“Ómis sta ta faze txeu kuza ki ka ta dura ta ben poi ta ten un dizastri na klima. Kes sidadi prinsipal ta ben fika baxu di agu. Ta ben ten txeu ónda di kalor. Ta ben kontise tenporal ki ta da algen medu. Txeu lugar ku falta di agu. Milhons di tipu di plantas ku animal ta ben dexa di izisti. Kel-li é ka ninhun filmi ô un izajeru. É kel-li ki siênsia ta fla ma ta ben kontise si nu kontinua ta uza inerjia sima nu sta uza gósi.” — Diskursu di António Guterres, sekretáriu jeral di Nasons Unidu, sobri rilatóriu ki Painel Intergovernamental de Mudanças Climáticas faze na dia 4 di abril di 2022.

 “Sientistas sta ta aviza ma pamodi mudansas di klima, kuazi tudu kes 423 parki nasional (na Mérka), ta ben fika distruídu na kes anu ki ta ben, pamodi es ka ta aguenta tenperaturas altu. Kes kuza mariadu ki pode ben kontise é sima kes dizastri ki Bíblia ta pâpia di el: lumi ku txeia, jélu ta direte, mar ta subi i óndas di kalor.” — “Kes txeia na Yellowstone é un sinal di prublémas ki sta pa ben”, New York Times di 15 di junhu di 2022.

 Prublémas di klima i di anbienti ta ben kaba? Si es ta ben kaba, kenha ki ta ben rezolve-s? Odja kuzê ki Bíblia ta fla.

 Bíblia ta fla ma Deus ta ben ‘distrui kes ki sta distrui Téra.’ (Apocalipse11:18) Kel versíklu di Bíblia li ta inxina-nu três kuza:

1.  1. Kuzas ki ómis ta faze ta ben prujudika Téra txeu.

2.  2. Distruison di Téra ta ben para.

3.  3. Envês di ómis, é Deus ki ta ben rezolve prublémas di klima i anbienti na nos planéta.

 Bíblia ta fla ma ‘Téra ta fika pa tudu ténpu.’ (Eclesiastes 1:4) Sénpri ta ben ten algen ta mora na Téra.

•   ‘Téra ta ben ser di kes algen justu i es ta ben vive na el pa tudu ténpu.’ — Salmo 37:29.

 Tudu prubléma di nos planéta ta ser rezolvedu.

•   ‘Dizértu i téra séku ta ben fika kontenti, kes lugar planu na dizértu ta ben grita ku txeu alegria i es ta ben da flor sima asafron.’ — Isaías 35:1.