Korupson di kes algen ki ta trabadja na govérnu é un prubléma ki izisti na mundu interu, i kel-li ta traze txeu rezultadu mariadu. a Pur izénplu, duránti COVID-19 alguns algen akuza funsionárius di txeu país i es fla ma es bira riku pamodi es furta dinheru ki éra pa es uzaba pa djuda pesoas lida ku koronavírus. Kel korupson li ka dexa txeu algen atxa kel ajuda ki es mesteba pa kuida di ses saúdi i pamodi kel-li txeu algen kaba pa sufri i móre.

 Korupson na govérnu ta afeta txeu algen. David Cameron, ki éra primeru ministru di Reinu Unidu, fla: “Korupson é sima un teia di aranha grandi i konplikadu i tudu país sta prézu na el.”

 Má nu pode ten sertéza ma já já tudu korupson ta ben kaba. Pamodi? Odja kuzê ki Bíblia ta fla ma Deus ta ben faze.

 Na Bíblia Deus ta fla: ‘Ami, Jeová, N ta ama justisa; N ta ôdia furtu i injustisa.’ b (Isaías 61:8) Deus ta odja óras ki pesoas ta sufri pamodi korupson ki otus algen ta faze. (Provérbios 14:31) El promete: ‘Pamodi frónta di kes ki sta sufri, N ta ben labanta i N ta ben aji.’ — Salmo 12:5.

 Kuzê ki Deus ta ben faze? Envês di ben muda kes govérnu di ómi, el ta ben troka kes govérnu pa se própi govérnu ki sta na Séu, ki txoma ‘Reinu di Deus’. (Marcos 1:14, 15; Mateus 6:10) Bíblia ta fla: ‘Deus di Séu ta ben traze un reinu i el ta ben disfaze i el ta ben kaba ku tudu kes reinu, i sô el ta ben fika pa tudu ténpu.’ (Daniel 2:44) É si ki Deus ta ben kaba ku korupson ki nu sta odja oji.

 Modi ki nu sabe ma Reinu di Deus ka ta ben bira un Reinu koruptu? Nu ben odja alguns kuza.

1.  1. Puder. Kel puder ki Reinu ta resebe ta ben di Deus Tudu-Poderozu. — Apocalipse 11:15.

    Pamodi ki kel-li é inportanti: Pa govérnus di ómi pode funsiona, es meste di dinheru di ses sidadon. I txeu bês es ta pruveta di kel dinheru li pa faze subornu, pa furta i pa poi otus algen ta faze kel ki es krê. Má Reinu ten apoiu di kel Deus Tudu-Poderozu, pur isu sénpri el ta pode da se sidadons kel ki es meste. — Salmo 145:16.

2.  2. Un governanti. Deus skodje Jizus Kristu pa ser Governanti di se Reinu. — Daniel 7:13, 14.

    Pamodi ki kel-li é inportanti: Ti kes governanti más dretu pode ser influensiadu pa faze kuzas mariadu. (Eclesiastes 7:20) Má Jizus dja mostra ma el ka ta seta subornu. (Mateus 4:8-11) Alén di kel-li, el é sénpri motivadu pa kel amor ki el ten pa se sidadons i el krê pa es sta dretu. — Salmo 72:12-14.

3.  3. Leis. Leis di govérnu di Deus é perfeitu, es ta traze alegria pa kes ki kontinua ta obi ku el. — Salmo 19:7, 8.

    Pamodi ki kel-li é inportanti: Leis di ómi txeu bês é konplikadu i difísil di aplika, i kel-la ta traze más korupson. Má, leis di Deus é bon pa nos i es ta djuda-nu. (Isaías 48:17, 18) Alén di kel-li, kes lei ka ta nvolve sô kuzas ki nu ta faze, má tanbê pamodi ki nu ta faze-s. (Mateus 22:37, 39) É klaru ki Deus pode lé korason, i el ta garanti ma se Reinu ta aplika leis ku bondadi. — Jeremias 17:10.

 Nu ta konvida-u pa bu prende más sobri kel promésa di Bíblia di un govérnu ki ka ta ben faze korupson.

•   Lé artigu “O Reino de Deus — um governo sem corrupção” i odja três motivu ki ta da-nu sertéza ma na Reinu di Deus nunka ka ta ba ten korupson.

•   Odja vídiu Kuzê ki é Reinu di Deus? pa bu prende más sobri Reinu di Deus i kuzê ki el ta ben faze pa nos.

•   Sprimenta studa Bíblia ku ajuda di un algen pa bu sabe modi ki es promésa di Bíblia pode djuda-u.