Sima nu sta ta odja duránti géra na Ukránia, xéfis di kes relijion ki ta fla ma es sta sigi Jizus sta ta insentiva algen pa partisipa na géra. Odja modi ki kes xéfi di relijion sta ta apoia kes dôs ladu:

•   “Nu ta da ónra i nu ten txeu gratidon pa tudu kes nos trópa ki difende ses téra, Ukránia, di kes algen ki ataka-l. Nu ta djuda nhos sénpri, nos korason i nos orason sinseru ta sta sénpri ku nhos.” — Kuzê ki Metropolitano Epifánio I, di Kiev, fla ki sai na The Jerusalem Post, 16 di marsu di 2022.

•   “Xéfi di Igreja Ortodoksu di Rúsia faze un prugrama di relijion spesial pa kes trópa di Rúsia na dumingu. El insentiva-s pa es difende ses país ki é ‘un kuza ki sô rusus pode faze’ timenti Moskovu ta kontinua ta ataka Ukránia.” — Reuters, 3 di abril di 2022.

 Kes algen ki ta sigi Jizus debe partisipa na géra? Kuzê ki Bíblia ta fla?

 Bíblia ta mostra ma kes algen ki ta sigi Jizus Kristu di verdadi ka ta partisipa na géra.

•   ‘Torna poi spada na se lugar, pamodi tudu kes ki uza spada, é spada ki ta mata-s.’ — Mateus 26:52.

   Si un algen ta aprova géra ô el ta partisipa na géra el sta ta obi ku kes palavra di Jizus li?

•   ‘N ta da nhos un mandamentu novu: Pa nhos ama kunpanheru; sima N ama nhos, tanbê nhos ama kunpanheru. Através di kel-li tudu algen ta fika ta sabe ma nhos é nha disiplus: si nhos ten amor pa kunpanheru.’ — João 13:34, 35.

   Si un algen ta apoia géra el sta ta mostra kel tipu di amor ki Jizus fla ma ta dexa klaru ken ki é se disiplus?

 Pa sabe más lé artigu: “A guerra é compatível com o cristianismo?”

 Nu debe spéra ma kes algen ki ta fla ma es ta sigi Jizus ka ta partisipa na kes géra ki ten gósi? Sin. Bíblia fla ma na nos ténpu, ki el ta txoma di ‘ténpu di fin’, algen di tudu nasons ka ta ‘prendeba géra más’, sima Jizus inxina. — Isaías 2:2, 4, nóta di rodapé.

•   Pa sabe más lé kes artigu na Sentinéla ku téma: “Como é que Deus encara a guerra?”

 Ka ta dura Jeová, a ki é ‘kel Deus di pas’, ta ben uza se govérnu na séu pa salva kes algen ki sta ta sufri ‘abuzu i violénsia’. — Filipenses 4:9; Salmo 72:14.

•   Pa odja modi ki kel-li ta ben kontise, odja vídiu Kuzê ki é Reinu di Deus?