Na dia 9 di otubru di 2024, organizason Fundo Mundial para a Natureza faze un rilatóriu ki ta dexa algen preokupadu. Kel rilatóriu ta pâpia sobri modi ki kuzas ki nu ta faze sta ta afeta vida di kes animal brabu. El ta mostra ma “na kes últimu 50 anu ki pasa (1970-2020), nunbru di animal brabu diminui 73 pursentu.” Kel rilatóriu aviza: “Nu pode fla ku serteza ma kes kuza ki ta ben kontise na kes prósimu 5 anu ta ben mostra kal ki ta ser nos futuru na téra.”

 Txeu algen ta fika dimiradu ku rilatórius sima kel-li. Nu ta ama nos planéta ki é bunitu i nu ta ôdia odja animal brabu ta sufri. Nu ta xinti si pamodi Deus faze-nu pa nu kuida di animal. — Jénezis 1:27, 28; Provérbios 12:10.

 Talvês bu ta pergunta, ‘Nu ta konsigi proteje kes animal brabu? Kuzê ki Bíblia ta fla?’

 Sikrê nu ta faze txeu sforsu, futuru di vida di kes animal brabu, ka ta dipende di nos, má di Deus. Bíblia ta fla na Apokalipse 11:18, ma Deus ta ben “kaba ku kes ki sta ta kaba ku téra.” Kel versiklu li ta inxina-nu dôs kuza:

1.  1. Deus ta ben inpidi pesoas di distrui ô kaba ku téra.

2.  2. Ka ta dura Deus ta ben aji. Modi ki nu sabe di kel-li? Pamodi oji risku di pesoas distrui animal é mutu más txeu di ki antis.

 Kuzê ki Deus ta ben faze pa ben rezolve kel prubléma li? El ta ben uza se govérnu na séu, ô Reinu, pa ben governa téra interu. (Mateus 6:10) Kel govérnu li ta ben inxina i trena kes algen obidienti pa es pode kuida i proteje di kes animal na téra. — Isaías 11:9.