NU MANTE SIENTI!

Géra i mudansas di klima sta poi falta di kumida na mundu interu ta omenta — Kuzê ki Bíblia ta fla?

TOKA

Géra na Ukránia i tanbê kes mudansa di klima sta kontinua ta kaba ku kes lugar ki ta da kumida pa mundu interu. Kel-li sta kontise prinsipalmenti na kes país ki sta ta dizenvolve, undi txeu algen ta luta pa ten kumida ki ta txiga-s.

“Géra, mudansas di klima, présu di inerjia i otus kuza sta ta prujudika produson di kumida i tanbê sta ta fika difísil di atxa kumida.” — António Guterres, sekretáriu jeral di ONU, 17 di julhu di 2023.
“Spesialistas ta fla ma dja ki Rúsia sai di kel akordu di manda serial pa otus país, kel krizi na mundu interu ki ten aver ku suguransa di kumida ta ben piora i el ta poi présu di kumida ta fika kada bês más altu na kes país ki algen ta ganha poku, prinsipalmenti na Áfrika di Nórti i na Orienti Médiu.” — Atalayar.com, 23 di julhu di 2023.

Odja kuzê ki Bíblia ta fla sobri falta di kumida i sobri futuru.

Bíblia dja flaba ma ta tinha falta di kumida

Jizus fla: “Nason ta ben labanta kóntra nason i reinu kóntra reinu, ta ben ten falta di kumida”. — Mateus 24:7.
Livru di Apokalipse ta pâpia di kuatu ómi montadu na kabalu. Un di es ta reprizenta géra. Ten un otu ki ta sigi-l i el ta reprizenta fómi. Kel-li ta kontiseba na un ténpu ki kumida ta sérba poku i ta bendedu karu dimás. “N odja un kabalu prétu. Kel ki staba montadu na el tinha un balansa na mô. N obi sima un vós. . . ta fla: ‘Un kilu di trigu pa un dináriu i três kilu di sevada pa un dináriu.’” — Apokalipse 6:5, 6.

Kes profesia di Bíblia li sobri falta di kumida sta ta kunpri gósi, ki é un ténpu ki Bíblia ta txoma di “ténpu di fin”. (2 Timótiu 3:1) Pa sabe más sobri “ténpu di fin” i korida di kes kuatu kabalu di Apokalipse, odja vídiu Mundu muda désdi 1914 i lé artigu “Quem são os cavaleiros do Apocalipse?”.

Modi ki bíblia pode djuda-u

Bíblia ten bons konsedju ki pode djuda-nu lida ku situasons difísil, sima présu di kumida ki sta omenta i ti mésmu ku falta di kumida. Odja alguns izénplu na artigu “Modi ki nu pode vive ku ménus dinheru?”.
Tanbê Bíblia ta da-nu speransa ma kuzas ta ben midjora. El ta promete un ténpu undi ki ‘ta ben ten kumida avontádi na téra’ i tudu algen ta ben ten kumida avontádi pa kume. (Salmo 72:16) Pa sabe más sobri kel speransa li pa futuru i pamodi ki nu pode kunfia na kel-li, lé artigu “Bu pode spéra un futuru midjór”.