pa nhos país.”

 Sikrê ku difikuldadi pamodi siparason di rasa, Tistimunhas di Jeová na Áfrika di Sul kontinua ta sisti runion djuntu pa adora Deus. (Ebreus 10:24, 25) Alguns kongregason ka ta podia fazeba un Salon di Reinu pamodi siparason di rasa. Pur isu, txeu algen éra póbri i es ka ta podia midjoraba ses situason. b Enver fla: “Duránti txeu anu nu ta rendaba kaza ki ka tinha mutu kondison. Nton, nha pai oferese nos kaza pa faze runion. Dôs bês pa simana, nos kaza ta biraba na un Salon di Reinu. Alvês ta tinha más di 100 algen ta sisti runion i nos kaza ta fikaba xeiu. Dipôs di runion, txeu bês nu ta daba tudu es lanxi.”

 Kes irmon atxa bons manera di vense kes dizafiu ki siparason di rasa traze. Pur izénplu na sidadi di Limpopo, un irmon branku ki konvidadu pa faze diskursu na un asenbleia na zóna di algen prétu ka dexadu entra. Nton kel irmon pâpia ku un ómi branku ki éra dónu di un txon ki ta fikaba na ladu di kel zóna di algen prétu, i es dôs faze un akordu. Kes algen ki sisti kel asenbleia fika na ladu di kel txon di kel ómi branku i kel irmon ki faze diskursu fika na kel txon ki éra di kel ómi branku.

 Na kel ténpu, kada algen ta viveba siparadu di akordu ku ses rasa. Pur isu, sénpri ta tinha pesoas di mésmu rasa na kes tiritóriu di kongregason. Kel situason ta poba Tistimunhas di Jeová ta ser ikilibradu na manera ki es ta organizaba publikadoris pa pregason. Pur izénplu, tinha alguns dizafiu pa trabadja na tiritóriu ki ka tinha ninhun kongregason. Krish, ki éra un di kes algen ki es ta trataba sima “indianu”, fla: “Txeu bês ka tinha lugar pa kes algen ki ka éra branku pasaba noti. Nton, nu podia durmiba déntu nos karu ô baxu di arvi. Di palmanhan, nu ta lababa na kes bonba di gazulina ki tinha kaza-banhu. Alvês, kes kaza-banhu tinha un plaka ta fla: ‘Sô pa algen branku.’ Sikrê ku kel situason li, irmons apoia pregason i es fika kontenti di prega pa kes algen ki mostra interesi na kes zóna ki ta fikaba fóra di sidadi.”

 Sikrê ku kes difikuldadi li, povu di Jeová kontinua ta omenta. Kantu ki kel siparason di rasa bira lei na 1948, Áfrika di Sul tinha 4.831 publikador. Kantu ki kel lei tirmina na 1994, la tinha 58.729 publikador. Kel nunbru li kontinua ta omenta. Na 2021, Áfrika di Sul txiga na 100.112 publikador.

 Duránti kel ténpu, Tistimunhas di Jeová na Áfrika di Sul vive na un país ki éra konxedu pa siparason di rasa. Na kel anbienti la, es sforsa txeu pa traze amor i union entri pesoas di tudu rasa. Pa faze kel-li, es inxina-s i es sigi kes prinsípiu di Bíblia. (Atus 10:34, 35) Enbóra es staba serkadu pa ódiu, es staba unidu pa amor. — Juan 13:34, 35.

 Na anu di 1993, Tistimunhas di Jeová faze un kongrésu na Áfrika di Sul ku algen di rasa diferenti. Na aeroportu, un xéfi di pulítika odja modi ki Tistimunhas di Jeová di Áfrika di Sul ta kunprimentaba i ta brasaba kes irmon ki binha di otus país pa sisti kongrésu. El fla: “Si nos éra unidu sima nhos, dja nu rezolveba nos prubléma dja tinha txeu ténpu.”